Bordi Drejtues i Organizatës Evropiane të Institucioneve Supreme të Auditimit (EUROSAI), në takimin e 52-të, të mbajtur sot, ka miratuar me shumicë votash anëtarësimin me të drejta të plota të Zyrës Kombëtare të Auditimit në këtë Organizatë. Në një deklarim publik, Auditori i Përgjithshëm i Kosovës, Besnik Osmani, ka falënderuar homologët e tij nga Institucionet Supreme të Auditimit anëtare të Bordit Drejtues, për mbështetjen dhe besimin e dhënë si dhe të gjitha institucionet relevante vendore për përkrahjen në këtë proces anëtarësimi. “Zyra Kombëtare e Auditimit është e përkushtuar të jap kontributin e vet në këtë organizatë dhe të marrë  përsipër të gjitha obligimet”, tha Osmani. Ky anëtarësim shënon edhe një hap të rëndësishëm në historinë e re të Zyrës Kombëtare të Auditimit si dhe përafrimit në procesin e integrimit në Bashkimin Evropian. ZKA në strukturat e EUROSAI-t do të promovojë përveç tjerash qeverisjen e mirë, rritjen e transparencës dhe llogaridhënies si dhe ngritjen e kompetencës profesionale në fushën e auditimit publik. EUROSAI është një nga Grupet Rajonale të Organizatës Ndërkombëtare të Institucioneve Supreme të Auditimit (INTOSAI), e cila u krijua në vitin 1990 dhe atëherë kishte 30 anëtarë, Institucione Supreme të Auditimit të 29 shteteve Evropiane dhe Gjykata Evropiane e Auditorëve. Ndër vite numri i anëtarëve të EUROSAI-t  ka arritur në pesëdhjetë ndërsa Zyra Kombëtare e Auditimit të Republikës së Kosovës është anëtari më i ri, i 51-ti me radhë. Zyra Kombëtare e Auditimit, kishte aplikuar për anëtarësim në EUROSAI me 24 shkurt 2020, ndërsa shqyrtimi i vendimit për anëtarësim ishte vendosur në agjendën e takimit të Bordit Drejtues të EUROSAI-t, i planifikuar të mbahej në qershor 2020. Për shkak të pandemisë me COVID -19 ky takim nuk u mbajt siç ishte planifikuar, ndërsa u realizua online sot me 12 nëntor 2020. Për të mësuar më shumë lidhur me Organizatën Evropiane të Institucioneve Supreme të Auditimit, vizitoni uebfaqen e tyre në: https://www.eurosai.org/en/about-us/about-eurosai/  

Kuvendi i Republikës së Kosovës me 39 vota për dhe 24 kundër sot ka miratuar Raportin Vjetor të Performancës së Zyrës Kombëtare të Auditimit (ZKA) për vitin 2019. Raporti Vjetor i Performancës së ZKA-së përfshinë shënime të rëndësishme rreth performancës së institucionit të Auditorit të Përgjithshëm në përmbushjen e obligimeve të tij kushtetuese e ligjore, në pajtim me Standardet Ndërkombëtare të Institucioneve Supreme të Auditimit (SNISA). Të gjitha aktivitetet e Zyrës gjatë vitit 2019 janë realizuar në tërësi siç edhe ishin planifikuar me Planin Vjetor të Punës për sezonin auditues 2018 – 2019. Bazuar në rezultatet e punës së Zyrës Kombëtare e Auditimit të përfshira në raport, gjatë vitit 2019 janë përfunduar dhe publikuar 128 raporte të auditimit. Prej tyre, 115 raporte janë të auditimit të rregullsisë dhe 13 raporte të auditimit të performancës. Numri i auditimeve të rregullsisë është rritur për 4 në raport me sezonin e kaluar, kurse auditimet e performancës kanë pasur rritje nga viti 2016 dhe përbëjnë rreth 11 % të auditimeve të ZKA-së. Auditimi i Ndërmarrjeve Publike (NP) ka filluar në sezonin auditues 2016/17 me vetëm 4 sosh dhe në sezonin 2019/2020 ka arritur në 14 NP, kurse krahasuar me sezonin e kaluar është rritur për 3 ndërmarrje më shumë. Ngjarja kryesore, e cila e ka karakterizuar performancën e Zyrës Kombëtare të Auditimit gjatë vitit 2019 është anëtarësimi me të drejta të plota në Organizatën Ndërkombëtare të Institucioneve Supreme të Auditimit (INTOSAI). Ky anëtarësim përbën arritjen më të madhe në historinë e auditimit të jashtëm, të sektorit publik të Republikës së Kosovës. Gjithashtu në seancën e sotme Kuvendi i Kosovës me 67 vota ka miratuar rekomandimet e Komisionit për Mbikëqyrjen e Financave Publike lidhur me Raportin Vjetor të Auditimit për vitin 2019.