Përfaqësuesit e Zyrës Kombëtare të Auditimit të Kosovës, Ariana Gjonbalaj, Fatlinda Ramosaj dhe Samir Zymberi ndoqën trajnimin e organizuar nga Zyra Kombëtare e Auditimit të Suedisë, mbi fuqizimin e fasilitimit nga 2-5 tetor në Stokholm të Suedisë.

Auditorët nga Institucionet Supreme të Auditimit të Suedisë dhe Kosovës diskutuan sfidat që mund të paraqiten si dhe praktikat e mira për tejkalimin e tyre me qëllimin e ngritjen së njohurive dhe ndarjes së përvojave të fasilitimit si mjet fuqizimi.

Pjesëmarrësit vlerësuan se procesi i fasilitimit luan rol kyç brenda Institucioneve Supreme të Auditimit pasi që rritë efektivitetin e procesit të auditimit dhe kontribuon në suksesin e përgjithshëm të institucionit, në komunikim dhe bashkëpunim më të qartë dhe më të lehtë në mes ekipeve të auditimit, institucioneve nën auditim dhe palëve të tjera të interesit.

Gjatë qëndrimit në Stokholm, auditorët nga Departamenti i Performancës  në ZKA u pritën në takime nga kolegët e Zyrës Kombëtare të Auditimit të Suedisë me ç’rast shkëmbyen njohuritë dhe përvojat në organizimin e kontrollit të cilësisë dhe procesin e auditimit të performancës.

Me mbështetjen e UN Women, me 16 dhe 17 tetor në Prishtinë u mbajt takimi i radhës për auditimin paralel “Barazia gjinore dhe fuqizimi i grave nga zonat rurale përmes përfshirjes së tyre në tregun e punës” ndërmjet Zyrës Kombëtare të Auditimit të Kosovës, Kontrollit të Lartë të Shtetit të Shqipërisë dhe Entit Shtetëror të Revizionit të Maqedonisë së Veriut.

Takim pati për qëllim prezantimin dhe diskutimin e gjetjeve preliminare nga secili Institucion Suprem i Auditimit dhe dakordimin për bashkëpunim e mëtutjeshëm deri në finalizimin e raportit të auditimit.

Në Kosovë më 16 tetor u shënua Dita Ndërkombëtare e Gruas Rurale dhe Dita Ndërkombëtare e Ushqimit ku u theksua roli i grave nga zonat rurale në shoqërinë tonë. Auditorët shfrytëzuan këtë mundësi për të vizituar panairin e ushqimit të grave nga zonat rurale të mbështetur nga UN Women.