Në Shkup nën organizimin e Institucionit Suprem të Auditimit të Maqedonisë është duke u mbajtur Takimi i 14-të vjetor i Grupit Punues të EUROSAI. Paralelisht po mbahet edhe seminari tre ditor për auditimin e mjedisit.

Auditori i Përgjithshëm i Kosovës, Besnik Osmani, po merr pjesë në këtë ngjarje si pjesë e panelit diskutues së bashku me Presidentët e Institucioneve Supreme të Auditimit të vendeve të Rajonit dhe më gjerë.

Temë e diskutimuit është kontrolli i zhvillimit të qëndrueshëm që përfshin aspektin ekonomik, social dhe mjedisor, Presidentët e Institucioneve Supreme të Auditimit dhe ekspertë ndërkombëtarë po prezantojnë konceptin e tyre të zhvillimit të qëndrueshëm dhe rolin e Institucioneve Supreme të Auditimit në këtë fushë.

Z. Osmani, ka shpjeguar qasjen, mundësitë dhe sfidat në auditimet nga fusha e zhvillimit të qëndrueshëm dhe mjedisit në Republikën e Kosovës dhe krijimin e mekanizmave të kontrollit për arritjen e qëllimeve të përcaktuara me strategjitë qeverisëse dhe planet e veprimit.

Gjatë qëndrimit në Shkup, z. Osmani ka takuar dhe biseduar për bashkëpunimin reciprok Auditorët e Përgjithshëm tëISA-ve të Sllovenisë, Estonisë, Maqedonisë, Bosnje e Hercegovinës dhe shumë ekspertë të fushës, me të cilët ka shkëmbyer përvojat e auditimit me qëllim të respektimit të standardeve ndërkombëtare në fushën e auditimit dhe kontabilitetit.

Takimi i 14-të Vjetor i Grupit Punues të EUROSAI për Auditime të Mjedisit, do t'i zhvillojë punimet nga data 27 deri me 29 shtator 2016, me moton "Le të auditojmë gjelbër", ku në fokus të diskutimit do të jenë instrumentet e tregut të bazuar për mbrojtjen e mjedisit dhe Standardet Ndërkombëtare të auditimit të mjedisit.

Nga Zyra Kombëtare e Auditimit në këtë takim do të marrin pjesë Vlora Spanca, Ndihmës Auditore e Përgjithshme dhe Labinot Sadiku, Auditor i Performancës.

Auditori i Përgjithshëm i Kosovës, z. Besnik Osmani zhvilloi sot më datë 17 tetor 2016 një vizitë pune në Kontrollin e Lartë të Shtetit.

Në takimin me Kryetarin e KLSH, z. Bujar Leskaj, z. Osmani, duke vlerësuar partneritetin e ngushtë të dy institucioneve supreme të auditimit të Kosovës dhe Shqipërisë, të nisur me nënshkrimin e marrëveshjes së bashkëpunimit në shkurt të vitit 2012, bëri një prezantim të punës dhe rezultateve të institucionit të tij pas emërimit të tij si Auditor i Përgjithshëm në mars 2016, si dhe të riorganizimit dhe ndryshimeve thelbësore të fundit të Zyrës Kombëtare të Auditimit (ZKA) të Kosovës, duke fituar një qasje më efektive në auditim, e orientuar nga auditime më cilësore dhe më pranë qytetarit kosovar, si dhe me informacione më të drejtpërdrejta për Kuvendin e Kosovës.

Z. Leskaj prezantoi punën e institucionit të KLSH gjatë vitit 2016, rezultatet dhe auditimet më të rëndësishme, si dhe kontributin e institucionit për përmirësimin e mirëqeverisjes publike, nëpërmjet thellimit te luftës kundër korrupsionit.

Më tej, të dy drejtuesit e institucioneve supreme të auditimit të Kosovës dhe Shqipërisë diskutuan për planin e ardhshëm të aktiviteteve, si në kuadrin e bashkëpunimit dypalësh dhe në atë më të gjerë të bashkëpunimit rajonal dhe mbarë evropian mes institucioneve anëtare të organizatës EUROSAI. Aktivitetet do të jenë të larmishme, nga shkëmbimi i përvojave në nivel praktik dhe teknik për zbatimin e plotë të standardeve ndërkombëtare të auditimit publik dhe praktikave të mira evropiane, nëpërmjet seminareve dhe konferencave vjetore individuale ose të përbashkëta, e deri tek auditime të përbashkëta për tema me rëndësi si për ekonominë dhe administrimin publik të Kosovës, ashtu dhe të Shqipërisë. Për këtë qëllim, do të rinovohet marrëveshja e lidhur mes dy institucioneve në vitin 2012, duke zgjeruar gamën e aktiviteteve të përbashkëta dhe duke përfshirë Planin e Veprimit KLSH-ZKA të vitit 2017.

Z. Osmani u takua dhe me Prof. Dr. Lindita Lati, Kryetaren e Autoritetit të Konkurrencës së Shqipërisë. Zj. Lati e njohu Kryeaudituesin e Kosovës me eksperiencën e një partneriteti të suksesshëm me KLSH, të nisur që në vitin 2012, me shkëmbimin e informacioneve dhe të rasteve kur aktiviteti i strukturave publike sillte deformimin e konkurrencës në treg.

Auditori i Përgjithshëm i Kosovës u takua në mesditë me Inspektorin e Përgjithshëm të Inspektoratit të Lartë të Deklarimit dhe Kontrollit të Pasurive dhe të Konfliktit të Interesave z. Shkëlqim Ganaj. Z. Ganaj i paraqiti z. Osmani rezultatet e bashkëpunimit me KLSH dhe praktikën efiçiente të deritanishme të shkëmbimit të indicieve mes të dyja institucioneve të kontrollit.

Në mjediset e KLSH, z. Besnik Osmani u takua dhe me deputetin e Kuvendit z. Florjon Mima, një nga themeluesit e sistemit modern fiskal të Shqipërisë dhe personalitet i mendimit ekonomik shqiptar. Z. Osmani dhe z. Mima kanë dhënë kontribut të përbashkët në ndërtimin e sistemit fiskal të Kosovës. Z. Mima e njohu Auditorin e Përgjithshëm të Kosovës me raportet e frytshme të punës që Komisioni për Ekonominë dhe Financat ku ai bën pjesë, ka me institucionin e Kontrollit të Lartë të Shtetit.

Z. Osmani nga ana e tij solli praktikën shumë pozitive dhe efektive të bashkëpunimit mes Zyrës Kombëtare të Auditimit të Kosovës dhe Komisionit për Mbikëqyrjen e Financave Publike të Kuvendit të Kosovës.

Në orën 16.00, Auditori i Përgjithshëm i Kosovës takoi Presidentin e Republikës, SH.T.Z. Bujar Nishani. Presidenti  vlerësoi kontributin e Zyrës Kombëtare të Auditimit të Kosovës në mirëqeverisjen publike të shtetit më të ri të Evropës.