Bordi Drejtues i INTOSAI-t, në nëntor të vitit 2023 miratoi standardin ISSAI 140 për menaxhimin e cilësisë i cili do të aplikohet për Institucionet Supreme të Auditimit (ISA) nga janari i vitit 2025. Ky standard ofron qasje gjithëpërfshirëse dhe sistematike për menaxhimin e cilësisë duke u bazuar në rrezik dhe ofron bazë të fortë për të siguruar cilësinë e auditimit në Institucionet Supreme të Auditimit.

Me qëllim të adresimit të kërkesave të standardit të ri dhe përgatitjeve me kohë për aplikimin e tij, Auditorja e Përgjithshme, Vlora Spanca ka ndërmarrë një sërë hapash. Po ashtu ky proces është mbështetur edhe nga ekspertët e Zyrës Kombëtare të Auditimit të Suedisë.

Në kuadër të projektit për bashkëpunim në mes të Zyrës Kombëtare të Auditimit të Suedisë dhe Zyrës Kombëtare të Auditimit të Kosovës, përkatësisht komponentës – Sigurimi i Cilësisë dhe Kontrolli i Cilësisë i riemërtuar Menaxhimi i Cilësisë, në datat 10-12 shtator 2024 në Prishtinë u  mbajt punëtoria e cila pati për qëllim përcaktimin e objektivave për menaxhimin e cilësisë, identifikimin dhe vlerësimin e rreziqeve, identifikimin e boshllëqeve të mundshme si dhe planifikimin e hapave të ardhshëm në mënyrë që deri në fund të vitit të sigurohet një bazë e qëndrueshme e mekanizmit të menaxhimit të cilësisë në përputhje me kërkesat e reja të ISSAI 140.

Mekanizmi i menaxhimit i cilësisë ISSAI 140 ka rol kyç në promovimin e auditimit të jashtëm duke siguruar një qasje të bazuar në rrezik dhe mundëson që ISA-t të ndjekin qasje strategjike për të arritur standarde edhe më të larta të cilësisë dhe efektivitetit. 

Në kuadër të zbatimit të Planit të Trajnimeve për muajin shtator, auditorët e Zyrës Kombëtare të Auditimit (ZKA) ndoqën trajnimin katër ditor për prokurim publik, përkatësisht kontratat e negociuara dhe kontratat kornizë.

Trajnimi i organizuar nga ekspertë të Komisionit Rregullativ të Prokurimit Publik (KRPP) pati për qëllim avancimin e aftësive të auditorëve për të vlerësuar dhe kontrolluar më mirë praktikat e prokurimit duke rritur efikasitetin dhe përgjegjshmërinë në menaxhimin e fondeve publike.

Në kuadër të modulit për kontratat me negocim auditorët u trajnuan për të monitoruar se si realizohen negociatat në përputhje me ligjin si dhe për të identifikuar dhe adresuar rreziqet që mund të dalin gjatë këtij procesi. Ndërsa për modulin e kontratave kornizë auditorët u trajnuan për të mbikëqyr zbatimin e këtyre kontratave si dhe të vlerësojnë nëse këto kontrata kontribuojnë në menaxhimin e duhur të financave publike.

Trajnimi u mbajt në kuadër të marrëveshjes së bashkëpunimit në mes të ZKA-së dhe KRPP-së me mbështetjen e Aktivitetit të USAID-it për Integritetin e Komunave në Kosovë.