Auditorët e Zyrës Kombëtare të Auditimit (ZKA) morën pjesë në dy aktivitete të rëndësishme mbi sigurinë kibernetike dhe inteligjencën artificiale të mbajtur në Oslo të  Norvegjisë. Aktivitetet përfshinë seminarin katër ditor për auditimin e sigurisë kibernetike dhe takimin XVII të Grupit Punues të EUROSAI-t për Teknologji të Informacionit.

Në seminarin e organizuar nga Zyra Kombëtare e Auditimit të Norvegjisë, përfaqësues nga Shqipëria, Maqedonia e Veriut, Suedia dhe Kosova diskutuan mbi rritjen e rreziqeve kibernetike si rezultat i digjitalizimit dhe rëndësinë e auditimit në këtë fushë.

ZKA-ja u përfaqësua nga Ndihmës Auditorja e Përgjithshme, Myrvete Gashi Morina dhe Drejtori i Departamentit të Auditimit të Teknologjisë së Informacionit, Samir Zymberi. Gjatë diskutimeve pjesëmarrësit shkëmbyen njohuri mbi mbrojtjen e të dhënave dhe shërbimeve publike nga kërcënimet kibernetike, si dhe teknika të avancuara të auditimit për të identifikuar dhe parandaluar shkeljet.

Ndërsa në takimin XVII të Grupit Punues të EUROSAI-t për Teknologji të Informacionit, u theksua rëndësia e përdorimit të inteligjencës artificiale në auditim. Diskutimet u fokusuan mbi sfidat e qeverisjes së inteligjencës artificiale, privatësinë e të dhënave dhe paragjykimet e mundshme në sistemet e avancuara.

Pjesëmarrësit theksuan nevojën për shkëmbimin e njohurive dhe trajnimeve për të adresuar këto sfida dhe për të përfshirë inteligjencën artificiale në auditimet e ardhshme, duke u mbështetur në rregulloret evropiane si bazë udhëzuese për auditimin e sistemeve me rrezik të lartë. 

Zyra Kombëtare e Auditimit (ZKA) dhe Fakulteti Ekonomik i Universitetit të Prishtinës “Hasan Prishtina” kanë arritur marrëveshje bashkëpunimi që synon ofrimin e mundësive për praktikë profesionale për studentët.

Marrëveshja e nënshkruar të martën nga Auditorja e Përgjithshme, Vlora Spanca dhe Dekani i Fakultetit Ekonomik, Driton Balaj synon shkëmbimin e përvojave dhe praktikave të mira për të rritur cilësinë e punës dhe për të ofruar mbështetje të ndërsjellë. Ky bashkëpunim do të përfshijë zhvillimin e projekteve kërkimore-shkencore dhe organizimin e ligjëratave të përvitshme në fushën e kontabilitetit dhe auditimit.

Programi i praktikës profesionale u mundëson studentëve ndërlidhjen e teorisë me praktikën duke punuar me profesionistë në një institucion të rëndësishëm siç është Zyra Kombëtare e Auditimit. Praktika profesionale do të zgjasë nga tre deri në gjashtë muaj dhe do të jetë pa kompensim.  

Në ceremoninë e nënshkrimit të marrëveshjes ishin të pranishëm edhe Zëvendës Auditori i Përgjithshëm, Bezad Halilaj, Ndihmës Auditori i Përgjithshëm, Zukë Zuka, Prof. Ass. Dr. Saranda Kajtazi, Prodekane për mësim dhe çështje të studentëve si dhe Prof. Ass. Dr. Vlora Prenaj, Prodekane për kërkime shkencore dhe bashkëpunim ndërkombëtar.