Në kuadër të zbatimit të Planit të Trajnimeve për muajin shtator, auditorët e Zyrës Kombëtare të Auditimit (ZKA) ndoqën trajnimin katër ditor për prokurim publik, përkatësisht kontratat e negociuara dhe kontratat kornizë.

Trajnimi i organizuar nga ekspertë të Komisionit Rregullativ të Prokurimit Publik (KRPP) pati për qëllim avancimin e aftësive të auditorëve për të vlerësuar dhe kontrolluar më mirë praktikat e prokurimit duke rritur efikasitetin dhe përgjegjshmërinë në menaxhimin e fondeve publike.

Në kuadër të modulit për kontratat me negocim auditorët u trajnuan për të monitoruar se si realizohen negociatat në përputhje me ligjin si dhe për të identifikuar dhe adresuar rreziqet që mund të dalin gjatë këtij procesi. Ndërsa për modulin e kontratave kornizë auditorët u trajnuan për të mbikëqyr zbatimin e këtyre kontratave si dhe të vlerësojnë nëse këto kontrata kontribuojnë në menaxhimin e duhur të financave publike.

Trajnimi u mbajt në kuadër të marrëveshjes së bashkëpunimit në mes të ZKA-së dhe KRPP-së me mbështetjen e Aktivitetit të USAID-it për Integritetin e Komunave në Kosovë.

Me qëllim të zhvillimit dhe avancimit të aftësive udhëheqëse, menaxhmenti i lartë dhe i mesëm i ZKA-së ndoqën punëtorinë pesëditore për lidership të organizuar në kuadër të projektit të bashkëpunimit në mes të Zyrës Kombëtare të Auditimit të Suedisë dhe Zyrës Kombëtare të Auditimit të Kosovës. 

Punëtoria e udhëhequr nga ekspertët suedezë Tinna Bondestam dhe Tomas Janhed  kishte për qëllim avancimin e lidershipit në nivelet më të larta, dhe përfshiu diskutime për strukturën organizative si dhe detyra operative në shërbim të arritjes së qëllimeve strategjike. Po ashtu u zhvilluan diskutime dhe ushtrime grupore të fokusuara në përmirësimin e performancës ekipore, mbikëqyrjen, si dhe komunikimin efektiv të qëllimeve strategjike tek stafi.