Qeveria e Kosovës ka shpenzuar gati një milion euro për zhvillimin dhe mirëmbajtjen e një aplikacioni softuerik për menaxhimin e pasurive publike, i cili nuk kryen funksionin e vet dhe nuk përdoret nga shumë departamente dhe organizata. Raporti më i fundit i auditimit të performancës i cili është publikuar sot, shfaq se aplikacioni softuerik e-Pasuria nuk ka arritur qëllimin e tij kryesor, për të krijuar një bazë qendrore të unifikuar për menaxhimin efektiv të pasurisë publike. Këto pasuri publike janë me vlerë më të vogël se 1000 euro, si  mobilie, kompjuterë,  telefona celularë, etj. Auditori i Përgjithshëm Besnik Osmani, konsideron se: “Institucionet Publike janë përgjegjëse  për pasurinë publike për ruajtjen dhe përdorimin e saj në mënyrë të duhur. Ato duhet të menaxhohen mirë dhe të dihet se ku janë. Paraja publike e shpenzuar për ndërtimin e softuereve të tilla duhet të jetë në funskion të shërbimeve më efikase ndaj qytetarëve të Kosovës. Pavarësisht faktit se janë shpenzuar gati një milion euro për zhvillimin e softuerit, ai nuk menaxhohet dhe përdoret si duhet.” Si rezultat i mungesës së bashkëpunimit midis Ministrisë së Financave dhe Ministrisë së Administratës Publike, softueri shpeshherë nuk përdoret nga organizatat dhe në disa raste madje janë shpenzuar para shtesë për softuerë paralel të cilët kryejnë të njëjtin funksion. Gjashtë Organizata Buxhetore të cilat do të duhej ta përdornin softuerin për të menaxhuar në mënyrë efektive pasurinë e tyre, kanë qenë subjekt i këtij auditimi. Dogana e Kosovës nuk e përdor fare aplikacionin softuerik e-Pasuria. Ministria e  Kulturës Rinisë dhe Sportit dhe Komuna  e Ferizajt kanë përdorim të kufizuar të këtij aplikacioni, ndërsa Ministria e Punëve Brendshme, Agjencia Kosovare e Privatizimit dhe Komuna e Lipjanit, e përdorin në mënyrë më efektive. Gjithashtu, pozitat kyçe që vlerësojnë regjistrimin e pasurisë brenda organizatës nuk e përdorin këtë aplikacion softuerik. Auditimi ka gjetur se më shumë se 800 përdorues ishin të pa identifikueshëm, të cilët përdornin emra ndryshe prej atyre të autorizuar. Diku 2000 përdorues kishin më tepër se një llogari. Ministria e Administratës Publike (MAP), përkatësisht Agjencia e Shoqërisë së Informacionit nuk ka hartuar politika dhe procedura për kontrollin e mirëfilltë të aplikacionit e-Pasuria. Prandaj, mungojnë fillimisht njohuritë për nevojën e përcaktimit të përgjegjësive, por edhe rrjedhës se veprimeve që duhet të ndërmarrën për të mundësuar përdorimin e duhur të aplikacionit softuerik, por edhe progresin e tij. Po ashtu mungojnë edhe procedurat për monitorimin dhe kontrollimin e këtij sistemi. Zyra Kombëtare e Auditimit rekomandon që Ministria e Financave dhe Ministrinë e Administratës Publike të ndërtojnë një komunikim të rregullt në mënyrë që të sigurohet shfrytëzueshmëria e plotë e këtij aplikacioni, i cili ka për qëllim regjistrimin e plotë të pasurisë shtetërore me vlerë nen një mijë euro. Po ashtu, Ministria e Administratës Publike përmes Agjencisë së Shoqërisë së Informacionit duhet të sigurojë funksionim të aplikacionit softuerik, në mënyrë që përdorimi i tij të jetë i lehtë. Organizatat Buxhetore rekomandohen që ta përdorin aplikacionin ne pajtim me obligimet që dalin nga Rregullorja për Pasuri jo-Financiare. Raportin e plotë mund ta lexoni në www.zka-rks.org Për informata mund të na kontaktoni në 038 60 60 04 ext. 10 12

Agjencia Qendrore e Prokurimit rrezikon të humbë 2.6 milion euro Edhe pse Agjencia Qendrore e Prokurimit është themeluar për të kursyer paratë e buxhetit të Kosovës përmes blerjeve me shumicë, raporti i fundit i Zyrës Kombëtare të Auditimit tregon se ekziston rreziku që furnitorët të paguhen pa dorëzuar mallra. Gjithashtu në disa raste çmimet e AQP-së ishin më të larta se çmimet individuale të institucioneve publike. Agjencia Qendrore e Prokurimit ka disa kontrata përfshirë kontratën për letër, goma dhe material zyrtar. Bazuar në informatat që merr nga institucionet publike (Ministritë, Komunat,  etj.), AQP kontrakton sasinë dhe çmimin e kontratës. Raporti i performancës tregon se AQP nuk kishte pasur informata të mjaftueshme për të marrë vendim lidhur me sasinë e nevojshme të kontratës. Në fakt vendimi është marrë duke u bazuar në informatat e ofruara nga 80 për qind e këtyre institucioneve, pjesa tjetër ishte vendosur me hamendje. Raporti ka gjetur raste të mallrave që kushtojnë më shtrenjtë kur blihen nga AQP se sa nga institucionet në mënyrë individuale. Raporti tregon se në shumicën e rasteve AQP-ja nuk i kishte analizuar kontratat individuale të institucioneve për të parë çmimet me të cilat ato furnizoheshin. Prandaj, për shembull në rastin e letrës, edhe Sekretariati i Këshillit Gjyqësor të Kosovës edhe Dogana kishin paguar çmime më të ulëta para se të përfshiheshin në kontratë të centralizuar ndërsa në rastin e karburanteve së paku katër entitete kishin çmime më të ulëta se AQP-ja. Meqë kontratat nuk ishin monitoruar si duhet dhe nuk kishte pasur masa parandaluese, furnitorët mund të kërkojnë kompensim prej 2.6 milion eurosh për mallrat që janë kontraktuar por nuk janë porositur. Raportimi i rrallë dhe analizimi edhe më i rrallë i këtyre raporteve ka rezultuar me mungesë të informatave lidhur me progresin e kontratave dhe ka çuar në mungesë të masave korrigjuese. Auditori i Përgjithshëm Besnik Osmani tha: “Është e papranueshme humbja e parave përmes prokurimit të centralizuar. AQP duhet urgjent të ndërmerr masa korrigjuese.” Rëndësia e kësaj çështjeje ka bërë që Auditori i Përgjithshëm të vendosë të kryej një auditim të dytë të këtyre kontratave kur ato të implementohen. Auditimi i ka vlerësuar 8 nga 15 kontratat apo 56% të vlerës së kontraktuar nga AQP gjatë viteve 2015 dhe 2016. Raportin e plotë mund ta lexoni në: www.zka-rks.org