republika-e-kosoves
Thank you! Your submission has been received!
Oops! Something went wrong while submitting the form.
Shqip
1/25/2019 10:39:39 AM

Kontratat e negociuara me kosto më të lartë se kontratat me procedurë të hapur

Në mungesë të analizave të mjaftueshme, vlerësimit të nevojave dhe njohjes së tregut, autoritetet kontraktuese kanë lidhur marrëveshje kontraktuese përmes procedurës së negociuar e cila në disa raste kishte rezultuar me kosto më të lartë për shërbimet/mallrat e pranuara se sa kontratat paraprake me procedurë të hapur apo mundësitë që ishin në treg. Zyra Kombëtare e Auditimit ka publikuar Raportin e auditimit të performancës ”Procedura me negocim pa publikim të njoftimit për kontratë”. Auditimi ka evidentuar që përdorimi i procedurës së negociuar pa publikim të kontratës nuk ishte arsyetuar mjaftueshëm dhe autoritetet kontraktuese nuk i kishin shteruar të gjitha mundësitë për të shmangur përdorimin e kësaj procedure. Raporti thekson se asnjë nga autoritet kontraktuese të audituara nuk kishin bërë analiza të përfitimeve dhe kostove pas zbatimit të kontratave dhe kështu nuk kanë një bazë mbi të cilën do të mund të merrnin vendimet për blerjet e radhës. 65% e kontratave të audituara përmes procedurës së negociuar ishin lidhur në kushte minimale të konkurrencës, prej tyre afër 47% me vetëm një operator ekonomik dhe 18% e tyre me vetëm dy operator ekonomik. Kjo mënyrë e prokurimit të mallrave dhe shërbimeve si dhe punëve, nuk është transparente dhe nuk garanton se autoriteti kontraktues ka marrë vlerë për paranë që ka shpenzuar. Me disa përmirësime në aspektin e hulumtimit të tregut dhe të analizës së kontratave paraprake, autoritetet kontraktuese të audituara do të mund të siguronin konkurrencë më të lartë dhe çmime më ekonomike. Besnik Osmani, Auditor i Përgjithshëm, me rastin e publikimit të këtij raporti ka potencuar se “Autoritetet kontraktuese duhet të ndërmarrin të gjitha veprimet e nevojshme për të ulur përdorimin e procedurës së negociuar pa publikim, në mënyrë që prokurimet të jenë transparente dhe të sigurojnë konkurrencë, rrjedhimisht edhe çmime më ekonomike”. Konkluzionet e lartcekura janë si rezultat i auditimit të 17 aktiviteteve të prokurimit të zhvilluara me procedurë të negociuar pa publikim të njoftimit për kontratë në katër autoritete kontraktuese: Ministrinë e Punëve të Brendshme, Ministrinë e Arsimit Shkencës dhe Teknologjisë, Doganën e Kosovës dhe Sekretariatin e Komisionit Qendror të Zgjedhjeve. Vlera e përbashkët e këtyre kontratave është mbi 21 milion euro. Zyra Kombëtare e Auditimit ka rekomanduar institucionet e audituara që të zhvillojnë hulumtim të tregut për të identifikuar furnizuesit potencial dhe ofertën e tyre, të bëjnë vlerësim të duhur të nevojave dhe të shqyrtojnë produkte alternative. Gjithashtu duhet të bëjnë një analizë të përfitimeve dhe kostove pas zbatimit të secilës kontratë në mënyrë që vendimet e ardhshme për blerje të jenë të bazuara në informata të qëndrueshme që të sigurojnë çmime më ekonomike. Raportin e plotë mund ta lexoni në http://www.zka-rks.org

  • Share:

Lexo lajme tjera:

Auditori i Përgjithshëm mban takim me përfaqësuesit e Organizatave Buxhetore të Republikës së Kosovës
23/01/2019

Auditori i Përgjithshëm mban takim me përfaqësuesit e Organizatave Buxhetore të Republikës së Kosovës

Sot, Zyra Kombetare e Auditimit ka mirëpritur në takim informues Zyrtarët Kryesor Financiar të Organizatave Buxhetore të nivelit qendror dhe lokal. Me këtë rast janë prezantuar çështje dhe tema me rëndësi që kanë të bëjnë me auditimin dhe raportimin  e pasqyrave vjetore financiare për vitin 2018 nga Organizatat Buxhetore. Zëvendës Auditori i Përgjithshëm, z. Ilir Salihu, në fjalën e tij të hapjes theksoi se tani gjindemi në një periudhë kohore shumë të rëndësishme sa i përket përgatitjes, raportimit dhe auditimit të pasqyrave financiare vjetore për vitin 2018 dhe se qëllimi i këtij takimi është informimi më i mirë dhe diskutimi i çështjeve me interes për Zyrën Kombëtare të Auditimit, Departamentin e Thesarit dhe Zyrtarët Kryesor Financiar si palë kryesore në këtë proces. Z. Ahmet Ismaili, Drejtor i Përgjithshëm i Thesarit në fjalën e tij ka tërhequr vëmendjen për afatet e përcaktuara për dorëzimin dhe mundësinë e korrigjimit të pasqyrave financiare vjetore para se ato zyrtarisht të jenë finale. Z. Ismaili, theksoi se në të gjitha vlerësimet ndërkombëtare që i bëhen Kosovës, dokumenti i parë si më i besueshëm dhe që merret në konsideratë është raporti i Auditorit të Përgjithshëm. Prandaj, ju bëj thirrje që të angazhoheni në adresimin e rekomandimeve të dhëna nga Auditori i Përgjithshëm, sepse çdo gjetje e prezantuar në raport në thelb ngrit çështje të rëndësishme dhe ka një proces për adresimin e tyre, tha ai. Ndihmës Auditori i Përgjithshëm, z. Çerkin Morina ka prezantuar çështjet kryesore për të cilat zyrtarët Kryesor Financiar duhet të tregojnë kujdes gjatë përgatitjes së pasqyrave financiare vjetore, gjithashtu i ka njoftuar edhe me kërkesat për këtë fazë të auditimit. Takimi ka vazhduar me diskutim të hapur dhe adresimin e çështjeve me interes të ngritura nga Zyrtarët Kryesor Financiar të organiztave buxhetore. Takim i ndarë është mbajtur edhe me Zyrtarët Kryesor Financiar të Ndërmarrjeve Publike që i nënshtrohen auditimit për vitin financiar 2018.  
Lexo më shumë
Vazhdon me sukses zbatimi i Programit për Menaxhim dhe Lidership në Zyrën Kombëtare të Auditimit
30/01/2019

Vazhdon me sukses zbatimi i Programit për Menaxhim dhe Lidership në Zyrën Kombëtare të Auditimit

Zyra Kombëtare e Auditimit të Suedisë përkrah Zyrën Kombëtare të Auditimit të Kosovës në zhvillimin e kapaciteteve të lidershipit Në datat 28-30 Janar 2019, udhëheqësit e ekipeve të auditimit morën pjesë në punëtorinë “Performanca në Ekip” që u mbajt në Prishtinë, aktivitet në kuadër të Programit për Menaxhim dhe Lidership. Synimi i kësaj punëtorie është të përmirësoj aftësitë dhe metodat institucionale dhe të forcoj më tej kapacitetet profesionale në Zyrën Kombëtare të Auditimit me fokus në rolin e udhëheqësit të ekipit të auditimit, aspekte të veçanta të lidershipit gjatë procesit të auditimit, si dhe fushat potenciale për zhvillim të performancës në ekip. Me qëllim që të ndihmojnë ekipet të performojnë më mirë, ekspertë nga Suedia  kanë prezantuar teknika dhe mësime të vlefshme të udhëheqjes dhe menaxhimit të proceseve të punës. Po ashtu, rëndësi e veçantë i është dhënë edhe vlerësimit të performancës në punë. Programi për Menaxhim dhe Lidership është aktivitet i vazhdueshëm në kuadër të Projektit të bashkëpunimit në mes të Zyrës Kombëtare të Auditimit të Suedisë dhe asaj të Kosovës, ndërsa kjo punëtori u mbajt sipas planit të aktiviteteve për vitin 2018-2019.
Lexo më shumë