Në kuadër të vizitës zyrtare në Mbretërinë e Bashkuar, Auditorja e Përgjithshme e Republikës së Kosovës, Vlora Spanca, të mërkurën vizitoi Zyrën Kombëtare të Auditimit të Uellsit. Ajo u prit nga Auditori i Përgjithshëm i Uellsit, Adrian Crompton, dhe bashkëpunëtorët e tij, ku shprehën përkushtimin për të promovuar transparencën dhe integritetin në menaxhimin e financave publike, duke vendosur bazat për një partneritet të fortë e afatgjatë. 

Me këtë rast znj. Spanca shprehu mirënjohjen për mikpritjen dhe interesimin nga homologu i saj për ndërtimin e një bashkëpunimi të qëndrueshëm dhe afatgjatë. Duke prezantuar punën dhe arritjet e ZKA-së përmes një pasqyre të shkurtër të punës dhe arritjeve, përfshirë avancimin e metodologjisë së auditimit, dixhitalizimin e procesit të auditimit, etj, ajo ceku edhe rëndësinë e bashkëpunimit përmes shkëmbimit të ekspertizës dhe ndarjes së praktikave më të mira, duke sjellë kështu përfitime të ndjeshme për qytetarët.  

Auditori i Përgjithshëm i Uellsit, z. Crompton vlerësoi punën dhe përkushtimin e ZKA-së në promovimin e qeverisjes së mirë dhe theksoi gatishmërinë për të forcuar partneritetin mes dy institucioneve. Ai theksoi se shkëmbimi i përvojave dhe ekspertizës do t’u ndihmojë të dyja institucioneve në ngritjen e kapaciteteve profesionale dhe përmirësimin e standardeve të punës.

Auditorja e Përgjithshme e Republikës së Kosovës, Vlora Spanca, Zëvendës Auditori i Përgjithshëm Bezad Halilaj, Ndihmës Auditorja e Përgjithshme Myrvete Gashi-Morina dhe Drejtori i Auditimit Faruk Rrahmani, të premten përmbyllën vizitën zyrtare në Mbretërinë e Bashkuar me takim me Ambasadorin e Republikës së Kosovës në Londër, Sh.T. Ilir Kapiti. 

Gjatë takimit, u diskutua për marrëdhëniet bilaterale ndërmjet Kosovës dhe Mbretërisë së Bashkuar, bashkëpunimin në fushën e auditimit publik dhe mundësitë për forcimin e lidhjeve institucionale. Ambasadori Kapiti uroi delegacionin për vizitën duke theksuar rëndësinë e angazhimit të Kosovës në skenën ndërkombëtare. Ai shprehu mbështetjen e tij për avancimin e misionit të Zyrës Kombëtare të Auditimit të Kosovës dhe rëndësinë e auditimit publik në forcimin e qeverisjes së mirë.

Delegacioni i ZKA-së njoftoi Ambasadorin për takimet dhe aktivitetet gjatë vizitës në Mbretërinë e Bashkuar duke vlerësuar lartë shkëmbimin e ideve dhe praktikave të mira me partnerët britanikë.