Zyra Kombëtare e Auditimit (ZKA) ka filluar auditimin e teknologjisë së informacionit me temë “Sistemi Informativ i Gjendjes Civile në Agjencinë e Regjistrit Civil (ARC)”. Auditimi i këtij sistemi është duke u kryer për herë të parë dhe përfshin kryesisht periudhën 2020-2021. Procesit të auditimit do t’i nënshtrohet Agjencia e Regjistrit Civil (ARC) në kuadër të Ministrisë së Punëve të Brendshme si dhe Komuna e Prishtinës dhe Komuna e Prizrenit, përkatësisht sektorët e gjendjes civile. Në fokus të auditimit do të jenë departamentet/sektorët përkatëse të këtyre institucioneve. Objektiv i këtij auditimi është vlerësimi i administrimit dhe siguria e informacionit të sistemit informativ të gjendjes civile të Republikës së Kosovës. Përmes procesit të auditimi synohet të shihet nëse është duke u ruajtur siguria dhe konfidencialiteti i të dhënave, integriteti dhe disponueshmëria e të dhënave. Fushëveprim i këtij auditimi do të jetë në Sektorin për Administrimin e Bazave të të Dhënave të ARC-së, Sektorin e Regjistrimit Qendror të Gjendjes Civile dhe Sektorët e Gjendjes Civile në komuna. Auditimi do të fokusohet në Sistemin Informativ për Gjendjen Civile, i cili shërben për administrimin e regjistrit qendror të gjendjes civile. Ky auditim do të trajtojë fushën e operacioneve të teknologjisë së informacionit, sigurinë e informacionit dhe kontrollet e aplikacionit. ARC-ja është burimi kryesor i të dhënave personale të qytetarëve të Kosovës, të cilat regjistrohen dhe mbahen në regjistrin e gjendjes civile dhe që vërtetojnë lindjen, statusin familjar, vdekjen, marrëdhëniet ndërmjet tyre dhe çdo ndryshim që ndodh në këto marrëdhënie. ARC-ja është përgjegjëse për menaxhimin e proceseve në lidhje me aplikimin e personalizimit dhe lëshimit të dokumenteve për shtetasit e Republikës së Kosovës, për shtetasit e huaj dhe për personat pa shtetësi, kur kanë banim të përkohshëm apo të përhershëm në territorin e Republikës së Kosovës, si dhe për shtetasit e huaj, të cilët kanë përfituar azil në Republikën e Kosovës. Ruajtja e konfidencialitetit është një nga parimet kryesore të regjistrit qendror të gjendjes civile, si dhe ARC-ja duhet siguruar saktësinë dhe plotësinë e të dhënave të regjistruara në sistemin informativ nëpërmjet të cilit menaxhohen këto të dhëna. Andaj, auditimi i teknologjisë së informacionit për “Sistemin Informativ të Gjendjes Civile në Agjencinë e Regjistrit Civil (ARC)” është i rëndësishëm meqë sipas hulumtimeve paraprake për SGJC-në janë identifikuar mangësi në mbrojtjen e të dhënave personale, përkatësisht në ruajtjen e konfidencialitetit të të dhënave. Prandaj përmes këtij procesi të auditimit synohet të vlerësohet nëse Sistemi i Gjendjes Civile ruan sigurinë, privatësinë dhe integritetin e të dhënave në përputhje me standardet dhe praktikat e mira të sistemeve të informacionit. Qëllimi është të jepen rekomandime të praktikave më të mira që të përmirësojnë funksionimin e këtij sistemi të informacionit.

Zyra Kombëtare e Auditimit të Republikës së Kosovës është bërë pjesë e Task Forcës së EUROSAI-t për auditimin e komunave. Kjo Task Forcë shërben si platformë e hapur për ndarjen e praktikave dhe përvojave më të mira në auditimin lokal si dhe ka për synim përmirësimin e sistemit të auditimit të komunave në vendet që janë pjesë e EUROSAI-t. Kryetari i Task Forcës së EUROSAI-t për auditimin e komunave njëherësh Auditor i Përgjithshëm i Lituanisë, Mindaugas Macijauskas, ka mirëpritur anëtarësimin e ZKA-së në këtë Task Forcë duke thënë se pret një marrëdhënie të suksesshme pune në të ardhmen. Ai ka vlerësuar se bashkëpunimi i suksesshëm i Institucioneve Supreme të Auditimit në kuadër të kësaj Task Force dhe kontributi i tyre individual në aktivitete do të lehtësojë shkëmbimin e praktikave dhe përvojave më të mira në auditimin e komunave në rajonin e EUROSAI-t. “Besoj gjithashtu se dëshira jonë për të krijuar një kulturë auditimi cilësor në sektorin publik dhe për ta bërë sistemin e auditimit të jashtëm komunal më efikas do të ndihmojë në përballimin e sfidave me të cilat  Institucionet Supreme të Auditimit po përballen në fushën e auditimit komunal”, është thënë në letrën e kryetarit të Task Forcës së EUROSAI-t për auditim të komunave, Mindaugas Macijauskas dërguar Auditores së Përgjithshme të Kosovës, Vlora Spanca. Zyra Kombëtare e Auditimit të Republikës së Kosovës tash e tutje do të jap kontributin e saj në kuadër të aktiviteteve të ndryshme të Task Forcës së EUROSAI-t për auditim të komunave.