Auditorja e Përgjithshme, Vlora Spanca, priti në takim znj. Marina Mandac, eksperte nga Agjencia Kroate për Auditimin e Sistemit të Zbatimit të Programeve të BE-së (ARPA), si dhe ekipin nga Zyra e Kryeministrit për Koordinimin e Procesit të Stabilizim-Asociimit përgjegjës për koordinimin e zbatimit të Agjendës së Reformave të Kosovës në kuadër të Instrumentit të BE-së për Reforma dhe Rritje Ekonomike për Ballkanin Perendimor për periudhën 2024 - 2027.

Në takim u trajtuan kërkesat e Komisionit Evropian për auditimin e programeve të BE-së, si dhe hapat e nevojshëm për përmbushjen e detyrimeve institucionale të Kosovës në raport me këtë mekanizëm të ri të BE-së.

Duke marrë parasysh se në Kosovë ende nuk është themeluar një institucion përgjegjës për auditimin e programeve të BE-së dhe kërkesave imediate për të adresuar këtë çështje, Auditorja e Përgjithshme u zotua se do t’i shqyrtojë me kujdes kërkesat dhe mundësitë për të marrë përsipër këtë angazhim. 

Instrumenti për Reforma dhe Rritje Ekonomike për Ballkanin Perendimor për periudhën 2024 – 2027, synon të nxisë rritjen ekonomike, forcimin e stabilitetit rajonal dhe përshpejtimin e procesit të aderimit të Kosovës në BE.

Auditorët e TI-së së Zyres Kombëtare të Auditimit të Kosovës (ZKA) marrin pjesë në trajnimin për auditimin e bazave të të dhënave Oracle,të organizuar nga Enti Shtetëror i Revizionit të Maqedonisë së Veriut në bashkëpunim me Zyren Kombëtare të Auditimit të Norvegjisë. Ky aktivitet synon të rrisë kapacitetet e auditorëve në auditimin e sistemeve të TI-së, duke përfshirë sigurinë dhe analizën e të dhënave. Në këtë trajnim po marrin pjesë edhe përfaqësues të Gjykatës së Auditimit të Sllovenisë. Trajnimi është mbajtur në datat 25-27 shkurt 2025 dhe është pjesë e bashkëpunimit të vazhdueshëm për përmirësimin e metodologjisë së auditimit të TI-së.