Zyra Kombëtare e Auditimit e Kosovës (ZKA) dhe Kontrolli i Lartë i Shtetit i Shqipërisë (KLSH) mbajtën sot takim pune në kuadër të auditimit paralel të performancës për mbrojtjen dhe sigurinë e digave në të dyja vendet.

Takimi i mbajtur në ambientet e ZKA-së në Prishtinë synon thellimin e bashkëpunimit ndërmjet dy institucioneve të auditimit dhe shkëmbimin e përvojave për të përmirësuar kontrollin dhe sigurinë e infrastrukturës së digave.

Takimi u hap me fjalët përshëndetëse të Auditores së Përgjithshme, Vlora Spanca, dhe të Kryetarit të KLSH-së, Arben Shehu, të cilët theksuan rëndësinë e këtij bashkëpunimi për rritjen e transparencës dhe efikasitetit në auditimet publike.

“Është kënaqësi e veçantë të realizojmë auditimin e tretë paralel me Kontrollin e Lartë të Shtetit, përmes të cilit kemi edhe një mundësi të shkëlqyer për të forcuar më tej marrëdhëniet dhe bashkëpunimin ndërmjet dy institucioneve tona,” theksoi Auditorja e Përgjithshme, Vlora Spanca.

“Është jashtëzakonisht e rëndësishme që të mbesim prezentë dhe të ofrojmë kontributin tonë të mirëfilltë, në ZKA dhe KLSH, si në Shqipëri ashtu edhe në Kosovë,” u shpreh Kryetari i KLSH-së Arben Shehu.

Më tutje përgjatë takimit, ekipet audituese të ZKA-së dhe KLSH-së prezantuan analizat e tyre për gjendjen e digave në Kosovë dhe Shqipëri, sfidat dhe mundësitë për përmirësim. Diskutimet u fokusuan në planifikimin e auditimit paralel, i cili do të ndihmojë në identifikimin e dobësive dhe forcimin e mekanizmave të kontrollit mbi sigurinë e digave.

Në takim ishin të pranishëm, nga ana e ZKA-së, Zëvendës Auditori i Përgjithshëm, Bezad Halilaj, Ndihmës Auditorja e Përgjithshme, Myrvete Gashi Morina, Drejtori i Auditimit, Samir Zymberi si dhe Udhëheqësja e Ekipit të auditimit, Alba Keqa. Ndërsa nga ana e KLSH-së të pranishëm ishin Sekretarja e Përgjithshme, Valbona Gaxha, Ardian Myslimaj, Këshilltar, Joana Troqe, Drejtore e Departamentit të Auditimit, dhe Xhesika Xhuveli, Drejtore e Komunikimit.

Ky aktivitet shënon vazhdimin e bashkëpunimit në mes të ZKA-së dhe KLSH-së për të forcuar llogaridhënien dhe transparencën në menaxhimin e resurseve publike.

Thirrja për praktikë profesionale në fushën e auditimit të jashtëm vjen në kuadër të Memorandumit të Bashkëpunimit lidhur ndërmjet Zyrës Kombëtare të Auditimit (ZKA) dhe Fakultetit Ekonomik të Universitetit të Prishtinës dhe përbën mundësi të shkëlqyer për zhvillimin e aftësive profesionale të studentëve.

Praktika tre-mujore iu mundëson atyre të angazhohen në proceset e auditimit të jashtëm në sektorin publik, duke kontribuar kështu si pjesë e ekipeve audituese dhe aplikuar njohuritë tashmë të fituara përgjatë studimeve.

Përmes kësaj iniciative, ZKA-ja synon të avancojë njohuritë e studentëve në auditimin publik dhe të theksojë rëndësinë e auditimit në forcimin e llogaridhënies dhe transparencës në institucionet publike. Prandaj, ftohen studentët e Fakultetit Ekonomik të aplikojnë për këtë mundësi në uebfaqen e fakultetit.