Nga 26 deri më 28 shkurt 2025, përfaqësuesja e Zyrës Kombëtare të Auditimit (ZKA), Natyra Kasumaj Ahmeti – Ushtruese e Detyrës se Udhëheqëses së Njësisë Kundër Mashtrimit, mori pjesë në një vizitë studimore në Romë në kuadër të  Projektit kundër Krimit Ekonomik (PECK III), bashkëfinancuar nga Bashkimi Evropian dhe Këshilli i Evropës.

Delegacioni kosovar i kryesuar nga Drejtori i Agjencisë për Parandalimin e Korrupsionit, Yll Buleshkaj, zhvilloi takime të rëndësishme me institucionet e Italisë që kanë rol të madh në luftën kundër mashtrimit dhe keqpërdorimit të fondeve publike siç janë Gjykata e Auditorëve (Corte dei Conti) dhe Autoriteti Kombëtar Anti-Korrupsion (ANAC).

Vizita pati për qellim shkëmbimin e  praktikave më të mira ndërkombëtare për forcimin e mekanizmave për parandalimin e mashtrimeve dhe korrupsionit, si dhe përmirësimin e menaxhimit të financave publike. Në fokus të diskutimeve ishin identifikimi dhe rikuperimi i fondeve të humbura, mbikëqyrja e prokurimeve dhe mbrojtja e sinjalizuesve të korrupsionit.

Gjithashtu, në Shkollën Kombëtare të Administratës (Scuola Nazionale dell’Amministrazione - SNA) u prezantuan programet e trajnimeve për auditim dhe rritjen e transparencës në administratën publike.

Auditorja e Përgjithshme, Vlora Spanca, të enjten me 6 mars priti në takim Udhëheqësin e ekipit të Bashkimit Evropian për asistencë teknike në mbështetje të reformave në menaxhimin e financave publike, Boris Petkov.

Në këtë takim u diskutua për angazhimin e nevojshëm nga të dyja palët për të ndihmuar në përmirësimin e mekanizmave të monitorimit, vlerësimit, raportimit dhe auditimit të fondeve të BE-së, duke siguruar përdorimin e tyre në përputhje me parimet e menaxhimit të shëndoshë financiar dhe Agjendën e Reformave.

Fokus të veçantë iu kushtua masave që konsiderohen të duhura për të siguruar auditimin e fondeve dhe programeve të BE-së, në përputhje me standardet ndërkombëtare të auditimit. Përpos kësaj, është biseduar edhe për nevojën për zhvillimin e sistemeve për mbrojtjen e interesave financiare të BE-së, përfshirë menaxhimin e parregullsive dhe kontrollet e forta financiare.

Palët theksuan rëndësinë e rritjes së kapaciteteve të institucioneve vendore për të garantuar transparencë dhe llogaridhënie në menaxhimin e fondeve evropiane.

Në takim ishin të pranishëm edhe Zëvendës Auditori i Përgjithshëm, Bezad Halilaj si dhe Ndihmës Auditorët e Përgjithshëm, Myrvete Gashi Morina dhe Ramadan Gashi. Nga ekipi i BE-së ishin Edon Kalludra, Menaxher Projekti në Zyrën e Bashkimit Evropian në Kosovë, Arsim Mulaku, Menaxher i lartë i Projektit të GIZ,  Burbuqe Kelmendi, Menaxhere e Projektit në Zyrën e Bashkimit Evropian në Kosovë.