Në kuadër të Marrëveshjes së Bashkëpunimit bilateral në mes të Zyres Kombëtare të Auditimit të Kosovës (ZKA) dhe Gjykatës së Llogarive të Turqisë (TCA), në datat 27 dhe 28 shkurt 2025 është mbajtur trajnimi online dyditor me temën “Analiza e të dhënave në auditimin financiar”. Sesionet trajnuese janë mbajtur nga auditorë me përvojë të TCA-së me qëllim të ofrimit të njohurive dhe përvojës mbi ndikimin e zhvillimeve teknologjike në auditim dhe përdorimin e mjeteve analitike për të rritur saktësinë dhe efektivitetin e auditimeve financiare për auditorët e ZKA-së.

Temat kryesore që u trajtuan ishin mbledhja dhe verifikimi i të dhënave, analizat në auditimin financiar dhe zbatimi i “Big Data”. Përveç kësaj, auditorët e ZKA-së patën mundësinë t’a njohin për së afërmi Mjetin e Analizës së të Dhënave i quajtur VERA, si shembull praktik i aplikimit të analizës së të dhënave në auditim në Gjykatën e Llogarive të Turqisë.

Përmes këtij aktiviteti auditorët e ZKA-së patën mundësinë të kuptojnë më shumë për procesin e analizës së të dhënave në auditimin e pasqyrave financiare dhe konceptet e qeverisjes si dhe analizës së të dhënave për të mbështetur vlerësimin e rrezikut dhe vendimmarrjen gjatë procesit të auditimit financiar.

Pesëmbëdhjetë studentë të Fakultetit Ekonomik të Universitetit të Prishtinës “Hasan Prishtina”, sot filluan praktikën profesionale në Zyrën Kombëtare të Auditimit (ZKA) në kuadër të zbatimit të marrëveshjes së bashkëpunimit të nënshkruar vitin e kaluar ndërmjet dy institucioneve.

Studentët u mirëpritën nga Zëvendës Auditori i Përgjithshëm, Bezad Halilaj, dhe zyrtarët e tjerë të menaxhmentit të lartë, të cilët i informuan studentët mbi rëndësinë e auditimit publik, rolin e ZKA-së dhe pritshmëritë nga praktika profesionale. Pas prezantimeve hyrëse, studentët nënshkruan kontratat e praktikës, duke zyrtarizuar kështu angazhimin e tyre për tre muajt e ardhshëm.

Studentët janë bërë pjesë e ekipeve audituese të ZKA-së dhe përgjatë  tre muajve do të jenë pjesë e procesit të auditimit në institucionet publik përkatëse ku do t’i aplikojnë njohuritë e fituara gjatë studimeve.