Auditorja e Përgjithshme e Republikës së Kosovës, Vlora Spanca, me ftesë të kryetares znj. Jana Ahčin, ka zhvilluar vizitë zyrtare në Gjykatën e  Auditimit të Sllovenisë, e shoqëruar nga Zëvendës Auditori i Përgjithshëm, Bezad Halilaj dhe Administratorja e bazës së të dhënave, Kaltrina Sylejmani.

Qëllimi i vizitës ishte shkëmbimi i përvojave profesionale dhe forcimi i bashkëpunimit ndërmjet dy institucioneve në fushën e auditimit publik.

Në fjalën e saj, znj. Jana Ahčin nënvizoi rëndësinë e bashkëpunimit të ngushtë rajonal në fushën e auditimit publik si mjet kyç për të ndihmuar institucionet publike që të jenë më të përgjegjshme dhe më transparente në menaxhimin e financave publike. znj. Spanca e falenderoi për mikpritjen dhe theksoi se shkëmbimi i përvojave dhe praktikave të mira në mes të Zyrës Kombëtare të Auditimit dhe  Gjykatës së Auditimit të Sllovenisë janë mundësi e vlefshme për rritjen e kapaciteteve profesionale dhe për të avancuar standardet e qeverisjes së mirë, transparencës dhe llogaridhënies publike.

Gjatë sesioneve të punës delegacionet shkëmbyen përvojat mbi menaxhimin e riskut institucional, qasjet për hartimin e raporteve miqësore për publikun, strukturën e raporteve të performancës, kuadrin ligjor dhe menaxhimin e sistemeve të TI-së, në veçanti homologët treguan interesim të veçantë për Sistemin për Menaxhimin e Auditimit (SITA) të ZKA-së.

Znj. Ahčin dhe znj. Spanca shprehën gatishmërinë për të avancuar bashkëpunimin në fusha me interes të përbashkët duke vlerësuar se shkëmbimi i njohurive dhe diskutimet e frytshme gjatë takimeve hapin rrugën për një bashkëpunim më të ngushtë në fusha të ndryshme të auditimit publik dhe për modernizimin e proceseve të punës në të dy institucionet.

Ndihmës Auditorët e Përgjithshëm, Agron Fetiu dhe Zukë Zuka, të premten morën pjesë në punëtorinë “Si t’i evitojmë shkaqet kryesore që çojnë në opinionin e kualifikuar të auditimit”, organizuar nga HELVETAS, projekti DEMOS.  

Pjesëmarrësit trajtuan çështje kryesore që ndikojnë në opinionin e kualifikuar të auditimit, si pasqyrimi i pasaktë i pasurive komunale, keqklasifikimet, detyrimet kontingjente, llogaritë e arkëtueshme dhe detyrimet e papaguara.  

Ndihmës Auditorët e Përgjithshëm z. Fetiu dhe z. Zuka ndan përvojat e tyre profesionale mbi sfidat më të shpeshta në raportimin financiar të komunave. Diskutimi pati fokusin te evitimi i shkaqeve që e ndikojnë opinionin e auditimit, me qëllim të përmirësimit të menaxhimit financiar dhe sigurimit të një opinioni të pakualifikuar të auditimit në vitet e ardhshme.  

Të pranishmit vlerësuan mbajtjen e kësaj punëtorie si të rëndësishme e cila pati për qëllim që komunat t’i përvetësojnë praktikat të mira financiare si dhe të rrisin transparencën dhe llogaridhënien në menaxhimin e parasë publike.