Në kuadër të bashkëpunimit ndërinstitucional të enjten u mbajt konferenca “Fuqizimi i Sistemit të Prokurimit Publik në Kosovë”, organizuar nga Komisioni Rregullativ i Prokurimit Publik (KRPP) në bashkëpunim me SIGMA/OECD. Konferenca mblodhi përfaqësues të institucioneve kyçe që mbikëqyrin prokurimin publik si dhe pati për synim rritjen e bashkëpunimit dhe avancimin e sistemit të prokurimit publik.

Zëvendës Auditori i Përgjithshëm, Bezad Halilaj, foli për  rolin e Zyrës Kombëtare të Auditimit (ZKA) në sigurimin e një sistemi të qëndrueshëm dhe transparent të prokurimit publik. Ai theksoi rëndësinë e zbatimit të rekomandimeve të auditimit si dhe nevojën për bashkëpunim të vazhdueshëm ndërmjet institucioneve.  

Z. Halilaj tregoi se shumica e gjetjeve që ZKA-ja evidenton në raportet e auditimit i përkasin fushës së prokurimit publik dhe kjo tregon se ende ka mangësi në të gjitha fazat e procesit. Ai tha se ZKA-ja mbetet e përkushtuar për të dhënë kontributin e saj për të forcuar sistemin e prokurimit publik dhe për të siguruar zbatim më efektiv të ligjit.

Në kuadër të punimeve të konferencës u diskutuan praktikat e mira dhe sfidat në këtë fushë, përfshirë përvojën e Komitetit Ndër-Ministror të Prokurimit Publik në Rumani si dhe përmirësimin e cilësisë dhe transparencës në raportimet vjetore.  

Në kuadër të shënimit të 100-vjetorit të themelimit, Kontrolli i Lartë i Shtetit të Republikës së Shqipërisë më 6 dhe 7 maj 2025 në Tiranë organizoi konferencë shkencore me temë: “Ndërtimi i institucioneve të adaptueshme: Përshtatja me dinamikat e mjedisit - Një perspektivë e auditimit të jashtëm”, ku morën pjesë përfaqësues nga Institucionet Supreme të Auditimit të Kosovës, Rumanisë, Greqisë, Turqisë dhe Suedisë.  

Pjesëmarrësit diskutuan mbi qasjet moderne në metodologjitë e auditimit, rolin e teknologjisë, menaxhimin e cilësisë dhe zhvillimin e kapaciteteve, si dhe sfidat me të cilat përballen në procesin e punës.

Në fjalën hyrëse të konferencës, Kryetari i Kontrolli të Lartë të Shtetit (KLSh), Arben Shehu,  tha se ky përvjetor është një moment historik për të reflektuar mbi rëndësinë e ndërtimit të institucioneve të qëndrueshme dhe të afta për t’u përshtatur me ndryshimet dinamike të mjedisit rregullator dhe teknologjik. Ai theksoi se në këtë proces roli i auditimit të jashtëm është thelbësor.  

Në këtë konferencë Zyra Kombëtare e Auditimit (ZKA) kontribuoi me katër prezantime shkencore si: 

“Sfidat në zbatimin e standardeve ndërkombëtare për menaxhimin e cilësisë në ZKA-në e Kosovës”, prezantuar nga Drejtori i Auditimit Mehmet Muçaj; 

“Evoluimi i metodologjive të auditimit për qëndrueshmëri”, prezantuar nga Ndihmës Auditorja e Përgjithshme, Myrvete Gashi Morina, dhe Drejtori i Auditimit, Samir Zymberi; 

“Menaxhimi i burimeve njerëzore si faktor kyç për auditime efektive”, prezantuar nga Drejtoresha e Departamentit për Menaxhimin e Burimeve Njerëzore, Dafina Strana Ujkani; si dhe 

“Menaxhimi i aseteve të qeverisë, roli dhe ndikimi i auditimit në avancimin e proceseve të menaxhimit të aseteve”, prezantuar nga Drejtoresha e Auditimit Blerina Krasniqi.  

Ndërsa Ndihmës Auditori i Përgjithshëm, Ramadan Gashi moderoi dhe kontribuoi në kuadër të panelit të dytë “Rritja e kapaciteteve dhe fleksibilitetit institucional”.  

Auditorja e Përgjithshme, Vlora Spanca përgëzoi përfaqësuesit e ZKA-së për punën e vyer dhe prezantimin dinjitoz në këtë konferencë shkencore, duke thënë se pjesëmarrja e tillë nuk ishte veç një përfaqësim profesional, por edhe moral e kombëtarë. “Prezantimet tuaja ishin pasqyrë e nivelit të lartë që përfaqësoni dhe e angazhimit tuaj për ndërtimin e institucioneve të qëndrueshme dhe të besueshme”, theksoi ajo.