Zyra Kombëtare e Auditimit (ZKA) njofton opinionin publik se gjatë ditës së djeshme (9 qershor 2025) Radio Televizioni i Kosovës dhe disa media tjera kanë publikuar informata që i referohen raportit të auditimit për komunën e Prishtinës të hartuar nga ZKA-ja. Me këtë rast, dëshirojmë ta njoftojmë publikun dhe mediat se publikimi i këtij dokumenti  nuk është autorizuar nga Zyra Kombëtare e Auditimit.  

Procesi i auditimit është i ndërtuar mbi standarde profesionale dhe rregulla të qarta që parashohin hapa të caktuar deri te  publikimi i raportit përfundimtar.  

Prandaj, publikimi i parakohshëm i raportit të auditimit dhe ende pa u miratuar nga Auditorja e Përgjithshme mund të dëmtojë procesin dhe bashkëpunimin ndërinstitucional që ZKA-ja gëzon me institucionet që janë subjekt i auditimit si dhe të çojë në interpretime të pjesshme apo të pasakta për publikun.

Raportet përfundimtare të auditimit të nënshkruara nga Auditorja e Përgjithshme pasi t’i dorëzohen subjektit të audituar dhe Kuvendit të Republikës së Kosovës, në përputhje me afatet dhe procedurat e përcaktuara në nenin 23, paragrafi 1, të Ligjit 05/L-055 për Auditorin e Përgjithshëm dhe Zyren Kombëtare të Auditimit, publikohen në faqen elektronike të ZKA-së dhe janë i vetmi qëndrim zyrtarë i ZKA-së.   

Si medium publik RTK-ja do të duhej të respektonte mandatin kushtetues dhe ligjor të ZKA-së.  Respektimi i tyre i mundëson ZKA-së të punojë në pajtim të plotë me kërkesat ligjore si dhe Standardet Ndërkombëtare të Auditimit dhe të shmang çdo keqinformim eventual të publikut në lidhje me rezultatet e auditimit të jashtëm të institucioneve publike.

ZKA-ja mbetet e përkushtuar për një proces të hapur dhe transparent në shërbim të llogaridhënies dhe interesit publik si dhe e gatshme për bashkëpunim me mediat dhe palët e interesuara për ofrimin e informatave të sakta dhe të verifikuara.

Ndihmës Auditorja e Përgjithshme, Myrvete Gashi Morina, dhe auditoret seniore Vjosë Bojku e Vlora Duraku morën pjesë  në takimin e tretë të Grupit punues mbi përfitimet dhe metodologjitë e auditimit në kohë reale, i cili operon nën qëllimin e parë strategjik të EUROSAI-t (bashkëpunimi profesional). Takimi është organizuar nga Institucionet Supreme të Auditimit (ISA) të Rumanisë dhe Italisë, më 5 dhe 6 qershor 2025 në Bukuresht.  

Pjesëmarrësit diskutuan për draft-dokumentin që përcakton parimet, karakteristikat, përfitimet dhe metodologjinë e auditimeve në kohë reale, si dhe shkëmbyen përvojat e tyre dhe raste studimore, duke synuar forcimin e bashkëpunimit dhe harmonizimin e qasjeve metodologjike në këtë fushë.  

Në kuadër të këtij takimit përfaqësuesit e Institucioneve Supreme të Auditimit nga  Kroacia, Italia, Portugalia, Serbia, Mbretëria e Bashkuar dhe Rumania prezantuan përvojat e tyre në auditime të kryera në kohë reale duke nxjerrë në pah përfitimet konkrete të këtij lloj auditimi. Po ashtu në takim u diskutuan hapat e ardhshëm dhe mundësia e zhvillimit të një metodologjie të përbashkët për auditime në kohë reale në kuadër të EUROSAI-t.