Nga 199 rekomandime të dhëna në auditimet e performancës në vitin 2019, vetëm 51 apo 25% e tyre janë zbatuar, 6 apo 4 % janë në proces, 111 apo 55% nuk kanë filluar ende zbatimin. Ndërsa, për 31 apo 16% të rekomandimeve nuk është bërë vlerësimi për shkak të mungesës së përgjigjeve nga subjektet e audituara respektivisht kufizimit të fushëveprimit. Këto janë rezultatet e raportit të auditimit të performancës “Vlerësimi i zbatimit të rekomandimeve të raporteve të auditimit të performancës të vitit 2019”, i cili ka matur zbatimin e rekomandimeve të 13 raporteve të  auditimit të performancës të vitit 2019 të cilat përfshijnë 36 institucione publike.

Rezultatet e këtij auditimi tregojnë se institucionet e audituara nuk kanë treguar përkushtim të mjaftueshëm në zbatimin e rekomandimeve të Zyrës Kombëtare të Auditimit. Prandaj për të pasur nivel më të lartë të zbatimit të rekomandimeve kërkohet përkushtim dhe bashkëpunim më i madh ndërinstitucional me qëllim të përmirësimit të performancës dhe forcimit të llogaridhënies publike.  

Vlerësimi i ndikimit të rekomandimeve në institucionet ku janë marrë masat për zbatim të plotë të rekomandimeve tregon se ka pasur efekt të dukshëm, si rasti i Doganës së  Kosovës dhe Agjencisë së Ushqimit dhe Veterinarisë.

Duke pasur parasysh se rekomandimet për këto raporte janë dhënë rreth gjashtë vite më parë, angazhimi i subjekteve të audituara nuk është i mjaftueshëm.

Lidhur me këtë auditim, Auditorja e Përgjithshme, Vlora Spanca, deklaroi se niveli i ulët i zbatimit të rekomandimeve të auditimit të performancës reflekton një mungesë të angazhimit institucional dhe llogaridhënie të dobët. Kjo gjendje ngrit shqetësime në lidhje me efikasitetin e procesit të auditimit dhe ndikimin e tij real në menaxhimin publik.

Raportin e plotë të auditimit “Vlerësimi i zbatimit të rekomandimeve të raporteve të auditimit të performancës të vitit 2019” e gjeni këtu.

Zyra Kombëtare e Auditimit (ZKA) ka realizuar auditimin e performancës “Funksionimi, licencimi dhe mbikëqyrja e Institucioneve Parashkollore” për përiudhën 2022–2024. Auditimi ka vlerësuar organizimin e procesit të edukimit në fëmijërinë e hershme, shfrytëzimin dhe zhvillimin e kapaciteteve si dhe mbikëqyrjen dhe monitorimin e institucioneve parashkollore. 

Subjekt i këtij auditimi ishin Ministria e Arsimit Shkencës Teknologjisë dhe Inovacionit (MASHTI), si dhe Drejtoritë Komunale të Arsimit në Prishtinë, Prizren dhe Gjakovë.

Rezultatet e auditimit tregojnë se pavarësisht iniciativave dhe përpjekjeve për të avancuar edukimin në fëmijërinë e hershme, sistemi aktual përballet me sfida. Ka mungesë të infrastrukturës ligjore sekondare, si dhe të mekanizmave funksional për monitorim dhe licencim.

MASHTI nuk ka arritur të vendosë një proces efektiv për funksionimin dhe mbikëqyrjen e institucioneve parashkollore. Ministria nuk ka siguruar një proces të rregullt, të drejtë dhe të barabartë të licencimit të institucioneve parashkollore.

Në nivel lokal, përkundër disa përparimeve në ndërtimin e objekteve dhe monitorim të pjesshëm, mungesa e planeve zhvillimore, rregulloreve të funksionimit dhe përfshirjes së plotë të grupmoshave e pengon funksionimin e qëndrueshëm dhe cilësor të institucioneve parashkollore.

Lidhur me këtë auditim, Auditorja e Përgjithshme, Vlora Spanca, ka deklaruar se proceset për funksionimin dhe licencimin e institucioneve parashkollore nuk janë efektive dhe nuk sigurojnë zhvillimin e duhur.

Zyra Kombëtare e Auditimit ka dhënë tetë rekomandime për përmiresimet e nevojshme në nivelin e edukimit parashkollor.  

Raportin e plotë të auditimit të performancës “Funksionimi, licencimi dhe mbikëqyrja e Institucioneve Parashkollore” e gjeni këtu.