Thank you! Your submission has been received!
Oops! Something went wrong while submitting the form.
11/10/2026 4:01:00 PM

ZKA forcon Sistemin e Menaxhimit të Cilësisë përmes miratimit të pesë dokumenteve kyçe në përputhje me ISSAI 140

Në kuadër të angazhimit të vazhdueshëm për avancimin e cilësisë së auditimit dhe forcimin e mekanizmave institucionalë, Zyra Kombëtare e Auditimit (ZKA) tashmë ka hartuar dhe miratuar pesë dokumente kyçe që rregullojnë dhe mbështesin funksionimin e Sistemit të Menaxhimit të Cilësisë, në përputhje me kërkesat e  Standardit Ndërkombëtar të Institucioneve Supreme të Auditimit ISSAI 140 – Menaxhimi i Cilësisë për Institucionet Supreme të Auditimit.  

Dokumentet e miratuara janë: Politika e Sistemit të Menaxhimit të Cilësisë,  Udhëzuesi mbi Zbatimin e Procesit të Menaxhimit të Rreziqeve të Cilësisë në ZKA, Udhëzuesi mbi Monitorimin e Sistemit të Menaxhimit të Cilësisë dhe Korrigjimin e Mangësive të Identifikuara në ZKA, Udhëzuesi mbi Vlerësimin e Sistemit të Menaxhimit të Cilësisë në ZKA si dhe Udhëzuesi mbi Rishikimin e Cilësisë së Angazhimit në ZKA.

Miratimi i këtyre dokumenteve siguron një qasje të strukturuar në identifikimin dhe menaxhimin e rreziqeve të cilësisë, monitorimin e funksionimit të sistemit, korrigjimin e mangësive të identifikuara, vlerësimin e përgjithshëm të sistemit, si dhe rishikimin e cilësisë së angazhimeve. Zbatimi i tyre i mundëson ZKA-së të ketë një sistem të dokumentuar dhe të qëndrueshëm për menaxhimin e cilësisë, të bazuar në identifikimin e rreziqeve, monitorimin e vazhdueshëm, vlerësimin e funksionimit të sistemit dhe ndërmarrjen e masave korrigjuese kur është e nevojshme. 

Përmes këtij procesi ZKA-ja synon të avancojë më tej cilësinë e punës audituese dhe të sigurojë që proceset të jenë në përputhje me standardet ndërkombëtare dhe praktikat profesionale të auditimit publik.

 

 

  • Share:

Lexo lajme tjera:

ZKA realizon me sukses sesionet e trajnimeve për sezonin vjeshtor

ZKA realizon me sukses sesionet e trajnimeve për sezonin vjeshtor

Gjatë muajve shtator dhe tetor 2026, Zyra Kombëtare e Auditimit (ZKA) ka realizuar planin e trajnimeve për sezonin vjeshtor, me qëllim të avancimit të njohurive profesionale, ngritjes së kapaciteteve të stafit dhe përmirësimit të vazhdueshëm të cilësisë së punës në institucion. 

Në kuadër të këtij plani, janë organizuar trajnime në fusha të ndryshme profesionale, përfshirë Auditimin Financiar dhe të Pajtueshmërisë, Auditimin e Performancës, Identifikimin dhe Vlerësimin e Rreziqeve, Procedurat Analitike Preliminare dhe Përcaktimin e Materialitetit, përdorimin e sistemit SITA dhe softuerit IDEA, SNISA 140 – Menaxhimi i Cilësisë, Kornizën Ligjore në ZKA dhe Kodin e Etikës. Përmes këtyre trajnimeve, pjesëmarrësit kanë thelluar njohuritë profesionale, kanë diskutuar çështje praktike dhe kanë shkëmbyer përvoja, duke kontribuar në avancimin e aftësive dhe përmirësimin e mëtejshëm të proceseve të auditimit. 

Në kuadër të realizimit të planit të trajnimeve, vëmendje e veçantë i është kushtuar edhe zbatimit të Ligjit për Procedurën e Përgjithshme Administrative, si dhe sigurisë dhe shëndetit në punë. Këto trajnime kanë avancuar njohuritë dhe aftësitë e stafit për zbatimin efektiv të kuadrit ligjor dhe procedural, si dhe rritjen e ndërgjegjësimit për rëndësinë e krijimit dhe ruajtjes së një mjedisi të sigurt dhe të shëndetshëm pune. Të dy trajnimet janë realizuar në bashkëpunim me Institutin e Kosovës për Administratë Publike (IKAP). 

Po ashtu, stafi auditues ka vijuar pjesëmarrjen në aktivitete të tjera të Edukimit të Vazhdueshëm Profesional, të organizuara nga Shoqata e Kontabilistëve të Çertifikuar dhe Auditorëve të Kosovës (ShKÇAK) dhe Instituti AAB, me qëllim të përditësimit të njohurive profesionale dhe zhvillimit të vazhdueshëm të kompetencave në fushën e auditimit. 

Lexo më shumë
Kryetari i KLSh-së vizitoi ZKA-në, riafirmohet bashkëpunimi ndërinstitucional

Kryetari i KLSh-së vizitoi ZKA-në, riafirmohet bashkëpunimi ndërinstitucional

Kryetari i Kontrollit të Lartë të Shtetit të Republikës së Shqipërisë (KLSh), Arben Shehu, të enjten vizitoi Zyrën Kombëtare të Auditimit të Republikës së Kosovës (ZKA), ku u prit nga Auditorja e Përgjithshme, Vlora Spanca, të cilën e uroi për marrjen e mandatit të ri.

Gjatë takimit, znj. Spanca dhe z. Shehu vlerësuan bashkëpunimin e deritanishëm ndërmjet dy institucioneve dhe shprehën gatishmërinë për vazhdimin dhe forcimin e mëtejshëm të tij, në funksion të avancimit të auditimit publik, shkëmbimit të përvojave profesionale dhe promovimit të standardeve të larta të transparencës, llogaridhënies dhe qeverisjes së mirë.

Auditorja e Përgjithshme, Vlora Spanca, vlerësoi vizitën dhe urimet e Kryetarit të KLSh-së, duke theksuar rëndësinë e bashkëpunimit të vazhdueshëm dhe shkëmbimit të përvojave ndërmjet dy institucioneve.

Kryetari i KLSh-së, Arben Shehu, rikonfirmoi gatishmërinë për të vazhduar bashkëpunimin e ngushtë me ZKA-në dhe për të mbështetur iniciativa të përbashkëta që kontribuojnë në zhvillimin e mëtejshëm të auditimit publik.

Po ashtu, gjatë takimit u diskutua për mundësitë e ndërmarrjes së iniciativave të përbashkëta, të cilat do të kontribuonin në përmbushjen e misionit të dy institucioneve, si dhe në rritjen e cilësisë dhe ndikimit të auditimit publik.

Lexo më shumë