Në kuadër të javës kundër korrupsionit, Zyra Kombëtare e Auditimit (ZKA) me mbështetjen e USAID-it mbajti tryezën e punës “Roli i institucioneve publike në luftën kundër korrupsionit,” ku morën pjesë drejtues dhe përfaqësues nga Zyra e Kryeprokurorit të Shtetit, Agjencia për Parandalimin e Korrupsionit, Inspektorati Policor i Kosovës, Komisioni Rregullativ i Prokurimit Publik, GIZ-i si dhe nga shoqëria civile.
Auditorja e Përgjithshme, Vlora Spanca, tha se ky aktivitet përveç rritjes së ndërgjegjësimit për efektet e korrupsionit në menaxhimin e parasë publike ka për qëllim edhe avancimin e bashkëpunimit ndërmjet institucioneve publike që direkt apo indirekt kontribuojnë në luftën kundër korrupsionit. Në këtë kontekst, ajo theksoi se është i domosdoshëm angazhimi i përbashkët i institucioneve që kanë mandat për parandalimin dhe luftimin e korrupsionit.
“Lufta kundër korrupsionit nuk përbën veçse një betejë ligjore apo rregullative, ajo është obligim moral i çdonjërit nga ne për mirëqenien e gjithë qytetarëve tanë. Qartazi, asnjë institucion si i vetëm, nuk mund t’i bëjë ballë e të triumfojë mbi dukurinë e këtillë duke vepruar si i vetëm. Në këtë aspekt, me mandatin që na është dhënë, parandalimi dhe luftimi i këtij fenomeni, me ngulm kërkoj bashkëpunim dhe koordinim efikas dhe efektiv, të ndajmë përvojën dhe burimet që kemi për të korrur rezultatet e duhura në nivele të ndryshme të administratës publike, por dhe shoqërisë në përgjithësi”, deklaroi znj. Spanca.
Auditorja e Përgjithshme foli edhe për marrëveshjen e bashkëpunimit me Kryeprokurorin e Shtetit, marrëveshje që ka për qëllim forcimin e sundimit të ligjit në Republikën e Kosovës. Me objektivën për të kontribuar në rritjen e llogaridhënies dhe transparencës si dhe luftimin e korrupsionit, ajo tregoi se ZKA-ja në baza vjetore dërgon te Prokurori i Shtetit për hetim të mëtutjeshëm raste me elemente potenciale për mashtrim.
Drejtoresha e programit KMI/USAID, Maia Gogoladze, tha se sot kur po diskutojmë për luftën kundër korrupsionit në nivel institucional, le të mos reflektojmë vetëm mbi arritjet e mëparshme, por edhe të angazhohemi për sfidat në vijim. “Udha jonë kolektive nuk është vetëm për auditime dhe struktura ligjore, është për të përmirësuar narrativën e Kosovës në lidhje me integritetin, llogaridhënien dhe transparencën. Le të vazhdojmë këtë udhëtim së bashku me përpjekjen për përmirësim në qeverisje dhe drejtësi për të mirën e qytetarëve”, theksoi Gogoladze.
Prokurori i Zyrës së Kryeprokurorit të Shtetit, Bahri Hyseni, shprehu përkushtimin e vazhdueshëm të këtij institucioni në luftimin e korrupsionit duke përmendur një sërë masash që janë ndërmarrë. Ai tha se luftimi i korrupsionit nuk është mision vetëm i një institucioni publik por i të gjithë neve këtu sot. “Deri më tani janë trajtuar shumë raste dhe kanë marr epilog, por ende ka nevojë për më shumë punë të përbashkët. Prandaj na duhet një bashkëveprim për të pasë më shumë suksese në luftën ndaj korrupsionit”, deklaroi Hyseni. Ai foli edhe për bashkëpunimin në mes të Zyrës së Kryeprokurorit të Shtetit dhe Zyrës Kombëtare të Auditimit, duke thënë se rastet e pranuara nga ZKA-ja janë shpërndarë në prokuroritë themelore dhe ka veprime hetimore që janë duke u marrë në shumicën prej tyre.
Drejtori i Agjencisë për Parandalimin e Korrupsionit (APK), Yll Buleshkaj, pas prezantimit të shkurtër të mekanizmave të APK-së për parandalimin e korrupsionit, theksoi nevojën për bashkërendim të angazhimit ndërinstitucional. “Agjencia për Parandalimin e Korrupsionit është e gatshme dhe e interesuar për koordinim dhe bashkëpunimin ndërinstitucional me qëllim parandalimin me sukses të korrupsionit dhe garantimin e integritetit të institucioneve publike. Pas riorganizimit të strukturës së Agjencisë, bashkëpunimi dhe koordinimi ndërinstitucional do të ngritet në nivel edhe më të lartë”, tha Buleshkaj.
Anëtari i Bordit të Komisionit Rregullativ të Prokurimit Publik (KRPP), Avni Sahiti, përmendi arritjet që janë bërë në fushën e prokurimit publik, megjithatë, sipas tij, nuk janë të mjaftueshme nëse nuk ka koordinim dhe përfshirje të institucioneve që janë të thirrura në parandalim dhe luftën kundër korrupsionit. “Në emër të KRPP-së rikonfirmoj gatishmërinë e lartë për bashkëpunim të mëtutjeshëm, për të promovuar parimet e qeverisjes së mirë dhe për të fuqizuar transparencën dhe llogaridhënien e të gjitha institucioneve publike. Gjithashtu edhe Raporti i Progresit të KE për Kosovën edhe këtë vit thekson rëndësinë e bashkëpunimit të ngushtë midis institucioneve të prokurimit, për të siguruar një zbatim të vazhdueshëm e të qëndrueshëm të kornizës rregullative në fushën e prokurimit publik, rritjes dhe forcimit të kapaciteteve të këtyre institucioneve”, tha Sahiti.
Kryeshefi i Inspektoratit Policor të Kosovës, Kushtrim Hodaj, foli për aktivitetet në të cilat angazhohet IPK-ja në luftimin e korrupsionit dhe rezultatet e arritura në hetimin e zyrtarëve të përfshirë në korrupsion. “Këto dy vitet e fundit kemi pas rezultate të mira, ndoshta më të mëdhatë që nga themelimi i IPK-së”, deklaroi ai. Gjithashtu Hodaj theksoi rëndësinë e mbajtjes së aktivitete të tilla sikurse tryeza e sotme që forcojnë bashkëpunimin dhe rrisin efikasitetin e organeve të zbatimit të ligjit në parandalimin e korrupsionit.
Drejtori i Rrjetit të OJQ-ve AVONET, Kenan Gashi, tha se takimet e tilla janë të dobishme dhe duhet të rritet bashkëpunimi në mes të institucioneve përgjegjëse për luftimin e korrupsionit. Ai tha se raportet e auditimit të ZKA-së kanë fakte të mjaftueshme për hetime të mëtutjeshme. “Duhet të trajtohen në mënyrë të barabartë zyrtarët nga niveli qendror po ashtu dhe ata të nivelit lokal. Po ashtu duhet të rriten masat ndëshkimore ndaj shkelësve të ligjit”, deklaroi Gashi.
Në mbyllje të tryezës Auditorja e Përgjithshme, Vlora Spanca, falënderoi drejtuesit dhe përfaqësuesit e institucioneve pjesëmarrëse për kontributin e dhënë duke shprehur përkushtimin e saj për rritje të bashkëpunimit i cili ka një qëllim të përbashkët: parandalimin dhe luftimin e korrupsionit.
