republika-e-kosoves
Thank you! Your submission has been received!
Oops! Something went wrong while submitting the form.
Shqip
6/8/2022 4:29:10 PM

Komisioni për Buxhet, Punë dhe Transfere miratoi Raportin Vjetor Financiar të ZKA-së për vitin 2021

Sot, Komisioni për Buxhet, Punë dhe Transfere (KBPT) ka vazhduar punimet nga mbledhja e së premtes, 3 qershor 2022, ku në rend të ditës përveç tjerash ishte edhe votimi i  Raportit Vjetor Financiar i Zyrës Kombëtare të Auditimit (ZKA) për vitin 2021 si dhe shqyrtimi i kërkesës së ZKA-së për vendosjen në objekt publik. Auditorja e Përgjithshme, Vlora Spanca, në mbledhjen e së premtes ka prezantuar dhe arsyetuar në mënyrë të detajuar raportin, duke u fokusuar në strukturën e buxhetit, qëllimet e përdorimit dhe rezultatet e arritura. Znj. Spanca ka bërë me dije se krahasuar me vitin paraprak, si dhe në bazë të një analize të përgjithshme të shpenzimeve dhe përmbushjes së detyrave audituese sipas Planit Vjetor të Auditimit, gjatë vitit 2021, shpenzimet janë më të ulëta për rreth 11 për qind. Në uljen e shpenzimeve ka ndikuar përfundimi i projektit “Softueri për menaxhimin e auditimit - SITA” si dhe situata e krijuar nga pandemia COVID-19, ku në masë të madhe shpenzimet janë kufizuar, por edhe racionalizuar. Tutje Auditorja e Përgjithshme ka treguar para deputetëve se kategoria ekonomike për Paga dhe mëditje, tërheq përqindjen më të madhe të shpenzimit të ZKA-së prej 80%; Mallra dhe shërbime 17.0%; Shërbimet komunale 1.3%; si dhe Shpenzimet kapitale 1.7%. Znj. Spanca ka thënë se shqetësim serioz vazhdon të jetë qiraja e objektit e cila tërheq përqindjen më të madhe të shpenzimit të kategorisë Mallra dhe Shërbime prej 35.4%. Ajo ka kërkuar nga Kuvendi që ta adresojë këtë çështje në mënyrë që të bëhet një zgjidhje për vendosjen e përhershme të ZKA-së në një objekt shtetëror dhe këto shpenzime të mos jenë barrë as për ZKA-në dhe as për buxhetin e shtetit. Gjithashtu, ajo ka njoftuar se përveç qirasë së objektit, vlerë të theksuar të shpenzimit tërheq edhe mirëmbajtja e sistemit elektronik të auditimit (SITA), i cili mundëson që puna audituese të kryhet me efikasitet dhe cilësi si dhe ofron siguri në procesin auditues. Tutje duke folur për aktivitetin dhe punën e ZKA-së, znj. Spanca ka thënë se nuk ka pasur mundësi të plotësohen nevojat me staf shtesë për shkak të deficiti buxhetor të akumuluar ndër vite. Sipas Auditores së Përgjithshme për të parandaluar trendin e menaxhimit me deficit buxhetor dhe për të vendosur kontrolle adekuate është rishikuar struktura organizative, janë shuar disa pozita të cilat janë konsideruar të panevojshme, janë fuzionuar disa njësi të departamenteve mbështetëse si dhe është formuar një departament i veçantë për planifikimin e punës dhe orientimin strategjik të ZKA-së. Po ashtu Auditorja e Përgjithshme i ka njoftuar deputetët se gjatë vitit 2021, ZKA-ja ka përfunduar dhe publikuar 131 raporte të auditimit, katër më shumë se në vitin paraprak. Në mbledhjen e sotme Komisioni ka miratuar Raportin Vjetor Financiar të Zyrës Kombëtare të Auditimit për vitin 2021, ndërsa si pikë e veçantë e rendit të ditës ka qenë edhe shqyrtimi i kërkesës së Zyrës Kombëtare të Auditimit për vendosjen në objekt publik. Me këtë rast, Auditorja e Përgjithshme, Vlora Spanca, ka kërkuar nga Komisioni që të aprovohet kërkesa e ZKA-së në mënyrë që shpenzimet e përvitshme për qiranë e objektit të mos jenë barrë e vazhdueshme për ZKA-në dhe buxhetin e shtetit. Znj. Spanca gjatë arsyetimit të kësaj kërkese, ka treguar se aktualisht vlera e kontratës mujore për objektin e ZKA-së në lagjen Arbëria, është 13 mijë e 500 euro, ndërsa 162 mijë euro për një vit. Auditorja e Përgjithshme, ka theksuar se kontrata për qira të objektit është pesëvjeçare por mund të ndërpritet kurdo që të gjendet një zgjidhje. “Përkundër adresimit të vazhdueshëm të kësaj çështjeje ende nuk është bërë ndonjë zgjidhje për vendosje të përhershme në një objekt shtetëror. Meqë ZKA-ja është institucion që mbikëqyret dhe mbështetet nga Kuvendi, shfrytëzoj rastin që të kërkoj nga ju adresimin e kësaj çështje, në mënyrë që njëherë e përgjithmonë, kjo zyre të dal nga objektet private”, është shprehur Spanca. “Përveç tjerash, operimi i ZKA-së në objekte me qira e ekspozon këtë Institucion me rrezikim të imazhit dhe pavarësisë se tij për shkak të ndjeshmërisë që bart, roli dhe misioni i tij”, ka theksuar Auditorja e Përgjithshme. Anëtarët e Komisionit njëzëri mbështetën rekomandimin, i cili i dërgohet Kryesisë së Kuvendit, Qeverisë së Republikës së Kosovës dhe Ministrisë së Punëve të Brendshme, që në një afat sa më të shpejtë të gjendet një objekt publik për vendosjen e ZKA-së.

  • Share:

Lexo lajme tjera:

Auditimi konstaton mangësi në menaxhimin e fondeve publike dhe raportimin financiar në RTK
02/06/2022

Auditimi konstaton mangësi në menaxhimin e fondeve publike dhe raportimin financiar në RTK

Zyra Kombëtare e Auditimit (ZKA) sot ka publikuar Raportin e  Auditimit të  Pasqyrave Vjetore Financiare për  Radio Televizioni i Kosovës (RTK) për vitin 2021 si dhe Raportin e  auditimit të performancës me temën “Menaxhimi i fondeve publike në Radio Televizionin e Kosovës”. Auditorja e Përgjithshme, Vlora Spanca, lidhur me këto raporte ka theksuar se kërkohen veprime të menjëhershme nga RTK-ja për adresimin e rekomandimeve të dhëna meqë auditimet e kryera në Radio Televizionin e Kosovës kanë identifikuar mangësi thelbësore lidhur me raportimin financiar si dhe në menaxhimin e fondeve publike të dedikuara për burimet njerëzore dhe programet vendore. “Fondet publike duhet të menaxhohen me kujdes dhe përgjegjshmëri të plotë dhe raportimi financiar duhet të reflektojë prezantimin e drejtë dhe të vërtetë të pozitës financiare të Radio Televizionit të Kosovës”, ka deklaruar znj. Spanca. Në raportin e auditimit për Pasqyrat Vjetore Financiare të RTK-së për vitin 2021 është dhënë Opinion i kundërt i auditimit, ndërsa për transaksionet e kryera në procesin e ekzekutimit të buxhetit të RTK-së  është dhënë Konkluzion i Kualifikuar. Çështjet që kanë ndikuar në dhënien e Opinionit të Kundërt kanë të bëjnë me parregullsitë  në kompensimin e kontratave, mospranimin e letër konfirmimeve nga furnitorët, mënyrën e trajtimit të pasurive të paprekshme, trajtimin jo të duhur të obligimeve ndaj furnitorëve, pagesa të parregullta për shujtat etj. Ndërsa, çështja që ka ndikuar në dhënien e Konkluzionit të Kualifikuar ka të bëjë me pagesat e parregullta për shtesat dhe shpërblimet e punëtorëve të RTK-së. Përderisa çështjet  tjera kyçe të menaxhimit financiar dhe kontrolleve, janë shoqëruar me mangësi  dhe parregullsi siç janë: mos shpalosja e padive gjyqësore, mos prezantimi i plotë i pasurive në regjistrin e pasurive, etj. Për të adresuar këto çështje, në këtë raport, janë dhënë 17 rekomandime për Bordin dhe Menaxhmentin e Radio Televizionit të Kosovës. Ndërsa Raporti i auditimit të performancës “Menaxhimi i fondeve publike në Radio Televizionin e Kosovës”, ka mbuluar aspektin e burimeve njerëzore, duke përfshirë stafin aktual, nevojat për rekrutim të stafit shtesë, dhe angazhimin e bashkëpunëtorëve të jashtëm. Gjithashtu është mbuluar edhe kontraktimi i  programeve të prodhuara vendore nga producentë të jashtëm. Ky auditim përfshinë periudhën 2019-2021. Auditimi ka konstatuar se kontrolli i dobët mbi menaxhimin e stafit të rregullt duke mos respektuar edhe vendimet e Bordit nga ana e menaxhmentit, i ka kushtuar Radio Televizionit të Kosovës keq menaxhim financiar në vlerë prej 806,898 euro për tre vite. Rezultatet e auditimit tregojnë se angazhimi i stafit të rregullt nuk ishte bërë sipas projeksioneve buxhetore dhe nuk ishin respektuar procedurat e rekrutimit. Mbi 70% e angazhimeve të punëtorëve janë lidhur për pozita të rregullta pa një proces transparent dhe konkurrues duke mos shpallur konkurs publik, në anën tjetër këta persona nuk kanë gëzuar të drejtat e punëtorëve të rregullt si pushimin vjetor, shujta etj.  Sistemimi dhe avancimi i stafit të Radio Televizionit të Kosovës është përcjell me mangësi të shumta, në raste të caktuara duke shpërfillur vendimet e Bordit dhe  shkaktuar kosto shtesë. Gjithashtu, nuk është bërë vlerësim i detajuar për nevojat e programeve të jashtme nga drejtorët programor dhe nuk janë marrë për bazë disa nga kriteret për përzgjedhjen e këtyre programeve. Me qëllim që RTK-ja të krijojë një sistem të përshtatshëm i cili siguron në mënyrë efektive menaxhimin e stafit dhe programeve vendore, në raportin e auditimit të performancës “Menaxhimi i fondeve publike në Radio Televizionin e Kosovës”, ZKA-ja ka dhënë nëntë rekomandime për Bordin dhe Menaxhmentin e RTK-së. Raportin e plotë të auditimit për Pasqyrat vjetore financiare të Radio Televizionit të Kosovës për vitin 2021 e gjeni këtu. Raportin e plotë të auditimit të performancës “Menaxhimi i fondeve publike në Radio Televizionin e Kosovës” e gjeni këtu.  
Lexo më shumë
Auditori rekomandon përmirësime në sigurinë dhe kualitetin e të dhënave në Sistemin Informativ të Gjendjes Civile në Kosovë
09/06/2022

Auditori rekomandon përmirësime në sigurinë dhe kualitetin e të dhënave në Sistemin Informativ të Gjendjes Civile në Kosovë

-Të dhënat personale të qytetarëve duhet të jenë të mbrojtura dhe mos të ketë ndërprerje të shërbimeve elektronike Zyra Kombëtare e Auditimit (ZKA)  ka publikuar raportin e auditimit të teknologjisë së informacionit “Sistemi Informativ i Gjendjes Civile në Agjencinë e Regjistrit Civil”.  Ky auditim kishte për qëllim vlerësimin e administrimit, sigurisë, integritetit si dhe menaxhimin e të dhënave në sistemin informativ të gjendjes civile të Republikës së Kosovës. Pavarësisht zhvillimeve dhe avancimit të vazhdueshëm në Sistemin Informativ të Gjendjes Civile, rezultatet e auditimit kanë treguar se Agjencia e Regjistrit Civil (ARC) nuk ka të vendosur mekanizma të përshtatshëm dhe funksional të Qeverisjes së Teknologjisë së Informacionit. Struktura dhe kontrollet në operacionet e TI-së nuk janë përcaktuar mirë duke ekspozuar kështu organizatën ndaj rrezikut për arritjen e objektivave, sigurimin e vazhdimësisë së operimit të sistemeve informative dhe shfrytëzimin e pajisjeve elektronike. Ndonëse në vazhdimësi ARC-ja ka bërë përpjekje për ta përmirësuar gjendjen, ZKA, ka konkluduar se kjo Agjenci, në raste të caktuara nuk ka kontrolle të mjaftueshme dhe monitorim për të mbrojtur sigurinë e informacionit të Sistemit të Gjendjes Civile (SGJC) në rrjete si dhe nuk ka kontrolle në qasjen e përdoruesve në sisteme, duke rritur rrezikun e ndërhyrjeve të paautorizuara në sisteme, ndërprerjen e shërbimeve, rrjedhjen e informacionit dhe mos sigurimin e mbrojtjes së të dhënave personale. Po ashtu ARC-ja në mungesë të një strukture të qartë të funksionit të TI-së, nuk ka arritur të përcaktoj rolet dhe përgjegjësitë për menaxhimin dhe administrimin e sistemeve të informacionit duke shkaktuar dyfishim dhe konflikt të përgjegjësive. Auditimi ka venë në pah se sistemi për mbrojtjen dhe sigurinë e informacionit që zbatohet në ARC nuk garanton mjaftueshëm vazhdimësinë e sistemit dhe integritetin e të dhënave në çdo kohë. Po ashtu, ekziston rreziku që në rast të ndonjë fatkeqësie natyrore apo dështimit të sistemit, ARC-ja nuk mund t’i rikthejë të dhënat e nevojshme kritike në kohë optimale duke rritur rrezikun e humbjes së të dhënave dhe dhënies së shërbimeve. Gjithashtu, konsullatat në kuadër të Ministrisë së Punëve të Jashtme dhe Diasporës, dhe Komuna e Prishtinës si përdorues të sistemit nuk garantojnë të kenë ruajtur si duhet integritetin dhe konfidencialitetin e të dhënave të vendosura në sistem. Sipas gjetjeve të këtij auditimi, kontrollet e aplikacionit që zbatohen në SGjC, nuk sigurojnë se në sistem vendosen dhe azhurnohen vetëm të dhëna të sakta dhe të vlefshme. Për rrjedhojë, ka qytetarë të cilët janë të regjistruar nga dy herë,  janë të pajisur me dy numra personal si dhe ka qytetarë të regjistruar me numër të njëjtë të Librit të Regjistrit Civil. Gjithashtu, ka mungesë të ndërlidhjes së SGjC-së me bazën e të dhënave të Agjencisë Kadastrale për regjistrim të adresës. Lidhur me këtë auditim, Auditorja e Përgjithshme, Vlora Spanca, ka kërkuar vëmendjen e institucioneve përgjegjëse që t’i ndërmarrin veprimet e nevojshme për të siguruar se të dhënat personale të qytetarëve janë të mbrojtura, siç kërkohet me legjislacionin në fuqi, si dhe vazhdimësia e pandërprerë e shërbimeve elektronike për qytetarët është e sigurt. Me qëllim të përmirësimit të shërbimeve të teknologjisë së informacionit, Zyra Kombëtare e Auditimit përmes raportit të auditimit ka dhënë 27 rekomandime për Ministrinë e Punëve të Brendshme dhe Agjencinë e Regjistrit Civil, përfshirë këtu një për Agjencinë e Shoqërisë së Informacionit, tri për Ministrinë e Punëve të Jashtme dhe Diasporës si dhe tri për komunën e Prishtinës dhe Prizrenit. Raportin e plotë të auditimit të teknologjisë së informacionit “Sistemi Informativ i Gjendjes Civile në Agjencinë e Regjistrit Civil” e gjeni këtu.  
Lexo më shumë