Auditorja e Përgjithshme, Vlora Spanca, ka uruar qytetarët për 17-vjetorin e shpalljes së Pavarësisë së Republikës së Kosovës, duke theksuar sakrificën e madhe për liri dhe shtetndërtim.

“Ky është një moment historik që na kujton sakrificat e shumta dhe angazhimin e palodhshëm të atyre që kanë dhënë gjithçka për të arritur lirinë dhe pavarësinë. Gjatë këtyre 17 viteve, Kosova ka arritur të ndërtoj shtetin dhe të forcojë institucionet e tij. Kjo ka kërkuar shumë mund, kohë dhe përpjekje nga të gjithë”, tha znj. Spanca.

Ajo vlerësoi progresin e bërë në forcimin e institucioneve dhe ka riafirmuar rëndësinë e auditimit publik në rritjen e transparencës dhe llogaridhënies. Znj. Spanca theksoi se auditimi i jashtëm është mbështetja kryesore për një administratë publike të përgjegjshme dhe demokratike, si dhe ka rol të rëndësishëm në forcimin e shtetit të Kosovës.  

Në këtë ditë të shënuar, Auditorja e Përgjithshme ka pranuar telegram urimi nga Kryetari i Kontrollit të Lartë të Shtetit të Republikës së Shqipërisë, Arben Shehu, i cili shpreh urimet më të përzemërta për punonjësit e ZKA-së dhe qytetarët e Kosovës. “Kjo ditë historike është një moment krenarie mbi rrugëtimin e Kosovës drejt shtetformimit dhe demokracisë. Guximi dhe sakrificat e popullit shqiptar të Kosovës për liri dhe pavarësi frymëzojnë brezat dhe janë një dëshmi e forcës së vullnetit për të ndërtuar një shtet të fortë dhe të begatë” thekson Shehu.

Në 17-vjetorin e Pavarësisë së Kosovës Auditorja e Përgjithshme ka pranuar telegram urimi edhe nga Presidenti i Gjykatës Turke të Llogarive, Metin Yener, i cili ka uruar qytetarët e Kosovës si dhe ka shprehur mbështetje dhe vlerësim për bashkëpunimin mes dy institucioneve.

Zyra Kombëtare e Auditimit e Kosovës (ZKA) dhe Kontrolli i Lartë i Shtetit i Shqipërisë (KLSH) mbajtën sot takim pune në kuadër të auditimit paralel të performancës për mbrojtjen dhe sigurinë e digave në të dyja vendet.

Takimi i mbajtur në ambientet e ZKA-së në Prishtinë synon thellimin e bashkëpunimit ndërmjet dy institucioneve të auditimit dhe shkëmbimin e përvojave për të përmirësuar kontrollin dhe sigurinë e infrastrukturës së digave.

Takimi u hap me fjalët përshëndetëse të Auditores së Përgjithshme, Vlora Spanca, dhe të Kryetarit të KLSH-së, Arben Shehu, të cilët theksuan rëndësinë e këtij bashkëpunimi për rritjen e transparencës dhe efikasitetit në auditimet publike.

“Është kënaqësi e veçantë të realizojmë auditimin e tretë paralel me Kontrollin e Lartë të Shtetit, përmes të cilit kemi edhe një mundësi të shkëlqyer për të forcuar më tej marrëdhëniet dhe bashkëpunimin ndërmjet dy institucioneve tona,” theksoi Auditorja e Përgjithshme, Vlora Spanca.

“Është jashtëzakonisht e rëndësishme që të mbesim prezentë dhe të ofrojmë kontributin tonë të mirëfilltë, në ZKA dhe KLSH, si në Shqipëri ashtu edhe në Kosovë,” u shpreh Kryetari i KLSH-së Arben Shehu.

Më tutje përgjatë takimit, ekipet audituese të ZKA-së dhe KLSH-së prezantuan analizat e tyre për gjendjen e digave në Kosovë dhe Shqipëri, sfidat dhe mundësitë për përmirësim. Diskutimet u fokusuan në planifikimin e auditimit paralel, i cili do të ndihmojë në identifikimin e dobësive dhe forcimin e mekanizmave të kontrollit mbi sigurinë e digave.

Në takim ishin të pranishëm, nga ana e ZKA-së, Zëvendës Auditori i Përgjithshëm, Bezad Halilaj, Ndihmës Auditorja e Përgjithshme, Myrvete Gashi Morina, Drejtori i Auditimit, Samir Zymberi si dhe Udhëheqësja e Ekipit të auditimit, Alba Keqa. Ndërsa nga ana e KLSH-së të pranishëm ishin Sekretarja e Përgjithshme, Valbona Gaxha, Ardian Myslimaj, Këshilltar, Joana Troqe, Drejtore e Departamentit të Auditimit, dhe Xhesika Xhuveli, Drejtore e Komunikimit.

Ky aktivitet shënon vazhdimin e bashkëpunimit në mes të ZKA-së dhe KLSH-së për të forcuar llogaridhënien dhe transparencën në menaxhimin e resurseve publike.