Zyra Kombëtare e Auditimit (ZKA) ka filluar auditimin e teknologjisë së informacionit me  temën “Platforma e shërbimeve online e-Kosova”, që është pjesë e Planit Vjetor të Auditimit për periudhën 2024/2025. Përmes këtij auditimi ZKA synon të vlerësojë nëse platforma e-Kosova iu ofron qytetarëve shërbime elektronike efikase, të sakta, të sigurta dhe të besueshme.   

Fushëveprimi i auditimit përfshinë Agjencinë për Shoqërinë e Informacionit (AShI), e cila administron dhe menaxhon platformën e-Kosova, si dhe Ministrinë e Financave, Punës dhe Transfereve, me departamentet për Tatimin në Pronë dhe Menaxhimin e Skemave Sociale, të cilat ofrojnë shërbime përkatëse përmes platformës.

e-Kosova është një prej sistemeve më të rëndësishme digjitale shtetërore, që ka për qëllim të modernizojë administratën publike, duke zvogëluar varësinë nga sportelet fizike dhe duke rritur transparencën e institucioneve. Pavarësisht progresit në digjitalizimin e shërbimeve, siguria e informacionit dhe integriteti i të dhënave mbeten thelbësore për besimin e qytetarëve në platformën e-Kosova.

Prandaj auditimi do të vlerësojë kontrollet e aplikacionit dhe masat e sigurisë së informacionit nëse platforma ofron mbrojtje adekuate dhe garanton funksionalitet.

Në kuadër të nismës për angazhimin e Zyrës Kombëtare të Auditimit (ZKA) në auditime të fondeve të BE-së, përkatësisht Instrumentit të BE-së për Reforma dhe Rritje Ekonomike për Ballkanin Perëndimor, Zyra e Kryeministrit, në bashkëpunim me ZKA-në, të enjten mbajtën punëtorinë online për të diskutuar fillimin e procesit të angazhimit dhe modalitetet përcjellëse. Objektivi kryesor i punëtorisë ishte auditimi dhe përgatitja e “Përmbledhjes se auditimeve” në kuadër të raportimit gjashtëmujor te Qeverisë se Republikës se Kosovë tek Komisioni Evropian për sa i përket përmbushjes se reformave të Agjendës së Reformave të Kosovës.  

Punëtoria pati për qëllim të forcojë kapacitetet institucionale dhe të sigurojë një qasje më efektive ndaj kërkesave të BE-së për monitorimin e reformave në kuadër të Instrumentit të BE-së për Reforma dhe Rritje Ekonomike për Ballkanin Perëndimor. 

Në hapje të punëtorisë, Zëvendës Auditori i Përgjithshëm, Bezad Halilaj, theksoi rëndësinë e transparencës dhe llogaridhënies në procesin e raportimit, duke shtuar se kjo punëtori ndihmon ZKA-në të rris njohuritë profesionale dhe të harmonizojë përmbledhjet e auditimeve me kërkesat e Komisionit Evropian, duke rritur cilësinë e raportimeve.

Ekspertja nga Agjencia Kroate për Auditimin e Sistemit të Zbatimit të Programeve të BE-së (ARPA), Marina Mandac prezantoi përvojën e shtetit të Kroacisë dhe standardet profesionale të kërkuara nga Komisioni Evropian për auditimin e fondeve të BE-së. Diskutimet u fokusuan në strukturën dhe metodologjinë e përmbledhjes së auditimeve, si dhe në procedurat e punës për raportimin gjashtëmujor.

Pjesë e punëtorisë ishin edhe përfaqësues nga GIZ-i, përkatësisht Asistenca teknike për mbështetje dhe implementim të Reformës se Menaxhimit të Financave Publike në Kosovë si dhe përfaqësues nga Qeveria e Republikës se Kosovës të përfshirë në procesin e angazhimit për reforma të agjendës evropiane.