Më 26 dhe 27 mars 2025 në Varshavë të Polonisë u mbajt takimi i Zyrtarëve ndërlidhës të Rrjetit të Institucioneve Supreme të Auditimit të vendeve kandidate dhe kandidate të mundshme për anëtarësim në Bashkimin Evropian, me pjesëmarrjen e SIGMA, Gjykatës Evropiane të Auditorëve dhe Grupit për Aktivitete të Përbashkëta në Auditim (JWGAA), si dhe takimi i Zyrtarëve Ndërlidhës të Komitetit të Kontaktit.  Në këtë takim mori pjesë edhe Drejtoresha e Departamentit për Komunikim dhe Bashkëpunim Ndërkombëtar, Qendresa Mulaj.  

Në takimin e Rrjetit, pjesëmarrësit diskutuan dhe u dakorduan për planin kohor të aktiviteteve për vitin 2025, siç janë punëtoria për menaxhimin e cilësisë dhe zbatimin e ISSA 140, programin e trajnimit për auditorët e performancës si dhe shqyrtimin e mundësive për organizimin e punëtorisë për auditimet e mjedisit sipas agjendës së qëllimeve për zhvillim të qëndrueshëm dhe  punëtorisë për mbështetjen e TI-së në proceset e auditimit si dhe auditimi i TI-së.

Po ashtu në këtë takim është shqyrtuar identifikimi i nevojave dhe temat me prioritet për planin e ri të bashkëpunimit në kuadër të Rrjetit si dhe veprimet për përgatitjen e takimit të ardhshëm të Presidentëve.  

Ndërsa në takimin e zyrtarëve ndërlidhës të ISA-ve të BE-së, u diskutua rreth përgatitjeve të  mbledhjes së Komitetit të Kontaktit që do të mbahet në Maltë në nëntor 2025. Pjesëmarrësit po ashtu rishikuan Kornizën e Bashkëpunimit të Komitetit të Kontaktit, përditësimet në faqen zyrtare të Komitetit dhe temat kyçe si auditimet bashkëpunuese, rolin e ISA-ve në kuadrin financiar shumëvjeçar të BE-së dhe deklaratën mbi Bankën Evropiane të Investimeve (EIB).

Këto takime mbahen në baza të rregullta vjetore dhe kanë për qëllim koordinimin e aktiviteteve në kuadër të Rrjetit dhe Komitetit të Kontaktit. Po ashtu janë një mundësi e rëndësishme për shkëmbimin e përvojave dhe forcimin e bashkëpunimit midis ISA-ve me qëllim të rritjes së transparencës dhe efektivitetit të auditimit publik në Evropë.

Në datat 24-28 mars 2025, u mbajt kursi online “Zotërimi i aftësive të vizualizimit dhe raportimi efektiv për auditorët”, i organizuar nga Qendra për Ekselencë në Financa (CEF). Në këtë aktivitet morën pjesë katër përfaqësuese të Zyrës Kombëtare të Auditimit (ZKA), duke përfshirë auditoren seniore Nora Rashiti Nishefci, e cila ishte folëse në kurs dhe ndau përvojën institucionale mbi përmirësimin e komunikimit të gjetjeve të auditimit.

Gjatë prezantimit të saj, znj. Rashiti Nishefci tregoi për reformat e ndërmarra nga ZKA, duke përfshirë përdorimin e gjuhës së thjeshtë, përmirësimin e strukturës së raporteve dhe integrimin e elementeve vizuale, me qëllim që raportet të jenë më të qarta dhe më të lehta për t’u kuptuar nga publiku. Ajo paraqiti shembuj konkretë të ndryshimeve të aplikuara dhe theksoi nismat kryesore si: emërimi i ambasadorëve të gjuhës së thjeshtë, zbatimi i softuerit të auditimit SITA, angazhimi i dizajnerit grafik, trajnimet e vazhdueshme për auditorët si dhe bashkëpunimi me Institucionet Supreme të Auditimit. 

Edhe përfaqësueset e tjera të ZKA-së, Auditorja Alba Keqa, Dizajnerja Grafike Dafina Visoka, dhe Zyrtarja për Komunikim me Publikun, Shqipe Hetemi ndoqën kursin dhe kontribuuan në grupet punuese dhe detyrat e kursit, duke ndarë njohuritë dhe përvojat mbi vizualizimin dhe raportimin efektiv në auditim.