Në datat 24-28 mars 2025, u mbajt kursi online “Zotërimi i aftësive të vizualizimit dhe raportimi efektiv për auditorët”, i organizuar nga Qendra për Ekselencë në Financa (CEF). Në këtë aktivitet morën pjesë katër përfaqësuese të Zyrës Kombëtare të Auditimit (ZKA), duke përfshirë auditoren seniore Nora Rashiti Nishefci, e cila ishte folëse në kurs dhe ndau përvojën institucionale mbi përmirësimin e komunikimit të gjetjeve të auditimit.

Gjatë prezantimit të saj, znj. Rashiti Nishefci tregoi për reformat e ndërmarra nga ZKA, duke përfshirë përdorimin e gjuhës së thjeshtë, përmirësimin e strukturës së raporteve dhe integrimin e elementeve vizuale, me qëllim që raportet të jenë më të qarta dhe më të lehta për t’u kuptuar nga publiku. Ajo paraqiti shembuj konkretë të ndryshimeve të aplikuara dhe theksoi nismat kryesore si: emërimi i ambasadorëve të gjuhës së thjeshtë, zbatimi i softuerit të auditimit SITA, angazhimi i dizajnerit grafik, trajnimet e vazhdueshme për auditorët si dhe bashkëpunimi me Institucionet Supreme të Auditimit. 

Edhe përfaqësueset e tjera të ZKA-së, Auditorja Alba Keqa, Dizajnerja Grafike Dafina Visoka, dhe Zyrtarja për Komunikim me Publikun, Shqipe Hetemi ndoqën kursin dhe kontribuuan në grupet punuese dhe detyrat e kursit, duke ndarë njohuritë dhe përvojat mbi vizualizimin dhe raportimin efektiv në auditim. 

Me ftesë të Kryetarit të Kontrollit të Lartë të Shtetit (KLSH), Arben Shehu,  Auditorja e Përgjithshme, Vlora Spanca, së bashku me përfaqësues nga të dy institucionet, zhvilluan një vizitë kulturore në qytetin e Vlorës, që shënon hapjen e aktiviteteve për kremtimin e 100-vjetorit të krijimit të Kontrollit të Lartë të Shtetit.    

Takimi ndërmjet përfaqësuesve të dy institucioneve dhe vizita në Muzeun e Pavarësisë në Vlorë u karakterizuan me shpalosjen e historisë se shpalljes se Pavarësisë dhe shtetformimit shqiptar, që shënon njëkohësisht momentin e krijimit te institucioneve shtetërore, zhvillimin e tyre ndër vite dhe rëndësinë e menaxhimit të qëndrueshëm të financave publike.  

Znj. Spanca përgëzoi homologun e saj dhe KLSH-në për përvjetorin jubilar, duke vlerësuar kontributin njëqindvjeçar të këtij institucioni në shërbim të shtetit dhe qytetarëve.  

Pjesë e delegacionit të ZKA-së ishin edhe Zëvendës Auditori i Përgjithshëm Bezad Halilaj, Ndihmës Auditori i Përgjithshëm Agron Fetiu dhe Drejtoresha e Departamentit të Auditimit, Blerina Krasniqi.  

Kontrolli i Lartë i Shtetit të Shqipërisë u themelua me Statutin Themeltar të Shtetit Shqiptar (Kushtetuta) në vitin 1925. Ndër vite KLSh-ja ka pësuar reformime institucionale por gjithmonë duke ruajtur misionin e vet themelor, garantimin e përdorimit të drejtë dhe efikas të fondeve publike.