Zyra Kombëtare e Auditimit të Kosovës (ZKA) vazhdon të japë kontribut në ndërtimin e kapaciteteve profesionale në nivel rajonal. Specialisti i auditimit të  performancës, Arben Selimi, mori pjesë si mentor në programin rajonal të trajnimit për auditim të performancës, të organizuar nga Zyra Kombëtare e Auditimit të Suedisë (SNAO) në Sarajevë në javën e parë të prillit 2025.

Trajnimi bashkoi pjesëmarrës nga Institucionet Supreme të Auditimit nga Kosova, Shqipëria, Maqedonia e Veriut, Bosnje dhe Hercegovina, Serbia, Gjeorgjia, Ukraina dhe Moldavia. Programi trajnues ka për synim zhvillimin e aftësive të auditorëve të rinj për auditime të performancës në përputhje me standardet e INTOSAI-t. Ky program përfshin metoda bashkëkohore të të mësuarit, punë praktike në grup dhe shkëmbim të përvojës profesionale.

Përmes rolit të tij si mentor, z. Selimi gjatë trajnimit ofroi udhëzime teorike dhe praktike, duke ndarë përvojën dhe ekspertizën e tij shumëvjeçare, për t’i ndihmuar auditorët në zhvillimin e aftësive metodologjike, analitike dhe komunikuese në auditimet e performancës.

Angazhimi i z. Selimit në këtë program si mentor përfaqëson një vlerësim të rolit të tij dhe të ZKA-së në promovimin e standardeve të larta profesionale dhe bashkëpunimit ndërkombëtar në fushën e auditimit të performancës. 

Këtë trajnim do ta ndjekin edhe auditorët, Edona Abazi, Verona Sekiraqa, Gezim Krasniqi dhe Gazmend Namani, të cilët pas përfundimit me sukses të detyrave të programit do të çertifikohen.

ZKA-ja ka 18 auditorë të çertifikuar për auditime të performancës në këtë program. 

Drejtori i Departamentit të Auditimit të Teknologjisë së Informacionit në Zyrën Kombëtare të Auditimit (ZKA), Samir Zymberi, dhe auditorja seniore për Teknologji të Informacionit, Poliksena Berisha, kanë përfunduar me sukses programin dyvjeçar “Pionierët përmes Avancimit të Teknologjisë (LOTA Pioneers)”, të organizuar nga Iniciativa për Zhvillim e INTOSAI-t.  

Programi LOTA Pioneers synon të zhvillojë agjentë ndryshimi brenda Institucioneve Supreme të Auditimit (ISA), për t’i ndihmuar ato në përdorimin e teknologjisë në auditim dhe në vlerësimin e mënyrës se si qeveritë aplikojnë teknologjinë në ofrimin e shërbimeve publike. 

Auditorja e Përgjithshme, Vlora Spanca, ka përgëzuar z. Zymberi dhe znj. Berisha për përfundimin me sukses të këtij programi të rëndësishëm profesional dhe për rolin e tyre udhëheqës në zhvillimin e planeve strategjike dhe realizimin e auditimeve në fushën e teknologjisë së informacionit.   

Pjesëmarrja dhe angazhimi i auditorëve të ZKA-së në “LOTA Pioneers” pasqyron përkushtimin e ZKA-së për të avancuar më tej qasjen teknologjike në auditim dhe për të ndërtuar ekipe profesionale që udhëheqin me njohuri të avancuara në këtë fushë.