Kontrolli i Lartë i Shtetit i Republikës së Shqipërisë festoi 100-vjetorin e themelimit të martën me një ceremoni solemne të mbajtur në sallën e seancave plenare të Kuvendit tё Republikës së Shqipërisë, ku morën pjesë drejtues të lartë të institucioneve vendore dhe atyre ndërkombëtare si dhe përfaqësues të lartë të INTOSAI-t, EUROSAI-t dhe Institucioneve Supreme të Auditimit nga 19 shtete.    

Kryetari i KLSh-së, Arben Shehu, falënderoi të pranishmit për pjesëmarrje në këtë ngjarje historike duke thënë se 100 vite histori nuk janë thjesht një rrugëtim për t’u përkujtuar, por një bazë e fortë për të ndërtuar të ardhmen. Z. Shehu u zotua se KLSh-ja do të vazhdojë të përmirësojё kapacitetet profesionale si dhe do t’i qëndrojё  besnike misionit  kushtetues dhe interesit të shtetit.   

Kryetarja e Kuvendit, Elisa Spiropali, vlerësoi Kontrollin e Lartë të Shtetit, si një instrument kyç për forcimin e demokracisë dhe luftën kundër korrupsionit, duke siguruar mbështetjen e Kuvendit për ruajtjen e pavarësisë institucionale.  

Auditorja e Përgjithshme e Republikës së Kosovës, Vlora Spanca, tha se ky përvjetor shekullor nuk është thjesht një datë në kalendar, por dëshmi e qëndrueshmërisë institucionale, e besnikërisë ndaj shërbimit publik dhe përkushtimit të palodhur për forcimin e llogaridhënies dhe integritetit në qeverisje publike. 

Znj. Spanca theksoi se KLSh ishte dhe vazhdon të jetë udhëheqës i pandalshëm dhe shtyllë e patundur në  shërbim të interesave të qytetarëve. Pavarësisht sfidave, ajo tha se KLSh-ja arriti të mbijetojë si model që nxit rritjen e përgjegjshmërisë, transparencës, dhe përmirësimin e menaxhimit të parasë se taksapaguesve, duke ndikuar drejtpërdrejtë në përmirësimin dhe avancimin e shërbimeve publike. Auditorja e Përgjithshme, Vlora Spanca, vlerësoi lartë partneritetin e ZKA-së me KLSh-në si urë e bashkimit dhe fuqizimit për institucione më të forta dhe më të përgjegjshme.

Fjalime përshëndetëse u mbajtën edhe nga krerët e INTOSAI-t dhe EUROSAI-t si dhe nga drejtues të Institucioneve Supreme të Auditimit dhe bashkëpunëtorë të tjerë.  

Në këtë aktivitet morën pjesë edhe Zëvendës Auditori i Përgjithshëm, Bezad Halilaj, Ndihmës Auditorët e Përgjithshëm Zukë Zuka, Emine Fazliu, Ramadan Gashi si dhe Drejtori i Departamentit për Buxhet dhe Financa, Arben Dodaj.

Zyra Kombëtare e Auditimit (ZKA) organizoi në Prishtinë punëtorinë dyditore me temën “Auditimet e Teknologjisë së Informacionit – Zhvillimet dhe Sfidat”, e cila bashkoi përfaqësues të Institucioneve Supreme të Auditimit (ISA) nga Shqipëria, Maqedonia e Veriut, Kroacia, Turqia, Polonia, Estonia, Portugalia, përfaqësues nga IDI, nga Universiteti i Tartu-së, konsulent kryesor nga GRC – Bitsecura, si dhe partnerë të tjerë ndërkombëtarë.  Ky aktivitet shërbeu si platformë për të diskutuar zhvillimet, sfidat dhe mundësitë në fushën e auditimeve të TI-së në sektorin publik.

Në hapje të punëtorisë, Auditorja e Përgjithshme e Republikës së Kosovës,  Vlora Spanca, theksoi rëndësinë që ka auditimi i teknologjisë së informacionit për garantimin e llogaridhënies, transparencës dhe sigurisë në administratën publike. Ajo tha se auditimi i sistemeve të informacionit është ndër pjesët thelbësore të mandatit të ZKA-së, duke u zhvilluar në përputhje me standardet ndërkombëtare dhe praktikat më të mira.

“Në këtë kontekst, auditimi i sistemeve të informacionit është bërë një komponent gjithnjë e më i rëndësishëm i mandatit tonë. Këto auditime kryhen si angazhime të pavarura ashtu edhe si elementë mbështetës brenda auditimeve financiare dhe të përputhshmërisë, në përputhje me standardet ndërkombëtare të auditimit dhe praktikat më të mira të njohura globalisht”, deklaroi znj. Spanca, duke shtuar se ky aktivitet është mundësi e mirë për të shkëmbyer përvoja dhe për të forcuar bashkëpunimin profesional.  

Punimet e punëtorisë u zhvilluan në tri sesione tematike. Sesioni I u fokusua në trendet globale dhe rajonale në auditimin e TI-së ku prezantuan përfaqësuesit nga ISA e Polonisë,  Portugalisë (virtualisht),  Estonisë dhe ITWG si dhe nga Universiteti i Tartu-së.  

Sesioni II adresoi përvojat praktike dhe sfidat aktuale ku prezantuan përfaqësues nga ZKA-ja, Iniciativa për Zhvillim e INTOSAI-t (virtualisht), ISA e Turqisë, KLSh-ja  e Shqipërisë si dhe ISA e Maqedonisë së Veriut.  

Ndërsa Sesioni III u fokusua në përvojat e Zyrës Kombëtare të Auditimit  në audimet e TI-së ku përfaqësuesit e ZKA-së prezantuan lidhur me sfidat, kërcënimet kibernetike ndaj institucioneve publike dhe rëndësinë e auditimeve të TI-së, si dhe rolin dhe mbështetjen e TI-së brenda ZKA-së.

Pjesëmarrësit punëtorinë e vlerësuan si një hap të rëndësishëm për shkëmbimin e përvojave profesionale dhe forcimin e bashkëpunimit rajonal e ndërkombëtar në fushën e auditimeve të teknologjisë së informacionit.

Ndërsa Auditorja e Përgjithshme përmbylli punimet duke falënderuar të pranishmit për pjesëmarrjen aktive dhe kontributin e vlefshëm. Ajo ceku se përkushtimi dhe bashkëpunimi janë thelbësore për të përballuar me sukses sfidat e auditimit të teknologjisë së informacionit, duke nxitur kështu zhvillimin dhe inovacionin në këtë fushë kaq dinamike dhe jetike.