Zyra Kombëtare e Auditimit (ZKA) organizoi në Prishtinë punëtorinë dyditore me temën “Auditimet e Teknologjisë së Informacionit – Zhvillimet dhe Sfidat”, e cila bashkoi përfaqësues të Institucioneve Supreme të Auditimit (ISA) nga Shqipëria, Maqedonia e Veriut, Kroacia, Turqia, Polonia, Estonia, Portugalia, përfaqësues nga IDI, nga Universiteti i Tartu-së, konsulent kryesor nga GRC – Bitsecura, si dhe partnerë të tjerë ndërkombëtarë.  Ky aktivitet shërbeu si platformë për të diskutuar zhvillimet, sfidat dhe mundësitë në fushën e auditimeve të TI-së në sektorin publik.

Në hapje të punëtorisë, Auditorja e Përgjithshme e Republikës së Kosovës,  Vlora Spanca, theksoi rëndësinë që ka auditimi i teknologjisë së informacionit për garantimin e llogaridhënies, transparencës dhe sigurisë në administratën publike. Ajo tha se auditimi i sistemeve të informacionit është ndër pjesët thelbësore të mandatit të ZKA-së, duke u zhvilluar në përputhje me standardet ndërkombëtare dhe praktikat më të mira.

“Në këtë kontekst, auditimi i sistemeve të informacionit është bërë një komponent gjithnjë e më i rëndësishëm i mandatit tonë. Këto auditime kryhen si angazhime të pavarura ashtu edhe si elementë mbështetës brenda auditimeve financiare dhe të përputhshmërisë, në përputhje me standardet ndërkombëtare të auditimit dhe praktikat më të mira të njohura globalisht”, deklaroi znj. Spanca, duke shtuar se ky aktivitet është mundësi e mirë për të shkëmbyer përvoja dhe për të forcuar bashkëpunimin profesional.  

Punimet e punëtorisë u zhvilluan në tri sesione tematike. Sesioni I u fokusua në trendet globale dhe rajonale në auditimin e TI-së ku prezantuan përfaqësuesit nga ISA e Polonisë,  Portugalisë (virtualisht),  Estonisë dhe ITWG si dhe nga Universiteti i Tartu-së.  

Sesioni II adresoi përvojat praktike dhe sfidat aktuale ku prezantuan përfaqësues nga ZKA-ja, Iniciativa për Zhvillim e INTOSAI-t (virtualisht), ISA e Turqisë, KLSh-ja  e Shqipërisë si dhe ISA e Maqedonisë së Veriut.  

Ndërsa Sesioni III u fokusua në përvojat e Zyrës Kombëtare të Auditimit  në audimet e TI-së ku përfaqësuesit e ZKA-së prezantuan lidhur me sfidat, kërcënimet kibernetike ndaj institucioneve publike dhe rëndësinë e auditimeve të TI-së, si dhe rolin dhe mbështetjen e TI-së brenda ZKA-së.

Pjesëmarrësit punëtorinë e vlerësuan si një hap të rëndësishëm për shkëmbimin e përvojave profesionale dhe forcimin e bashkëpunimit rajonal e ndërkombëtar në fushën e auditimeve të teknologjisë së informacionit.

Ndërsa Auditorja e Përgjithshme përmbylli punimet duke falënderuar të pranishmit për pjesëmarrjen aktive dhe kontributin e vlefshëm. Ajo ceku se përkushtimi dhe bashkëpunimi janë thelbësore për të përballuar me sukses sfidat e auditimit të teknologjisë së informacionit, duke nxitur kështu zhvillimin dhe inovacionin në këtë fushë kaq dinamike dhe jetike.

Në kuadër të bashkëpunimit profesional ndërmjet Zyrës Kombëtare të Auditimit të Kosovës (ZKA) dhe Kontrollit të Lartë të Shtetit të Shqipërisë (KLSh), me 29 dhe 30 maj 2025 u mbajt takimi i radhës në Prishtinë për realizimin e auditimit paralel të performancës me temë “Mbrojtja dhe siguria e digave”.

Ekipet diskutuan për temën e auditimit dhe objektivat e përbashkëta për të vlerësuar menaxhimin dhe masat e sigurisë në digat e të dy vendeve, metodologjinë, qasjet e përdorura dhe përputhshmërinë e planeve të auditimit, memon parastudimore dhe çështje tjera të procesit të auditimit. Ekipet gjithashtu koordinuan aktivitetet e ardhshme për auditim e përbashkët i cili synon të kontribuoj në forcimin e përgjegjësisë institucionale dhe mbrojtjen e interesit publik.  Ata gjithashtu, prezantuan dhe diskutuan rezultatet e punës e deritanishme.

Në kuadër të këtij takimi u zhvillua edhe një vizitë në digën e Liqenit të Batllaves ku ekipet panë nga afër gjendjen në teren.

Në këtë takim, nga ZKA morën pjesë Drejtoresha e Departamentit të Auditimit të Performancës, Ariana Gjonbalaj Shala, Udhëheqësja e Ekipit, Alba Keqa Bejtullahu, dhe anëtarja e ekipit Kujtesa Alaj. Ndërsa, nga KLSh mysafir ishin Drejtori i Departamentit të Performancës, Aulent Guri dhe auditorët Artan Topjana e Skënder Muça.