Zyra Kombëtare e Auditimit e Republikës së Kosovës (ZKA) dhe Zyra Kombëtare e Auditimit të Suedisë (SNAO) të enjten virtualisht kanë nënshkruar memorandumin e mirëkuptimit për bashkëpunim në zhvillimin institucional për periudhën 2025 -2030, duke thelluar partneritetin e suksesshëm që nga viti 2011.  

Memorandumi i nënshkruar nga Auditorja e Përgjithshme e Kosovës, Vlora Spanca, dhe Auditorja e Përgjithshme e Suedisë, Christina Gellerbrant Hagberg, synon forcimin e mëtejmë të kapaciteteve të ZKA-së për të punuar në përputhje me standardet më të avancuara ndërkombëtare të auditimit.  

Ky bashkëpunim shumëvjeçar do të fokusohet në tri fusha kyçe si: menaxhimi strategjik, auditimi i performancës, si dhe lidershipi dhe komunikimi i brendshëm. Përmes këtij projekti, Zyra Kombëtare e Auditimit të Suedisë do të ofrojë mbështetje profesionale dhe teknike, përfshirë shkëmbimin e ekspertizës, angazhimin e konsulentëve dhe mbulimin e kostove për aktivitetet e përbashkëta.  

Gjatë ceremonisë së nënshkrimit, palët theksuan rëndësinë që ka pasur bashkëpunimi i vazhdueshëm që nga viti 2011 në avancimin e kapaciteteve institucionale të ZKA-së dhe promovimin e transparencës dhe llogaridhënies në sektorin publik në Kosovë.  

Auditorja e Përgjithshme e Kosovës, Vlora Spanca, vlerësoi lartë dhe shprehu mirënjohjen e përzemërt për partneritetin dhe mbështetjen nga Zyra Kombëtare e Auditimit të Suedisë. Ajo tha se ky bashkëpunim ka kontribuar që ZKA-ja të bëhet institucion i njohur për besueshmërinë, profesionalizmin dhe ndikimin e saj.  

“Pa dyshim, kemi mësuar shumë nga lidershipi juaj i fortë, përvoja e pasur dhe angazhimi për të promovuar qeverisjen e mirë dhe për të forcuar praktikat e auditimit. Me mbështetjen e projektit, Zyra Kombëtare e Auditimit të Kosovës ka forcuar proceset e saj organizative, ka profesionalizuar punën e auditimit, veçanërisht në auditimin e performancës, ka bërë përparim drejt lidershipit modern dhe ka përmirësuar komunikimin e brendshëm dhe me palët e jashtme”, deklaroi znj. Spanca.  

Auditorja e Përgjithshme e Suedisë, Christina Gellerbrant Hagberg, tha se është krenare për partneritetin në mes të dy institucioneve si dhe shprehu pritjet për vazhdimësinë e rezultateve. “Jam shumë krenare për partneritetin e gjatë midis institucioneve tona dhe mezi pres të vazhdoj në një fazë të re, përfundimtare të fokusuar në konsolidimin e rezultateve dhe sigurimin e qëndrueshmërisë”, deklaroi ajo.  

Kjo marrëveshje është nënshkruar në kuadër të takimit të Komitetit Drejtues ku përveç të tjerash u prezantuan dhe miratuan procesverbali nga takimi paraprak i Komitetet, Raporti i progresit për periudhën 18 mujore, Plani i projektit 2025-2030 si dhe Plani vjetor i aktiviteteve.   

Auditorja e Përgjithshme, Vlora Spanca, të martën priti në takim pune Udhëheqësen e Ekipit të  Qeverisjes së Mirë në kuadër të projektit Reforma në Administratën Publike/ Menaxhimi i Financave Publike në Zyrën e Bashkimit Evropian në Kosovë, Laura Fallavollita. Takimi u mbajt në kuadër të bashkëpunimit të vazhdueshëm dhe pati për qëllim informimin e dyanshëm për zhvillimet më të fundit.  

Auditorja e Përgjithshme, Vlora Spanca, e njoftoi mysafiren për përfundimin e procesit të auditimit të rregullsisë dhe publikimin e raporteve. Në veçanti u bisedua për trendin e opinioneve të auditimit për organizatat buxhetore në nivel qendror dhe lokal si dhe potencoi rëndësinë e zbatimit të rekomandimeve nga institucionet publike. Gjithashtu znj. Spanca e njoftoi edhe për auditimin e Raportit Financiar Vjetor të buxhetit të shtetit dhe për çështje të tjera me interes të dyanshëm.  

Palët theksuan rëndësinë e bashkëpunimit të ndërsjellë si dhe rëndësinë që kanë auditimet në rritjen e llogaridhënies dhe transparencës në institucionet publike.  

Në takim morën pjesë edhe Zëvendës Auditori i Përgjithshëm, Bezad Halilaj, Drejtoresha e Departamentit për Komunikim dhe Bashkëpunim Ndërkombëtar në ZKA, Qendresa Mulaj. Ndërsa nga Zyra e BE-së ishin edhe Burbuqe Kelmendi, Menaxhere Projekti/Koordinatore Binjakëzimi dhe Edon Kalludra Menaxher i Projektit.