Nga data 23 deri më 28 qershor 2025, në Shkup u mbajt blloku i tretë i trajnimit për auditimet e performancës për vendet e Ballkanit Perëndimor, i organizuar nga Zyra Kombëtare e Auditimit të Suedisë në bashkëpunim me Entin Shtetëror të Revizionit të Maqedonisë së Veriut.   

Në kuadër të këtij programi, Udhëheqësi i Departamentit për Auditimet e Performancës nga Zyra Kombëtare e Auditimit (ZKA), Arben Selimi kontribuoi në cilësinë e fasilituesit, duke ndarë përvojat dhe praktikat e institucionit në fushën e auditimeve të performancës. 

Programi përfshiu tema si përcaktimi i objektivave të auditimit, pyetjeve të auditimit, përzgjedhja e metodave të hulumtimit, analiza e kostos dhe përfitimeve, studime rastesh dhe hetime përmes sondazheve dhe vlerësimeve eksperimentale. 

Më qellim të fuqizimit të kapaciteteve profesionale dhe thellimit të bashkëpunimit rajonal në fushën e auditimit të performancës, pjesë e këtij programi trajnimi janë edhe auditorët e Zyrës Kombëtare të Auditimit të Kosovës, Gazmend Namani, Edona Abazi, Gëzim Krasniqi dhe Verona Sekiraqa. 

Sot, Auditorja e Përgjithshme, Vlora Spanca dhe ushtruesi i detyrës së Drejtorit Ekzekutiv të Shoqatës për Kontabilist të Çertifikuar dhe Auditor të Kosovës (ShKÇAK), Blerim Pushkolli, kanë ripërtërirë marrëveshjen e bashkëpunimit për ofrimin e programit të trajnimeve për Edukimin e Vazhdueshëm Profesional (EVP) për auditorët e Zyrës Kombëtare të Auditimit, në fushën e kontabilitetit dhe auditimit.  

Përmes programeve të ShKÇAK-së, auditorët do të ndjekin së paku 12 orë trajnimi profesional në vit me qëllim të edukimit të vazhdueshëm dhe zhvillimit të njohurive dhe aftësive profesionale në përputhje me standardet dhe praktikat më të mira ndërkombëtare. Marrëveshja do të zgjasë për një periudhë prej 24 muajsh nga dita e nënshkrimit.