Në kuadër të një vizite studimore në Republikën e Kosovës, një delegacion nga Autoriteti i Ankesave të Prokurimit Publik të Tanzanisë vizitoi sot Zyren Kombëtare të Auditimit (ZKA).

Auditorja e Përgjithshme, Vlora Spanca, i ka përshëndetur dhe u ka uruar mirëseardhje delegacionit nga Tanzania, ndërsa në takim u priten nga Zëvendës Auditori i Përgjithshëm, Bezad Halilaj, dhe zyrtarë tjerë të lartë të ZKA-së.

Me këtë rast mysafirëve iu prezantua historiku, mandati dhe roli i ZKA-së, si dhe praktikat në fushën e auditimit të prokurimit publik dhe auditimeve të performancës. Arben Selimi, Ushtrues Detyre i Drejtorit të Auditimit të Performancës prezantoi ndikimin e punës audituese për forcimin e llogaridhënies dhe transparencës në institucionet publike, si dhe raste konkrete nga auditimi i proceseve të prokurimit në nivel qendror dhe lokal.  

Vizita kishte për qëllim shkëmbimin e përvojave ndërinstitucionale dhe ofroi një mundësi të mirë për të diskutuar mbi sfidat dhe praktikat e ndryshme në mbikëqyrjen e prokurimit publik në të dyja vendet.

Me 24 dhe 25 korrik 2025, Auditorja e Përgjithshme, Vlora Spanca, e shoqëruar nga Zëvendës Auditori i Përgjithshëm, Bezad Halilaj, Drejtori i Auditimit Faruk Rrahmani dhe Zyrtarja për Dizajnim Grafik, Dafina Visoka, realizuan vizitë bilaterale në Zyrën Shtetërore të Auditimit të Maqedonisë së Veriut në Shkup.

Auditorja e Përgjithshme me bashkëpunëtorë u pritën nga homologu i saj, z. Maksim Acevski, Auditor i Përgjithshëm i Maqedonisë së Veriut, dhe stafi drejtues i këtij institucioni. Takimi u fokusua në shkëmbimin e përvojave dhe praktikave të mira të auditimit, me theks të veçantë në strukturën dhe vizualizimin e raporteve të auditimit, sidomos Raportit Vjetor të Auditimit, si dhe në praktikat e auditimit të fondeve të Bashkimit Evropian.  

Vizita përfshiu prezantime tematike dhe diskutime interaktive ndërmjet dyja institucioneve, me synim forcimin e bashkëpunimit profesional dhe shkëmbimin e njohurive në fushën e auditimit publik.  

Auditorja e Përgjithshme e Kosovës, znj. Vlora Spanca, vuri në dukje rëndësinë e transparencës dhe gatishmërisë së institucioneve supreme të auditimit për ndarjen e praktikave të mira dhe qasjeve inovative në fushën e auditimit. Ajo e vlerësoi vizitën si një hap të rëndësishëm drejt fuqizimit të një partneriteti të qëndrueshëm dhe nxitjes së të mësuarit të përbashkët, që do të kontribuojë në zhvillimin dhe forcimin e funksionit të auditimit, si në nivel kombëtar, ashtu edhe rajonal.  

Nga ana e tij, Auditori i Përgjithshëm i Maqedonisë së Veriut, z. Maksim Acevski, nënvizoi rëndësinë e bashkëpunimit rajonal dhe shkëmbimit të vazhdueshëm të njohurive ndërmjet institucioneve më të larta të auditimit, me synim forcimin e kapaciteteve të auditimit, rritjen e transparencës dhe ndikimit të auditimeve në sektorin publik.  

Kjo vizitë rikonfirmoin përkushtimin e dy institucioneve për bashkëpunim rajonal dhe ngritje të mëtejme të cilësisë së auditimit, komunikimin e qartë të rezultateve të auditimit për publikun dhe rritjen e transparencës në institucionet publike.