republika-e-kosoves
Thank you! Your submission has been received!
Oops! Something went wrong while submitting the form.
Shqip
2/23/2023 2:58:29 PM

Zëvendës Auditori i Përgjithshëm: Rezultatet e auditimit tregojnë se menaxhimi i granteve dhe subvencioneve nuk është i mirë

Zëvendës Auditori i Përgjithshëm, Bezad Halilaj, ka marrë pjesë në Konferencën Vjetore me temën: “Rritja e mbikëqyrjes publike dhe llogaridhënies institucionale në Kosovë”  të organizuar nga Grupi për Studime Juridike dhe Politike (GLPS), Instituti GAP dhe Instituti për Politika Zhvillimore (INDEP), ku kanë marrë pjesë përfaqësues nga institucionet  qendrore, ekspertë si dhe ambasadori britanik Nicholas Abott. Punimet e konferencës janë zhvilluar në kuadër të katër paneleve ku pjesëmarrësit kanë shpalosur perspektivën e tyre për temat: Rekrutimi në institucionet publike; Prokurimi Publik; Grantet dhe Subvencionet si dhe Lejet, Licencat dhe Tarifat. Zëvendës Auditori i Përgjithshëm, Bezad Halilaj, në kuadër të diskutimeve të panelit të tretë ku është trajtuar tema “Grantet dhe Subvencionet” ka thënë se rezultatet e auditimit tregojnë se gjendja me menaxhimin e granteve dhe subvencioneve ende nuk është e mirë. Prandaj, trajtimi i këtyre temave do të jetë në fokus edhe më të zgjeruar të Zyrës Kombëtare të Auditimit në të ardhmen. Ai ka thënë se menaxhimi i granteve dhe subvencioneve padyshim është një ndër fushëveprimet kryesore në punën e ZKA-së dhe informatat e prezantuara në këtë tryezë do të shërbejnë për identifikimin dhe propozimin e temave të reja që ndërlidhen me auditimet përkatëse, qoftë atyre të pajtueshmërisë po ashtu edhe të performancës. “Grantet dhe subvencionet mbulohen në baza të rregullta vjetore përmes auditimit të Pasqyrave Vjetore Financiare, në pothuajse të gjitha organizatat buxhetore për të vlerësuar nëse ato janë duke u dhënë dhe menaxhuar si duhet dhe për këtë ne japim rekomandime në baza vjetore. Vetëm për vitin 2021 kemi dhënë gjithsejtë 95 rekomandime”, ka deklaruar Halilaj, duke shtuar se çdo vit auditimi ka identifikuar mangësi të ndryshme në menaxhimin e tyre të cilat kanë ardhur si rrjedhojë e mungesës së kontrolleve brenda organizatave buxhetore. “Prandaj kjo fushë kërkon një trajtim mjaft të fokusuar duke zhvilluar kontrolle efektive, monitorim dhe mbikëqyrje rigoroze në mënyrë që llogaridhënia publike të avansohet tutje”, është shprehur z. Halilaj.  

  • Share:

Lexo lajme tjera:

ZKA-ja bëhet pjesë e Task Forcës së INTOSAI-t për përfshirjen e qytetarëve dhe shoqërisë civile në proceset e auditimit
23/02/2023

ZKA-ja bëhet pjesë e Task Forcës së INTOSAI-t për përfshirjen e qytetarëve dhe shoqërisë civile në proceset e auditimit

Task Forcës së INTOSAI-t për përfshirjen e qytetarëve dhe shoqërisë civile në proceset e  auditimit i është bashkuar edhe Zyra Kombëtare e Auditimit të Kosovës. ZKA-ja duke qenë pjesë e kësaj Task Force do të pasurojë aktivitetet si dhe do të jap kontribut në arritjen e objektivave të saj. Nëpërmjet një letre dërguar Auditores së Përgjithshme të Kosovës, Vlora Spanca, kryetari i Task Forcës së INTOSAI-t për përfshirjen e qytetarëve dhe shoqërisë civile në proceset e auditimit, njëherësh Auditor i Përgjithshëm i Perusë, Nelson Shack Yalta, ka mirëpritur anëtarësimin e ZKA-së në këtë mekanizëm. Ai ka riafirmuar angazhimin ndaj aktiviteteve, projekteve dhe nismave që do të realizohen duke thënë se me përfshirjen e ZKA-së në këtë task forcë do të arrihen rezultate të jashtëzakonshme të cilat do të jenë në dobi të sistemeve supreme të auditimit. Ndërsa Auditorja e Përgjithshme, Vlora Spanca, në letrën e saj ka falënderuar kryetarin e kësaj task force për mundësinë që ZKA-ja të jap kontributin e saj si dhe të dëshmojë se është një burim shtesë i mbështetjes në arritjen e synimeve. “Jemi të nderuar që ZKA-ja është në mesin e institucioneve supreme të auditimit me mundësinë për t’iu përgjigjur në mënyrë të përshtatshme sfidave, pritshmërive dhe  rreziqeve. Në këtë mënyrë ofron një pasqyrë të pavarur dhe të paanshme që synon ndryshime të dobishme në sektorin publik”, është theksuar në letrën e znj. Spanca dërguar kryetarit të task forcës. Task Forca ka për qëllim që të identifikojë dhe të ndajë praktikat e mira për pjesëmarrjen e qytetarëve dhe angazhimin e shoqërisë civile në punën e Institucioneve Supreme të Auditimit (ISA) duke bërë kështu që zëri i publikut të jetë edhe më shumë i përfshirë në proceset e Zyrës Kombëtare të Auditimit. Për më tepër, Task Forca inicion dhe zhvillon nisma, mjete dhe qasje për të mbështetur zbatimin e praktikave të tilla të mira si një mjet për të promovuar vlerën dhe përfitimet e ISA-ve.
Lexo më shumë
ZKA-ja dhe KLSH-ja vazhdojnë shkëmbimin e përvojave lidhur me auditimin paralel në fushën e teknologjisë së informacionit
24/02/2023

ZKA-ja dhe KLSH-ja vazhdojnë shkëmbimin e përvojave lidhur me auditimin paralel në fushën e teknologjisë së informacionit

Në vijim të aktiviteteve në kuadër të auditimit paralel të Teknologjisë së Informacionit për sistemet e informacionit të ujësjellësit në Tiranë dhe Prishtinë, me datë 20 dhe 21 shkurt në Prishtinë është mbajtur puntoria e radhës. Ekipet e auditimit nga të dyja institucionet kanë prezantuar rezultatet e fazës së ekzekutimit të auditimit dhe përmbajtjen e draft raporteve individuale të auditimit,  lidhur me auditimin paralel që është duke u zhvilluar, si dhe kanë diskutuar për fazat vijuese të këtij procesi të auditimit në mes të KLSH-së dhe ZKA-së. Në kuadër të kësaj vizite është realizuar edhe një vizitë pune në  Kompaninë Rajonale të Ujësjellësit Prishtina. Në takim u prezantuan aktivitetet lidhur me furnizimin me ujë të pijshëm përfshirë sfidat dhe vështirësitë si dhe projektet specifike zhvillimore veçanërisht në fushën e teknologjisë së informacionit, etj. Digjitalizimi i proceseve, siguria dhe kontrolli i informacioneve ishte tema kryesore e diskutimit. Po ashtu, auditorët nga të dyja vendet kanë vizituar edhe Impiantin e Trajtimit të Ujit në Shkabaj për t’ua prezantuar për së afërmi funksionimin, sistemet dhe proceset teknologjike të trajtimit të ujit. Punëtoria është përmbyllur me dakordimin për planin e aktiviteteve të ardhshme deri në përmbylljen e auditimit paralel për sistemet e informacionit të ujësjellësve në të dy vendet.
Lexo më shumë