republika-e-kosoves
Thank you! Your submission has been received!
Oops! Something went wrong while submitting the form.
Shqip
9/29/2023 4:34:00 PM

ZKA-ja merr pjesë në Konferencën mbi Transparencën e Qeverisjes Lokale

Zëvendës Auditori i Përgjithshëm, Bezad Halilaj dhe Ndihmës Auditori i Përgjithshëm Zukë Zuka, morën pjesë në konferencën “Ndërtimi i Besimit, Forcimi i Komuniteteve: Konferenca mbi Transparencën e Qeverisjes Lokale,” organizuar nga OJQ AKTIV, ku u diskutua për parandalimin e korrupsionit dhe forcimin e transparencës në nivel të vetëqeverisjes lokale në Kosovë. Përfaqësuesit e institucioneve të ndryshme në kuadër të katër paneleve diskutuan për temat: “Ndërlidhja e integritetit: Strategjitë për një Kosovë pa korrupsion”; “Qeverisja e pamaskuar: Ndriçimi i transparencës institucionale”, “Nxitja e ndryshimit përmes inovacionit: Eksplorimi i metodave kreative për aktivizmin qytetar dhe strategjitë e angazhimit” si dhe “Dekodimi i Transparencës: Ridefinimi i Narrativës Antikorrupsion të Kosovës”. Në panelin e dytë mbi “Qeverisjen e pamaskuar: Ndriçimi i transparencës institucionale”, Zëvendës Auditori i Përgjithshëm, Bezad Halilaj tha se synimi kryesor i Zyrës Kombëtare të Auditimit të Kosovës është promovimi i llogaridhënies, efektivitetit, efikasitetit dhe transparencës se administratës publike. Ai tha se rezultatet e punës audituese kanë qëllim të ndihmojnë sektorin publik në përmirësimin e qeverisjes dhe ofrimin e shërbimeve më të mira për qytetarët e Kosovës. “Transparenca dhe llogaridhënia në komuna janë çështje kyçe për një qeverisje të mirë. ZKA-ja përmes auditimeve ofron informacione cilësore mbi përdorimin e fondeve publike, duke ndihmuar kështu entitetet e audituara të përmirësojnë sistemet e tyre të menaxhimit financiar dhe kontrollit përmes rekomandimeve. Në këtë mënyrë, ne rrisim besimin në shpenzimin e fondeve publike dhe luajmë rol aktiv në sigurimin e interesit të taksapaguesve dhe palëve të tjera në rritjen e përgjegjësisë publike”, theksoi z. Halilaj.

  • Share:

Lexo lajme tjera:

Auditorët nga ZKA certifikohen në programin “Edukimi Profesional për Auditorë (PESA-P)”
26/09/2023

Auditorët nga ZKA certifikohen në programin “Edukimi Profesional për Auditorë (PESA-P)”

Duke qenë pjesë aktive e programeve të ndryshme ndërkombëtare për arsimim dhe zhvillim të kapaciteteve audituese, së fundmi auditorët e Zyrës Kombëtare të Auditimit të Kosovës treguan rezultate të kënaqshme në kuadër të procesit të vlerësimit dhe certifikimit në programin për Edukim Profesional për Institucionet Supreme të Auditimit (PESA-P). Samir Zymberi, Drejtor i Departamentit të Auditimit dhe Armin Bushati, Udhëheqës i ekipit të auditimit me sukses të plotë përfunduan programin “Edukimi Profesional për Auditorë (PESA-P)” të Iniciativës për Zhvillim e INTOSAI-t dhe u certifikuan si  “Auditorë të Certifikuar nga IDI”. Ndarja e certifikatave është bërë të martën në një ceremoni të veçantë, organizuar nga Auditorja e Përgjithshme, Vlora Spanca. Më këtë rast, znj. Spanca përgëzoi auditorët për sukseset e arritura, duke thënë se ky certifikim është i rëndësisë se veçantë për Zyrën sepse avancon nivelin e profesionalizmit dhe cilësinë e punës sonë. Ajo shtoi se “ZKA-ja mbetet e përkushtuar në mbështetjen dhe avancimin e stafit përmes programeve të tilla ndërkombëtare”. Programi PESA-P ka për qëllim ofrimin e mundësive të zhvillimit të aftësive profesionale dhe të menaxhimit, për të mbështetur zbatimin e plotë të Standardeve Ndërkombëtare të Auditimit në punën e përditshme në Institucionet Supreme të Auditimit. Kjo mundëson ngritjen e aftësive në menaxhimin e zhvillimit profesional dhe të planit zhvillimor të auditorëve në ZKA. Auditorët e certifikuar nga IDI janë ftuar të jenë pjesë e programeve të IDI për zhvillim profesional. Në kuadër të këtij programi pjesëmarrësit ndoqën aktivitete të detyrueshme, duke përfshirë edukimin dixhital të zhvillimit profesional të mbikëqyrur nga trajnerët. Pjesëmarrësit i janë nënshtruar procesit rigoroz të vlerësimit dhe certifikimit. Certifikata lëshohet nga Iniciativa për Zhvillim INTOSAI (IDI), organizatë ndërkombëtare me mandat të mbështetjes së Institucioneve Supreme të Auditimit (ISA) në vendet në zhvillim për të ngritur në mënyrë të qëndrueshme performancën dhe kapacitetin e tyre. Aktualisht ky program po ndiqet edhe nga disa auditorë nga Zyra Kombëtare e Auditimit të Kosovës.
Lexo më shumë
Përfaqësuesit e ZKA-së, kryetarët e komunave dhe donatorët diskutojnë për rolin dhe rëndësinë e Grantit të Performancës Komunale
02/10/2023

Përfaqësuesit e ZKA-së, kryetarët e komunave dhe donatorët diskutojnë për rolin dhe rëndësinë e Grantit të Performancës Komunale

Në datat 29 shtator – 1 tetor 2023 në Durrës u mbajt takimi me kryetarët e komunave i organizuar nga Projekti DEMOS, zbatuar nga Helvetas Swiss Intercooperation në bashkëpunim me Ministrinë e Administrimit të Pushtetit Lokal (MAPL).

Takimi pati për qëllim diskutimin e çështjeve të rëndësishme duke përfshirë kriteret e kualifikimit për Grantin e Performancës Komunale, treguesit e Sistemit të Menaxhimit të Performancës Komunale, procedurat për zbatim të projekteve komunale, etj. Në këtë aktivitet Zyra Kombëtare e Auditimit (ZKA) u përfaqësua nga Zëvendës Auditori i Përgjithshëm Bezad Halilaj, Ndihmës Auditori i Përgjithshëm Zukë Zuka, Drejtor i Departamentit të Auditimit Lavdim Maxhuni dhe Udhëheqësja e Ekipit, Laureta Matoshi-Pozhegu.

Zëvendës Auditori i Përgjithshëm Bezad Halilaj, theksoi se Zyra Kombëtare e Auditimit vlerëson lartë përfshirjen e opinionit të auditimit si rezultat final në njërin nga kushtet minimale për kualifikimin dhe vlerësimin e performancës së komunave në programin e Grantit të Performancës. Ai theksoj se kjo ka ndikuar të rritet ndërgjegjësimi i komunave për ngritjen e llogaridhënies dhe transparencës në shpenzimin e parasë publike. “Për rezultat, cilësia e raportimit financiar është duke u përmirësuar nga viti në vit”, deklaroi z. Halilaj.

Në kuadër të këtij takimi, Zyra Kombëtare e Audimit prezantoi raportin e auditimit të performancës “Funksionimi i sistemit të Grantit të Performancës Komunale dhe menaxhimi i projekteve të financuara nga Donatorët për vitin 2021,” realizuar sipas marrëveshjes në mes Zyrës Kombëtare të Auditimit dhe Agjencisë Zvicerane për Zhvillim dhe Bashkëpunim (përmes Projektit për Decentralizim dhe Përkrahje Komunale si zbatues).

Auditimi ka vlerësuar funksionimin e sistemit të Grantit të Performancës Komunale për periudhën 2018 – 2021, si dhe nëse menaxhimi i shpenzimeve për projektet kapitale të financuara nga donatorët për vitin fiskal 2021 është bërë në pajtim me legjislacionin në fuqi dhe ka arritur rezultatet e synuara.

Rezultatet e auditimit tregojnë se funksionimi i Grantit të Performancës Komunale  i ndarë në dy burime të financimit ka rezultuar me mangësi dhe se aktivitetet e prokurimit për projektet e financuara nga donatorët gjatë vitit 2021 edhe pse kishin arritur qëllimet, ishin përcjellë me dobësi të ndryshme dhe grupet e margjinalizuara nuk ishin integruar mjaftueshëm në këto nisma.

 

Lexo më shumë