Komisioni për Mbikëqyrjen e Financave Publike shqyrtoi Raportin Vjetor të Auditimit për vitin 2022
Auditorja e Përgjithshme, Vlora Spanca, prezantoi në Komisionin për Mbikëqyrjen e Financave Publike (KMFP), Raportin Vjetor të Auditimit për vitin 2022, i cili përmban përmbledhjen e rezultateve kryesore të punës audituese, duke përfshirë opinionin e auditimit, gjetjet dhe rekomandimet.
Znj. Spanca bëri me dije se për sezonin auditues 2022/2023, ZKA-ja arriti të përmbush planin auditues, duke kryer 123 auditime.
Para deputetëve ajo tregoi se për Pasqyrat Financiare Vjetore të 86 organizata buxhetore janë dhënë 53 opinione të pamodifikuara dhe 33 opinione të modifikuara (të kualifikuara). Përderisa për 11 ndërmarrjet publike të audituara është dhënë një opinion i pamodifikuar dhe 10 opinione të modifikuara (prej tyre shtatë opinione të kualifikuar dhe tri të kundërta).
Po ashtu ZKA-ja ka dhënë konkluzione të pajtueshmërisë me kornizën ligjore dhe sipas rezultateve institucionet publike jo në të gjitha rastet kanë qenë në pajtueshmëri me kornizën ligjore. Mangësitë kryesore janë identifikuar te kategoritë: investimet kapitale, paga dhe mëditje, subvencionet dhe transfere dhe të hyrat.
Auditorja e Përgjithshme Vlora Spanca më tutje i njoftoi deputetët se për Raportin Vjetor Financiar të Qeverisë për Buxhetin e Republikës së Kosovës është dhënë: Opinion i Kualifikuar. Arsyet e kualifikimit të opinionit, kanë qenë për shkak se vlera e gabimeve të identifikuara në pasqyra financiare ka qenë materiale.
Përveç opinionit të auditimit, ZKA-ja vlerësoi edhe çështjet e tjera të përcaktuara me Ligjin për Menaxhimin e Financave Publike dhe Përgjegjësive, si: pajtueshmërinë e deficitit buxhetore me kornizën ligjore, borxhin shtetëror, obligimet e pa paguara dhe ato kontigjente, etj.
Për të vlerësuar nëse fondet publike po shfrytëzohen në mënyrë ekonomike, efikase dhe efektive, ZKA-ja kreu 15 auditime të performancës, të cilat mbulojnë fushat me interes shoqëror, si: ekonomi, shëndetësi, ambient, teknologji të informacionit dhe prokurim publik, etj.
Ndërsa, sa i përket rekomandimeve, në auditimet financiare dhe të pajtueshmërisë për vitin 2022, ZKA-ja ka dhënë 900 rekomandime. Znj Spanca theksoj se niveli i zbatimit të rekomandimeve nuk është i kënaqshëm. Për vitin 2021, nga auditimet financiare dhe pajtueshmërisë janë zbatuar vetëm 49%, e që në raport me vitin paraprak (2020) paraqet një ulje prej 1%. Përderisa tek NP, nga 187 rekomandime sa janë dhënë vitin e kaluar, 58% janë zbatuar.
Auditorja e Përgjithshme i njoftoj deputetët se me përfundimin e sezonit auditues 2022/2023, ZKA-ja ka analizuar të gjitha raportet e publikuara të auditimeve të rregullsisë dhe performancës duke evidentuar 51 raste të dyshimit të cilat janë dërguar te Prokurori i Shtetit për analizë dhe hetime të mëtejme. Përveç këtyre 51 rasteve të evidentuara, në Prokurori janë dërguar edhe 2 raporte në tërësi për shkak të çështjeve të ndërlidhura.
Ndërsa Ministri i Financave, Punës dhe Transfereve, Hekuran Murati, pasi shpalosi para deputetëve sqarimet e nevojshme në lidhje më rezultatet e Raportit të auditimit, u zotua se në nivel të Qeverisë se Republikës se Kosovës do të ndërmarrin veprimet e nevojshme për zbatimin e rekomandimeve.
