republika-e-kosoves
Thank you! Your submission has been received!
Oops! Something went wrong while submitting the form.
Shqip
12/27/2023 5:49:00 PM

Kosova dhe Shqipëria kryejnë auditimin e përbashkët për “Sistemet e informacionit në ujësjellësit e Tiranës dhe Prishtinës”

Auditorja e Përgjithshme e Republikës së Kosovës, Vlora Spanca, Zëvendës Auditori i Përgjithshëm, Bezad Halilaj, Drejtori i Departamentit të Auditimit të Teknologjisë së Informacionit, Samir Zymberi, dhe Auditorja Arlinda Mustafa, qëndruan të premten për vizitë zyrtare në Kontrollin e Lartë të Shtetit (KLSH) të Republikës së Shqipërisë.

Kryetari i KLSH-së, Arben Shehu, priti në takim të veçantë znj. Spanca me bashkëpunëtorë, duke shënuar kështu përfundimin e auditimit të përbashkët të TI-së “Sistemet e informacionit në ujësjellësit e Tiranës dhe Prishtinës”. Takimi kishte për qëllim diskutimin e ecurisë dhe rezultatet e punës audituese në të dy institucionet si dhe mundësitë e reja për avancimin e bashkëpunimit në të ardhmen. 

Me këtë rast z. Shehu vlerësoi punën e bërë si dhe falenderoi ekipet e auditimit duke thënë është përmbyll me sukses një auditim sfidues mbi sistemet e informacionit, i cili është vlerë e shtuar për punën e auditorëve. Ai tha se ky auditim shërbeu edhe në shkëmbimin e vlefshëm të ideve, praktikave të punës, qasjeve, harmonizimit të metodologjive që ekipet respektive të auditimit ndanë së bashku duke përfituar më të mirën nga njëri-tjetri.

Auditorja e Përgjithshme, Vlora Spanca falënderoi kryetarin Shehu për mirëpritjen dhe në veçanti gatishmërinë për bashkëpunimin e palëkundur gjatë gjithë kësaj kohe, jo vetëm në projektin e auditimit paralel.

 

Znj. Spanca theksoi se janë bërë hapa të rëndësishëm në forcimin e partneritetit ndërmjet Kontrollit të Lartë të Shtetit të Republikës së Shqipërisë dhe Zyrës Kombëtare të Auditimit të Republikës së Kosovës.  Një nismë e rëndësishme e këtij partneriteti  në vitin 2022 ishte organizimi i këtij auditimi paralel me fokus teknologjinë e informacionit.

“Ekipet e të dy Institucioneve Supreme të Auditimit kanë punuar ngushtë me njëra-tjetrën dhe janë dakorduar rreth organizimit dhe ekzekutimit të auditimit paralel në sistemet e informacionit të kompanive të ujësjellësit, duke u fokusuar veçanërisht në Ujësjellësin e Tiranës dhe Ujësjellësin Rajonal të Prishtinës. Ekipet  patën rast për të diskutuar çështjet në secilën fazë të auditimit”, deklaroi Spanca, duke shtuar se ndër qëllimet kryesore të këtij lloj angazhimi është hapja e portave të përbashkëta për të shkëmbyer përvojën dhe eksperiencën, veçanërisht në fusha më specifike, siç është auditimi i teknologjisë së informacionit.  

“Bazuar në raportet individuale të auditimit më gëzon fakti që sot kemi përpara një raport përmbledhës të hartuar nga të dy ISA-të. Raporti përfshinë çështjet kyçe të auditimit paralel me një pamje të plotë dhe të strukturuar rreth zhvillimit të këtij procesi dhe rezultateve të auditimit, duke përfshirë edhe rekomandime për përmirësim”, tha Auditorja e Përgjithshme, Vlora Spanca.

Ajo theksoi se me realizimin me sukses të projekteve të tilla më se miri tregohet se në institucionet tona kemi njerëz të përgatitur, profesional, kompetent dhe të përkushtuar për të arritur majat e suksesit.

Z. Shehu dhe znj. Spanca shprehën përkushtimin e tyre për vijueshmërinë e bashkëpunimit të ndërsjellë në auditime të tjera për tematika të rëndësishme dhe me interes të përbashkët.

 

  • Share:

Lexo lajme tjera:

Zyra Kombëtare e Auditimit dhe Njësia Qendrore Harmonizuese me Memorandum të Mirëkuptimit
21/12/2023

Zyra Kombëtare e Auditimit dhe Njësia Qendrore Harmonizuese me Memorandum të Mirëkuptimit

Auditorja e Përgjithshme, Vlora Spanca, dhe drejtori i Njësisë Qendrore Harmonizuese në Ministrinë e Financave, Punës dhe Transfereve, Agim Krasniqi, kanë nënshkruar Memorandumin e Mirëkuptimit me qëllim të bashkëpunimit në përmirësimin e cilësisë së auditimit të brendshëm me fokus në qeverisjen, vlerësimin dhe menaxhimin e rrezikut, si dhe ngritjen e cilësisë së raporteve të auditimit të brendshëm.

Memorandumi parasheh bashkëpunim ndërinstitucional në implementimin e programit të trajnimit për zhvillimin e vazhdueshëm profesional për auditorët e brendshëm, shkëmbimin e njohurive dhe praktikave të mira të punës, organizimin e punëtorive dhe seminareve të përbashkëta, si dhe mbajtjen e takimeve për çështje të ndryshme në fushën e auditimit të jashtëm dhe të brendshëm me qëllim të mbështetjes së ndërsjellë profesionale.

Me nënshkrimin e këtij Memorandumi, Zyra Kombëtare e Auditimit pajtohet që t’i ofrojë mbështetje profesionale Njësisë Qendrore Harmonizuese në fushën e metodologjisë dhe qasjes audituese në proceset e planifikimit dhe ekzekutimit të auditimit përmes trajnimeve dhe formave tjera të edukimit të vazhdueshëm profesional  për auditorët e brendshëm. Po ashtu palët pajtohen të shkëmbejnë informatat e nevojshme që ndihmojnë në rritjen e cilësisë së punës audituese.

 

 

Lexo më shumë
Auditorja e Përgjithshme Vlora Spanca u prit në takim nga Kryesuesi i Këshillit Prokurorial të Kosovës Jetish Maloku
17/01/2024

Auditorja e Përgjithshme Vlora Spanca u prit në takim nga Kryesuesi i Këshillit Prokurorial të Kosovës Jetish Maloku

Auditorja e Përgjithshme e Republikës së Kosovës, Vlora Spanca, dhe Zëvendës Auditori i Përgjithshëm, Bezad Halilaj, të mërkurën u priten në takim nga kryesuesi i Këshillit Prokurorial të Kosovës, Jetish Maloku dhe auditori i brendshëm në Sekretariatin e KPK-së, Beqir Dauti.
Takimi kishte për qëllimi avancimin e bashkëpunimit në mes të Zyrës Kombëtare të Auditimit dhe Këshillit Prokurorial të Kosovës lidhur me raportet e auditimit për përdorim efektiv, efikas dhe ekonomik të fondeve publike, si dhe diskutimin për zbatimin e standardeve dhe praktikave më të mira ndërkombëtare për menaxhimin transparent të financave publike.
Auditorja e Përgjithshme, Vlora Spanca, dhe Kryesuesi i KPK-së, Jetish Maloku, u dakorduan për nevojën e organizimit të trajnimeve të përbashkëta me prokurorë, ku do të diskutohen dhe trajtohen gjetjet dhe rekomandimet e auditimit, duke theksuar përkushtimin e përbashkët për të punuar gjithnjë në interes të rritjes së përgjegjësisë publike në fushën e zbatimit të ligjit.
Me këtë rast, z. Maloku e informoi Auditoren e Përgjithshme, për përpjekjet dhe angazhimin e sistemit prokurorial në përmirësimin e vazhdueshëm rreth menaxhimit të fondeve publike, duke u mbështetur në rekomandimet e Zyrës Kombëtare të Auditimit (ZKA) dhe rekomandimet e Njësisë së Auditimit të Brendshëm të KPK-së.
Znj. Spanca dhe z. Maloku dhe u zotuan që në të ardhmen të ketë më shumë takime të tilla për të trajtuar tema me interes të përbashkët në funksion të menaxhimit të financave publike si dhe identifikimit të sfidave.

Lexo më shumë