Lajmet

Mbahet Konferenca Përmbyllëse e Projektit të Binjakëzimit ”Fuqizimi i mëtejmë i ndikimit të Zyrës Kombëtare të Auditimit”. Ky projekt është  financuar nga Bashkimi Evropian dhe është zbatuar nga Zyra Supreme e Auditimit të Polonisë. Në konferencë morën pjesë Auditori i Përgjithshëm i Kosovës, Besnik Osmani, presidenti i Institucionit Suprem të Auditimit të Polonisë, Marian Banas me bashkëpunëtor, si dhe Zëvendësshefja e Bashkëpunimit në Zyrën e Bashkimit Evropian në Prishtinë, Hillen Francke. Në fjalën hyrës të kësaj konference, Auditori i Përgjithshëm i Republikës së Kosovës, Besnik Osmani, falënderoj Bashkimin Evropian për financimin e Projektit të Binjakëzimit “Fuqizimi i mëtejmë i ndikimit të Zyrës Kombëtare të Auditimit” si dhe Institucionin Suprem të Auditimit të Polonisë për profesionalizimin, angazhimin dhe kontributin e dhënë për të zbatuar me sukses këtë projekt. Osmani ka vlerësuar lartë bashkëpunimin me kolegët polak, duke thënë se realizimi i këtij projekti ka pasur për qëllim përmirësimin e mëtejmë të menaxhimit të financave publike në Kosovë si dhe të rrisë besimin në shpenzimet publike duke promovuar transparencë dhe duke rritur llogaridhënien publike. “Pavarësisht se 90% e projektit është zbatuar gjatë kohës së pandemisë, me shumë sfida dhe paqartësi rreth situatës, projekti arriti të zbatohet me sukses. Falë këtij projekti Zyra Kombëtare e Auditimit ka Strategjinë e Komunikimit përmes së cilës synohet komunikim më efektiv me qytetarët, Parlamentin dhe palët e tjera të interesit; Udhëzuesin për rekomandime të auditimit dhe data bazën e rekomandimeve përmes së cilave synojmë të rrisim cilësinë e rekomandimeve që ne japim dhe të rrisim transparencën lidhur me rekomandimet në kohë reale; si dhe Doracakun e përditësuar të auditimit financiar dhe të pajtueshmërisë përmes së cilit synojmë të rrisim cilësinë e auditimeve tona dhe të jemi më afër Standardeve Ndërkombëtare të Auditimit”, është shprehur Osmani. Ndërkohë presidenti i  Institucionit Suprem të Auditimit të Polonisë, Marian Banas, është shprehur i kënaqur me rezultatet e arritura nga Projekti i Binjakëzimit “Fuqizimi i mëtejmë i ndikimit të Zyrës Kombëtare të Auditimit”. Ai ka thënë se ky projekt ka shërbyer për rritje të cilësisë në auditim dhe zbatimin e rekomandimet nga subjektet e audituara. Banas ka falënderuar për bashkëpunim të vazhdueshëm në kuadër të këtij projekti kolegët nga Institucioni Suprem i Auditimit të Polonisë si dhe ata të Zyrës Kombëtare të Auditimit të Kosovës. “Jam shumë i lumtur dhe krenar që ISA e Polonisë ka mundur të implementojë këtë Projekt këtu në Kosovë, ne si dy vende ndajmë eksperiencë dhe histori të ngjashme. Falënderoj Auditorin e Përgjithshëm të Republikës së Kosovës  për vizionin dhe kurajon e tij. Besnik Osmani më të vërtetë është një lider i përgjegjshëm i cili e kupton rëndësinë e zhvillimit dhe bashkëpunimit”, ka deklaruar Banasi. Kurse zëvendësshefja e Bashkëpunimit në Zyrën e Bashkimit Evropian në Prishtinë, Hillen Francke, ka thënë se ndihet mirë për financimin e këtij projekti që ka dhënë rezultate të frytshme dhe se Zyra e Bashkimit Evropian mbetet e përkushtuar që në vazhdimësi ta mbështes Zyrën Kombëtare të Auditimit në ngritjen e kapaciteteve të saj. “Më të vërtetë jam e kënaqur me rezultatet e Projektit të Binjakëzimit në mes të Zyrës Kombëtare të Auditimit të Kosovës dhe Zyrës Kombëtare të Auditimit të Polonisë. Po ashtu si BE jemi të kënaqur me bashkëpunimin në mes të këtyre dy organizatave sepse të dy palët kanë treguar shumë fleksibilitet gjatë zbatimit të projektit në kohë pandemie. Nuk është hera e parë që e ndihmojmë ZKA-në e Kosovës, në fakt ky është projekti i shtatë të cilin ne e mbështesim. Institucionet Supreme të Auditimit kanë rendësi të madhe në shpenzimin e parasë publike dhe llogaridhënien”, ka deklaruar Francke. Ajo ka shtuar se ZKA-ja në vazhdimësi ka rritur numrin e auditimeve të Ndërmarrjeve Publike si dhe auditimet e fondeve të donatorëve. Mirëpo suksesi më i madh i saj është anëtarësimi në organizatat më të rëndësishme ndërkombëtare të auditimit INTOSAI dhe EUROSAI. Ndërkaq rezultatet e projektit në detaje janë prezantuar nga Zëvendës Auditori i Përgjithshëm i Kosovës, njëherësh udhëheqës i Projektit, Ilir Salihu dhe kryesuesi i projektit nga Institucioni Suprem i Auditimit të Polonisë Wojciech Kutyla. Objektivë e projektit të binjakëzimit ishte që të mbështetet Zyra Kombëtare e Auditimit të Kosovës në zhvillimin e mëtejmë të kapaciteteve të saj në realizimin e qëndrueshëm të objektivave dhe  të misionit të vet sipas Standardeve Ndërkombëtare të Institucioneve Supreme të Auditimit (SNISA) dhe rritjen e ndikimit të saj përmes komunikimit të intensifikuar me qytetarët, Parlamentin dhe palët tjera të interesit. Komponentët kryesore të këtij projekti ishin: (i) Komunikimi me qytetarët, Parlamentin dhe palët e tjera të interesit; (ii) Fuqizimi i kapaciteteve institucionale të ZKA-së; dhe (iii) Përditësimi i doracakëve të auditimit (financiar dhe të pajtueshmërisë) dhe të letrave të punës, në përputhje me legjislacionin dhe SNISA-t.  

Auditori i Përgjithshëm i Republikës së Kosovës, Besnik Osmani, të hënën ka pritur në takim bilateral presidentin e Institucionit Suprem të Auditimit të Polonisë Marian Banas me delegacionin e tij. Homologët diskutuan për mënyrat e vazhdimit të bashkëpunimit bilateral përmes shkëmbimit të njohurive dhe përvojave që kanë për qëllim avancimin e mëtejmë të auditimit të jashtëm dhe përmirësimin e menaxhimit të parasë publike. Ata kanë folur edhe për vështirësitë dhe sfidat si dhe për procesin e auditimit në kohë pandemie. Auditori i Përgjithshëm, Besnik Osmani, me këtë rast ka falënderuar homologun polak për ndihëm e vazhdueshme dhënë ZKA-së në ngritjen e kapaciteteve profesionale. Osmani është shprehur i kënaqur me bashkëpunimin e deritanishëm si dhe u zotua për vazhdimin e këtij bashkëpunimit në mes të dy organizatave përmes projekteve të reja. Nga ana tjetër Presidenti i Institucionit Suprem të Auditimit të Polonisë, Marian Banas, ka përgëzuar Osmanin për arritjet e Zyrës Kombëtare të Auditimit në përgjithësi, e në veçanti për anëtarësimin me të drejta të plota në Organizatën Evropiane të Institucioneve Supreme të Auditimit (EUROSAI). Banasi ka thënë se mbështesin ZKA-në dhe presim që të punojmë edhe më tutje në ngritjen e marrëdhënieve të mira në mes të organizatave, veçanërisht punën që lidhet me procesin e auditimit për Covid - 19. Ai ka vlerësuar se bashkëpunimi ndërmjet dy organizatave është në shërbim të rritjes së cilësisë në auditimin e jashtëm. Osmani dhe Banas  janë shprehur të kënaqur që Zyra Kombëtare e Auditimit të Polonisë dhe Zyra Kombëtare e Auditimit të Kosovës kanë arritur që ta përmbyllin me sukses Projektin e Binjakëzimit “Fuqizimi i mëtejmë i ndikimit të Zyrës Kombëtare të Auditimit në Kosovë” të financuar nga Bashkimi Evropian. Pavarësisht sfidave të shkaktuara nga pandemia Covid-19 për më shumë se një vit, të gjitha aktivitetet janë zhvilluar përmes platformës online duke mos u shkaktuar asnjë vonesë apo aktivitet i humbur. Ky takim u realizua në kuadër të vizitës së presidentit të Institucionit Suprem të Auditimit të Polonisë Marian Banas në Kosovë për të marrë pjesë në konferencën përmbyllëse të Projektit të Binjakëzimit.

Në kuadër të mbështetjes së vazhdueshme nga Zyra Kombëtare e Auditimit të Suedisë për Institucionet Supreme të Auditimit në Ballkanin Perëndimor gjatë kësaj jave përfaqësuesit e Institucioneve Supreme të Auditimit nga Kosova, Mali i Zi dhe Bosnja e Hercegovina kanë ndjekur punëtorinë e  fundit të seminarit lidhur me sigurimin dhe kontrollin e cilësisë në auditim. Kjo punëtorie që ishte e treta më radhë kishte për synim sqarimet e mëtejshme sesi një Institucion Suprem i Auditimit mund të forcojë kapacitetin e tij përmes një përqendrimi sistematik në çështjet e cilësisë në organizatë. Me këtë rast është bërë një përmbledhje e ndryshimeve midis kontrollit të cilësisë dhe sigurimit të cilësisë. Pjesëmarrësit nga tri Institucionet Supreme të Auditimit kanë biseduar për  një strategji të mundshme se si të vazhdojnë zhvillimin dhe adresimin e çështjeve në lidhje me kontrollin dhe sigurimin e cilësisë në organizatat përkatëse. Seminari për sigurimin e cilësisë dhe kontrollin e cilësisë i organizuar nga Zyra Kombëtare e Auditimit të Suedisë ishte i ndarë në tri punëtori, punëtoria e parë u mbajt në Sarajevë në vitin 2019, ndërsa për shkak të pandemisë, punëtoria e dytë dhe e tretë janë mbajtur online, përmes platformës Zoom.

Zyra Kombëtare e Auditimit (ZKA) ka publikuar të enjten raportin e auditimit të performancës “Projektet e financuara nga Granti i Performancës Komunale për vitin fiskal 2019". Granti është bashkëfinancuar nga Fondacioni Zviceran në Kosovë/Projekti për Decentralizim dhe Përkrahje të Komunave si dhe Ministria e Administrimit të Pushtetit Lokal. Qëllimi i këtij auditimi ka qenë  të vlerësoj nëse shpenzimet dhe menaxhimi i projekteve nga Granti janë në harmoni me kërkesat e donatorëve dhe nëse kanë arritur rezultatet e synuara. Subjekt i auditimit kanë qenë grantet e dhëna nga Ministria  e Administrimit të Pushtetit Lokal dhe Komunat: Prizren, Gllogoc, Vushtrri, Viti, Shtërpcë dhe Obiliq. Rezultatet e auditimit tregojnë se institucionet e audituara në përgjithësi  kanë aplikuar procedurat e prokurimit në fuqi, ashtu siç parashihet me kërkesat e këtij Granti: fondet e ndara janë shpenzuar për projektet kapitale dhe për qëllimin e kontraktuar, dhe qytetarët janë shprehur të kënaqur me investimet e bëra në kuadër të këtyre projekteve. Megjithatë, auditimi ka nxjerrë në pah disa mangësi që duhet të përmirësohen për të maksimizuar përfitimin nga Grantet. Një prej këtyre mangësive është mungesa e një  procesi standard të pranimit të kërkesave nga qytetarët, shqyrtimit të tyre dhe prioritizimit të nevojave për investime komunale. Gjithashtu inicimi i procedurave të prokurimit është bërë me vonesë. Operatorëve Ekonomik nuk i janë ofruar kushtet e përshtatshme për  punë, si dhe ka pasur rast kur operatori nuk ishte i përgjegjshëm ndaj kontratës. Auditori i Përgjithshëm, Besnik Osmani, lidhur me këtë auditim ka vlerësuar se Granti i Performancës Komunale në përgjithësi ka ndihmuar komunat në arritjen e objektivave strategjike dhe ka arritur qëllimin e tij kryesor duke ofruar shërbime më të mira komunale për qytetarët, mirëpo komunat e audituara duhet të shtojnë vëmendjen në procesin e monitorimit të menaxhimit të kontratave për të maksimizuar rezultatet e synuara. Zyra Kombëtare e Auditimit i ka rekomanduar komunat e audituara të përmirësojnë  procesin e menaxhimit të këtyre projekteve, duke filluar me inicimin e procedurave të prokurimit me kohë deri te përfundimi i projekteve brenda kohës së kontraktuar. Ky auditim është realizuar në kuadër të marrëveshjes në mes Zyrës Kombëtare të Auditimit dhe Agjencisë Zvicerane për Zhvillim dhe Bashkëpunim, (përmes Decentralizimit dhe Përkrahjes Komunale). Raportin e plotë mund ta lexoni këtu.  

Drejtuesit e Institucioneve Supreme të Auditimit (ISA) të enjten kanë marrë pjesë në konferencën online “Pavarësia e Institucioneve Supreme të Auditimit” të organizuar nga Institucioni Suprem i Auditimit të Polonisë, në të cilën është diskutuar për rëndësinë e pavarësisë institucionale. Në këtë konferencë përvojat e tyre i kanë ndarë drejtuesit e Institucioneve Supreme të Auditimit të vendeve evropiane si Polonia, Norvegjia, Hungaria, Bullgaria, Malta,  Moldova, Rumania, Turqia, Ukraina, Kroacia dhe Kosova, si dhe përfaqësues nga Iniciativa për Zhvillim e INTOSAI-t. (IDI) Punimet e kësaj konference i ka ndjekur edhe Auditori i Përgjithshëm i Republikës së Kosovës, Besnik Osmani. Në prezantimin e tij, Osmani ka thënë se Auditori i Përgjithshëm i Kosovës, sipas Kushtetutës, është institucioni më i lartë i kontrollit ekonomik dhe financiar në Republikën e Kosovës, dhe ushtron mandatin, funksionet dhe përgjegjësitë e tij funksionale, financiare dhe operacionale në mënyrë të pavarur. “Një Institucion Suprem i Auditimit, për  të përmbushë misionin dhe të rrisë ndikimin e tij për një jetë më të mirë të qytetarëve duhet të jetë vazhdimisht i vetëdijshëm për sfidat e mundshme për pavarësinë e tij në të gjitha aspektet, funksionalisht, financiarisht dhe operacionalisht”, ka deklaruar Osmani. Tutje Osmani ka theksuar se përkundër se operon në një mjedis të brishtë dhe sfidues, Zyra Kombëtare e Auditimit e Kosovës ka qenë në gjendje të përmbushë mandatin e saj dhe në vazhdimësi ka dorëzuar dhe botuar raporte të auditimit me profesionalizëm dhe të rëndësisë së veçantë. Osmani ka treguar se megjithatë në disa raste ZKA-ja ka hasur në vështirësi dhe përpjekje për të ndërhyrë në punën dhe mandatin e saj, siç ka qenë rasti në vitin 2019, ku me Ligjin për Zyrtarët Publik është rrezikuar pavarësia  e Auditori të Përgjithshëm lidhur me çështjet që ndërlidhen me strukturën organizative, funksionimin, klasifikimin e pozitave të punës dhe kriteret e rekrutimit të stafit të ZKA-së por që është tejkaluar me vendimin e Gjykatës Kushtetuese. "Ky vendim ka rikonfirmuar vendosjen e drejtpërdrejtë të pavarësisë funksionale dhe organizative të Auditorit të Përgjithshëm në Kushtetutën e Republikës së Kosovës dhe më në fund ka shmangur diskutimet e mëtejshme dhe mosmarrëveshjet e mundshme”, ka thënë Auditori i Përgjithshëm i Kosovës, Besnik Osmani. Po ashtu Auditorët e Përgjithshëm të vendeve pjesëmarrëse kanë prezantuar përvojat e vendeve të tyre dhe ka qenë konkludim i përbashkët që përpjekjet për ndërhyrje janë të vazhdueshme dhe gjerësisht të shprehura në shumë vende por të përhershme duhet të jenë edhe përpjekjet e ISA-ve që t’i parandalojnë dhe mënyra më e mirë është aleanca me mediat dhe shoqërinë civile.

Për tri ditë më radhë (24-26 maj) përfaqësuesit e Zyrës Kombëtare të Auditimit kanë ndjekur trajnimin mbi përdorimin e Doracakut të Auditimit të Pajtueshmërisë i cili u mbajt në kuadër të Projektit të Binjakëzimit “Fuqizimi i mëtejshëm i ndikimit të Zyrës Kombëtare të Auditimit të Kosovës”. Trajnimi kishte për synim avancimin e teknikave të përdorimit të Doracakut të Auditimit të Pajtueshmërisë. Ndërsa,  qëllimi kryesor i këtij Doracaku është që tu ofrojë punonjësve të ZKA-së një pikë referimi për t'ju ndihmuar gjatë gjithë procesit të auditimit. Në mënyrë që të sigurohet cilësi e lartë e financiare dhe punës së auditimit të pajtueshmërisë, Manuali ofron një kornizë për planifikimin, ekzekutimin, përfundimin dhe raportimin mbi auditimet, ndërsa thekson rëndësinë e vënies së fokusit në rrezikun ndaj objektivave të pajtueshmërisë, për të ofruar auditime efektive dhe efikase dhe për të mbrojtur dhe rritur reputacionin e ZKA. Pjesëmarrësit në kuadër të punëtorive trajtuan disa tema si: Përmbledhja e Manualit të ri të Auditimit të Pajtueshmërisë, ku diskutimi u fokusua te Koncepti i një auditimi të pavarur të pajtueshmërisë; Procesi i modifikuar i auditimit; Përzgjedhja e dokumenteve të punës; Kriteret e vlerësimit të provave të marra; si dhe Struktura dhe përmbajtja e raportit të auditorit. Kurse tema Prezantimi i çështjes u elaborua në detaje me përzgjedhjen e një teme për një auditim të pavarur të pajtueshmërisë; Vlerësimin paraprak të rrezikut si dhe Planifikimin paraprak të auditimit. Ndërsa të Zgjidhja e çështjes u diskutua për Analizën e procesit themelor të çështjes; Vlerësimin e hollësishëm të rrezikut të procesit; Planifikimit të procedurave të hollësishme; Vlerësimin e provave të marra potencialisht; Marrjen e vendimit për opinionin e auditimit si dhe Hartimin e shembujve të gjetjeve dhe rekomandimeve.

Në një ceremoni të rastit ku prezentë ishin Ambasadorja e Maqedonisë së Veriut në Kosovës, Shpresa Jusufi, Zëvendëskryeministri i Qeverisë së Maqedonisë së Veriut, Fatmir Bytyqi dhe Zëvendëskryeministrja Donika Gervalla, Zyra Kombëtare e Auditimit të Republikës së Kosovës dhe Autoriteti i Auditimit të Maqedonisë së Veriut kanë avancuar bashkëpunimin institucional me nënshkrimin e një Memorandumi të Mirëkuptimit/Bashkëpunimit. Memorandumi i mirëkuptimi për bashkëpunim ndërmjet dy institucioneve i nënshkruar të martën në Prishtinë nga Auditori i Përgjithshëm i Republikës së Kosovës, Besnik Osmani dhe Auditori i Përgjithshëm i Autoritetit të Auditimit të Maqedonisë së Veriut për auditimin e fondeve IPA, Adem Curi ka për qëllim forcimin e mëtejshëm të kapaciteteve institucionale për auditim efektiv dhe efikas në fushën e auditimit të fondeve nga IPA. Auditori i Përgjithshëm, Besnik Osmani, ka vlerësuar se ky Memorandum  është mundësi e mirë që auditorët e Zyrës Kombëtare të Auditimit të Kosovës të forcojnë njohuritë e tyre për specifikat e auditimeve të fondeve IPA. Përafrimi i Kosovës në procesin e integrimeve evropiane do të sjellë nevojën e zbatimit të këtyre auditimeve për të cilat aktualisht ne nuk kemi ndonjë përvojë të veçantë. Edhe Auditori i Përgjithshëm i Autoritetit të Auditimit të Maqedonisë së Veriut për auditimin e fondeve IPA, Adem Curi, e ka vlerësuar të rëndësishëm nënshkrimin e këtij memorandumi, duke thënë se shkëmbimi i praktikave profesionale mundëson  përmirësimin e kapaciteteve audituese të dy institucioneve. Ky bashkëpunim parasheh shkëmbimin e përvojës në qasjen e audimit dhe metodologjinë e përdorur në pajtim me standardet e auditimit; shkëmbimin e përvojës dhe mësimet e nxjerra në fushën e auditimit; ofrimin e ndihmës dhe bashkëpunimit nga eksperti në fushën e auditimit; organizimin e hulumtimeve, takimeve, konferencave, trajnimeve, vizitave studimore, dhe praktikave profesionale për përmirësimin e kapaciteteve audituese te të dy institucioneve si dhe organizimin e vizitave të përbashkëta tek organet dhe institucionet profesionale në fushën e auditimit. Zëvendëskryeministrja njëherësh Ministrja e Punëve të Jashtme dhe Diasporës e Republikës së Kosovës, Donika Gërvalla, ka thënë se Qeveria mirëpret një bashkëpunim të tillë mes dy shteteve për forcimin e marrëdhënieve bilaterale. “Memorandumit të Mirëkuptimit i cili do të nënshkruhet sot, i paraprijnë një sërë marrëveshjesh qoftë ndërinstitucionale apo ndërqeveritare në mes të Republikës së Kosovës dhe Maqedonisë së Veriut. Si Qeveri e re e mirëpresim një bashkëpunim të tillë mes dy shteteve për forcimin e marrëdhënieve bilaterale. Republika e Kosovës dhe Republika e Maqedonisë së Veriut ndajnë interesa të përbashkëta politike dhe ekonomike, për stabilitetin, qëndrueshmërinë dhe prosperitetin e rajonit tonë. Fuqizimi i marrëdhënieve dypalëshe dhe fqinjësisë së mirë madje miqësisë së ndërsjellë është përkushtimi ynë”, ka thënë Gërvalla. Edhe Zëvendëskryeministri i Qeverisë së Maqedonisë së Veriut, Fatmir Bytyqi e ka përshëndetur nënshkrimin e këtij memorandumi. “Nënshkrimi i memorandumit të sotëm dëshmon që bashkëpunimi ynë rajonal i bazuar në paradigmën e konkurueshmerisë rajonale kundrejt konkurrencës rajonale të vendeve të Ballkanit Perëndimor jetësohet edhe në praktikë, duke shkëmbyer përvojat ”, ka deklaruar Bytyqi.  

Auditori i Përgjithshëm Besnik Osmani dhe presidenti i EUROSAI-t Miloslav Kala flasin për avancimin e bashkëpunimit në forumet e EUROSAI-t Auditori i Përgjithshëm i Kosovës, Besnik Osmani, ka mbajtur takim virtual me Presidentin e Organizatës Evropiane të Institucioneve Supreme të Auditimit (EUROSAI), z. Miloslav Kala njëherësh President i Institucionit Suprem të Auditimit të Republikës së Çekisë. Me këtë rast presidenti i EUROSAI-t Miloslav Kala i ka uruar mirëseardhje Zyrës Kombëtare të Auditimit në këtë organizatë, duke shprehur gatishmërinë për të avancuar bashkëpunimin ndërinstitucional përmes zhvillimit të aktiviteteve në forumet e EUROSAI-t. Ndërsa Auditori i Përgjithshëm, Besnik Osmani, ka deklaruar se anëtarësimi i Zyrës Kombëtare të Auditimit në EUROSAI ofron një mundësi të shkëlqyeshme për zhvillimin tonë profesional në të ardhmen dhe lejon stafin tonë të ndajnë përvojën dhe idetë me interes të përbashkët me kolegët e tyre evropianë. Osmani ka rikonfirmuar  gatishmërinë e tij dhe të Zyrës Kombëtare të Auditimit të Kosovës për të pranuar dhe marrë përsipër të gjitha detyrimet dhe të drejtat që lidhen me statusin si anëtar i plotë në EUROSAI. Të pranishëm në këtë takim kanë qenë edhe Zëvendës Auditori i Përgjithshëm Ilir Salihu dhe drejtoresha për Bashkëpunim Ndërkombëtar, Qëndresa Mulaj.

Në kuadër të Projektit të Binjakëzimit “Fuqizimi i mëtejshëm i ndikimit të Zyrës Kombëtare të Auditimit të Kosovës”, të enjten dhe të premten është mbajtur trajnimi lidhur me udhëzimet e rekomandimeve të auditimit. Trajnimi dy ditorë për udhëzimet e rekomandimeve të auditimit është përqendruar në temat si: Moszbatimi i rekomandimeve të ZKA-së; Shkaqet e brendshme dhe të jashtme;  Referenca themelore – Interesi publik; Strukturat kyçe të rekomandimit: Gjetja; Rreziku; Kërkimi për mbështetje në teknologji digjitale; Përqendrimi i veçantë në statusin e të zbatuarit si dhe Prezantim i rekomandimeve në ueb faqe të Zyrës Kombëtare të Auditimit.  Secila nga këto  temat është diskutuar në punëtori, duke u mbuluar me detajet e nevojshme dhe duke iu referuar shembujve konkret bazuar në raportet e auditimit nga ZKA-ja. Ky trajnim është ndjekur nga Ndihmësit e Auditorit të Përgjithshëm, Udhëheqësit e Auditimit, Udhëheqës të Ekipeve të Auditimit, Departamenti për Metodologji dhe Sigurimin e Cilësisë si dhe Departamenti për Komunikimi dhe Zhvillim Profesional. Ndikimi i auditimit matet me nivelin e zbatimit të rekomandimeve. Niveli i zbatimit të rekomandimit është treguesi më i mirë për të kuptuar nëse menaxhmenti po përmirëson proceset ekzistuese dhe kontrollet në fushat ku janë identifikuar gabimet dhe parregullsitë. Rekomandimet e dhëna në raportet e auditimit përshkruajnë veprimet e nevojshme për të korrigjuar situatën, prandaj që të kenë efektin e dëshiruar ato duhet të jenë të përgatitura me kujdes, të shkruara dhe strukturuara mirë dhe të orientuar drejt rezultateve. Me qëllim të rritjes së numrit të rekomandimeve të zbatuara dhe rritjes së ndikimit të ZKA-së, përmes projektit “Fuqizimi i mëtejshëm i ndikimit të Zyrës Kombëtare të Auditimit të Kosovës”, është duke u zhvilluara dhe së shpejti pritet të finalizohet databaza e rekomandimeve të auditimit e cila do të jetë e qasshme për publike përmes ueb faqes së ZKA-së. Prandaj, një pjesë e këtij trajnimi është fokusuar në demonstrimin e konceptit mbi të cilin është duke u zhvilluar kjo databazë.  

Auditori i Përgjithshëm Besnik Osmani pranon urime për anëtarësimin e ZKA-së me të drejta të plota në EUROSAI Në punimet e Kongresit të XI-të të Organizatës Evropiane të Institucioneve Supreme të Auditimit (EUROSAI), të mbajtur me 14 dhe 15 prill 2021, pasi u ndërmorën të gjitha veprimet e nevojshme, Kongresi si organi më i lartë i organizatës, ka bërë të plotfuqishëm vendimin e Bordit Drejtues për pranimin e Zyrës Kombëtare të Auditimit të Republikës së Kosovës (ZKA) në këtë organizatë. Me këtë rast, Auditori i Përgjithshëm i Kosovës, Besnik Osmani, ka pranuar urime të shumta nga homologët e tij për këtë arritje të rëndësishme për ZKA-në. Osmani ka marrë telegrame urimi nga Presidenti i EUROSAI-t, z. Miloslav Kala njëherësh President i Institucionit Suprem të Auditimit të Republikës së Çekisë, nga z. Seyit Ahmet Bas, President i Gjykatës Turke të Llogarive, njëherësh Nën President i EUROSAI-t, Auditori i Përgjithshëm i Britanisë së Madhe, z. Gareth Davies, nga Kryetar i Kontrollit të Lartë të Shtetit të Shqipërisë, z. Arben Shehu. Gjithashtu ka pranuar telefonata të shumta urimi nga homologë të Institucioneve Supreme të Auditimit dhe kolegë e miq tjerë ndërkombëtar, si nga Auditori i Përgjithshëm i Republikës së Maqedonisë së Veriut, z. Maksim Acevski, ai i Kroacisë, z. Ivan Klešic, Presidenti i Institucionit Supreme të Auditimit të Polonisë, z. Marian Banas etj. Presidenti i EUROSAI-t, z. Miloslav Kala, në letrën e tij drejtuar z. Osmani, ka thënë se është i lumtur që në Kongresin e XI të EUROSAI-t është vulosur anëtarësimi i plotë i ZKA-së në këtë organizatë. Ai ka rikujtuar se rruga për t’u bërë pjesë e EUROSAI-t ishte e gjatë dhe me pengesa, por falë përpjekjeve të përbashkëta dhe bashkëpunimit  të ngushtë është  shënuar ky sukses. “Ky është një moment historik për ZKA-në, bashkëpunimi miqësor dhe i frytshëm do të vazhdojë edhe në të ardhmen në mes të dy organizatave tona. Gjatë mandatit tim të presidencës, unë do të theksoja domosdoshmërinë e bashkëpunimit ndërkombëtar dhe ndarjen e njohurive midis anëtarëve të EUROSAI-t”, ka shkruar Kala. Urime të përzemërta Osmani ka marrë edhe nga Kryetari i Kontrollit të Lartë të Shtetit të Shqipërisë, Arben Shehu. Në letrën e urimit z. Shehu ka thënë se Zyra Kombëtare e Auditimit të Kosovës ndan të njëjtat parime dhe vlera me të gjitha vendet anëtare të EUROSAI-t në lidhje me transparencën, mirëqeverisjen, llogaridhënien dhe zhvillimin e kompetencave profesionale në fushën e auditimit të sektorit publik, duke u bërë anëtari i 51-të i kësaj organizate. “Angazhimi i vazhdueshëm në mbështetje të ZKA-së do të shërbej për intensifikimin dhe rritjen cilësore të bashkëpunimit midisi dy institucioneve tona në fushat me interes të përbashkët edhe në të ardhmen”, është shprehur Shehu. Po ashtu edhe Auditori i Përgjithshëm i Britanisë së Madhe, Gareth Davies, ka përgëzuar Auditorin e Përgjithshëm Besnik Osmanin lidhur me anëtarësimin e ZKA-së në EUROSAI, duke thënë se kjo mundëson shkëmbimin e eksperiencave dhe njohurive ndërmjet anëtarëve. “Ne e mbështesim Zyrën Kombëtare të Auditimit të Kosovës dhe presim që të punojmë edhe më tutje në ngritjen e marrëdhënieve të mira në mes të organizatave tona, veçanërisht punën që lidhet me procesin e auditimit për Covid 19”, thuhet ndër të tjera në urimin e Davies.

Auditori i Përgjithshëm, Besnik Osmani, të premten është pritur në takim nga kryetari i Komisionit për Buxhet, Punë dhe Transfere (KBPT), Armend Muja. Osmani e ka informuar z. Muja për finalizimin e procesit të auditimit për sezonin 2020/21 dhe për vështirësitë me të cilat është duke u ballafaquar ZKA-ja në realizimin e planit të auditimit. Ata kanë biseduar për modalitetet e bashkëpunimit ndërmjet ZKA-së dhe KBPT-së me qellim që rezultatet e auditimit të përmirësojnë qeverisjen dhe shërbimet ndaj qytetarëve. Me këtë rast Auditori i Përgjithshëm/Zyra Kombëtare e Auditimit (ZKA) e ka dorëzuar  në Kuvendin e Kosovës edhe Raportin Vjetor të Performancës për vitin 2020. Pas dorëzimit, raporti është publikuar në uebfaqen e ZKA-së. Raporti Vjetor i Performancës përmban informata të rëndësishme rreth performancës së institucionit të Auditorit të Përgjithshëm në përmbushjen e obligimeve të tij kushtetuese e ligjore, në pajtim me Standardet Ndërkombëtare të Institucioneve Supreme të Auditimit (SNISA). Puna e  Zyrës gjatë vitit 2020 është mbështetur në Planin Strategjik 2018-2021, Planin Vjetor të Auditimit 2019/20, që paraprakisht i është dorëzuar Kuvendit të Kosovës, si dhe në Planin Operativ 2020. Auditori i Përgjithshëm, Besnik Osmani, në fjalën e tij brenda raportit ka thënë se pavarësisht se viti 2020 ka qenë sfidues për shkak të ndikimit të pandemisë COVID 19, Zyra Kombëtare e Auditimit ka arritur t’i përmbush të gjitha kërkesat dhe afatet ligjore për punën audituese, duke forcuar mbulueshmërinë dhe cilësinë e auditimit. Madje gjatë vitit 2020 ka kryer numrin më të lartë të auditimeve të rregullsisë që nga themelimi. Ai ka thënë se përmes rekomandimeve praktike, ZKA-ja ka shtrirë më tej ndikimin e saj, ku është vërejtur një progres i lehtë në rritjen e shkallës së zbatimit të rekomandimeve të auditimit. “Janë audituar 95 organizata buxhetore me një buxhet të përgjithshëm rreth 2.5 miliardë euro, 14 ndërmarrje publike kryesisht në fushën e telekomunikimit, furnizimit me ujë dhe trajtimit të mbeturinave, 8 auditime të performancës me fokus tema komplekse, si dhe 9 projekte të financuara nga fondet e donatorëve”, është shprehur Osmani. Paralelisht, janë përditësuar doracakët dhe letrat e punës sipas Standardeve Ndërkombëtare të Auditimit dhe praktikave të mira ndërkombëtare si dhe është  digjitalizuar procesi i punës audituese me lansimin e sistemit elektronik të auditimit SITA, përmes së cilit do të racionalizohet koha në auditim, rritet cilësia dhe siguria e auditimeve si dhe forcohet transparenca. Kurse sukseset në rrafshin ndërkombëtar kanë kulmuar me integrimin e ZKA-së si anëtare në dy organizata ndërkombëtare, Organizatën Ndërkombëtare të Institucioneve Supreme të Auditimit (INTOSAI) dhe në Organizatën Evropiane të Institucioneve Supreme të Auditimit (EUROSAI). Ndërkaq, me Planin Vjetor për sezonin e auditimit 2020/21, ZKA-ja është duke kryer 116 auditime të rregullsisë (financiare dhe të pajtueshmërisë) si dhe tetë (8) auditime të performancës. Raportin Vjetor të Performancës për vitin 2020 mund ta gjeni këtu.