Lajmet

Auditorja e Përgjithshme e Suedisë, Helena Lindberg,  ka uruar homologen e saj Vlora Spanca për zgjedhjen në pozitën e Auditores së Përgjithshme të Republikës së Kosovës. Me këtë rast Auditorja Lindberg është zotuar për vazhdimin e bashkëpunimit ndërmjet dy institucioneve. “Dy organizatat tona kanë pasur një marrëdhënie të shkëlqyer gjatë mandatit të ish Auditorit të Përgjithshëm z. Besnik Osmani, dhe unë pres që të vazhdojmë në këtë rrugë. Shpresoj që pandemia së shpejti të na lejojë të takohemi dhe të forcojmë bashkëpunimin tonë. Ju uroj suksese në detyrat tuaja të reja”, është thënë ndër të tjera në letrën e urimit të Auditores së Përgjithshme Helena Lindberg. Zyra Kombëtare e Auditimit të Kosovës dhe Zyra Kombëtare e Auditimit të Suedisë aktualisht janë në proces të zbatimit të Marrëveshjes së bashkëpunimit bilateral “Bashkëpunimi për Zhvillim Institucional me Zyrën Kombëtare të Auditimit të Kosovës 2020-2023” e cila ka për qëllim zhvillimin e mëtutjeshëm të kapaciteteve organizative të ZKA-së që promovojnë punë me cilësi të lartë, si dhe forcimin e kapacitetit për të përgatitur raporte të auditimit të performancës me cilësi të lartë dhe të dobishme për shoqërinë. Bashkëpunimi dhe partneriteti në mes të ZKA-së së Kosovës dhe asaj të Suedisë daton që nga  2011-ta, kur është nënshkruar Marrëveshja e Bashkëpunimit për zhvillimin e kapaciteteve, përmes së cilës ZKA-së së Kosovës i është ofruar mbështetje për të përmbushur mandatin e saj dhe për t`u bërë një institucion suprem i auditimit i qëndrueshëm, i cili vepron në pajtim me standardet ndërkombëtare dhe praktikat e mira.

Kryetari i Kontrollit të Lartë të Shtetit të Republikës së Shqipërisë, Arben Shehu, ka uruar Auditoren e Përgjithshme të Republikës së Kosovës, Vlora Spanca, me rastin e marrjes së detyrës. Në letrën e urimit dërguar homologes së tij, kryetari i KLSH-së ka shprehur përkushtimin  për thellimin e bashkëpunimit ndërmjet dy institucioneve në zbatimin e objektivave të përbashkëta, që kanë të bëjnë me qeverisjen  e mirë  të financave  publike  dhe  përmirësimin e vazhdueshëm të shpenzimit të fondeve publike. “Shpreh gatishmërinë time për intensifikimin dhe rritjen cilësore të bashkëpunimit midis dy institucioneve tona në fushat me interes të përbashkët edhe në të ardhmen. Duke ju uruar suksese të mëtejshme ju përcjell urimet më të mira”, është theksuar në letrën e urimit të kryetarit Shehu. Po ashtu kryetari i Kontrollit të Lartë të Shtetit të Republikës së Shqipërisë, Arben Shehu ka bërë me dije se është i gatshëm për realizimin e një takimi me Auditoren e Përgjithshme Vlora Spanca për të diskutuar  në  terma konkrete  për  zgjerimin  dhe  thellimin  e bashkëpunimit midis dy institucioneve. KLSH-ja dhe ZKA-ja kanë marrëveshje bilaterale të bashkëpunimit që nga viti 2012. Në kuadër të kësaj Marrëveshje janë mbajtur trajnime dhe punëtori të ndryshme duke shkëmbyer pikëpamjet, metodat dhe përvojat e punës me qëllim të ngritjes së mëtejme të kapaciteteve profesionale në fusha të ndryshme të auditimit.

Auditorja e Përgjithshme e Republikës së Kosovës, Vlora Spanca, ka pranuar letër urimi nga Auditori i Përgjithshëm i Polonisë, Marian Banas. Homologu polak ka përgëzuar znj. Spanca për marrjen e detyrës së re duke i uruar sukses në realizimin e synimeve gjatë mandati të saj. Banas ka shprehur përkushtimin e tij për vazhdimin e bashkëpunimit  ndërmjet dy institucioneve. “Marrëdhëniet e ngushta dhe miqësore midis Zyrës Kombëtare të Auditimit të Polonisë dhe Zyrës Kombëtare të Auditimit të Kosovës kontribuojnë në bashkëpunimin efektive të vendeve tona, si dhe zbatimin e objektivave të përbashkëta të zyrave tona, që kanë të bëjnë me qeverisjen e mirë të financave publike dhe përmirësimin  e vazhdueshëm të shpenzimit të fondeve publike”, thuhet ndër të tjera në letrën e urimit të Auditorit të Përgjithshëm të Polonisë Marian Banas.  

Sindikata e Zyrës Kombëtare të Auditimit nëpërmjet një letër urimi ka përshëndetur emërimin e znj. Vlora Spanca në pozitën e Auditores së Përgjithshme të Kosovës. Anëtarësia sindikale ka uruar Auditoren e Përgjithshme për marrjen e detyrës si dhe i ka kërkuar menaxhim të suksesshëm të ZKA-së, me qëllim të ruajtjes së kredibilitetit institucional. Sindikata inkurajon znj. Spanca që gjatë mandatit pesëvjeçar në krye të ZKA-së, të ketë trajtim të dinjitetshëm dhe të barabartë për punonjësit si dhe të ofrojë kushte pune e avancime profesionale. “Besojmë që do të përpiqesh maksimalisht për të kryer me ndërgjegje e besnikëri misionin e Zyrës Kombëtare të Auditimit, pra auditimin e buxhetit të shtetit, duke reflektuar dhe promovuar llogaridhënie, pavarësi profesionale, trajtim të dinjitetshëm dhe të barabartë për punëtorët, kushte pune dhe avancime profesionale për gjithë stafin e ZKA-së, gjithnjë duke respektuar rregullativën ligjore dhe standardet ndërkombëtare të auditimit. Përvoja juaj shumë vjeçare në ZKA, shpresojmë që do konvertohet në menaxhim të suksesshëm të këtij institucioni kredibil”, thuhet në letrën e urimit të Sindikatës së ZKA-së. Po ashtu, nëpërmjet një letre falënderimi, Sindikata e ZKA-së ka falënderuar edhe ish Auditorin e Përgjithshëm, Besnik Osmani, për punën, bashkëpunimin dhe kontributin e dhënë në menaxhimin e ZKA-së.

Kuvendi i Kosovës, në seancën e sotme, me shumicë votash, ka zgjedhur Vlora Spancën, Auditore të Përgjithshme të Republikës së Kosovës, me mandat pesëvjeçar. Pas marrjes së detyrës, Auditorja e Përgjithshme, Vlora Spanca, është zotuar se do të vazhdoj të punojë në fuqizimin e rolit dhe ndikimit të Zyrës Kombëtare të Auditimit në rritjen e llogaridhënies dhe transparencës në sektorin publik. Auditori i deritanishëm Besnik Osmani, e ka uruar znj. Spanca për marrjen e detyrës së re, duke shprehur besimin që Zyra Kombëtare e Auditimit do të vazhdoj të mbetet një ndër institucionet më të besueshme në Kosovë. Znj. Spanca është Auditorja e pestë me radhë, që nga themelimi i institucionit të Auditorit të Përgjithshëm, në vitin 2003. Biografia e znj. Spanca Vlora Spanca që nga muaji gusht i vitit 2017 ishte Ndihmës Auditor i Përgjithshëm në Zyrën Kombëtare të Auditimit. Ajo ishte përgjegjëse për Divizionin e një portofoli të departamenteve të auditimit, që përfshin: Departamentin e Auditimit të Performancës, Departamentin e Auditimit të Performancës dhe Teknologjisë Informativ, si dhe Departamentin e Auditimit për Prokurimin dhe Menaxhimin e Projektit.Po ashtu, ka qenë përgjegjëse për auditimin financiar të projekteve të financuara nga donatorë të ndryshëm, si Banka Botërore dhe Agjencia Suedeze për Zhvillim. Gjatë periudhës 2017-2019, Spanca ka qenë koordinatore për implementim të projektit të financuar nga Banka Botërore për zhvillimin e kapaciteteve audituese në fushën e prokurimit publik. Në Zyrën Kombëtare të Auditimit është punësuar në vitin 2007 dhe që nga viti 2009 deri në vitin 2016, Spanca ishte drejtoreshë e Departamentit të Auditimit për auditime të rregullsisë, që përfshin Ministritë dhe Agjencitë e Pavarura të krijuara nga Kuvendi i Kosovës. Gjatë periudhës 2015 – 2016, Spanca ishte përgjegjëse për auditimin e Pasqyrës Vjetore Financiare të Buxhetit të Kosovës. Para se të punësohej në Zyrën Kombëtare të Auditimit, Spanca ka punuar për katër vjet me Misionin e Kombeve të Bashkuara në Kosovë, për Zyrën e Zëvendës-Përfaqësuesit Special të Sekretarit të Përgjithshëm. Ajo ishte përgjegjëse kryesisht për mbështetjen e veprimtarive administrative për Zyrat Ndërlidhëse me Trupat Mbrojtëse të Kosovës, Strukturën e Përkohshme Administrative të Kosovës, si dhe për Drejtorinë për Çështje Rurale. Spanca ka përfunduar studimet universitare në drejtimin e Ekonomisë në Universitetin e Prishtinës “Hasan Prishtina”. Është Auditor i certifikuar në sektorin publik dhe është certifikuar si menaxher i cilësisë së sistemit nga “Quality Austria”.

Auditori i Përgjithshëm i Republikës së Kosovës, Besnik Osmani, ka mirëpritur gjetjet e Raportit të Bankës Botërore lidhur me pavarësinë e Institucioneve Supreme të Auditimit, duke nënvizuar se kjo e arritur e madhe është rezultat i punës profesionale dhe përkushtimit të personelit, përkrahjes nga publiku kosovar dhe ndihmës së partnerëve ndërkombëtar. Përfundimisht, shembulli i Zyrës Kombëtare të Auditimit është mesazhi më i qartë se Republika e Kosovës ka kapacitete për të ndërtuar institucione kredibile në rang botëror. Zyra Kombëtare e Auditimit e Republikës së Kosovës është renditur në mesin e Institucioneve Supreme të Auditimit që gëzojnë pavarësi të lartë në botë. Raporti i Bankës Botërore “Indeksi i Pavarësisë së Institucioneve Supreme të Auditimit”, ka listuar ZKA-në në mesin e 17-të Institucioneve Supreme të Auditimit të cilat kanë pavarësi të lartë. Rezultatet e këtij raporti, tregojnë se Zyra Kombëtare e Auditimit e Kosovës dhe ajo e Kroacisë qëndrojnë më mirë se institucionet homologe të vendeve të Ballkanit Perëndimor, për sa i përket pavarësisë institucionale. Ky vlerësim ka përfshirë 118 vende të botës dhe është bazuar në 10 indikatorë të pavarësisë, bazuar në standardet ndërkombëtare dhe praktikat e mira: Kushtetuta dhe korniza ligjore, transparenca në emërimin e kreut të ISA-ve, pavarësia financiare, llojet e auditimit, pavarësia operacionale, pavarësia e stafit, mandati i auditimit, pavarësia në fushëveprimin e auditimit, qasja në të dhëna dhe informata, të drejtat dhe përgjegjësitë në raportet e auditimit. Sipas, raportit vetëm 2 nga 118 vende u vlerësuar me 10 pikë, pra me pavarësi shumë të lartë, 17 vende kishin pavarësi të lartë; 33 vende kishin pavarësi thelbësore; 37 vende kishin pavarësi të kënaqshme dhe 29 vende kishin pavarësi të ulët. Raportin e plotë mund ta gjeni në këtë link: Indeksi i Pavarësisë së Instutucionet Supreme të Auditimit  

Instituti GAP ka mbajtur tryezën e  diskutimit me temën “Ndikimi i subvencioneve dhe granteve në prodhimin bujqësor” ku u prezantua Raporti për grante dhe ai për subvencione. Në këtë tryezë morën pjesë drejtori i hulumtimeve në Institutin GAP, Jeton Mehmeti,  Auditori i Përgjithshëm, Besnik Osmani, kryetarja e Komisionit Parlamentar për Bujqësi, Pylltari, Zhvillim Rural, Mjedis e Planifikim Hapësinor dhe Infrastrukturë si dhe Gentian Gashi hulumtues në GAP. Drejtor i hulumtimeve në Institutin GAP, Jeton Mehmeti, ka thënë se raporti ka pasur për qëllim analizimin e politikave zhvillimore për bujqësinë, duke qenë se bujqësia luan një rol të rëndësishëm në përmirësimin e bilancit tregtar, rritjen e punësimit dhe zhvillimin ekonomik. Por, përkundër skemave mbështetëse financiare nga ana e Qeverisë së Kosovës, të dhënat tregojnë se nuk janë arritur rezultatet e pritura. Ndërsa Auditor i Përgjithshëm i Republikës së Kosovës, Besnik Osmani, ka thënë se  Zyra Kombëtare e Auditimit (ZKA) duke pas parasysh rëndësinë e sektorit të bujqësisë në zhvillimin ekonomik të vendit, përveç që në baza vjetore kryen auditimin e rregullsisë për Ministrinë e Bujqësisë, Pylltarisë dhe Zhvillimit Rural, poashtu ka kryer edhe dy auditime të veçanta të performancës dhe teknologjisë së informacionit, ?Procesi i Menaxhimit të Granteve dhe Subvencioneve në Sektorin e Bujqësisë? dhe ?Sistemet elektronike për menaxhimin e granteve dhe subvencioneve në AZhB-MBPZhR?. Osmani ka theksuar se gjetjet e këtyre raporteve, tregojnë se ka nevojë për përmirësime në të gjitha proceset,  që nga pikëpamja strategjike, e planit operativ, mungesën e monitorimit dhe vlerësimit të ndikimit që kanë grantet dhe subvencionet në sektorin e bujqësisë. Pra, ZKA-ja ka identifikuar se ka politika jo adekuate, menaxhim jo të duhur të fondeve, koordinim minimal mes nivelit qendror dhe njësive respektive si dhe komunave. Ai ka shtuar se gjithashtu mungon sistemi adekuat për matjen e rezultateve dhe monitorimin e përmbushjes së kontratave dhe se qëllimi nuk është zvogëlimi i fondeve për sektorin bujqësor, por përmirësimi i procesit së dhënies së këtyre fondeve. Tutje Osmani ka deklaruar se rezultatet e auditimit tregojnë se aplikacionet e teknologjisë së informacionit nuk i përmbajnë standardet e kërkuara që të menaxhojnë në mënyrë efikase dhe të sigurt proceset për shpërndarjen e granteve dhe subvencioneve bujqësore. Lidhur me këto mangësi Osmani ka bërë me dije se ZKA-ja ka dhënë  36 rekomandime, zbatimi i së cilave do të përmirësojë gjendjen në këtë sektor. Këto rekomandime janë po aq të rëndësishme edhe për Komisionin për Bujqësi sepse i sjellin një informacion të detajuar se cilat janë çështjet e rëndësishme që kërkojnë intervenim dhe Kuvendi duhet t’i mbaj në llogaridhënie Qeverinë për t’i adresuar këto rekomandime. Kurse Kryetarja e Komisionit Parlamentar për Bujqësi, Pylltari, Zhvillim Rural, Mjedis e Planifikim Hapësinor dhe Infrastrukturë në Kuvendin e Kosovës, Fitore Pacolli,  ka thënë se deri tani bujqësia nuk është trajtuar si sektor për mbrojtjen e ushqimit, prandaj janë duke u rishikuar një mori ligjesh ekzistuese. Ajo ka thënë se Komisioni është  në angazhim të vazhdueshëm me ministrinë për krijimin e strategjive të reja të cilat do të mundësonin edhe akreditimin në mënyrë që të shfrytëzohen edhe fondet e Bashkimit Evropian. Ndërkohë  Gentian Gashi, hulumtues në Institutin GAP, ka prezantuar të gjeturat e raportit duke theksuar se nga viti 2015 deri më 2019 janë shpërndarë rreth 134.7 milionë euro në pagesa direkte (subvencione) dhe 104.5 milionë euro grante nga Ministria e Bujqësisë, Pylltarisë dhe Zhvillimit Rural (MBPZHR) në prodhime bujqësore. Mungesa e arritjes së rezultateve të pritura përkundër përkrahjes së lartë financiare vë në pikëpyetje efektshmërinë e politikave bujqësore apo mënyrën e shpërndarjes së tyre. Saranda Ramaj, Gazetare në “Koha Ditore” ka shprehur shqetësimin se dëmi mund të jetë ende më i lartë, duke i parë rastet e fundit korruptive të administratës në Ministrinë e Bujqësisë, ku raportet ekzistuese mund të tregojnë vlera jo reale.

Zyra Kombëtare e Auditimit (ZKA) ka publikuar raportin e auditimit të performancës “Transparenca dhe llogaridhënia në procesin e financimit të organizatave joqeveritare”. Auditimi kishte për qëllim vlerësimin nëse procesi i financimit të organizatave joqeveritare është menaxhuar si duhet, ofron transparencë të plotë, është konkurrues dhe arrin qëllimet e synuara të institucioneve publike. Subjekte të këtij auditimi kanë qenë  Zyra e Kryeministrit, Ministria e Kulturës, Rinisë dhe Sportit si dhe Komuna e Prishtinës. Auditimi ka identifikuar mangësi në procesin e financimit të organizatave joqeveritare nga institucionet publike të audituara, të cilat rrezikojnë llogaridhënien, transparencën, konkurrencën dhe arritjen e qëllimeve të synuara. Rezultatet e auditimit tregojnë se institucionet publike kanë realizuar financime direkte të projekteve të ndryshme pa thirrje publike, pa plotësimin e kritereve dhe vetëm me vendime të udhëheqësve, krerëve të drejtorive dhe departamenteve përkatëse. Për më tepër organizatat joqeveritare janë përkrahur nga më shumë se një burim i financimit publik për projektin e njëjtë nga institucionet publike, ishin financuar operator ekonomik të cilat nuk ishin organizata joqeveritare, si dhe kishte raste të konfliktit të interesit. Një çështje me theks të veçantë është dështimi në vlerësimin e rezultateve për projektet e financuara, si pasojë e mungesës së monitorimit të projekteve. Institucionet publike nuk kanë arritur të monitorojnë ecurinë e projekteve dhe organizatat joqeveritare nuk janë mbajtur përgjegjës për zbatimin e projekteve. Si rezultat, nuk ka një vlerësim nëse janë arritur qëllimet e synuara dhe nëse fushat e caktuara janë përmirësuar nga financimet e dhëna për organizatat joqeveritare. Zyra për Qeverisje të Mirë në kuadër të Zyrës së Kryeministrit nuk ka bërë përpjekje që të bëjë publikimin e të dhënave mbi financimet e projekteve të organizatave joqeveritare në uebfaqe dhe të bëjë menaxhimin e bazë së të dhënave në nivel të kënaqshëm. Zyra e Kryeministrit dhe Ministria e Kulturës Rinisë dhe Sportit nuk kanë pasqyruar të dhënat e financimit përmes raporteve vjetore. Mungesa e raportimit dhe monitorimit të projekteve ka pamundësuar vlerësimin nëse janë arritur rezultatet e synuara për projektet e financuara. Rezultatet e këtij auditimi theksojnë nevojën për përmirësimin e procesit të financimit të organizatave joqeveritare nga institucionet publike në nivelin qendror dhe lokal. Auditor i Përgjithshëm, Besnik Osmani,  lidhur me këtë auditim ka deklaruar se institucionet publike që përkrahin organizatat joqeveritare kanë një rol të rëndësishëm që përmes një financimi të duhur dhe transparent të OJQ-ve të përmirësojnë jetën qytetarëve në fusha të ndryshme ekonomike-sociale. Megjithatë, mangësitë e identifikuara në auditim paraqesin një shqetësim për menaxhimin e procesit të financimit të organizatave joqeveritare dhe transparencën nga institucionet publike. Me qëllim të adresimit të shpejtë të çështjeve rreth menaxhimit të procesit të financimit të organizatave jo-qeveritare si dhe rritjes së transparencës dhe llogaridhënies Zyra Kombëtare e Auditimit, ka dhënë nëntë rekomandime për Zyrën e Kryeministrit, Ministrinë e Kulturës, Rinisë dhe Sportit si dhe për Komunën e Prishtinës. Raportin e plotë mund ta lexoni këtu.

Zyra Kombëtare e Auditimit (ZKA) të mërkurën ka publikuar raportin e auditimit të teknologjisë së informacionit “Sistemi për Menaxhimin Informativ të Lëndëve në Këshillin Gjyqësor të Kosovës (KGJK) dhe Këshillin Prokurorial të Kosovës (KPK)”. Auditimi kishte për qëllim vlerësimin e sigurisë dhe administrimit të sistemit informativ për menaxhimin e lëndëve, nëse është duke ofruar informacione të besueshme, me integritet dhe në kohë. Projekti ka filluar të realizohet në qershor të vitit 2015 dhe ka për objektivë zëvendësimin e punës manuale duke mundësuar procesimin dhe menaxhimin elektronik të lëndëve në gjykata dhe prokurori si dhe rritjen e efikasitetit dhe transparencës. Po ashtu, mundëson përpunimin e të dhënave në kohë reale, lehtësimin e ofrimit të shërbimeve për zyrtarët e institucioneve dhe eliminimin e shkëmbimit të të dhënave në kopje fizike. Ky sistem është ende në fazën e zhvillimit dhe avancimit të mëtejmë për zbatimin në të gjitha instancat e gjykatave dhe prokurorive. Pavarësisht përparimit të vazhdueshëm në SMIL në KGjK  dhe KPK, rezultatet e auditimit kanë treguar që ende nuk është realizuar shtrirja e plotë e zbatimit të këtij sistemi në të gjitha instancat në gjykata dhe prokurori. Shpërndarja automatike e lëndëve në gjykatë dhe prokurori, ndërveprimi i SMIL-it të prokurorisë dhe gjykatës për të gjitha shkresat dhe raportet statistikore me tregues të avancuar janë disa nga zhvillimet që duhet të finalizohen plotësisht. Përveç këtyre, ende nuk është hartuar strategjia e teknologjisë së informacionit në KGjK dhe procedurat standarde të operimit nuk kanë arritur të zbatohen plotësisht në KPK. Këto mangësi mund të ndikojnë në administrimin jo të mirë të SMIL dhe pasqyrimin jo të saktë të efikasitetit, transparencës dhe planifikimit të burimeve të nevojshme në gjykata dhe prokurori. Auditori i Përgjithshëm, Besnik Osmani, lidhur me këtë auditim ka vlerësuar se zbatimi i plotë i Sistemit për Menaxhimin Informativ të Lëndëve është kritik për të përmbyllur këtë projekt me sukses. Përmes tij gjykatat dhe prokuroritë mund të marrin përfitimet e synuara në procesimin dhe menaxhimin e lëndëve. Duke marrë parasysh rëndësinë e sistemit të drejtësisë për shtetin dhe në veçanti për qytetarët, Zyra Kombëtare e Auditimit për adresimin e shpejtë të çështjeve të qeverisjes së teknologjisë së informacionit dhe sigurisë së sistemeve të informacionit ka dhënë 16 rekomandime për KGjK  dhe 14 për KPK. Raportin e plotë mund ta lexoni këtu.

Zyra Kombëtare e Auditimit e Kosovës është vlerësuar se ka shënuar progres në fushën e  komunikimit me publikun gjatë vitit 2020. Kështu është konstatuar në Raportin Kombëtar të monitorimit nen projektin rajonal WeBER 2.0 të Grupit për Studime Juridike dhe Politike i cili është publikuar në tryezën “Reforma në Administratën Publike”. Për ZKA-në tregues i monitorimit të këtij Raporti ka qenë  “Komunikimi dhe bashkëpunimi i Institucionit Suprem të Auditimit me publikun që ka të bëjë me punën e tij”. Gjetjet e raportit  tregojnë se ZKA-ja ka marrë vlerësim pozitiv sa i përket hartimit të Strategjisë së Komunikimit për të arritur te publiku. “Në monitorimin e mëparshëm ZKA-ja nuk kishte një strategji specifike të komunikimit, ndërsa monitorimi i vitit 2020 njeh se Strategjia e Komunikimit e Zyrës Kombëtare të Auditimit të Kosovës për periudhën 2020-2022 është zhvilluar me qëllime dhe objektiva të përcaktuara për ZKA-në. Dokumenti është në përputhje me Planin Strategjik 2018-2021. Në Strategji është treguar se ZKA-ja duhet të mbajë marrëdhënie të mira me degët ekzekutive dhe legjislative për të inkurajuar zbatimin dhe për të lehtësuar mbikëqyrjen dhe llogaridhënien e publikut. Plani do të rishikohet çdo vit dhe do të jetë nën Departamentin e Komunikimit të ZKA-së”, është thënë në raport. Poashtu ZKA-ja ka marrë vlerësim pozitiv edhe për konsultimin me Organizatat e Shoqërisë Civile dhe punën e tyre me qëllim të identifikimit të rreziqeve në sektorin publik. “Shoqëria civile ka qenë vazhdimisht pjesëmarrëse në grupet e këshillimit për hartimin e dokumenteve strategjike të ZKA-së dhe pjesë e hartimit të strategjisë së komunikimit të ZKA-së. Ky proces konsultimi zyrtarizohet përmes rregullores (ZKA) nr.02/2020 për Organizimin e Brendshëm dhe Sistematizimin e Vendeve të Punës ku parashikohet Forumi Konsultativ me Shoqërinë Civile”, është thënë më tutje në raport. Ndërsa progres të pjesshëm ZKA-ja ka shënuar në përdorimin e mënyrave të ndryshme të komunikimit me publikun si dhe në komunikimin pro aktiv dhe sigurimin e reagimeve ndaj publikut. “ZKA-ja si në raportet e mëparshme të monitorimit ka përkushtuar të paktën një pozitë pune për komunikim proaktiv dhe ofrimin e komenteve ndaj publikut. Për më tepër, hulumtimet e mëparshme kanë treguar që ZKA-ja përdor të paktën dy mjete shtesë të komunikimit me publikun. Më konkretisht, duke mirëmbajtur aktivisht llogarinë në ‘Facebook’ dhe duke mbajtur konferenca për shtyp ku u prezantuan Raportet e Auditimit të Performancës së ZKA-së dhe u zhvillua diskutimi në tryezë të rrumbullakët”, është thënë ndër të tjera në raport. Megjithatë ky raport ka identifikuar edhe dy çështje në të cilat ZKA-ja duhet të përmirësohet meqë aktualisht nuk qëndron mirë, siç janë mungesa e një kanali specifik në ueb faqen e ZKA-së për paraqitjen e ankesave ose iniciativave për çështje të identifikuara nga palët e jashtme të interesit, si dhe mungesa e përmbledhjes miqësore ndaj qytetarëve të raporteve të auditimit.

Rreth tridhjetë studentë të forumeve rinore të të gjitha partive politike të premten kanë zhvilluar një vizitë studimore në Zyrën Kombëtare të Auditimit, me ç’rast u priten në takim nga Auditori i Përgjithshëm i Kosovës, Besnik Osmani me bashkëpunëtor. Kjo vizitë u realizua nga Grupi për Ballkan në kuadër të Programit “Të rinjtë në politikë” i cili ka për synim trajnimin dhe ngritjen e kapaciteteve të të rinjve aktiv në parti politike në fushën e sundimit të ligjit, politikat publike, qeverisja e mirë, zhvillimi ekonomik, politikat shoqërore, politikat e edukimit, bashkëpunimi rajonal, etj. Auditori i Përgjithshëm, Besnik Osmani, pati një bashkëbisedim me politikanët e rinj të cilëve u shpjegoj rolin, misionin, mënyrën se si funksionon Zyra Kombëtare e Auditimit, si dhe detaje të tjera rreth procesit të përpilimit të raporteve të auditimit. Me këtë rast Osmani ka thënë se ZKA-ja auditon fondet publike për t’i siguruar taksapaguesit që paratë e tyre po përdorën në mënyrë ekonomike, që raportimi financiar është i saktë dhe vendimet janë në pajtim me kërkesat ligjore. Auditori i Përgjithshëm ka theksuar rëndësinë e zbatimit të  rekomandimeve të ZKA-së dhe ndikimin e tyre në fuqizimin e qeverisjes së mirë dhe llogaridhënies. Politikanët e rinj u interesuan që të informohen më shumë për realizimin e procesit të auditimit; për gjetjet kryesore më të rëndësishme si dhe ndikimin e tyre në nivelin e përgjithshëm të qeverisjes në vend.

Zyra Kombëtare e Auditimit (ZKA) të martën ka publikuar raportin e auditimit të teknologjisë së informacionit “Sistemet elektronike për menaxhimin e granteve dhe subvencioneve në AZhB-MBPZhR”. Auditimi është kryer në Agjencinë për Zhvillimin e Bujqësisë e cila është në kuadër të Ministrisë së Bujqësisë, Pylltarisë dhe Zhvillimit Rural dhe ka rol ekzekutiv me qëllim të zbatimit të programeve për mbështetjen e bujqësisë dhe zhvillimit rural. Ky auditim përfshin periudhën 2018-2020 dhe kishte për qëllim të vlerësojë nëse sistemet e informacionit për menaxhimin e granteve dhe subvencioneve bujqësore kanë arritur qëllimin e tyre dhe nëse sigurojnë integritetin, vlefshmërinë dhe besueshmërinë e të dhënave gjatë përpunimit të tyre. Me vënien në funksion të këtyre aplikacioneve, Agjencia ka arritur që të menaxhoj më me lehtësi proceset për mbështetjen financiare të fermerëve dhe ato kanë ndikuar në rritjen e transparencës. Megjithatë, auditimi ka nxjerrë në pah mangësi të theksuara lidhur me qeverisjen e  teknologjisë së informacionit si dhe në sigurimin e integritetit, vlefshmërisë dhe besueshmërisë së të dhënave që përmbajnë këto aplikacione. Agjencia për Zhvillimin e Bujqësisë nuk kishte hartuar planin strategjik apo strategjinë e teknologjisë së informacionit dhe as politikat dhe procedurat e teknologjisë së informacionit. AZhB-ja  poashtu nuk kishte bërë shpërndarjen e burimeve financiare dhe njerëzore sipas nevojave të saj dhe kishte krijuar varësi nga palët e treta duke rrezikuar disponueshmërinë, integritetin dhe besueshmërinë e proceseve të teknologjisë së informacionit. Në aplikacionet që përdor Agjencia nuk ishin vendosur kontrolle për t’u siguruar që ato pranojnë vetëm të dhëna të autorizuara, të sakta dhe të plota. Si pasojë, bazat e shënimeve përmbanin të dhëna jo të sakta. Poashtu, mangësi janë vërejtur edhe në sigurinë e sistemeve të informacionit të cilat rrezikojnë që infrastruktura dhe sistemet të jenë të pasigurta dhe të cenueshme kundrejt gabimeve dhe keqpërdorimeve të mundshme dhe ekziston rreziku që të ndryshohen të dhënat e ruajtura në bazat e të dhënave pa u identifikuar. Auditori i Përgjithshëm i Kosovës, Besnik Osmani, lidhur me këtë auditim ka theksuar që rezultatet e auditimit tregojnë se aplikacionet që ka në shfrytëzim Agjencia nuk i përmbajnë standardet e kërkuara që të menaxhojnë në mënyrë efikase dhe të sigurt proceset për shpërndarjen e granteve dhe subvencioneve bujqësore. Zyra Kombëtare e Auditimit ka rekomanduar Ministrin  e Bujqësisë, Pylltarisë dhe Zhvillimit Rural të ndërmarrë veprime të menjëhershme për koordinimin e aktiviteteve me Agjencinë e Zhvillimit të Bujqësisë në mënyrë që të siguroj qeverisje të mirë dhe integritet të sistemeve të informacionit.  Për këtë ZKA-ja ka dhënë 16 rekomandime. Raportin e plotë mund ta lexoni këtu.