Lajmet

Auditori i Përgjithshëm i Bullgarisë, Tzvetan Tzvetkov,  ka përgëzuar Auditoren e Përgjithshme të Republikës së Kosovës për marrjen e detyrës në udhëheqjen e Zyrës Kombëtare të Auditimit të Kosovës. Duke i dëshiruar sukses dhe mbarësi në këtë rrugëtim, homologu Tzvetkov  e ka siguruar znj. Spanca se Zyra Kombëtare e Auditimit të Bullgarisë  është vazhdimisht e hapur për nisma të reja që synojnë forcimin e marrëdhënieve profesionale midis Institucioneve Supreme të Auditimit në nivel dypalësh dhe shumëpalësh. “Besoj fuqishëm se njohuritë e juaja gjithëpërfshirëse  dhe përvoja profesionale, padyshim që do të kontribuojnë në zhvillimin dhe progresin e mëtejshëm të Zyrës Kombëtare të Auditimit të Republikës së Kosovës. Ju uroj përzemërsisht suksese në përgjegjësinë tuaj të re dhe pres të bashkëpunojmë në të ardhshmen”, është thënë në urimin e Auditorit të Përgjithshëm të Bullgarisë, Tzvetan Tzvetkov.

Auditori i Përgjithshëm i Filipineve, Michael G. Aguinaldo; Auditori i Përgjithshëm i Maldives Hussain Niyazy si dhe Auditori i Përgjithshëm i Butanit Dasho Tashi, i kanë dërguar letra urimi Auditores së Përgjithshme të Republikës së Kosovës, Vlora Spanca, duke i dëshiruar realizimin e synimeve gjatë mandatit në udhëheqjen e Zyrës Kombëtare të Auditimit të Kosovës. Nëpërmjet urimeve të veçanta dërguar homologes së tyre, ata kanë shprehur gatishmërinë për të vazhduar bashkëpunimin profesional mes Institucioneve Supreme të Auditimit si dhe në kuadër të INTOSAI-t për të arritur qëllimet e përbashkëta. Po ashtu krerët e Institucioneve Supreme të Auditimit të Filipineve, Maldives, dhe Butanit kanë thënë se përvoja dhe ekspertiza e Auditores së Përgjithshme Vlora Spanca garantojnë arritjen e objektivave operative të Zyrës Kombëtare të Auditimit të Kosovës.

Avokati i Popullit Naim Qelaj ka përgëzuar Auditoren e Përgjithshme të Republikës së Kosovës, Vlora Spanca, me rastin e zgjedhjes në krye të Zyrës Kombëtare të Auditimit. Në letrën e urimit dërguar znj. Spanca, Avokati i Popullit ka shkruar se përvoja dhe puna e saj  e deritanishme do të vazhdojë  të kontribuojë në fuqizimin e llogaridhënies dhe transparencës në sektorin publik. Po ashtu, Avokati i Popullit Naim Qelaj ka shprehur përkushtimin që bashkëpunimi i shkëlqyeshëm në mes të dy institucioneve të vazhdojë edhe më tej në të ardhmen, në funksion të respektimit të të drejtave të njeriut dhe forcimit  të sundimit të ligjit. “Në emër të Institucionit të Avokatit të Popullit dhe në emrin tim, dëshiroj t’ju shpreh urimet më të sinqerta me rastin e zgjedhjes tuaj në krye të Zyrës Kombëtare të Auditimit të Kosovës. Shpreh besimin e plotë se përvoja dhe puna juaj e deritanishme do të vazhdojë të kontribuojë në fuqizimin e llogaridhënies dhe transparencës në sektorin publik. Institucioni i Avokatit të Popullit do të vazhdojë përkushtimin që bashkëpunimi i shkëlqyeshëm që është ndërtuar  gjatë viteve në mes të institucioneve tona, do të vazhdojë edhe më tej në të ardhmen, në funksion të respektimit të të drejtave të njeriut dhe forcimit të mëtejmë të sundimit të ligjit në vend. Me  këtë,  shfrytëzoj  rastin  të  shprehi interesimin tim për t’ju takuar dhe uruar detyrën e re edhe personalisht”, është thënë në letrën e urimit të Avokatit të Popullit, Naim Qelaj.

Në rrjedhën e urimeve për emërimin në pozitën e Auditores së Përgjithshme të Republikës së Kosovës, znj. Spanca ka pranuar letër urimi edhe nga Presidenti i Gjykatës Sllovene të Llogarive, Tomaž Vesel. Në urimin dërguar homologes së tij, Vesel ka thënë se presin një bashkëpunim efikas midis dy institucioneve në shkëmbimin e opinioneve, praktikave më të mira dhe adresimin e sfidave për zhvillimin e Institucioneve Supreme të Auditimit. Ai ka theksuar se duhet shfrytëzuar mundësitë për shkëmbimin e pikëpamjeve të rëndësishme dhe të dobishme midis ekspertëve ndërkombëtarë për të krijuar procese të qëndrueshme dhe gjithëpërfshirëse të auditimit. “Jam i bindur se kontributet tuaja të mëtejshme do ta bëjnë Zyrën Kombëtare të Auditimit të Kosovës një partner të besueshëm në forcimin e mëtejshëm të llogaridhënies në administratën publike për një përdorim efektiv, efikas dhe ekonomik të burimeve kombëtare”, është theksuar ndër të tjera në urimin e Presidentit të Gjykatës Sllovene të Llogarive, Tomaž Vesel.

Komuna e Pejës ka shënuar progres sa i përket numrit të rekomandimeve të pranuara nga Auditori i Përgjithshëm dhe zbatimit të tyre, megjithatë duhet të punojë në përmirësimin e procedurave të prokurimit, menaxhimit të kontratave si dhe arkëtimin e borxheve. Kështu është thënë të martën në debatin e radhës të mbajtur në Komunën e Pejës, ku kanë qenë të pranishëm kryetari i komunës, Gazmend Muhaxheri, Udhëheqësi i Auditimit në Zyrën Kombëtare të Auditimit, Arian Haxha, Visar Prebreza nga BIRN-i si dhe këshilltarët komunal. Me këtë rast Udhëheqësi i Auditimit në Zyrën Kombëtare të Auditimit, Arian Haxha, ka thënë niveli i zbatimit të rekomandimit është treguesi më i mirë për të kuptuar nëse menaxhmenti po përmirëson proceset ekzistuese dhe kontrollet në fushat ku janë identifikuar gabimet dhe parregullsitë. Ai ka bërë me dije se rekomandimet e dhëna në raportin e auditimit për Komunën e Pejës përshkruajnë veprimet e nevojshme për të korrigjuar situatën, prandaj që të kenë efektin e dëshiruar duhet të zbatohen. Kryetari i Komunës së Pejës, Gazmend Muhaxheri, ka thënë se raporti i auditimit është  i pranueshëm dhe do të adresohen gjetjet e Auditorit të Përgjithshëm. Muhaxheri është zotuar se disa prej gjetjeve të auditorit të vitit 2020 nuk do të përsëriten në raportin e auditimit për vitin 2021 meqë është përgatitur plani i adresimit të tyre. Muhaxheri ka thënë se janë ndërmarrë masat sa i përket dobësive të evidentuara në procesin e ndarjes së subvencioneve për OJQ, kurse sa i përket gjetjeve në procesin e menaxhimit të kontratave ai ka thënë se është problem të adresohen rekomandimet meqë ka numër të vogël të mbikëqyrësve të këtyre kontratave. Ndërsa lidhur me borxhet ndaj komunës, ai ka thënë se ky proces është më sfidues. Ndërsa Visar Prebreza nga BIRN-i ka vlerësuar se në Komunën e Pejës ka një progres sa i përket numrit të rekomandimeve të pranuara vit pas viti. Kurse sa i përket zbatimit të rekomandimeve ai ka thënë se janë zbatuar 6 rekomandime prej 15 sa kanë qenë gjithsej në 2019-n. Prandaj Prebreza ka deklaruar se Komuna e Pejës duhet të punojë më shumë në zbatimin e rekomandimeve Auditorit të Përgjithshëm. Ai ka bërë me dije se sikurse në komunat e tjera, edhe në Pejë janë identifikuar dobësi te ndarja e subvencioneve, janë evidentuar disa shkelje në prokurimi, si dhe borxhi ndaj komunës është i madh, rreth 18 milionë euro. Ky debat është organizuar nga BIRN Kosova në  kuadër të Projektit me USAID TEAM i cili ju ka ndihmuar komunave që t’i zbatojnë rekomandimet e auditorit. Debati ka për qellim ngritjen e vetëdijes për rëndësinë e raporteve të auditimit dhe zbatimin e rekomandimeve.  

Procesi i ndërtimit dhe përmirësimit të rrugëve rajonale dhe lokale gjatë periudhës 2017-2019 për të cilin janë shpenzuar mbi 343 milionë euro, është përcjellë me mangësi të shumta dhe vonesa nga tri deri në pesë vjet. Ky është konkluzioni i përgjithshëm i auditimit të Raportit të Performancës “Vlera për para në ndërtimin e rrugëve lokale dhe rajonale” i Zyrës Kombëtare të Auditimit që është publikuar të hënën. Ky auditim kishte për qëllim vlerësimin nëse rrugët e ndërtuara përfundohen me kohë, me cilësi sipas standardeve dhe nëse është arritur vlera për para. Subjekte të auditimit kanë qenë Ministria e Infrastrukturës[1], Komuna e Prishtinës, Prizrenit, Ferizajt dhe e Malishevës. Rezultatet e auditimit tregojnë se ndërtimi rrugëve lokale dhe rajonale është karakterizuar me dobësi të shumta duke filluar nga mungesa e analizës kosto-përfitime, planifikimi jo adekuat i aktiviteteve, buxhetimi i pamjaftueshëm i fondeve, probleme me shpronësime si dhe problemet me hartimin e projekteve kryesore dhe paqartësi sa i përket referimit në standarde të ndërtimit të rrugëve. Për pasojë, ndërtimi i rrugëve ishte përcjellë me vonesa nga tri deri në pesë vite prandaj në shumicën e projekteve të audituara nuk është siguruar vlera më e mirë për para. Auditimi ka identifikuar se Ministria e Infrastrukturës dhe komunat e audituara kishin shpallur tenderë pa u siguruar se janë plotësuar parakushtet për fillimin e tyre përfshirë edhe mospërfundimin e shpronësimeve. Edhe inicimi i aktivitetit të prokurimit dhe lidhja e kontratave është bërë në kohë të papërshtatshme gjë që kishte pamundësuar zbatimin e tyre me kohë. Mandej nuk kishin buxhetuar fonde të mjaftueshme për të siguruar zbatimin e pandërprerë të kontratave, mirëpo këto fonde ishin vënë në dispozicion vetëm pas dy apo tri vitesh. Po ashtu procesi i auditimit ka nxjerr në pah mangësi edhe në hartimin  e projekteve kryesore, me ç’rast disa rrugë ishin ndërtuar duke u bazuar vetëm në paramasë. Për pasojë, në disa raste, ishin bërë punë shtesë, duke krijuar kështu edhe shpenzime shtesë. Përveç këtyre çështjeve auditimi ka identifikuar edhe disa mangësi të përbashkëta rreth pajtueshmërisë me kërkesat ligjore në procesin e ndërtimit të rrugëve. Auditorja e Përgjithshme, Vlora Spanca, lidhur me këtë auditim ka deklaruar se cilësia e mirë e punimeve në rrugë është e rëndësishme si për sigurinë ashtu edhe për arsyet e zhvillimit ekonomik. Prandaj bazuar në mangësitë e identifikuara, përmirësimet në procesin e ndërtimit të rrugëve janë të domosdoshme dhe për të eliminuar mangësitë në këtë proces duhet të ndërmerren veprime konkrete. Me qëllim të adresimit të gjetjeve dhe përmirësimit të procesit, Zyra Kombëtare e Auditimit, ka dhënë nëntë rekomandime për Ministrinë e Infrastrukturës,  Komunën e Prishtinës, Prizrenit, Ferizajt dhe Malishevës. Raportin e plotë mund ta lexoni këtu. [1] Tani Ministria e Mjedisit, Planifikimit Hapësinorë dhe Infrastrukturës-MMPHI  

Auditori i Përgjithshëm i Sllovakisë, Karol Mitrik, ka uruar Auditoren e Përgjithshme të Republikës së Kosovës, Vlora Spanca, për marrjen e detyrës në udhëheqjen e Zyrë Kombëtare të Auditimit. Në letrën dërguar homologes nga Kosova, Mitrik ka shkruar se ZKA-ja është përfituese dhe kontribut dhënëse si brenda komunitetit të auditorëve në nivel ndërkombëtar dhe në atë dy palësh. “Unë besoj se bashkëpunimi i suksesshëm me Zyrën Kombëtare të Auditimit do të vazhdoj edhe në të ardhmen. Prandaj me padurim pres bashkëpunimin me ju”, është thënë në letrën e urimit të Auditorit të Përgjithshëm të Sllovakisë, Karol Mitrik.

Përgëzime për detyrën e re Auditorja e Përgjithshme, Vlora Spanca, ka marrë edhe nga krerët e Institucioneve Supreme të Auditimit të Portugalisë, Kuvajtit, Omanit, Bahrainit, Ekuadorit dhe Kenisë. Në urimet e veçanta dërguar homologes së tyre nga Kosova, krerët e Institucioneve Supreme të Auditimit të Portugalisë, Kuvajtit, Oamanit, Bahrainit, Ekuadorit dhe Kenisë kanë shprehur gatishmëri për të punuar me Zyrën Kombëtare të Auditimit të Kosovës, me qëllimin e përbashkët për të siguruar që fondet publike të shfrytëzohen drejt dhe të përmirësojnë jetën e qytetarëve. Ata janë zotuar se do të angazhohen edhe për forcimin e marrëdhënieve ndërkombëtare përmes bashkëpunimit dypalësh dhe shumëpalësh brenda komunitetit të EUROSAI-t dhe INTOSAI-t.

Auditori i Përgjithshëm i Belgjikës, Philippe Roland; Auditori i Përgjithshëm i Maltës, Charles Deguara; Auditori i Përgjithshëm i Andorës, Francesc d’Assis Pons Tomas si dhe Auditori i Përgjithshëm i Zambisë, Dr Dick Chellah Sichembe kanë dërguar letra urimi për Auditoren e Përgjithshme të Republikës së Kosovës, Vlora Spanca me rastin e marrjes së detyrës së re. Në letrat e veçanta dërguar znj. Spanca, homologët kanë përgëzuar atë për ardhjen në krye të Zyrës Kombëtare të Auditimit të Kosovës, duke shprehur besimin se gjatë mandatit të saj ZKA-ja do të shënoj ngritje dhe suksese. Po ashtu krerët e Institucioneve Supreme të Auditimit të Belgjikës, Maltës, Andorës dhe Zambisë kanë shprehur gatishmërinë për të vazhduar bashkëpunimi në mes të Institucioneve Supreme të Auditimit. Ata kanë vlerësuar se përvoja e Auditores së Përgjithshme, Vlora Spanca, në fushën e auditimit do të sigurojë një vlerë të shtuar jo vetëm brenda ZKA-në por edhe në nivelin ndërkombëtarë veçanërisht brenda INTOSAI-t dhe EUROSAI-t.

Drejtori i Përgjithshëm i Iniciativës për Zhvillim e INTOSAI-t (IDI), Einar J. Gørrissen, ka uruar Auditoren e Përgjithshme të Kosovës, Vlora Spanca, duke i dëshiruar mandat të suksesshëm në krye të Zyrës Kombëtare e Auditimit.  Në letrën dërguar znj. Spanca, Gørrissen ka shkruar se mezi pret të punojë së bashku dhe të vazhdojë marrëdhënien bashkëpunuese mes  Iniciativës për Zhvillim e INTOSAI-t dhe Zyrës Kombëtare të Auditimit të Republikës së Kosovës. ?Kemi pasur fatin që kemi bashkëpunim me ISA-in e Kosovës, në përpjekjet tona të përbashkëta për të mbështetur ISA-at për të përforcuar performancën dhe kapacitete e tyre. Mbështetja e Kosovës në ofrimin e resurseve për programet e IDI-it, ka ndihmuar në zhvillimin e kapaciteteve të ISA-ve tjera. Me kënaqësi dëshirojmë të theksojmë se gjatë bashkëpunimeve tona të mëhershme, ISA e Kosovës ka vazhduar që të pasuroj me pjesëmarrës mes tjerash programet tona, atë të  ISA Liderëve të Rinjë të ISA-ve dhe Programin Profesional PESA-P, është thënë në urimin e Drejtorit të Përgjithshëm të Iniciativës për Zhvillim të  INTOSAI-t, Einar J. Gørrissen. Aktualisht, ZKA-ja është pjesë e Iniciativës për Zhvillim e INTOSAI-t (IDI), në kuadër të Programit për Edukim Profesional për Auditorët e ISA-ve (PESA). Po ashtu në kuadër të partneritetit me Iniciativën për Zhvillim e INTOSAI-t ZKA-ja më herët ka qenë pjesë e Programit “Liderët e rinj”.

Auditorja e Përgjithshme e Republikës së Kosovës, Vlora Spanca, ka pranuar letër urimi edhe nga Auditori i Përgjithshëm i Çekisë, njëherësh Presidenti i EUROSAI-t, Miloslav Kala. Duke i dëshiruar suksese gjatë ushtrimit të mandatit, Kala ka shprehur përkushtimin për të vazhduar bashkëpunimin e mirë në mes të dy institucioneve, si dhe brenda EUROSAI-t. “Shpresoj që marrëdhënia e mirë dhe bashkëpunimi i ndërsjellë midis Zyrave tona do të vazhdojnë në të ardhmen,  si dhe marrëdhëniet reciproke profesionale,  si në nivel bilateral ashtu edhe në kuadër të EUROSAI -t, do të jenë po aq të mira dhe të frytshme siç kanë qenë deri me tani. Mezi pres të takohem personalisht me Ju në të ardhmen e afërt”, është thënë në letrën e urimit të Auditorit të Përgjithshëm të Çekisë njëherësh president i EUROSAI-t.

Auditori i Përgjithshëm i Autoritetit të Auditimit të Maqedonisë së Veriut për auditimin e fondeve IPA, Adem Curi, ka përgëzuar Auditoren e Përgjithshme të Republikës së Kosovës, Vlora Spanca për marrjen e detyrës. Me këtë rast ai ka shprehur gatishmërinë për të forcuar më tej komunikimin dhe bashkëpunimin profesional mes institucioneve. “Duke pasur parasysh kapacitetin dhe njohuritë tona profesionale në auditimin e fondeve të BE -së, ne kemi krijuar një Rrjet Rajonal të Autoriteteve të Auditimit IPA, ku diskutojmë qasjen dhe sfidat tona të auditimit me kolegët nga Komisioni Evropian, Gjykata Evropiane e Auditorëve dhe autoritet e tjera të Auditimit. Në fund, edhe një herë dua t'ju përgëzoj për rolin e ri si Auditor i Përgjithshëm i Zyrës Kombëtare në Republikën e Kosovës dhe ju uroj suksese në vitet e ardhshme”, është thënë në letrën e urimit të Auditorit të Përgjithshëm të Autoritetit të Auditimit të Maqedonisë së Veriut për auditimin e fondeve IPA. Zyra Kombëtare e Auditimit të Republikës së Kosovës dhe Autoriteti i Auditimit të Maqedonisë së Veriut për auditimin e fondeve IPA kanë marrëveshje bashkëpunimi për forcimin e mëtejshëm të kapaciteteve institucionale për auditim efektiv dhe efikas në fushën e auditimit të fondeve nga IPA.