Lajmet

Zyra Kombëtare e Auditimit (ZKA) ka filluar auditimin e teknologjisë së informacionit me temën “Sistemet e Informacionit në Kompaninë Rajonale të Ujësjellësit “Prishtina” sh.a”. Qëllimi i këtij auditimi është të vlerësojë nëse menaxhmenti i ndërmarrjes sigurohet se burimet e Teknologjisë së Informacionit, mbështesin qëllimet dhe strategjinë e ndërmarrjes duke ofruar një mjedis efektiv për të ruajtur integritetin e të dhënave dhe vazhdimësinë e sistemeve të TI-së. KRU-Prishtina ofron shërbimet e ujit dhe kanalizimit për komunën e Prishtinës, Fushë Kosovës, Obiliqit, Shtimes, Lipjanit, Podujevës, Drenasit dhe Graçanicës. Kjo kompani është ofruesi më i madh i shërbimit të ujit në Kosovë që ka të regjistruar 153,509 konsumatorë apo 37% nga totali i konsumatorëve në të gjithë Kosovën. Me qëllim të zhvillimit të veprimtarisë së kompanisë, arritjes së objektivave të saj dhe përmirësimit të shërbimeve për qytetarë, KRU Prishtina aplikon sistemet e teknologjisë së informacionit dhe investon në këtë fushë. Prandaj, përmes këtij auditimi ZKA-ja synon të ofrojë rekomandime relevante për KRU Prishtina, në mënyrë që të përmirësohet qeverisja, menaxhimi i TI-së dhe siguria e informacionit. Fushëveprim i këtij auditimi do të mbuloj gjendjen aktuale të teknologjisë së informacionit në këtë ndërmarrje, me fokus në mekanizmat e vendosura nga strukturat udhëheqëse të ndërmarrjes për të menaxhuar burimet e TI-së. Për të vlerësuar nëse janë dizajnuar kontrollet e aplikacioneve në atë mënyrë që të sigurojnë se sistemet e informacionit në KRU Prishtina pranojnë vetëm të dhëna të vlefshme dhe të proceduara nga personeli i autorizuar, do të testohet gjendja aktuale e aplikacioneve si dhe do të verifikohen të dhënat e regjistruara gjatë viteve 2021- 2022. Për më tepër ky është auditimi i parë paralel në mes të ZKA-së dhe Kontrollit të Lartë të Shtetit të Shqipërisë (KLSH) në fushën e teknologjisë së informacionit, me ç'rast të dy institucionet supreme të auditimit do të auditojnë sistemet e teknologjisë së informacionit të ujësjellësve respektiv, në Tiranë dhe Prishtinë. Ekipet e auditimit në vazhdimësi do të komunikojnë dhe shkëmbejnë përvoja lidhur me këto auditime.

Auditorja e Përgjithshme e Republikës së Kosovës, Vlora Spanca, i ka dërguar letër urimi kryetarit të Kontrollit të Lartë të Shtetit (KLSH), Arben Shehu me rastin e 28 Nëntorit, Ditës së Flamurit dhe 110-vjetorit të Pavarësisë së Republikës së Shqipërisë. Në letrën e urimit thuhet se shpallja e pavarësisë së Shqipërisë është një nga ngjarjet më të rëndësishme kombëtare, dhe 28 nëntori një ditë e veçantë për çdo shqiptar, prandaj edhe në Zyrën Kombëtare të Auditimit të Kosovës kjo ditë merr ngjyrime feste dhe krenarie. “Në emrin tim personal dhe në emër të Zyrës Kombëtare të Auditimit, ju lutem pranoni urimet më të përzemërta me rastin e shënimit të Ditës së Flamurit dhe 110-të vjetorit të  Pavarësisë së Shqipërisë”, është thënë në urimin e znj. Spanca. Me urimet më të mira për mirëqenien e popullit shqiptar kudo, Auditorja e Përgjithshme ka konfirmuar përkushtimin e saj dhe të ZKA-së në forcimin e mëtutjeshëm të bashkëpunimit në mes të dy institucioneve. “Partneriteti dhe angazhimi i institucioneve tona në projekte të përbashkëta të karakterit profesional çon drejtë avancimit të qëndrueshëm të funksionit të auditimit të jashtëm dhe ndikimit në rritjen e menaxhimit më të mirë të projekteve dhe programeve shtetërore në vendet tona”, është theksuar ndër të tjera në letrën e urimit të Auditores së Përgjithshme, Vlora Spanca dërguar kryetari të Kontrollit të Lartë të Shtetit të Shqipërisë, Arben Shehu.

Me 23 dhe 24 nëntor, në Stamboll, është mbajtur Konferenca Rajonale për buxhetimin e përgjegjshëm gjinor “Financimi transformues si një përshpejtues për barazinë gjinore: duke marrë përvojat dhe mësimet e nxjerra nga buxhetimi i përgjegjshëm gjinor” e organizuar nga UN Women. Auditorja e Përgjithshme e Kosovës, Vlora Spanca ka marrë pjesë në  punimet e konferencës ku ka mbajtur një fjalë rasti duke i dhënë një vëmendje të veçantë buxhetimit dhe zbatimit të përgjegjshëm të fondeve për barazi gjinore, me qëllim të rritjes së llogaridhënies dhe transparencës për përdorimin e tyre. Konferenca ka pasur në fokus të punimeve shkëmbimin e përvojave ndërmjet, vendimmarrësve, zyrtarëve të lartë publikë, avokatëve gjinorë, organizatave të shoqërisë civile dhe mediave; për të mësuar nga praktikat më të mira rajonale dhe globale; si dhe për të parë nga e ardhmja se si të përmirësohet më tej zbatimi i buxhetimit të përgjegjshëm gjinor në arritjen e barazisë gjinore. Auditorja e Përgjithshme, Vlora Spanca, në fjalën e saj ka falënderuar UN Women për ftesën dhe organizimin e Konferencës për të diskutuar çështjen e barazisë dhe buxhetimit të përgjegjshëm gjinor, posaçërisht Auditorët e Përgjithshëm dhe Institucionet Supreme të Auditimit si institucione kyçe për të ofruar informacion objektiv dhe të pavarur nëse strategjitë dhe aktivitetet qeveritare janë duke u implementuar në mënyrë efektive. Znj. Spanca i ka njoftuar të pranishmit për ngritjen e kapaciteteve të Zyrës Kombëtare të Auditimit të Kosovës në fushën e barazisë gjinore dhe buxhetimin e përgjegjshëm gjinor si dhe i ka ftuar Auditorët e Përgjithshëm të vendeve të rajonit për ndarjen e përvojave dhe praktikave të mira me qëllim të maksimizimit të përfitimit nga auditimi i çështjeve që ndërlidhen me barazinë gjinore. Në këtë konferencë kanë marrë pjesë edhe përfaqësues të ministrive të financave, ministrive të linjës që zbatojnë buxhetin e përgjegjshëm gjinor, mekanizmave institucionalë gjinorë, kryetarëve të komunave, përfaqësuesve të pushtetit vendor, parlamenteve, Institucioneve Supreme të Auditimit, organizatave të shoqërisë civile dhe mediave të vendeve të Ballkanit Perëndimor. Nga Kosova pjesëmarrëse ka qenë, Ministri i Administrimit të Pushtetit Lokal, Elbert Krasniqi, kryetari i komunës së Gjakovës, Ardian Gjini, drejtori i Departamentit të Buxhetit në Ministrinë e Financave, Salvador Elmazi, Kryeshefja Ekzekutive e Agjencisë për Barazi Gjinore, Edi Gusia, si dhe përfaqësues të tjerë institucional, të cilët në kuadër të paneleve të konferencës kanë prezantuar perspektivat e tyre nga fushat që mbulojnë. Punimet dyditore të Konferencës Rajonale për Buxhetimin e Përgjegjshëm Gjinor janë zhvilluar në kuadër të shtatë (7) paneleve, ku janë diskutuar tema të rëndësishme si: “Perspektiva e lidershipit dhe politikëbërësve për buxhetimin e përgjegjshëm gjinor”; “Menaxhimi i Financave Publike si rrugë për arritjen e barazisë gjinore”; Ndryshimi i jetës së grave dhe burrave përmes aplikimit sektorial të buxhetimit të përgjegjshëm gjinor”; “Qasjet e pranuara ndërkombëtarisht për të vlerësuar zbatimin e BPGJ-së”; “Roli i institucioneve të mbikëqyrjes publike në avancimin e barazisë gjinore”; “Zbatimi i buxhetimit të përgjegjshëm gjinor në nivel lokal: praktika nga rajoni”; si dhe “Ndikimi i buxhetimit të përgjegjshëm gjinor në jetën e grave dhe burrave”.

Zyra Kombëtare e Auditimit (ZKA) dhe Misioni në Kosovë i Organizatës për Siguri dhe Bashkëpunim në Evropë (OSBE)/Departamenti për Demokratizim, kanë mbajtur punëtorinë për përmirësimin e zbatimit të rekomandimeve të auditimit në  nivelin e pushtetit lokal. Punëtoria është mbajtur në rajonin e Gjilanit, Prizrenit dhe Prishtinës në të cilën janë përshirë të gjitha komunat e Kosovës në datat 15,17 dhe 22 nëntor. Zyra Kombëtare e Auditimit në këtë punëtori ka qenë e përfaqësuar nga Ndihmës Auditori i Përgjithshëm, Zukë Zuka, drejtoresha e Departamentit për Auditimin e Komunave, Shehrije Shala, dhe udhëheqësi i ekipit të auditimit, Florim Beqiri. Ndërsa nga Departamenti për Demokratizim i OSBE-së ka marrë pjesë, Fatmir Zylfijaj, nga Ministria e Administrimit të Pushtetit Lokal (MAPL), Fetije Begolli, si dhe kryesues të kuvendeve komunale, zyrtarë kryesorë financiarë, auditorë të brendshëm dhe drejtorë financiarë. Punëtoria kishte për qëllim të shërbejë si platformë diskutimi për sfidat kryesore në zbatimin e rekomandimeve dhe planeve të veprimit, si dhe rolin e legjislacionit komunal në çështjet financiare, raportimin rreth auditimit dhe transparencën. Kjo punëtori ishte një mundësi e mirë që përfaqësuesit komunal diskutojnë me përfaqësuesit e ZKA-së dhe të MAPL-së, rreth gjetjeve kryesore të raporteve të auditimit për vitin 2021, sfidat kryesore të identifikuara, përfitimet që vijnë nga rritja e nivelit të zbatimit të rekomandimeve të auditimit, si dhe për rolin e legjislacionit komunal dhe grantit të performancës për komunat. Me këtë rast përfaqësuesit e ZKA-së, kanë ofruar pikëpamjet e tyre për sa i përket veprimeve të duhura që do të ndikonin në përmirësimin e  menaxhimit financiar dhe kontrollit në  komuna. Fokus i veçantë i është dhënë zbatimit sa më efikas të rekomandimeve të auditimit dhe shkëmbimit të përvojave ndërmjet komunave.  

Zyra Kombëtare e Auditimit (ZKA) ka filluar auditimin e performancës me temën “Mbështetja e ndërmarrjeve mikro, të vogla dhe të mesme nga MINT/KIESA” për periudhën 2019-2022. Fokus kryesor i këtij auditimi është vlerësimi i aktiviteteve të Ministrisë së Industrisë, Ndërmarrësisë dhe Tregtisë (MINT) dhe Agjencisë për Investime dhe Përkrahjen e Ndërmarrjeve në Kosovë (KIESA) për arritjen e rezultateve të duhura në përkrahjen dhe ngritjen e kapaciteteve të ndërmarrjeve mikro, të vogla dhe të mesme (NMVM) dhe zonave ekonomike. MINT/KIESA çdo vit bën shpallje për përkrahjen e NMVM-ve me qëllim të ngritjes së kapaciteteve të tyre në mënyrë që këto ndërmarrje të ofrojnë produkte më cilësore dhe të jenë konkurruese me ndërmarrjet në nivel ndërkombëtar. Njëkohësisht përmes zonave ekonomike MINT u ofron ndërmarrjeve lehtësira të ndryshme. Thirrjet publike duhet të bëhen në përputhje me strategjinë e MINT-it lidhur me zhvillimin e NMVM-ve në vendin tonë, po ashtu thirrjet dhe përzgjedhja e përfituesve duhet të bëhet në përputhje me ligjet dhe rregulloret për përkrahjen e këtyre ndërmarrjeve. Prandaj, përmes këtij auditimi në MINT/KIESA, ZKA-ja do të vlerësojë arsyeshmërinë dhe  përputhjen ligjore të procesit për përkrahjen e NMVM-ve. Po ashtu do të analizojë shpalljet e zonave të lira ekonomike për të parë nëse MINT është bazuar në analiza të arsyeshme për themelimin e këtyre zonave. Auditimi “Mbështetja e ndërmarrjeve mikro, të vogla dhe të mesme nga MINT/KIESA”, ka për synim që përmes rekomandimeve të ndihmojë institucionet përgjegjëse në përmirësimin e aktiviteteve për përkrahjen e NMVM-ve dhe themelimin e zonave të lira ekonomike.  

Zyra Kombëtare e Auditimit (ZKA) dhe HELVETAS Swiss Intercooperation në Kosovë/ Projekti për Decentralizim dhe Përkrahje të Komunave (DEMOS) kanë vazhduar  bashkëpunimin për vendosjen e mekanizmave mbikëqyrës në qeverisjen lokale për të rritur ndikimin e auditimit, përkatësisht rritjen e nivelit të zbatimit të rekomandimeve të auditimit. Në kuadër të aktiviteteve për mbështetjen e komunave për zbatimin e rekomandimeve, është mbajtur punëtoria dyditore (14 dhe 15 nëntor) ku kanë marrë pjesë drejtorët e departamenteve për  auditim të komunave në Zyrën Kombëtare të Auditimit, Lavdim Maxhuni dhe Shehrije Shala, drejtoresha e HELVETAS Swiss Intercooperation në Kosovë, Celestine Krosschell, përfaqësues të Projektit DEMOS, përfaqësues nga Ministria e Financave, Punës dhe Transfereve, si dhe zyrtarë kryesor financiar dhe zyrtarë për menaxhimin e pasurisë nga komunat. Pjesëmarrësit e kësaj punëtorie kanë diskutuar për çështjet që kanë ndikuar në opinionin e auditimit financiar, përkatësisht  çështjet e pasurisë të ngritura në raportet e auditimit të pasqyrave financiare për vitin 2021 si: vlerësimin e pasurisë së trashëguar/alternativat, barrierat ligjore në vlerësim të pronës së trashëguar, si dhe çështje të tjera që ndërlidhen me shpalosjet e pasqyrave financiare vjetore me fokus tek llogaritë e arkëtueshme. Përfaqësuesit e ZKA-së në këtë ngjarje kanë dhënë kontribut duke ofruar pikëpamjet e ZKA-së në lidhje me veprimet e duhura përmes së cilave komunat mund të përmirësojnë menaxhimin financiar, me theks të pasurisë jofinanciare. Gjatë këtij diskutimi është theksuar se zbatimi i rekomandimeve të auditimit ndihmon institucionet publike të përmirësojnë sistemin e raportimit financiar dhe të rrisin kontrollet për menaxhim të parasë dhe pasurisë publike. Drejtorët e departamenteve për  auditimin e komunave në ZKA, kanë vlerësuar se për të rritur nivelin e rekomandimeve të zbatuara, nevojitet të shtohet kujdes dhe përgjegjshmëri në kryerjen e detyrave zyrtare përmes masave shtesë të kontrolleve dhe llogaridhënies në të gjitha nivelet komunale. Ndërsa përfaqësuesit e komunave e kanë vlerësuar të dobishme punëtorinë në dhënien e këshillave dhe mundësive për përmirësimin e menaxhimit të pasurisë dhe zbatimit të rekomandimeve.

Auditorja e Përgjithshme, Vlora Spanca, Zëvendës Auditori i Përgjithshëm, Bezad Halilaj dhe drejtori i Departamentit të Auditimit, Faruk Rrahmani, kanë pritur të mërkurën në takim shefin e misionit të Fondit Monetar Ndërkombëtar (FMN), z. Jacques Charaoui, këshilltarin për Menaxhimin e Financave Publike, Yasemin Hurcan, si dhe ekspertet e Departamentit të Çështjeve Fiskale, Richard Allen, Guillaume Gaubert dhe Katja Lautar. Me përfaqësuesit e këtij misioni është diskutuar për aktivitetet e Zyrës Kombëtare të Auditimit në veçanti për rezultatet e auditimit të buxhetit të Kosovës dhe çështjet e identifikuara nga procesi i auditimit për vitin 2021. Fokus i veçantë i është dhënë diskutimit për përmirësimin e menaxhimit të investimeve publike, raportimit financiar, gjetjeve të raporteve të auditimit të institucioneve qendrore, ndërmarrjeve publike dhe komunave, zbatimit të Programit të Investimeve Publike, problemeve që lidhen me shpronësimet për projektet e infrastrukturës, si dhe klasifikimit të gabuar të shpenzimeve. Auditorja e Përgjithshme, Vlora Spanca u është përgjigjur interesimit të delegacionit në lidhje shumë çështje të fushëveprimit të auditimit duke ofruar pikëpamjet e ZKA-së nga këndvështrimi i auditimit. Gjithashtu, ajo i ka njoftuar mysafirët edhe për planet e auditimit të Zyrës Kombëtare të Auditimit, për sezonin auditues 2022/23.

Rekomandimet e auditimit kanë për qëllim që t’i ndihmojnë institucionet publike të përmirësojnë qeverisjen dhe të rrisin kontrollet për menaxhimin e parasë publike Organizatat buxhetore që i nënshtrohen procesit të auditimit e kanë obligim ligjor që brenda 30 ditëve pas pranimit të raportit të auditimit t’i dorëzojnë në Zyrën Kombëtare të Auditimit planet e veprimit për zbatimin e rekomandimeve të Auditorit të Përgjithshëm, megjithatë dhjetëra prej tyre nuk e kanë respektuar afatin e përcaktuar, e disa prej tyre nuk i kanë dorëzuar fare. Sa i përket auditimit financiar dhe të pajtueshmërisë, nga institucionet që kanë qenë subjekt i auditimit, nëntë (9) prej tyre nuk i kanë dorëzuar planet e veprimit brenda afatit të përcaktuar. Kurse Ministria e Kulturës, Rinisë dhe Sportit (MKRS) si dhe Ministria e Industrisë, Ndërmarrësisë dhe Tregtisë (MINT) nuk i kanë dërguar fare planet e veprimit. Me vonesë planet e veprimit i kanë dorëzuar Ministria e Financave, Punës dhe Transfereve; Ministria e Shëndetësisë; Ministria për Komunitete dhe Kthim; Shërbimi Spitalor dhe Klinik Universitar i Kosovës; Posta e Kosovës, Kompania Regjionale për Mbeturina “Pastrimi”; Ngrohtorja Qendrore “Termokos”; Ndërmarrja Publike Hekurudhat e Kosovës – INFRAKOS; Ndërmarrja Publike Banesore; si dhe Komuna e Prishtinës. Ndërsa gjendje më e keqe për sa i përket këtyre planeve është tek auditimet e performancës, për shkak se shumica e entiteteve që i janë nënshtruar procesit të auditimit, katërmbëdhjetë (14) sosh nuk i kanë dërguar fare planet e veprimit për adresimin e rekomandimeve, kurse dy (2) i kanë dorëzuar me vonesë. Për raportin e auditimit “Vlerësimi i nxënësve në testet kombëtare dhe ndërkombëtare”, planet e veprimit nuk i kanë dorëzuar Ministria e Arsimit, Shkencës, Teknologjisë dhe Inovacionit (MAShTI); Komuna e Prizrenit; Komuna e Istogut si dhe Komuna e Novobërdës. Kurse për raportin e auditimit “Sistemi i licencimit të hidrocentraleve dhe monitorimi i tyre mbi ndikimin në mjedis dhe ujëra” këtë plan nuk e ka dorëzuar Zyra e Rregullatorit të Energjisë (ZRRE). Ndërkaq për raportet e auditimit “Furnizimi me barëra dhe materiale shëndetësore për t'iu përgjigjur nevojave të pacientëve me Covid-19” dhe “Optimizimi i resurseve njerëzore dhe pajisjeve teknike mjekësore për t’iu përgjigjur nevojave të pacientëve me Covid-19” planet e veprimit nuk janë dorëzuar nga Shërbimi Spitalor dhe Klinik Universitar i Kosovës. Sa i përket auditimit të teknologjisë së informacionit “Sistemi Informativ i Gjendjes Civile në Agjencinë e Regjistrit Civil” plani i veprimit nuk është dërguar nga Komuna e Prishtinës, ndërsa me vonesë plani i veprimit është dërguar nga Ministria e Punëve të Jashtme dhe Diasporës. Lidhur me raportin e auditimit “Auditim përcjellës për rekomandimet e dhëna për SIMFK-në në Raportin Vjetor të Auditimit 2020 për pjesën e TI-së” planin e rishikuar e ka dorëzuar me vonesë Thesari. Kurse për auditimin “Menaxhimi i projektit bashkimi i qytetit të Ferizajt” planin e veprimit nuk e ka dërguar Komuna e Ferizajt. Për auditimin “Kontratat e centralizuara - Shërbimet e transportit ajror” planet e veprimit nuk ia kanë dërguar Zyra e Kryeministrit; Ministria e Punëve të Brendshme; Ministria e Drejtësisë; si dhe Ministria e Mjedisit, Planifikimit Hapësinor dhe Infrastrukturës. Radio Televizioni i Kosovës (RTK) e ka dërguar me vonesë planin e veprimit për auditimin “Menaxhimi i fondeve publike në Radio Televizionin e Kosovës”. Me vonesë është dërguar edhe plani i veprimit nga Thesari për raportin e auditimit “Sistemi për Menaxhimin e Pagave-Payroll”. Rekomandimet e auditimit kanë për qëllim që t’i ndihmojnë institucionet publike të përmirësojnë qeverisjen dhe të rrisin kontrollet për menaxhimin me paranë publike. Mënyra e zbatimit të rekomandimeve duke përfshirë kohën, masat dhe  resurset e nevojshme përcaktohen përmes Planit të Veprimit që përgatitet nga organizatat e audituara. Auditorja e Përgjithshme, znj. Vlora Spanca i fton Organizatat Buxhetore që nuk i kanë dorëzuar Planet e veprimit për zbatim të rekomandimeve që brenda një periudhe sa më të shkurtër kohore t’i përgatisin dhe dorëzojnë ato. Gjithashtu, znj. Spanca inkurajon të gjitha institucionet publike të audituara që të rrisin angazhimet e tyre në drejtim të zbatimit të rekomandimeve të auditimit duke siguruar që përmes kësaj të përmirësohet performanca e përgjithshme e tyre. Të gjitha planet e veprimit për vitin 2021 të pranuara nga organizatat buxhetore dhe institucionet tjera të audituara janë të publikuara këtu.

Zyra Kombëtare e Auditimit (ZKA) ka filluar auditimin me temën “Projektet e financuara nga Grantet e Perfomancës Komunale (GPK)”. Fokus kryesor i këtij auditimi është vlerësimi i mënyrës së financimit të grantit dhe mënyra e menaxhimit të projekteve të financuara nga ky grant. Auditimi do të analizoj edhe gjithëpërfshirjen e qytetarëve në këto procese investive, me theks grupet e margjinalizuara. Mjetet e planifikuara për GPK për vitet 2018 – 2021 ishin rreth 14 milionë euro dhe janë financuar rreth 190 projekte në komunat e Republikës së Kosovës. Në vitin 2021 nga 38 komuna të  Kosovës, 21 prej tyre i kanë përmbushur kushtet minimale për t’u kualifikuar dhe për të përfituar nga ky grant. Shuma e përgjithshme e disponueshme për vitin 2021 ishte rreth 4.35 milionë euro. Menaxhimi i projekteve të financuara nga ky grant duhet të jetë në pajtim me legjislacionin vendor, me parimet e ekonomisë, efikasitetit dhe trajtimit të barabartë, si dhe të sigurojë se projektet në të cilat investojnë komunat ndikojnë në përmirësimin e shërbimeve ndaj qytetarëve. Përmes këtij auditimi ZKA-ja synon të vlerësojë funksionimin e sistemit të Grantit të Performancës Komunale përgjatë viteve 2018-2021. Po ashtu, do të vlerësojë nëse menaxhimi dhe efektiviteti i projekteve të financuara nga Donatorët[1]  për vitin fiskal 2021 është bërë në pajtim me legjislacionin në fuqi dhe ka arritur rezultatet e synuara. Fushëveprimi i këtij auditimi shtrihet në analizimin e funksionimit të sistemit të shpërndarjes së granteve përgjatë viteve 2018-2021 nga Donatorët dhe nga Ministria e Administrimit të Pushtetit Lokal, pastaj auditimi i gjashtë projekteve në komunat (Drenas, Lipjan, Vushtrri dhe Skenderaj), arsyet e mos shpenzimit të fondeve nga ky grant në komunat (Mitrovicë e Jugut, Leposaviq dhe Shtërpcë), ndërsa në komunat Peje dhe Prizren do të vlerësohet kthimi i fondeve. Ky auditim synon të ofrojë rekomandime relevante me qëllim të menaxhimit sa më të mirë të projekteve kapitale të Grantit të Performancës Komunale si dhe përfshirjes sa më të madhe të qytetarëve. Auditimi “Projektet e financuara nga Grantet e Perfomancës Komunale (GPK) është kërkesë nga HSIK/DEMOS si përfaqësuese e qeverisë zvicerane, e cila ka lidhur kontratë me Zyrën Kombëtare të Auditimit. Me auditimin e këtyre projekteve ZKA-ja synon të ofrojë një pasqyrë të përgjithshme për donatorin dhe qytetarët se si po shpenzohen këto mjete. Po ashtu, me këtë auditim ZKA synon të rris llogaridhënien dhe transparencën në shpenzimin e këtyre fondeve. [1] Agjencia Zvicerane për Zhvillim dhe Bashkëpunim, Agjencia Suedeze për Bashkëpunim dhe Zhvillim Ndërkombëtar, Shteti i Norvegjisë

Komisioni për Mbikëqyrjen e Financave Publike (KMFP) në mbledhjen e së martës ka shqyrtuar Planin Vjetor të Auditimit për sezonin 2022/23 të Zyrës Kombëtare të Auditimit (ZKA). Auditorja e Përgjithshme, Vlora Spanca, para anëtarëve të Komisionit e ka prezantuar në detaje këtë Plan si dhe ka dhënë shpjegimet e nevojshme. Me këtë rast znj. Spanca ka bërë me dije se misioni i saj është që t’i sigurojë Kuvendit të Kosovës, autoriteteve tjera dhe qytetarëve, informacion objektiv dhe të pavarur mbi funksionimin e institucioneve publike lidhur me menaxhimin e financave publike. “Mbi këtë bazë, çështje e padiskutueshme është kryerja e auditimeve cilësore në përputhje me legjislacionin në fuqi, Standardet Ndërkombëtare të Institucioneve Supreme të Auditimit dhe me interes për Kuvendin e qytetarët”, është shprehur ajo. Auditorja e Përgjithshme, i ka informuar deputetët se Plani Vjetor i Auditimit 2022/23 është përgatitur duke pas parasysh kapacitetet ekzistuese njerëzore dhe financiare të ZKA-së të cilat ende nuk janë të mjaftueshme për të përmbush nevojat dhe pritjet. Znj. Spanca, ka treguar se për sezonin auditues 2022/23 janë planifikuar 134 auditime. Prej të cilave, 113 auditime financiare dhe të pajtueshmërisë që mbulojnë pasqyrat financiare për vitin 2022, duke filluar nga auditimi i Raportit vjetor financiar të Qeverisë së Republikës së Kosovës, pasqyrave financiare për institucionet publike, ministritë, institucionet e pavarura, komunat, ndërmarrjet publike si dhe fondet e donatorëve. Në planin e auditimit janë përfshirë 11 Ndërmarrje Publike, prej tyre 5 janë nga niveli qendror, 2 regjionale si dhe 4  nga niveli lokal. Po ashtu Auditorja e Përgjithshme ka bërë me dije se për dallim nga vitet e mëparshme për herë të parë është përfshirë edhe auditimi i Pasqyrave Financiare të Korporatës Energjetike të Kosovës (KEK). Ndërsa sa i përket auditimeve të performancës, Auditorja e Përgjithshme ka treguar se janë planifikuar 18 auditime të kësaj fushe, disa prej tyre me kombinim të pajtueshmërisë. Znj. Spanca, ka thënë se përmes këtyre auditimeve mbulohen fusha me rëndësi ekonomike, sociale, shëndetësore, arsimore, mediale, kulturore e sportive, si dhe tema të rëndësishme në prokurim publik, projekte nga donatoret, si dhe auditime të sistemeve të informacionit. Përzgjedhja e temave të performancës është bërë më kontributin e Shoqërisë Civile, organizatave profesionale, komunitetit të donatorëve dhe ekspertëve të fushave. Në Planin vjetor të auditimit janë përfshirë dy tema si rezultat i propozimeve të tyre. Gjatë vitit 2022, ZKA për herë të parë ka pranuar dhe ka marrë në konsideratë raportime të ndryshme nga palët e jashtme, në veçanti nga qytetarët e Kosovës (21 raportime). ZKA, i ka adresuar këto raportime tek ekipet e auditimit për trajtim të mëtutjeshëm, si dhe ka përfshirë një temë audituese në fushën e performancës. Në lidhje më ketë, Auditorja e Përgjithshme i falënderon qytetarët e Republikës se Kosovës për besueshmërinë që kanë treguar për Zyrën Kombëtare të Auditimit dhe inkurajon ata që të ofrojnë informacione kurdo që vlerësojnë që ka parregullsi, mos pajtueshmëri më ligjin apo potencial për mashtrim. “Kësisoj sepse, përveç që do të na ndihmojnë neve si Institucion, do ti ndihmojnë edhe mirëqenies se tyre në të ardhmen”, ka theksuar znj. Spanca. Auditorja e Përgjithshme, Vlora Spanca, në bazë të mandatit kushtetues dhe ligjor ka  shprehur përkushtimin e saj dhe të ZKA-së që në mënyrë rigoroze të zbatoj standardet ndërkombëtare të auditimit përmes dhënies se opinioneve për pasqyra financiare të cilat duhet të reflektojnë gjendjen e vërtetë, të drejtë dhe të saktë të informatave financiare. Planin Vjetor të Auditimit për sezonin 2022/23 mund ta gjeni këtu.  

Një delegacion i Zyrës Kombëtare të Auditimit të Republikës së Kosovës në përbërje të Ndihmës Auditores së Përgjithshme për auditime të performancës, Myrvete Gashi Morina, drejtorit të Departamentit të Auditimit të Teknologjisë së Informacionit, Samir Zymberi, si dhe auditoret Saranda Husaj Baraliu, Arbërore Sheremeti dhe Arlinda Mustafa, kanë qëndruar për vizitë studimore dy ditore në Kontrollin e Lartë të Shtetit të Republikës së Shqipërisë (KLSH). Kjo vizitë ka qenë vazhdimësi e aktiviteteve në kuadër të auditimit paralel të Teknologjisë së Informacionit për sistemet e informacionit të ujësjellësit në Tiranë dhe Prishtinë. Ekipet e auditimit nga të dyja institucionet kanë prezantuar rezultatet e fazës së parastudimit lidhur me auditimin paralel që është duke u zhvilluar, si dhe kanë diskutuar për fazat vijuese të këtij procesi të auditimit në mes të KLSH-së dhe ZKA-së. Në kuadër të kësaj vizite ekipet e auditimit kanë zhvilluar një vizitë pune në  Ujësjellësin e Tiranës, ku janë informuar rreth procesit auditues dhe detajeve të tjera nga drejtuesit e këtij institucioni. Auditimi paralel në mes të KLSH-së dhe ZKA-së përveç që forcon bashkëpunimin në mes të dy institucioneve, ka rol në shkëmbimin e përvojave në fushën e auditimeve të teknologjisë së informacionit si dhe ndikon në përmirësimin e menaxhimit të sistemeve të informacionit për ujësjellësit në Shqipëri dhe Kosovë.

Në datat 7-11 nëntor 2022, në Rio de Zhaneiro, po mbahet Kongresi i Institucioneve Supreme të Auditimit, i organizuar nga Gjykata Federale e Llogarive të Brazilit. Në kongres, Zyra Kombetare e Auditimit përfaqësohet nga Emine Fazliu, Ndihmës Auditore e Përgjithshme dhe Qëndresa Mulaj, Drejtoreshë e Departamenti për Bashkëpunim Ndërkombëtar dhe Komunikim. Në seancën e parë plenare Kongresi ka miratuar dokumente të rëndësishme përfshirë edhe rregullat dhe procedurat e organizatës, raporte pune, si dhe Planin Strategjik të INTOSAI-t 2023-2028. Punimet në vazhdim i kanë trajtuar dy tema me rëndësi të vecantë të auditimit publik si: “Roli i institucioneve supreme të auditimit në përballje me katastrofat” dhe “Zëri global, rezultati global dhe ndikimi largpamës”. Delegacioni i Zyrës Kombëtare të Auditimit të Kosovës në kuadër të Kongresit ka takuar kolegë dhe partnerë nga ISA-t tjera ku kanë biseduar për çështje të auditimit publik, përvojat dhe zgjidhjet e mundshme, me qëllim të aplikimit të standardeve të auditimit, dhe rritjes së bashkëpunimit. Në vazhdim të punimeve, Kongresi pritet të miratojë Deklaratën e Rios si dhe të zgjedhë anëtarët e rinj të Bordit Drejtues dhe të caktojë auditorët e jashtëm për auditimin e organizatës. Kongresi është organi më i lartë i Organizatës Ndërkombëtare të Institucioneve Supreme të Auditimit (INTOSAI). Më shumë informata mund të gjeni në https://incosai2022.rio.br/pt/home/