Lajmet

Ndihmës Auditoret e Përgjithshme, Emine Fazliu dhe Myrvete Gashi Morina, si dhe Drejtori i Departamentit të Auditimit, Jusuf Kryeziu, morën pjesë në seminarin e parë të EUROSAI-t për Ndërtimin e Kapaciteteve, i cili u mbajt më 14 dhe 15 tetor 2025 në Varshavë, nën organizimin e Zyrës Supreme të Auditimit të Polonisë.  

Ky seminar mblodhi përfaqësues të Institucioneve Supreme të Auditimit (ISA) nga vendet anëtare të EUROSAI-t, për të shkëmbyer përvojat dhe praktikat e mira me qëllim të forcimit të kapaciteteve profesionale në tri fusha kyçe: zbatimin e standardit të përditësuar ISSAI 140, përdorimin e gjuhës së thjeshtë në komunikim dhe raporte, si dhe qasjen dhe përdorimin e mediave sociale në punën e SAI-ve.  

Pjesëmarrësit ndanë praktika të mira dhe qasje inovative për përmirësimin e cilësisë së punës dhe rritjen e transparencës në komunikim me publikun.  

Seminari u zhvillua në kuadër të zbatimit të Objektivit Strategjik 2 të Planit Strategjik të EUROSAI-t 2024–2030, i cili synon fuqizimin e bashkëpunimit dhe ngritjen e kapaciteteve të Institucioneve Supreme të Auditimit në Evropë. 

Auditorja e Përgjithshme, Vlora Spanca, Zëvendës Auditori i Përgjithshëm, Bezad Halilaj, dhe Osman Kabashi Auditor Inxhinier, të mërkurën priten në takim kryetarin e Odës së Inxhinierëve të Republikës së Kosovës (OIRK), Arsim Rapuca dhe Drejtorin Ekzekutiv Lulzim Ismajli, si dhe anëtarin e Bordit të Odës së Arkitektëve të Republikës së Kosovës (OARK), Asim Vatovci.  

Auditorja e Përgjithshme, Vlora Spanca dhe përfaqësuesit e odave diskutuan për rëndësinë e bashkëpunimit ndërinstitucional dhe u pajtuan për nevojën dhe përgatitjen e një memorandumi bashkëpunimi në të ardhmen.  

Znj. Spanca foli për rolin dhe mandatin e ZKA-së, me theks të veçantë për rëndësinë e auditimeve të realizuara në fushën e ndërtimeve deri më tani si dhe rritjen e numrit të tyre në të ardhmen.  

Kryetari Rapuca foli për rolin dhe përgjegjësitë ligjore të odave profesionale, si dhe dokumentacionin përcjellës ligjor dhe teknik që rregullon proceset në fushën e ndërtimit.

Ndihmës Auditori i Përgjithshëm, Zukë Zuka, Drejtori i Departamentit të Sigurimit të Cilësisë së Auditimit, Fitim Haliti dhe auditori senior, Ylber Sadiku morën pjesë në  konferencën “Sistemi i Menaxhimit të Cilësisë së Auditimit”, të mbajtur me 8 dhe 9 tetor 2025 në Sarajevë, organizuar nga Zyra e Auditimit të Bosnjë dhe Hercegovinës në bashkëpunim me OECD/SIGMA në kuadër të Planit të Punës të Rrjetit të Institucioneve Supreme të Auditimit të vendeve kandidate dhe kandidate të mundshme për anëtarësim në Bashkimin Evropian. Të pranishëm ishin përfaqësues të Institucioneve Supreme të Auditimit nga Shqipëria, Bosnja dhe Hercegovina, Mali i Zi, Gjeorgjia, Kosova, Moldavia, Maqedonia e Veriut, Serbia, Turqia, Ukraina, Suedia dhe Kroacia.

Konferenca shërbeu për shkëmbimin e përvojave mbi ngritjen dhe aplikimin e Sistemit të Menaxhimit të Cilësisë së Auditimit, i cili bazohet në standardin ndërkombëtar të rishikuar ISSAI 140. Përfaqësuesit e Zyrës së Auditimit të Bosnjë dhe Hercegovinës prezantuan përvojën nga pjesëmarrja në projektin pilot global të zhvilluar nga IDI për SoAQM  (Sistemi për Menaxhimin e Cilësisë në Auditim).

Në margjinat e konferencës u shënua 25-vjetori i Zyrës së  Auditimit të  Bosnjës dhe Hercegovinës, me ç’rast Auditori i Përgjithshëm, Hrvoje Tvrtkoviq foli për zhvillimin e Zyrës dhe rolin e saj në forcimin e transparencës dhe llogaridhënies në sektorin publik. Me këtë rast Ndihmës Auditori i Përgjithshëm, Zuke Zuka, në emër të  Auditores së Përgjithshme, Vlora Spanca, uroi z. Tvrtkoviq  për 25-vjetorin duke i dëshiruar shumë suksese në forcimin e auditimit publik në rajon dhe bashkëpunimin ndërinstitucional.

Auditorja e Përgjithshme e Republikës së Kosovës, Vlora Spanca, së bashku me Zëvendës Auditorin e Përgjithshëm Bezad Halilaj dhe Ndihmës Auditoren e Përgjithshme, Myrvete Gashi, zhvilluan takim me Rektorin e Universitetit për Biznes dhe Teknologji (UBT), Prof. Dr. Edmond Hajrizi.

Në takim u diskutua ripërtëritja e marrëveshjes së bashkëpunimit dhe mundësitë që kjo hapë për të ardhmen përmes fuqizimit të kapaciteteve profesionale dhe shkëmbimit të përvojave. Palët u dakorduan që përmes kësaj marrëveshjeje të forcojnë partneritetin dhe të kontribuojnë në zhvillimin profesional, me qëllim të rritjes së kapaciteteve dhe shkëmbimit të përvojave në fusha me interes të përbashkët.

Zyra Kombëtare e Auditimit (ZKA) publikoi raportin e auditimit të performancës “Efikasiteti dhe efektiviteti në procesin e lejeve të ndërtimit në Komunën e Fushë Kosovës”. Auditimi ka vlerësuar procesin që nga dhënia e kushteve ndërtimore e deri te pajisja me çertifikata të përdorimit. Auditimi është fokusuar në vlerësimin e përputhshmërisë me planifikimin hapësinor, përdorimin e mekanizmave të kontrollit në dispozicion, si dhe garantimin e sigurisë për banorët që vendosen në këto objekte.

Auditimi ka konstatuar mangësi serioze në procesin e lejeve ndërtimore në Komunën e Fushë Kosovës si: mos miratimi i Planit Zhvillimor Komunal, mos  hartimi i planeve të detajuara rregulluese si dhe lëshimi i lejeve ndërtimore sipas hartës zonale. ZKA ka identifikuar se, Komuna ka lejuar devijime nga kushtet ndërtimore, si mungesë e hapësirave gjelbëruese apo tejkalim i sipërfaqeve të ndërtimit. Po ashtu, kishte vonesa të konsiderueshme në lëshimin e kushteve ndërtimore nga katër deri në 131 ditë. Po ashtu në disa raste lejet ndërtimore kishin devijime nga parametrat e përcaktuara, duke përfshirë rritje të sipërfaqes ndërtimore, tejkalim të numrit të njësive banesore dhe mungesë të hapësirave gjelbëruese apo vend parkimeve.

Rezultatet e auditimit tregojnë se inspektorët komunalë kanë inspektuar një pjesë shumë të vogël të punimeve, ndërsa pjesën tjetër ia kanë lënë investitorëve. Në vend që të forcojë mbikëqyrjen, inspektorati ka vepruar pa plan pune, pa ndarje të qartë të detyrave si dhe pa databazë për të gjurmuar ndërtimet.

ZKA, ka konstatuar dallime midis sipërfaqes se ndërtuar, kushteve dhe lejeve ndërtimore. Kishte raste kur sipërfaqja ndërtimore në leje ishte më e madhe se ajo e miratuar në kushte, duke shkuar deri në 6,158 m². Ndërsa, kishte raste të tjera ku sipërfaqja në leje ishte më e vogël, duke variuar nga 235 m² deri në 2,158 m². 

Komuna nuk ka respektuar as afatet ligjore për lëshimin e kushteve dhe lejeve ndërtimore duke shkaktuar vonesa deri në 250 ditë, si dhe ka lëshuar shumë më pak certifikata përdorimi sesa leje ndërtimore.

Lidhur me këtë auditim, Auditorja e Përgjithshme, Vlora Spanca, deklaroi se Komuna e Fushë Kosovës nuk ishte treguar efikase dhe efektive për të siguruar përputhshmërinë e ndërtimeve të larta banesore me planifikimet hapësinore. Po ashtu komuna nuk ka zgjeruar infrastrukturën publike (çerdhe, shkolla, qendra mjekësore) në përputhje me rritjen e numrit të ndërtimeve.

Për të siguruar që procesi i lejeve ndërtimore zhvillohet në mënyrë sa më efikase dhe efektive, Zyra Kombëtare e Auditimit (ZKA) ka dhënë dhjetë rekomandime.   

Zyra Kombëtare e Auditimit (ZKA) publikoi  raportin e auditimit të performancës “Efikasiteti në planifikimin dhe menaxhimin e projektit ‘Ndërtimi i sheshit së bashku me nënkalimet dhe parkingun nëntokësor në qytetin e Malishevës’”, për periudhën 2022 - mars 2025. Auditimi ka vlerësuar efikasitetin e komunës në planifikimin dhe menaxhimin e këtij projekti si dhe ndikimin i tij në zhvillimin urban dhe jetën e qytetarëve.

Rezultatet e auditimit tregojnë se Komuna e Malishevës nuk ka qenë efikase në planifikimin dhe menaxhimin e projektit të kontraktuar në vlerë 8.28 milionë euro. Kontrata e këtij Projekti ishte nënshkruar me mbështetje buxhetore prej 2.03 milionë euro dhe kishte filluar pa planifikim të detajuar, duke u përcjellë më pas më rritje të kostove. Përveç kontratës bazë Komuna e Malishevës kishte lidhur edhe aneks kontratë në vlerë mbi 800 mijë euro si dhe kostot të pritshme deri në përfundim të projektit janë rreth 500 mijë euro. Përveç kësaj janë ridestinuar rreth 520 mijë euro nga projekte tjera për të mundësuar ndërtimin e këtij projekti.

Në procedurat e prokurimit për kontraktimin e kompanisë projektuese ka pasur mungesë të transparencës dhe trajtim jo të  barabartë.  

Po ashtu janë evidentuar mospërputhje në mes çmimeve të vlerësuara dhe atyre të kontraktuara tek 226 pozicione nga gjithsej 802, ose 28% e tyre, ku çmimi i kontraktuar ishte deri në 1600% (në dy pozicione) më i lartë se ai i parashikuar.

Kishte edhe dallime të theksuara mes sasive të parashikuara në projekt, të kontraktuara dhe atyre të realizuara në praktikë. Këto dallime janë vërejtur në 302 pozicione  nga 802 sa kanë qenë gjithsej apo 37% e pozicioneve.

Kontrata nuk ka pasur mbikëqyrje profesionale, duke bërë që sasia dhe cilësia e materialeve të pranuara të jetë e pa qartë. Kjo kishte ndodhur për shkak të mungesës së menaxhimit të kontratës për hartimin e projektit, si dhe mungesës së organit mbikëqyrës të pavarur gjatë realizimit të kontratës gjë që ka rezultuar në menaxhim dhe mbikëqyrje të dobët të sajë.

Mungesa e masave të nevojshme nga Komuna për menaxhimin dhe mbikëqyrjen adekuate të cilësisë së punimeve ka ndikuar që cilësia dhe siguria e projektit të rrezikohet.

Gjithashtu auditimit ka venë në pah se projekti nuk ishte i bazuar në një Plan Zhvillimor Urban, nuk ka pasur konsultime me qytetarët dhe palët e interesit, ndërsa lejet për ndërtim janë siguruar pas fillimit të punimeve.

Ndonëse projekti synon të kontribuojë në urbanizimin e qytetit, gjatë realizimit ka shkaktuar vështirësi në qarkullim e qytetarëve, zhvillimin e aktiviteteve të tyre dhe bizneseve përreth.

Lidhur me këtë auditim, Auditorja e Përgjithshme, Vlora Spanca, theksoi se mangësitë në planifikim, buxhetim dhe mbikëqyrje kanë ndikuar në efikasitetin, cilësinë dhe sigurinë e projektit “Ndërtimi i sheshit së bashku me nënkalime dhe parkingun nëntokësor në qytetin e Malishevës”.

Zyra Kombëtare e Auditimit (ZKA) ka dhënë nëntë rekomandime për Komunën e Malishevës, me qëllim që të përmirësohet procesi i planifikimit dhe menaxhimit të projekteve kapitale.  

Raportin e plotë të auditimit të performancës “Efikasiteti në planifikimin dhe menaxhimin e projektit ‘Ndërtimi i sheshit së bashku me nënkalimet dhe parkingun nëntokësor në qytetin e Malishevës’”, e gjeni këtu.

Nga 22 deri në 26 shtator 2025, një delegacion i Zyrës Kombëtare të Auditimit (ZKA) i udhëhequr nga Zëvendës Auditori i Përgjithshëm, Bezad Halilaj, qëndroi për vizitë zyrtare në Zyrën Kombëtare të Auditimit të Suedisë (SNAO) në Stokholm.  

Vizita njëjavore pati për qëllim hartimin e planit dyvjeçar për zbatimin e projektit të ri të bashkëpunimit për zhvillim institucional 2025-2030 ndërmjet dy Institucioneve Supreme të Auditimit. Fokusi ishte të objektivat, ndarja e roleve dhe përgjegjësive sipas objektivave dhe komponentëve si dhe rezultatet e synuara për dy vitet e ardhshme 2026-2027.

Zyrtarët përgjegjës për menaxhimin e projektit u angazhuan për t’i identifikuar aktivitetet me përparësi sipas komponentëve, dhe nënkomponentët, zbatimin e tyre si dhe treguesit e rezultateve.

Po ashtu programi i vizitës përfshiu edhe sesionin për menaxhimin e projektit, menaxhimin e ndryshimit dhe ndikimin e rezultateve të projektit në punën e institucionit.  

Zyra Kombëtare e Auditimit (ZKA) ka realizuar auditimin e Teknologjisë së Informacionit “Sistemi i Informacionit të Tatimit në Pronë (SITP)” për periudhën 2024 – korrik 2025, i cili ka vlerësuar nëse ky sistem siguron të dhëna cilësore, të sakta, dhe të besueshme.

Rezultatet e auditimit tregojnë se ky sistem nuk garanton plotësisht ofrimin e të dhënave cilësore, të sakta, të plota dhe të besueshme. Dobësitë në zhvillim dhe funksionim të sistemit, mungesa e procedurave të standardizuara për testim dhe aprovime, si dhe kontrollet e pamjaftueshme, kanë ndikuar negativisht në integritetin e të dhënave dhe menaxhimin efikas të tatimit. Kjo ka rritur rrezikun për pasaktësi në llogaritje, shpërndarje të gabuar të pagesave dhe vështirësi në identifikimin e saktë të tatimpaguesve.

Ministria e Financave, Punës dhe Transfereve e cila menaxhon SITP nuk siguron që zhvillimet e realizuar në këtë sistem arrijnë qëllimin, pasi ka mungesë të procedurave për kontrolle të brendshme funksionale lidhur me menaxhimin e ndryshimeve dhe trajtimit të kërkesave për zhvillim.

Mungesa e kontrolleve hyrëse në aplikacion për SITP ka krijuar rreziqe për saktësinë e të dhënave dhe integritetin e shërbimeve. Auditimi ka evidentuar mangësi në ndërlidhjen e sistemit me regjistrin e të dhënave të Agjencisë Kadastrale të Kosovës, si dhe ndërlidhjes me Sistemin e Anketimit. Kjo ka rezultuar me të dhëna të pasakta për tatimpaguesit dhe pronat. Mangësitë në kontrollet e përpunimit kanë shkaktuar mos shpërndarjen e pagesës në mënyrë proporcionale dhe në borxhe të pasakta për qytetarët duke i dëmtuar me ndëshkime dhe interes.

Po ashtu SITP ka mangësi në regjistrimin e pagesave duke mos regjistruar datën e saktë të tyre, nuk e pasqyron gjendjen reale të faturës si dhe nuk ka pasqyrim dhe zbatim të saktë të kërkesave ligjore dhe rregullative. Për rrjedhojë qytetarët mund të penalizohen me interes pavarësisht pagesës së realizuar në kohë. Gjithashtu proceset manuale rrisin rrezikun e gabimeve dhe humbjes së të dhënave jashtë sistemit. Mangësitë në kontrollet e sigurisë bëjnë më të cenueshëm SITP ndaj keqpërdorimeve të sigurisë.  

Lidhur me këtë auditim, Auditorja e Përgjithshme, Vlora Spanca, theksoi se Sistemi i Informacionit të Tatimit në Pronë ka transformuar administrimin e tatimit në pronë duke e bërë më të menaxhueshëm, por nuk garanton plotësisht të dhëna cilësore, të sakta, të plota dhe të besueshme.

Për të përmirësuar çështjet e identifikuara në këtë sistem, Zyra Kombëtare e Auditimit ka dhënë 14 rekomandime.

Raportin e plotë të auditimit të Teknologjisë së Informacionit “Sistemi i Informacionit të Tatimit në Pronë (SITP)”, e gjeni këtu.

Zyra Kombëtare e Auditimit (ZKA) ka realizuar auditimin e Teknologjisë së Informacionit “Platforma e shërbimeve online e-Kosova” për periudhën 2024 – qershor 2025, i cili ka vlerësuar nëse kjo platformë iu mundëson qytetarëve shërbime elektronike efikase, të sakta, të sigurta dhe të besueshme. Fokusi i auditimit ka qenë në shërbimet “Shtesat për fëmijë”, “Tatimi në pronë”, “Subvencionimi i librave” dhe moduli “Pagesat elektronike”.  

Ndonëse “Platforma e-Kosova” ka kontribuar në digjitalizimin, transparencën dhe efikasitetin e proceseve administrative, ajo vazhdon të përballet me mangësi në kontrollet e aplikacionit, të cilat ndikojnë në integritetin, saktësinë dhe sigurinë e të dhënave.  

Rezultatet e auditimit tregojnë se për shërbimet “Subvencionimi i librave” dhe “Shtesat për fëmijë”, mungesa e ndërlidhjes së duhur të sistemeve ka lejuar përfitimin e subvencionit të librave pa plotësuar kushtet e nevojshme dhe për shtesat e fëmijëve aplikime të dyfishta. Mungesa e përditësimit të gjendjes së pagesës në kohë reale dhe kontrollet e dobëta në modulin e pagesave kanë lejuar pagesa të njëjta të ekzekutohen disa herë, duke shkaktuar dëme financiare për qytetarët.

Agjencia e Shoqërisë së Informacionit e cila menaxhon platformën e-Kosova nuk ka vendosur standarde të mjaftueshme për menaxhimin e kontratave, duke lënë paqartësi mbi përgjegjësitë për sigurinë e informacionit, nuk garanton mjedis të sigurt informacioni për shkak të politikave të vjetruara dhe mungesës së tyre, si dhe nuk është e përgatitur për të rikthyer shërbimet në raste emergjente ose fatkeqësie duke rrezikuar vazhdimësinë e operacioneve shtetërore elektronike.

Lidhur me këtë auditim, Auditorja e Përgjithshme, Vlora Spanca, tha se Platforma e-Kosova ka shënuar përparim të dukshëm në digjitalizimin e shërbimeve publike, megjithatë ka ende sfida në integrimin e sistemeve, sigurinë e informacionit, kontrollin dhe besueshmërinë e të dhënave, si dhe në vazhdimësinë e biznesit.

Me qëllim të përmirësimit të kontrolleve, integrimit, digjitalizimit dhe sigurisë së platformës e-Kosova, Zyra Kombëtare e Auditimit ka dhënë 15 rekomandime. 

Raportin e plotë të auditimit të Teknologjisë së Informacionit “Platforma e shërbimeve online e-Kosova”, e gjeni këtu.

Zyra Kombëtare e Auditimit (ZKA) ka realizuar auditimin e performancës “Mbrojtja, zhvillimi dhe ripërtëritja e hapësirave pyjore”, për periudhën 2020–2024 i cili ka vlerësuar efikasitetin e institucioneve përgjegjëse në mbrojtjen, zhvillimin dhe ripërtëritjen e hapësirave pyjore.

Rezultatet e këtij auditimi tregojnë se institucionet përgjegjëse nuk kanë arritur të menaxhojnë në mënyrë të duhur hapësirat pyjore në Kosovë. Ministria e Bujqësisë, Pylltarisë dhe Zhvillimit Rural(MBPZhR) nuk ka arritur të përgatisë dhe të miratojë udhëzimet administrative të nevojshme për menaxhimin e pyjeve, për rrjedhojë Agjencia Pyjore e Kosovës operon pa kornizë të plotë rregullative.  

Po ashtu Agjencia Pyjore e Kosovës nuk ka bërë inventarizim të plotë dhe të përditësuar të pyjeve si dhe nuk ka organizuar në mënyrë efektive mbrojtjen e pyjeve publike, prandaj nuk ka të dhëna të sakta për gjendjen aktuale të resurseve pyjore.

Auditimi ka evidentuar se rreth 44% e objektivave të planifikuara nuk janë realizuar, ngecjet janë më të theksuara në kultivimin, trajtimin dhe ngritjen e pyjeve të reja. Rreth një milion fidanë në Institutin Pyjor të Kosovës rrezikojnë të dështojnë për shkak të mungesës së kontraktimeve për pyllëzim nga Agjencia.

Në parqet “Bjeshkët e Nemuna” dhe “Sharri” janë regjistruar prerje të shumta ilegale dhe ndërtime pa leje. Në Parkun Kombëtar “Sharri”, mungesa e rojeve pyjore ka bërë që deri në 70% e territorit të mbetet pa mbrojtje. Ndërsa, në Parkun Kombëtarë “Bjeshkët e Nemuna” problem i madh janë edhe ndërtimet ilegale dhe sipas regjistrimeve të vitit 2024 janë mbi 6,083 ndërtime ilegale. Po ashtu nuk ka të dhëna të sakta sa i përket numrit të uzurpimit të pronave publike.

Agjencia Pyjore për më shumë se 20 vjet nuk ka trajtuar çështjen e pronave që i ka në menaxhim. Ka rreth 500 prona me emërtime të ndryshme të cilat ende nuk i ka unifikuar dhe verifikuar. Gjithashtu auditimi ka evidentuar se në procesin e qiradhënies së pronave publike ka vonesa deri në 38 muaj si dhe janë bërë shumë shkelje nga qiramarrësit.

Lidhur me këtë auditim, Auditorja e Përgjithshme, Vlora Spanca,  deklaroi se mungesa e kornizës së qartë ligjore, kontrollit efektiv, dhe koordinimit institucional, kanë rezultuar me prerje ilegale, uzurpime dhe dëmtime të zonave të mbrojtura, duke shkaktuar humbje të mëdha ekonomike dhe mjedisore. Prandaj është i nevojshëm një koordinim ndërinstitucional me qëllim të ruajtjes, zhvillimit dhe ripërtëritjes së hapësirave pyjore të vendit.

Për përmirësimin e gjendjes se pyjeve në Republikën e Kosovës, Zyra Kombëtare e Auditimit ka dhënë 11 rekomandime.

Raportin e plotë të auditimit të performancës “Mbrojtja, zhvillimi dhe ripërtëritja e hapësirave pyjore”, e gjeni këtu.  

Nga 15 deri më 19 shtator 2025, në Vlorë u mbajt punëtoria për Siguri Kibernetike II,  organizuar nga Kontrolli i Lartë i Shtetit të Shqipërisë në bashkëpunim me Zyrën Kombëtare të Auditimit të Norvegjisë, ku morën pjesë auditorë dhe ekspertë të teknologjisë së informacionit nga Institucionet Supreme të Auditimit të Kosovës, Shqipërisë, Maqedonisë së Veriut, Sllovenisë, Turqisë dhe Suedisë.

Zyra Kombëtare e Auditimit u përfaqësua nga auditorja seniore e teknologjisë së informacionit, Poliksena Berisha dhe administratori i sistemeve, Selami Ibishi. 

Punëtoria pati për qëllim forcimin e institucioneve, sigurimin e shërbimeve digjitale dhe rritjen e besimit të qytetarëve tek ato. Fokusi kryesor i aktivitetit ishte testimi i penetrimit të sigurisë kibernetike. Përmes laboratorëve praktikë, pjesëmarrësit u angazhuan në simulime të sulmeve ndaj mjediseve të Active Directory dhe më pas punuan mbi teknikat e zbutjes së sulmeve, duke ndërtuar ura në mes sulmit dhe mbrojtjes.

Në punëtori u theksua se testimi i penetrimit të sigurisë kibernetike është ndër mënyrat më efektive për të verifikuar funksionalitetin e masave të sigurisë dhe për të kuptuar rreziqet reale me të cilat përballen institucionet publike.

Zyra Kombëtare e Auditimit (ZKA) në bashkëpunim me Misionin e OSBE-së në Kosovë të premten në Prizren mbajti punëtorinë rajonale me gazetarë “Rritja e bashkëpunimit me mediat lokale për transparencë dhe llogaridhënie publike”.  Punëtoria pati për qëllim rritjen e bashkëpunimit me mediat lokale dhe informimin e gazetarëve mbi proceset e auditimit.

Në hapje të punëtorisë, Zëvendës Auditori i Përgjithshëm, Bezad Halilaj, tha se Zyra Kombëtare e Auditimit ka prioritet avancimin e transparencës, llogaridhënies dhe rritjen e bashkëpunimit me media. Po ashtu z. Halilaj foli edhe për mandatin kushtetues dhe ligjor të Auditorit të Përgjithshëm dhe të ZKA-së, për rolin  si dhe për llojet e auditimeve dhe procesin e auditimit.

Po ashtu zyrtarë të lartë të ZKA-së prezantuan rezultatet e auditimit për komunën e Prizrenit si dhe praktikat e komunikimit dhe bashkëpunimit të ZKA-së me mediat. Ndërsa në emër të misionit të OSBE-së, Fatmir Zylfijaj, theksoi rëndësinë e këtij bashkëpunimi dhe ndikimin në rritjen e përgjegjësisë në menaxhimin e parasë publike.

Gazetarët falënderuan ZKA-në dhe OSBE-në për mundësinë e këtij bashkëbisedimi duke thënë se ky komunikim duhet të vazhdoj edhe në të ardhmen. Gjithashtu gazetarët folën për sfidat me të cilat ballafaqohen gjatë ushtrimit të profesionit të tyre e që kryesisht kanë të bëjnë me mungesë të mjeteve financiare dhe mungesë të stafit.