Lajmet

Nga 2 deri më 5 dhjetor 2025, në Stamboll u mbajt punëtoria e parë e organizuar në kuadër të Projekt Grupit për Aktivitetet e Zhvillimit të EUROSAI-t, ku morën pjesë përfaqësues të Institucioneve Supreme të Auditimit nga Kosova, Shqipëria, Maqedonia e Veriut, Mali i Zi, Bosnja dhe Hercegovina, Serbia, Turqia, Gjeorgjia, Ukraina, Moldavia dhe Kazakistani.  

Drejtoresha e Departamentit për Auditim Financiar, Mjellma Dibra Morina,  Drejtoresha e Departamentit për Auditim të Performancës, Ariana Gjonbalaj Shala dhe Zyrtarja për Komunikim me Publikun, Shqipe Hetemi, përfaqësuan Zyrën Kombëtare të Auditimit të Kosovës në këtë aktivitet.   

Punëtoria u fokusua të ndikimi i auditimit duke përfshirë procesin që nga planifikimi, mbledhja e provave, vlerësimi i rrezikut dhe menaxhimi i cilësisë deri te raportimi dhe komunikimi i rezultateve si dhe angazhimi me palët e interesit për të rritur ndikimin. Gjatë sesioneve të shumta interaktive, pjesëmarrësit shkëmbyen përvojat dhe praktikat e mira si dhe sfidat me të cilat ballafaqohen.  

Përfaqësueset e ZKA-së kontribuan në diskutime lidhur me rëndësinë e auditimit të orientuar drejt rezultateve, si dhe në avancimin e metodologjive për forcimin e transparencës, komunikimit dhe sigurisë së cilësisë në proceset e auditimit.  

Projekt Grupi për Aktivitetet e Zhvillimit të EUROSAI-t udhëhiqet nga Zyra Kombëtare e Auditimit të Suedisë dhe ka për qëllim të mbështet Institucionet Supreme të Auditimit nga rajoni për të adresuar nevojat për zhvillim. Fushat për zhvillim do të caktohen në bashkëpunim me ISA-t pjesëmarrëse.  

Zyra Kombëtare e Auditimit (ZKA) publikoi raportin “Përcjellja e rekomandimeve për raportin e auditimit ‘Mekanizmat e sigurimit të cilësisë së të dhënave të raportuara për Sistemin e Menaxhimit të Performancës Komunale dhe Grantin e Performancës Komunale për vitin 2021’”. Përcjellja ka vlerësuar nëse veprimet e ndërmarra nga komunat Gjakovë, Klinë, Viti dhe Ministria e Administrimit të Pushtetit Lokal (MAPL) janë në përputhje me qëllimin dhe përmbajtjen e rekomandimeve të dhëna në raportin e auditimit të vitit 2024. 

Rezultatet e përcjelljes së zbatimit të rekomandimeve tregojnë se vetëm një rekomandim është zbatuar plotësisht, tri janë në fazën përfundimtare të zbatimit, dy kanë filluar të zbatohen ndërsa dy nuk janë adresuar fare. Konkluzioni i përcjelljes është se MAPL dhe komunat Gjakovë, Klinë dhe Viti kanë punuar për të adresuar rekomandimet, por zbatimi i plotë i tyre kërkon ende angazhim. 

Lidhur me këtë përcjellje të zbatimit të rekomandimeve, Auditorja e Përgjithshme, Vlora Spanca, tha se megjithëse MAPL dhe komunat kanë ende për të bërë në drejtim të zbatimit të rekomandimeve, auditimi i performancës kishte ndikim të dukshëm në përmirësimin e funksionimit të komunave dhe të MAPL-së, si dhe rekomandimet kanë nxitur ndërgjegjësim më të madh për transparencën, llogaridhënien dhe përdorimin të metodologjisë së njësuar në raportimin e performancës.

Raportin e plotë të përcjelljes së zbatimit të rekomandimeve të dhëna në raportin e auditimit “Mekanizmat e sigurimit të cilësisë së të dhënave të raportuara për Sistemin e Menaxhimit të Performancës Komunale dhe Grantin e Performancës Komunale për vitin 2021” e gjeni këtu. 

Zyra Kombëtare e Auditimit (ZKA) publikoi raportin e auditimit të pajtueshmërisë “Ndërtimi i objektit për Klinikat Nefrologji dhe Hemato-Onkologji” në Shërbimin Spitalor dhe Klinik Universitar të Kosovës për periudhën 2018 - qershor 2025.  

Auditimi ka vlerësuar pajtueshmërinë e procesit të ndërtimit të objektit me rregullat dhe kërkesat ligjore që nga procesi i buxhetimit dhe planifikimit, procedurat e tenderimit deri te menaxhimi i fondeve dhe implementimi i kontratës.

Procesi i auditimit ka identifikuar mangësi në procesin e buxhetimit, tenderimit dhe menaxhimit të fondeve. Auditimi vë në pah mospërputhje në planifikimin buxhetor për ndërtimin e objektit për klinikat Hemato-Onkologji dhe Nefrologji, qasje të dyfishtë në hartimin e specifikave teknike, mospërputhje në mes të dokumentacionit teknik të projektit dhe paramasës, si dhe mangësi në procesin e vlerësimit të ofertës gjatë procesit të tenderimit dhe në procesin e menaxhimit të shpenzimeve.

Lidhur me këtë auditim, Auditorja e Përgjithshme, Vlora Spanca, theksoi se  mangësitë e evidentuara nga auditimi reflektojnë nevojën për qasje më sistematike dhe respektim të plotë të kornizës ligjore në zbatimin e projekteve. Kjo do të mundësojë rritjen e përgjegjshmërisë, transparencës dhe integritetit në menaxhimin e fondeve publike.

Zyra Kombëtare e Auditimit (ZKA) ka dhënë pesë rekomandime për të përmirësuar dhe siguruar mbarëvajtjen e proceseve nga faza e planifikimit e deri te zbatimi i tyre. 

Raportin e plotë të auditimit të pajtueshmerisë  “Ndërtimi i Objektit për Klinikat Nefrologji dhe Hemato-Onkologji” në Shërbimin Spitalor Klinik Universitar të Kosovës e gjeni këtu.

Auditorja e Përgjithshme tha se gjetjet e auditimit tregojnë se integriteti sfidohet në disa pika kritike të ciklit të prokurimit publik, dhe sfida më e madhe mbetet menaxhimi i kontratave. “Gjetjet e Zyrës Kombëtare të Auditimit tregojnë se integriteti në prokurim kërkon forcim të kontrollit të brendshëm, përdorim të plotë të platformës së e-prokurimit dhe zbatim më të madh të rekomandimeve të auditimit. Vetëm përmes një angazhimi të tillë të qëndrueshëm institucional mund të arrihen përmirësime reale në mbrojtjen e fondeve publike”, deklaroi znj. Spanca.

Auditorja e Përgjithshme njoftoi se, sipas rezultateve të auditimit, ka përmirësime në raportimin financiar dhe regjistrimin e  pasurisë. Megjithatë, sa i përket integritetit të prokurimit publik, përfshirë procedurat e negocimit, menaxhimin e kontratave dhe sinjalet e konfliktit të interesit, përparimet mbeten të kufizuara. “Zbatimi i rekomandimeve të ZKA-së mbetet një nga sfidat më të mëdha sistemike në sektorin publik, dhe ky tregues është kyç për të vlerësuar se sa efektivisht reagojnë institucionet ndaj gjetjeve të auditimit dhe sa seriozisht angazhohen në përmirësimin e qeverisjes së brendshme. Fatkeqësisht, të dhënat e dy viteve të fundit tregojnë një trend në ulje”, tha ajo.

Znj. Spanca, bëri thirrje për një angazhim më të madh dhe efektiv në parandalimin dhe luftimin e korrupsionin në prokurimin publik, duke u bazuar edhe në praktikat më të mira  ndërkombëtare. “Së bashku me institucionet tjera përgjegjëse për luftimin e korrupsionit duhet të veprojmë më shpejt, me fokus më të qartë dhe proaktivitet maksimal. Vetëm në këtë mënyrë mund të rrisim ndjeshëm transparencën, llogaridhënien dhe besueshmërinë e institucioneve tona”, theksoi ajo.

Myrvete Gashi Morina, Ndihmës Auditore e Përgjithshme, dhe Alba Keqa Bejtullahu, Auditore e Performancës dhe pjesëmarrëse në programin WeLead, pritën në takim përfaqësuesit e Qendrës për Ekselencë në Financa (CEF), Robert Bauchmueller, Zyrtar Kryesor për Strategji në CEF dhe Nina Vujosevic, Konsulente për Menaxhimin e Financave Publike (PFM) dhe Reformat Ekonomike.

Ndihmës Auditorja e Përgjithshme i njoftoi zyrtarët e CEF-it me rezultatet e punës audituese dhe prioritet e ZKA-së për ruajtjen dhe zhvillimin e mëtejshëm profesional të stafit. Ajo po ashtu përcolli edhe vëmendjen e Auditores së Përgjithshme, znj. Vlora Spanca, ndaj rritjes së kapaciteteve profesionale në fusha me rëndësi të veçantë, si auditimi mjedisor dhe përdorimi i inteligjencës artificiale në auditim.

Palët vlerësuan lartë bashkëpunimin ekzistues, duke theksuar se vetëm gjatë vitit të fundit rreth 30 zyrtarë të ZKA-së kanë marrë pjesë në aktivitete të organizuara nga CEF.  

Përfaqësuesit e CEF-it njoftuan mbi orientimin e ri strategjik drejt zhvillimit të më shumë aktiviteteve në vendet përfituese, përfshirë edhe Kosovën, me fokus në aktivitete vjetore të përshtatura sipas nevojave specifike institucionale. Në takim u theksua edhe përfitimi dhe përvoja e auditores së ZKA-së, znj. Keqa Bejtullahu në programin WeLead, si dhe roli i këtij programi në zhvillimin e kapitalit njerëzor dhe motivimin e nëpunësve civilë.

Në përmbyllje, palët shprehën gatishmërinë për të thelluar bashkëpunimin përmes aktiviteteve me interes të përbashkët dhe shkëmbimit të ekspertizës profesionale.

Me rastin e 28 Nëntorit, Ditës së Flamurit dhe 113-vjetorit të Pavarësisë së Shqipërisë, Auditorja e Përgjithshme e Republikës së Kosovës,  Vlora Spanca, ka uruar Kryetarin e Kontrollit të Lartë të Shtetit të Shqipërisë, Arben Shehu.

Znj. Spanca ka shprehur urimet më të përzemërta në emër të saj dhe të Zyrës Kombëtare të Auditimit, duke theksuar se fryma e bashkëpunimit ndërinstitucional dhe miqësor do të thellohet edhe më tej, në funksion të interesit publik dhe vlerave që na bashkojnë si një komb i vetëm. “Z. Shehu nën udhëheqjen tuaj, Kontrolli i Lartë i Shtetit vazhdon të jetë një partner i çmuar, i cili me vizion dhe integritet kontribuon në avancimin e praktikave më të mira të auditimit publik”, thuhet në urimin e znj. Spanca.

Auditorja e Përgjithshme, po ashtu ka uruar mbarë kombin shqiptar për 28 Nëntorin, duke thënë se kjo është dita ku historia jonë bëhet një.

“Gëzuar 28 Nëntorin –  Ditën e Flamurit Kombëtar dhe Pavarësisë së Shqipërisë! Ditëlindjen e Komandantit Legjendar Adem Jashari! Daljen në skenë të UÇK-së! Gëzuar Ditën e Forcës! 28 Nëntori është një ditë ku historia jonë bëhet një: Nga Kruja te Vlora, nga Prekazi te Tirana e Prishtina, nga gjaku i të parëve tek amaneti i brezave. Është dita që na kujton se shqiptarët, kudo që janë, ndajnë të njëjtin flamur, të njëjtën krenari dhe të njëjtën përgjegjësi për të ruajtur,  ndërtuar dhe bashkuar atdheun”, ka shkruar znj. Spanca në profilin e saj në “Facebook”.  

Drejtori i Departamentit për Planifikim Strategjik, Raportim dhe Analiza, Muhamet Balaj ka marrë pjesë në takimin e 7-të të Nënkomitetit BE–Kosovë për Ekonomi, Çështje Financiare dhe Statistika, mbajtur më 25 nëntor 2025 në Bruksel. Takimi i 7-të vjetor pati në fokus diskutimin e zhvillimeve makroekonomike, buxhetore dhe statistike, si dhe për monitorimin e progresit të reformave në fushën e kontrollit financiar dhe auditimit të jashtëm.  

Z. Balaj prezantoi gjetjet kryesore nga Raporti Vjetor i  Auditimit për vitin 2024, duke theksuar nivelin e zbatimit të rekomandimeve nga organizatat buxhetore, si dhe rolin e Zyrës Kombëtare të Auditimit në avancimin e transparencës dhe llogaridhënies publike në Kosovë. Në takim u diskutua edhe për procesin e reformave të parapara me ligjin e ri për Auditorin e Përgjithshëm dhe aktet nënligjore. Nga ana tjetër përfaqësuesit e BE-së ngritën shqetësimin e tyre për vonesat në procedimin e ndryshimit të Ligjit për Auditorin e Përgjithshëm dhe Zyrën Kombëtare të Auditimit dhe nivelin e rekomandimeve të pazbatuara.

Auditorja e Përgjithshme, Vlora Spanca dhe Ndihmës Auditori i Përgjithshëm, Zukë Zuka, të enjten morën pjesë në konferencën “Fuqizimi i sistemit të prokurimit publik - raportet vjetore dhe bashkëpunimi ndërinstitucional”, organizuar nga Komisionit Rregullativ i Prokurimit Publik në bashkëpunim me SIGMA/OECD, me fokus në rritjen e llogaridhënies, integritetit, transparencës dhe efikasitetit.

Në fjalën hyrëse znj. Spanca tha se fuqizimi i sistemit të prokurimit publik kërkon bashkëpunim të strukturuar, raportim më cilësor dhe respektim të standardeve të integritetit. “Rritja e transparencës, llogaridhënies dhe integritet nuk është thjeshtë një detyrë por obligim i të gjithë neve ndaj qytetarit. Gjetjet e auditimit duhet të shërbejnë si udhërrëfyes për përmirësime të qëndrueshme në çdo hallkë të procesit të prokurimit publik,” tha znj. Spanca.

Ndërsa Ndihmës Auditori i Përgjithshëm, Zukë Zuka, prezantoi gjetjet kryesore të raporteve të auditimit në fushën e prokurimit publik, ai veçoi sfidat në menaxhimin e kontratave publike dhe rekomandimet që ka dhënë Zyra Kombëtare e Auditimit, zbatimi i së cilave kontribuon në rritjen e transparencës dhe llogaridhënies në prokurimin publik. Ai tha se gjetjet e auditimit të ZKA-së tregojnë qartë nevojën për avancimin e mekanizmave të kontrollit të brendshëm dhe forcimin e integritetit në të gjitha fazat e prokurimit publik. “Do të intensifikojmë punën tonë dhe do të koordinohemi me organet tjera të zbatimit të ligjit për të siguruar llogaridhënie dhe menaxhim të drejtë të fondeve publike. ZKA mbetet e përkushtuar për përmirësimin e qeverisjes publike”, tha z. Zuka.

Drejtuesit e lartë të institucioneve pjesëmarrëse prezantuan gjetjet kryesore të raporteve vjetore për vitin 2024. Gjatë konferencës u ndanë edhe përvojat e Rumanisë në funksionimin e komiteteve ndërministrore të prokurimit publik. Ekspertët e SIGMA-s trajtuan rëndësinë e përmirësimit të cilësisë dhe transparencës në përgatitjen e raporteve vjetore, ndërsa pjesëmarrësit ritheksuan përkushtimin për forcimin e bashkëpunimit ndërinstitucional dhe rritjen e integritetit në sistemin e prokurimit publik.

Zyra Kombëtare e Auditimit (ZKA) publikoi raportin e auditimit të  pajtueshmërisë “Ndërtimi i shtëpive për pjesëtarët e komuniteteve jo shumicë në komuna” në Ministrinë e Administrimit të Pushteti Lokal (MAPL) për vitin 2024.  Auditimi ka vlerësuar pajtueshmërinë e këtij projekti me kornizën ligjore, rregulloret dhe dispozitat e thirrjes publike në të gjitha fazat e zbatimit të projektit: nga planifikimi dhe shpallja e thirrjes, deri te përzgjedhja e përfituesve, implementimi i subvencionit dhe ekzekutimi i fondeve.

Rezultatet e auditimit tregojnë se aktiviteti për ndërtimin e shtëpive ishte zhvilluar jashtë planit vjetor të punës dhe objektivave strategjike të MAPL-së, si dhe në mungesë të rregullores për menaxhim të subvencioneve. Edhe procesi i përzgjedhjes së përfituesve nuk ishte në pajtueshmëri me kriteret e thirrjes publike. Gjithashtu, procesi i auditimit ka evidentuar përfitues të përzgjedhur pa dokumentacion të plotë, trajtim të pabarabartë të aplikantëve me kushte të njëjta, vendime të pabazuara nga komisioni i ankesave si dhe mungesë e dokumentimit të vizitave në terren nga komisioni vlerësues.

Sa i përket procesit të implementimit të subvencionit, auditimi vë në pah se në dy raste ndërtimi i shtëpive nuk është realizuar sipas afateve dhe kushteve kontraktuale. Ndonëse këto raste u evidentuan dhe raportuan nga komisioni monitorues, MAPL nuk ka ndërmarrë masa ndëshkuese të parapara me kontratë, duke krijuar rrezik për shfrytëzimin joefektiv të fondeve publike dhe mosrealizimin e qëllimit të mbështetjes.

Lidhur me këtë auditim, Auditorja e Përgjithshme, Vlora Spanca, tha se ndonëse aktiviteti për ndërtimi i shtëpive për pjesëtarët e komuniteteve jo shumicë në komuna ka arritur të sigurojë mbështetje për një numër të caktuar përfituesish, procesi nuk ka qenë plotësisht i harmonizuar me kërkesat për ligjshmëri, transparencë dhe barazi.

Zyra Kombëtare e Auditimit (ZKA) ka dhënë katër rekomandime për të përmirësuar dhe siguruar mbarëvajtjen e proceseve nga faza e planifikimit e deri te zbatimi i subvencionit.

Raportin e plotë të auditimit të pajtueshmerisë  “Ndërtimi i shtëpive për pjesëtarët e komuniteteve jo shumicë në komuna” në Ministrinë e Administrimit të Pushtetit Lokal për vitin 2024 e gjeni këtu.

Zyra Kombëtare e Auditimit (ZKA) të mërkuren publikoi raportin e auditimit të  pajtueshmërisë “Menaxhimi i projekteve kapitale në fushën e trashëgimisë kulturore në Ministrinë e Kulturës, Rinisë dhe Sportit (MKRS)” për periudhën 2022 – 2024. Auditimi ka vlerësuar nëse menaxhimi i projekteve kapitale në fushën e trashëgimisë kulturore është zhvilluar në pajtim me ligjin dhe rregulloret, si dhe nëse fondet publike janë përdorur për qëllimet e planifikuara.

Ndonëse MKRS për periudhën 2022–2024 kishte planifikuar buxhet në vlerë prej 27,153,500 euro, prej tyre vetëm 10,891,418 i kishte realizuar duke treguar nivel të ulët të shpenzimit të buxhetit për këto tri vite.

Auditimi konstaton se Ministria e Kulturës, Rinisë dhe Sportit (MKRS) nuk ka arritur të menaxhojë në mënyrë të duhur realizimin e projekteve kapitale në fushën e trashëgimisë kulturore si dhe nuk ishte në pajtueshmëri të plotë me kërkesat ligjore dhe kontraktuale për menaxhimin e këtyre projekteve.

Procesi i auditimit ka evidentuar se MKRS ka angazhuar staf të pa licencuar në mbikëqyrjen e projekteve dhe menaxhimin e kontratave nuk e ka bërë përmes Sistemit Elektronik të Prokurimit (E-prokurimi). Po ashtu auditimi vë në pah mangësi në hartimin e projekteve ekzekutive,  në mbajtjen e ditarëve të punës dhe librave ndërtimor, vonesa në realizimin e kontratave si dhe mungesë të garancioneve për punimet pas pranimit teknik.

Lidhur me këtë auditim, Auditorja e Përgjithshme, Vlora Spanca, theksoi se  mangësitë e evidentuara nga auditimi ndikojnë në efektivitetin e projekteve, rrezikojnë cilësinë dhe sigurinë e punimeve si dhe tregojnë nevojën për forcimin e kontrolleve të brendshme, respektimin e procedurave ligjore dhe rritjen e mbikëqyrjes profesionale.

Zyra Kombëtare e Auditimit (ZKA) ka dhënë gjashtë rekomandime për përmirësimin e procesit të menaxhimit të projekteve kapitale në fushën e trashëgimisë kulturore, me qëllim rritjen e transparencës, llogaridhënies dhe efikasitetit në përdorimin e fondeve publike.

Raportin e plotë të auditimit të pajtueshmerisë “Menaxhimi i projekteve kapitale në fushën e trashëgimisë kulturore në Ministrinë e Kulturës, Rinisë dhe Sportit (MKRS)” e gjeni këtu.