Lajmet

Auditorja e Përgjithshme, Vlora Spanca, ka nënshkruar marrëveshje bashkëpunimi me drejtorët e pesë institucioneve arsimore për dorëzimin e inventarit dhe pajisjeve teknologjike të liruara nga përdorimi në Zyrën Kombëtare të Auditimit (ZKA) me qëllim të mbështetjes së shkollave dhe procesit mësimor. 

Gjatë nënshkrimit të marrëveshjeve, Auditorja e Përgjithshme, Vlora Spanca, theksoi se përmes këtij aktiviteti ZKA synon t’i ndihmojë institucionet arsimore si dhe pasuritë publike të përdorën sa më mirë. 

Pajisjet e dorëzuara përfshijnë pajisje teknologjike, inventar si dhe materiale të tjera për nevojat e institucioneve arsimore, në përputhje me kërkesat e tyre. 

Shkollat përfituese nga kjo iniciativë janë SHML “Ahmet Gashi” në Prishtinë, SHFMU “Mehmet Gjevori” në Prishtinë, SHFMU “Naim Frashëri” në Prishtinë, SHFMU “28 Nëntori” në Bresanë të Dragashit, si dhe shkolla “Ilir Konushevci” në Llugë të Podujevës.  

Sipas marrëveshjeve, pronësia e pajisjeve kalon te shkollat përfituese pas procesit të pranim-dorëzimit dhe evidentimit përkatës, ndërsa institucionet përfituese marrin përgjegjësinë për mirëmbajtjen dhe përdorimin e tyre sipas destinimit të përcaktuar. 

“Zyra Kombëtare e Auditimit mbetet e përkushtuar që resurset publike të menaxhohen me përgjegjësi, integritet dhe efikasitet. Në këtë frymë, një pjesë e pasurisë jofinanciare po vihet në shërbim të shkollave, me bindjen se do të kontribuojë në përmirësimin e kushteve të punës dhe funksionimit të përditshëm të institucioneve tona arsimore”, tha Auditorja e Përgjithshme, Vlora Spanca. 

Auditorja e Përgjithshme, Vlora Spanca dhe auditoret Donjeta Dreshaj dhe Vjosë Zeqiraj morën pjesë në programin studimor me 20 dhe 21 maj 2026 në Hagë të organizuar nga Akademia Kombëtare për Financa dhe Ekonomi dhe Ministria e Financave e Holandës. 

Programi studimor pati për fokus monitorimin, vlerësimin, auditimin dhe sigurimin e zbatimit të Agjendës së Reformave dhe integritetit të fondeve të Bashkimit Evropian, duke mundësuar shkëmbimin e përvojave dhe praktikave më të mira ndërmjet institucioneve pjesëmarrëse. 

Gjatë programit dyditor pjesëmarrësit u njoftuan me sistemin e menaxhimit të fondeve të BE-së në Holandë, proceset dhe mekanizmat e kontrollit dhe auditimit, si dhe rolet dhe përgjegjësitë e institucioneve relevante në menaxhimin dhe mbikëqyrjen e këtyre fondeve. Më tej u trajtuan edhe temat që lidhen me Planin e Rimëkëmbjes dhe Qëndrueshmërisë së Holandës, fondet strukturore dhe fondet bujqësore, me theks të veçantë në proceset e menaxhimit, kontrollit, auditimit, monitorimit dhe raportimit.

Auditorja e Përgjithshme, Vlora Spanca deklaroi se ky shkëmbim i përvojave riafirmon rëndësinë e kornizave të fuqishme të kontrollit të brendshëm dhe të strukturave të përcaktuara, të llogaridhënies, si elemente thelbësore për mbrojtjen e parasë publike si dhe për forcimin e besimit në menaxhimin e programeve të financuara nga Bashkimi Evropian. Shtoi se aktiviteti do të shërbejë si udhërrëfyes në përpjekjet e mëtejshme për të forcuar cilësinë e auditimit, për të thelluar përafrimin me standardet evropiane si dhe për të fuqizuar rolin e auditimit të jashtëm në mbështetje të llogaridhënies dhe qeverisjes së mire financiare.

Auditorja e Përgjithshme, Vlora Spanca, e shoqëruar nga Zëvendës Auditori i Përgjithshëm Bezad Halilaj dhe Ndihmës Auditori i Përgjithshëm Zukë Zuka, mori pjesë në konferencën “25 vjet në Avancimin e Profesionit: Nga themelet drejt transformimit”, organizuar nga Shoqata e Kontabilistëve dhe Auditorëve të Certifikuar të Kosovës (ShKÇAK) me rastin e shënimit të 25-vjetorit të themelimit.  

Në adresimin e saj, ajo vlerësoi kontributin e ShKÇAK-ut në zhvillimin dhe avancimin e profesionit të kontabilitetit dhe auditimit në Kosovë, duke theksuar se ky jubile përfaqëson historinë e konsolidimit të një profesioni me rëndësi të veçantë për funksionimin demokratik dhe zhvillimin ekonomik të vendit. Shtoi se bashkëpunimi me ShKÇAK mbetet partneritet i rëndësishëm profesional dhe institucional, i cili kontribuon në avancimin e kapaciteteve profesionale dhe ngritjen e cilësisë së auditimit në sektorin publik.

Duke folur për sfidat dhe zhvillimet bashkëkohore në profesionin e auditimit dhe kontabilitetit, znj. Spanca theksoi rëndësinë e integritetit profesional në kohën e transformimit digjital. “Integriteti është themeli dhe kapitali më i madh i profesionit tonë, sepse pa të raportet humbin vlerën, auditimi humb kredibilitetin dhe institucionet humbin besimin e qytetarëve”, deklaroi ajo. 

Auditorja e Përgjithshme ritheksoi përkushtimin e Zyrës Kombëtare të Auditimit për promovimin e qeverisjes së mirë, transparencës dhe përdorimit të përgjegjshëm të parasë publike, në përputhje me standardet ndërkombëtare dhe zhvillimet bashkëkohore profesionale. 

Auditorja e Përgjithshme, Vlora Spanca, të martën priti në takim  Kryeshefin Ekzekutiv të Federatës Ndërkombëtare të Kontabilistëve (IFAC), Lee White, me të cilin biseduan për mundësitë e zgjerimit të bashkëpunimit në fushën e auditimit dhe profesionit të kontabilitetit. 

Në fokus të diskutimeve ishte shkëmbimi i përvojave profesionale dhe praktikat më të mira ndërkombëtare, me qëllim forcimin e kapaciteteve institucionale dhe avancimin e standardeve të auditimit publik. Gjithashtu u diskutua edhe për raportimin për qëndrueshmërinë dhe klimën. 

Po ashtu, u theksua rëndësia e bashkëpunimit me organizatat ndërkombëtare profesionale si IFAC në promovimin e transparencës, llogaridhënies dhe integritetit në sektorin publik. 

Pjesë e takimit nga ZKA-ja ishin Zëvendës Auditori i Përgjithshëm, Bezad Halilaj, Ndihmës Auditorja e Përgjithshme, Myrvete Gashi Morina, Drejtori i Përgjithshëm, Safet Berisha dhe Drejtori i Departamentit të Metodologjisë, Naser Arllati. Ndërsa z. White ishte i shoqëruar nga Ekspertja për Qeverisje, Strategji dhe Zhvillim si dhe Anëtare e Komitetit për Zhvillim të Organizatave Profesionale në IFAC, Ardiana Bunjaku, Kryetarja e Shoqatës së Kontabilistëve të Çertifikuar dhe Auditorëve të Kosovës (ShKÇAK) Fitore Neziri si dheDrejtoresha Ekzekutive e ShKÇAK, Teuta Ukshini Aliu.

Auditorja e Përgjithshme, Vlora Spanca, të hënën në konferencë për media prezantoi gjetjet kryesore të 24 auditimeve, prej tyre 22 auditime financiare dhe pajtueshmërisë, auditimin e performancës “Efikasiteti dhe efektiviteti i grumbullimit të mbeturinave të amvisërisë në kryeqytet” si dhe Raportin e auditimit për raportin financiar vjetor të Korporatës Energjetike të Kosovës për qëllime të veçanta mbi rentën minerare të paguar për licencat për vitin 2025.  

Znj. Spanca tregoi se për 14 auditimet financiare dhe pajtueshmërisë ZKA ka dhënë gjashtë opinione të pa modifikuara dhe tetë opinione të kualifikuara. Ndërsa te ndërmarrjet publike janë dhënë katër opinione të kundërta dhe katër të kualifikuara.

Auditorja e Përgjithshme theksoi se fakti që tetë nga 10 ndërmarrje të audituara kanë marrë opinion negativ tregon që këto ndërmarrje ende nuk kanë arritur të vendosin kontrolle adekuate për raportim financiar.  

“Nga auditimet e publikuara deri me tani rezulton se edhe kryerja e aktiviteteve, transaksioneve dhe operacioneve tjera ende nuk është në pajtueshmëri të plotë me kornizën ligjore dhe procedurat që ndërlidhen me menaxhimin dhe shpenzimin e parasë publike”, deklaroi znj. Spanca.  

Ndërsa sa i përket raportit të performancës “Efikasiteti dhe efektiviteti i grumbullimit të mbeturinave të amvisërisë në kryeqytet” Auditorja e Përgjithshme tha se rezultatet e këtij auditimi tregojnë se komuna nuk ka arritur të jetë efikase as efektive në grumbullimin e mbeturinave gjatë viteve të fundit. Një nga gjetjet më shqetësuese të raportit është dështimi i pothuajse të gjitha hallkave të mbikëqyrjes institucionale. Ky proces kishte dështuar të realizohej pothuajse në të gjitha nivelet nga të gjitha palët. 

Znj. Spanca deklaroi se institucionet publike rekomandimet e ZKA-së duhet t’i pranojnë si një kontribut serioz për përmirësimin e proceseve, aktiviteteve dhe operacioneve të tyre. Kjo do të ndikojë në përmirësimin e përgjithshëm të menaxhimit më të mirë të parasë publike dhe cilësisë së shërbimeve të ofruara.  

Po ashtu në këtë konferencë Auditorja e Përgjithshme prezantoi rezultatet kryesore të Raportit Vjetor të Performancës së ZKA-së për vitin 2025 si dhe foli për bashkëpunimin me Prokurorinë e Shtetit përkatësisht rastet e dërguara nga gjetjet e auditimit, ku vetëm për vitin 2025 janë referuar 80 sosh.

Fjala e plotë e Auditores së Përgjithshme Vlora Spanca në konferencën për media 

 Të nderuar përfaqësues të mediave,

Ju ftojmë të merrni pjesë në konferencën për media të Auditores së Përgjithshme, Vlora Spanca, ku do të prezantohet realizimi i Planit Vjetor të Auditimit 2025/2026 deri më tani si dhe gjetjet kryesore të 24 raporteve të auditimeve financiare dhe pajtueshmërisë, dhe auditimeve të performancës.

Në theks të veçantë do të jetë auditimi i performancës për “Menaxhimin e shërbimit të grumbullimit të mbeturinave nga Komuna e Prishtinës dhe KRM Pastrimit”, si dhe rezultate të tjera nga auditimet e Ndërmarrjeve Publike, Ministrive, Komunave dhe Institucioneve të tjera.

Po ashtu në konferencë do të prezantohen edhe rezultatet kryesore të Raportit Vjetor të Performancës së Zyrës Kombëtare të Auditimit për vitin 2025.

Konferenca do të mbahet:

Të hënën, 18 maj 2026

Ora: 11:00

Vendi: Zyra Kombëtare e Auditimit (ZKA)

Ju mirëpresim!

Zëvendës Auditori i Përgjithshëm, Bezad Halilaj dhe Ndihmës Auditorja e  Përgjithshme, Myrvete Gashi Morina, të enjten pritën në takim Udhëheqësen e Ekipit për Lidership dhe Mësim në Qendrën për Ekselencë në Financa (CEF), Ajda Turk dhe Zyrtarin Kryesor në CEF Robert Bauchmüller. 

Palët vlerësuan bashkëpunimin e deritanishëm duke theksuar rëndësinë e programeve të përbashkëta për zhvillimin e kapaciteteve, shkëmbimin e praktikave të mira dhe mbështetjen e reformave institucionale. 

Diskutimi u fokusua te “Becoming a Learning Organization” (Shndërrimi në një organizatë e orientuar drejt të nxënit) koncept ky që përqendrohet në zhvillimin institucional dhe fuqizimin e kapaciteteve profesionale përmes kulturës së të mësuarit të vazhdueshëm. Programi i CEF-it përfshin gjashtë blloqe kryesore si: qeverisjen, resurset, partneritetet, ndarjen e njohurive, komunikimin, si dhe monitorimin dhe vlerësimin. 

Përfaqësuesit e ZKA-së vlerësuan se investimi në ngritjen e kapaciteteve profesionale mbetet një nga prioritetet kryesore i cili i shërben rritjes së cilësisë së auditimit dhe forcimit të rolit të ZKA-së. 

Palët shprehen gatishmërinë për thellimin e mëtejmë të bashkëpunimit përmes aktiviteteve të përbashkëta që kontribuojnë në zhvillimin e ZKA-së.

Drejtoresha për Komunikim dhe Bashkëpunim Ndërkombëtar nga Zyra Kombëtare e Auditimit (ZKA), Qendresa Mulaj, mori pjesë në takimet e Zyrtarëve Ndërlidhës të Rrjetit të Institucioneve Supreme të Auditimit (ISA) nga vendet kandidate dhe kandidate potenciale për anëtarësim në BE, dhe Komitetit të Kontaktit të mbajtur më 28 dhe 29 prill 2026 në Larnaca të Qipros.

Takimet patën për qëllim koordinimin e aktiviteteve të përbashkëta si dhe shkëmbimin e përvojave dhe forcimin e bashkëpunimit rajonal, në funksion të përgatitjes së institucioneve të auditimit për kërkesat e procesit të integrimit evropian për vendet kandidate dhe kandidate potenciale për anëtarësim në BE. 

Në takimin vjetor të Zyrtarëve Ndërlidhës të Rrjetit u diskutuan aktivitetet kryesore të zbatuara në periudhën 2025–2026, përfshirë Konferencën mbi Sistemin e Menaxhimit të Cilësisë së Auditimit dhe programin rajonal të trajnimit për auditimin e performancës, si dhe punëtorinë mbi auditimin mjedisor dhe objektivat e zhvillimit të qëndrueshëm. 

Pjesëmarrësit shqyrtuan prioritetet për hartimin e Planit të ri të Aktiviteteve të Rrjetit për vitet 2027–2028, duke identifikuar fusha me interes si digjitalizimi i auditimit, përdorimi i inteligjencës artificiale, zhvillimi i auditimeve të performancës, auditimi i investimeve kapitale dhe matja e ndikimit të rezultateve të auditimit dhe punës së ISA-ve. Po ashtu u shqyrtua edhe rëndësia e auditimit të fondeve të Agjendës së Reformave dhe gjetja e modaliteteve të bashkëpunimit dhe shkëmbimit të përvojave në këtë temë. 

Ndërsa në takimin vjetor të Zyrtarëve Ndërlidhës të Komitetit të Kontaktit të ISA-ve të Bashkimit Evropian u diskutua për përgatitjen e takimit të Komitetit të Kontaktit për vitin 2026, zhvillimet në aktivitetet e përbashkëta të ISA-ve të BE-së, si dhe çështje të tjera me interes të përbashkët, përfshirë raportimin mbi sundimin e ligjit dhe auditimet paralele.

Auditorja e Përgjithshme, Vlora Spanca, të mërkurën i ka dorëzuar Kuvendit të Republikës së Kosovës Raportin Vjetor të Performancës (RVP) për vitin 2025. Raporti paraqet informata për performancën e përgjithshme të Zyrës Kombëtare të Auditimit (ZKA) karshi detyrimeve dhe mandatit ligjor, si dhe reflekton progresin e arritur dhe adresimin e sfidave përgjatë vitit.  

Znj. Spanca në fjalën e saj ka theksuar se edhe gjatë vitit 2025 ZKA-ja ka ushtruar  mandatin e saj me pavarësi të plotë, integritet të lartë profesional dhe përgjegjësi institucionale. Përmes vlerësimeve të pavarura, objektive dhe të ndershme, ajo tha se ZKA kontribuoi në informimin e publikut dhe palëve të tjera të interesit, duke forcuar transparencën dhe inkurajuar një kulturë më të avancuar të llogaridhënies në sektorin publik. 

“Ky angazhim është reflektuar qartë edhe në realizimin e plotë të Planit Vjetor të Auditimit për sezonin 2024/2025, ku janë përfunduar 133 auditime, prej të cilave 104 financiare/të pajtueshmërisë, 14 të performancës, 12 të pajtueshmërisë dhe tre auditime me nivel të informacionit të klasifikuar. Ky rezultat dëshmon jo vetëm kapacitete të larta profesionale, por edhe pjekuri institucionale. Shtrirja e auditimeve në organizata me kompleksitet të lartë, e shoqëruar me vëmendje të shtuar ndaj monitorimit të zbatimit të rekomandimeve, flet për një orientim gjithnjë e më të qartë drejt ndikimit të qëndrueshëm dhe përmirësimit të qeverisjes publike”, deklaroi znj. Spanca. 

Më tej, Auditorja e Përgjithshme tregoi se gjetjet e auditimeve të ZKA-së vazhdojnë të evidentojnë dobësi strukturore në menaxhimin financiar dhe në sistemet e kontrollit të brendshëm. Ndonëse ka përmirësime në disa fusha, znj. Spanca theksoi se niveli i zbatimit të rekomandimeve mbetet nën pritshmëritë, prandaj nevojiten mekanizma më të fortë dhe më efektivë të përgjegjësisë institucionale. Në këtë aspekt mungesa e funksionimit të Kuvendit gjatë vitit 2025 ka ndikuar në ritmin e shqyrtimit parlamentar të raporteve të auditimit, duke reflektuar sfida që kërkojnë adresim për funksionimin e plotë dhe efektiv të ciklit të llogaridhënies demokratike. 

Në funksion të sundimit të ligjit dhe mbrojtjes së interesit publik është intensifikuar bashkëpunimi me organet e drejtësisë, duke referuar rastet me elemente potenciale të veprave penale të identifikuara gjatë auditimeve. 

Auditorja e Përgjithshme, Vlora Spanca, tha se pavarësisht sfidave, ZKA ka ruajtur stabilitetin institucional dhe ka avancuar sistemet e saj të brendshme. Ajo shtoi se ZKA vazhdon të fuqizohet dhe të prijë në rajon si institucion i besueshëm dhe me ndikim në jetën e qytetarëve, si dhe ka konsoliduar edhe më tej pozitën e saj si partner i besueshëm në rrjetin e Institucioneve Supreme të Auditimit. 

Raportin Vjetor të Performancës së ZKA-së për vitin 2025 e gjeni këtu.

Zyra Kombëtare e Auditimit (ZKA) dhe Fondacioni Jahjaga kanë nënshkruar Marrëveshje Mirëkuptimi, me qëllim zhvillimin e nismave të përbashkëta në fushën e sigurisë, zhvillimit institucional dhe fusha të tjera me interes të ndërsjellë. Marrëveshja u nënshkrua të mërkurën nga Auditorja e Përgjithshme, Vlora Spanca dhe Drejtoresha Ekzekutive e Fondacionit Jahjaga,  Egzona Bexheti.

Marrëveshja ka për qëllim krijimin e një kornize bashkëpunimi për nisma të përbashkëta në fushën e qeverisjes lokale, bashkëpunimit ndërkomunal, zhvillimin ekonomik lokal, sigurisë, zhvillimit institucional dhe aspekte tjera të bashkëpunimit nga fushat e kompetencave komunale.

Në këtë kuadër, palët do të bashkëpunojnë në organizimin e trajnimeve, programeve të mentorimit, tryezave të diskutimit dhe aktiviteteve të tjera profesionale, si dhe në shkëmbimin e praktikave të mira dhe zhvillimin e hulumtimeve në mbështetje të politikave përkatëse. Bashkëpunimi do të udhëhiqet nga parimet e ligjshmërisë, transparencës, integritetit profesional dhe respektimit të standardeve të barazisë gjinore.

Auditorja e Përgjithshme, Vlora Spanca, theksoi se kjo marrëveshje përbën një hap të rëndësishëm drejt forcimit të bashkëpunimit ndërinstitucional dhe shkëmbimit të njohurive, duke kontribuar në zhvillimin institucional dhe avancimin e praktikave të mira në sektorë me rëndësi për interesin publik.

Dhjetë auditorë senior të Zyrës Kombëtare të Auditimit (ZKA) kanë përfunduar programin njëjavor të trajnimit për auditimin financiar që u mbajt nga 20 deri më 24 prill 2026 në Ankara të Turqisë. Trajnimi u organizua nga Gjykata e Llogarive të Turqisë me mbështetjen e Agjencisë Turke për Bashkëpunim dhe Koordinim (TİKA) dhe kishte për qëllim avancimin e njohurive dhe aftësive profesionale të auditorëve në fushën e auditimit financiar. 

Pas përfundimit me sukses të moduleve të trajnimit auditorët u  pajisën me certifikata nga Presidenti i Gjykatës së Llogarive Turqisë, Metin Yener dhe Zëvendësdrejtori i Agjencisë Turke për Bashkëpunim dhe Koordinim, Ali Ercan. 

Trajnimi u fokusua të korniza metodologjike e auditimit financiar, si dhe praktikat më të mira në auditimin e ndërmarrjeve publike, pushtetit lokal dhe sistemit të sigurimeve shoqërore. Në këtë kuadër ekspertët dhe pjesëmarrësit përmes prezantimeve shkëmbyen përvojat e tyre duke përfituar njohuri të reja të cilat mund t’i aplikojnë në punën e tyre të përditshme. 

Ky program trajnimi përfshiu gjithashtu prezantime mbi përdorimin e teknologjive moderne në auditim, përfshirë analizën e të dhënave të mëdha, inteligjencën artificiale dhe sistemet e menaxhimit të auditimit, duke kontribuar në forcimin e kapaciteteve profesionale të auditorëve në përputhje me zhvillimet bashkëkohore. 

Përfundimi me sukses i këtij trajnimi kontribuon në ngritjen e mëtejshme të kapaciteteve profesionale të auditorëve të ZKA-së si dhe në përmirësimin e cilësisë së auditimeve financiare në përputhje me standardet ndërkombëtare. 

Trajnimin e ndoqën Drejtoresha e Departamentit të Auditimit, Blerina Krasniqi, Drejtori i Departamentit të Metodologjisë, Naser Arllati, si dhe auditorët senior Neslihane Mati, Florim Beqiri, Ariana Rexhëbeqaj, Alban Beka, Shqiponja Krasniqi, Fjolla Sadiku, Burbuqe Idrizi dhe Nora Rashiti.  

Auditorja e Përgjithshme, Vlora Spanca, mori pjesë në punimet e Akademisë Rajonale të Lidershipit për Gratë në Ballkanin Perëndimor, mbajtur më 23 dhe 24 prill 2026 në Tiranë. Qëllimi i këtij aktiviteti ishte fuqizimi i grave lidere në Ballkanin Perëndimor përmes avancimit të njohurive dhe shkëmbimit të përvojave në fushën e barazisë gjinore dhe lidershipit gjithëpërfshirës.  

Në ditën e parë të punimeve fokusi i diskutimeve ishte te rëndësia e barazisë gjinore në kontekstin aktual, konceptet bazë të saj, si dhe analizën e pozitës së grave dhe burrave në vendet e Ballkanit Perëndimor. Në këtë kuadër u trajtuan sfidat ekzistuese dhe u ndanë përvoja lidhur me përfaqësimin dhe pjesëmarrjen në vendimmarrje. 

Ndërkaq në ditën e dytë u diskutua për stereotipet gjinore dhe ndikimi i tyre në shoqëri, si dhe për zhvillimin e lidershipit përmes një perspektive gjinore. Pjesëmarrëset diskutuan edhe për mundësitë e kalimit nga vetëdijesimi në veprim, duke përfshirë reflektime dhe shkëmbim përvojash. 

Ky aktivitet u organizua në kuadër të programit rajonal të Bashkimit Evropian për barazinë gjinore i zbatuar nga UNDP dhe UN Women.