Lajmet

Të nderuar përfaqësues të mediave,

Ju ftojmë të ndiqni konferencën për media të Auditores së Përgjithshme, Vlora Spanca, me rastin e përfundimit të auditimeve të detyrueshme të rregullsisë (financiare dhe pajtueshmërisë) për Pasqyrat Financiare Vjetore për vitin 2024.

Konferenca do të mbahet:

Të premten, 4 korrik 2025

Ora: 11:00

Vendi: Zyra Kombëtare e Auditimit (ZKA)

Në këtë konferencë Auditorja e Përgjithshme do të prezantojë çështjet kryesore që kanë rezultuar në raportet e auditimit financiar dhe të pajtueshmërisë për vitin 2024 dhe planin e publikimit të raporteve të auditimit të performancës dhe pajtueshmërisë për sezonin auditues 2024/2025.

Ju mirëpresim!

Nga data 23 deri më 28 qershor 2025, në Shkup u mbajt blloku i tretë i trajnimit për auditimet e performancës për vendet e Ballkanit Perëndimor, i organizuar nga Zyra Kombëtare e Auditimit të Suedisë në bashkëpunim me Entin Shtetëror të Revizionit të Maqedonisë së Veriut.   

Në kuadër të këtij programi, Udhëheqësi i Departamentit për Auditimet e Performancës nga Zyra Kombëtare e Auditimit (ZKA), Arben Selimi kontribuoi në cilësinë e fasilituesit, duke ndarë përvojat dhe praktikat e institucionit në fushën e auditimeve të performancës. 

Programi përfshiu tema si përcaktimi i objektivave të auditimit, pyetjeve të auditimit, përzgjedhja e metodave të hulumtimit, analiza e kostos dhe përfitimeve, studime rastesh dhe hetime përmes sondazheve dhe vlerësimeve eksperimentale. 

Më qellim të fuqizimit të kapaciteteve profesionale dhe thellimit të bashkëpunimit rajonal në fushën e auditimit të performancës, pjesë e këtij programi trajnimi janë edhe auditorët e Zyrës Kombëtare të Auditimit të Kosovës, Gazmend Namani, Edona Abazi, Gëzim Krasniqi dhe Verona Sekiraqa. 

Zyra Kombëtare e Auditimit e Republikës së Kosovës (ZKA) dhe Zyra Kombëtare e Auditimit të Suedisë (SNAO) të enjten virtualisht kanë nënshkruar memorandumin e mirëkuptimit për bashkëpunim në zhvillimin institucional për periudhën 2025 -2030, duke thelluar partneritetin e suksesshëm që nga viti 2011.  

Memorandumi i nënshkruar nga Auditorja e Përgjithshme e Kosovës, Vlora Spanca, dhe Auditorja e Përgjithshme e Suedisë, Christina Gellerbrant Hagberg, synon forcimin e mëtejmë të kapaciteteve të ZKA-së për të punuar në përputhje me standardet më të avancuara ndërkombëtare të auditimit.  

Ky bashkëpunim shumëvjeçar do të fokusohet në tri fusha kyçe si: menaxhimi strategjik, auditimi i performancës, si dhe lidershipi dhe komunikimi i brendshëm. Përmes këtij projekti, Zyra Kombëtare e Auditimit të Suedisë do të ofrojë mbështetje profesionale dhe teknike, përfshirë shkëmbimin e ekspertizës, angazhimin e konsulentëve dhe mbulimin e kostove për aktivitetet e përbashkëta.  

Gjatë ceremonisë së nënshkrimit, palët theksuan rëndësinë që ka pasur bashkëpunimi i vazhdueshëm që nga viti 2011 në avancimin e kapaciteteve institucionale të ZKA-së dhe promovimin e transparencës dhe llogaridhënies në sektorin publik në Kosovë.  

Auditorja e Përgjithshme e Kosovës, Vlora Spanca, vlerësoi lartë dhe shprehu mirënjohjen e përzemërt për partneritetin dhe mbështetjen nga Zyra Kombëtare e Auditimit të Suedisë. Ajo tha se ky bashkëpunim ka kontribuar që ZKA-ja të bëhet institucion i njohur për besueshmërinë, profesionalizmin dhe ndikimin e saj.  

“Pa dyshim, kemi mësuar shumë nga lidershipi juaj i fortë, përvoja e pasur dhe angazhimi për të promovuar qeverisjen e mirë dhe për të forcuar praktikat e auditimit. Me mbështetjen e projektit, Zyra Kombëtare e Auditimit të Kosovës ka forcuar proceset e saj organizative, ka profesionalizuar punën e auditimit, veçanërisht në auditimin e performancës, ka bërë përparim drejt lidershipit modern dhe ka përmirësuar komunikimin e brendshëm dhe me palët e jashtme”, deklaroi znj. Spanca.  

Auditorja e Përgjithshme e Suedisë, Christina Gellerbrant Hagberg, tha se është krenare për partneritetin në mes të dy institucioneve si dhe shprehu pritjet për vazhdimësinë e rezultateve. “Jam shumë krenare për partneritetin e gjatë midis institucioneve tona dhe mezi pres të vazhdoj në një fazë të re, përfundimtare të fokusuar në konsolidimin e rezultateve dhe sigurimin e qëndrueshmërisë”, deklaroi ajo.  

Kjo marrëveshje është nënshkruar në kuadër të takimit të Komitetit Drejtues ku përveç të tjerash u prezantuan dhe miratuan procesverbali nga takimi paraprak i Komitetet, Raporti i progresit për periudhën 18 mujore, Plani i projektit 2025-2030 si dhe Plani vjetor i aktiviteteve.   

Në Zyrën Kombëtare të Auditimit të mërkurën u mbajt ceremonia përmbyllëse e praktikës profesionale për 15 studentë të Fakultetit Ekonomik të Universitetit të Prishtinës, të cilët për tre muaj ishin pjesë e ekipeve të auditimit. Në ceremoni përveç drejtuesve më të lartë të manaxhmentit të ZKA-së morën pjesë edhe Dekani i Fakultetit Ekonomik, Driton Balaj, si dhe prodekanët Vlora Prenaj dhe Saranda Kajtazi.  

Auditorja e Përgjithshme, Vlora Spanca, vlerësoi përkushtimin e studentëve dhe theksoi rëndësinë e këtij bashkëpunimi institucional. Ajo tha se praktika profesionale nuk është vetëm një fazë e domosdoshme në studime, por një mundësi e madhe për të praktikuar njohuritë e fituara si dhe për të njohur nga afër sfidat dhe mundësitë që ofron fusha e auditimit publik.  

Dekani i Fakultetit Ekonomik, Driton Balaj, falënderoi Auditoren e Përgjithshme dhe ZKA-në për bashkëpunimin dhe mundësinë që iu është dhënë studentëve të përvetësojnë njohuritë për procesin e auditimit në një institucion kredibil, me integritet dhe besueshmëri të lartë siç është ZKA-ja.    

Studentëve iu ndanë certifikatat nga Auditorja e Përgjithshme dhe Dekani i Fakultetit Ekonomik të UP-së, me urimin për suksese të mëtutjeshme. Ky program u realizua në kuadër të marrëveshjes së bashkëpunimit ndërmjet dy institucioneve.  

Zyra Kombëtare e Auditimit (ZKA) po vazhdon procesin e publikimit të raporteve të auditimit dhe së fundi publikoi dhe 31 raporte tëauditimit financiar dhe të pajtueshmërisë për 14 komuna, 10 institucione të pavarura, katër (4) ndërmarrje publike si dhe tri (3) ministri.  

Nga këto auditime janë dhënë 15 opinione të modifikuara - kualifikuar për: Ministrinë e Kulturës, Rinisë dhe Sportit, Ministrinë e Administrimit të Pushtetit Lokal, Ministrinë e Mjedisit, Planifikimit Hapësinor dhe Infrastrukturës, Agjencinë për Informim dhe Privatësi, Komunën e Deçanit, Komunën e Prishtinës, Komunën e Gjilanit, Komunën e Obiliqit, Komunën e Zubin Potokut, Komunën e Shtimes, Komunën e Graçanicës, Komunën e Leposaviqit, Komunën e Mitrovicës së Veriut, Komunën e Istogut dhe për ndërmarrjen publike Iber Lepenci.  

Në kualifikim të opinioneve kryesisht kanë ndikuar: mbivlerësimi/nënvlerësimi i pasurive; prezantimi jo i saktë i llogarive të arkëtueshme dhe detyrimeve kontigjente  si dhe klasifikimi joadekuat i shpenzimeve.

Ndërsa opinion i kundërt i është dhënë ndërmarrjeve publike Uniteti dhe Termokosi për shkak se Pasqyrat Financiare Vjetore (PFV) përmbajnë keqdeklarime materiale.   

Kurse 14 opinione të pamodifikuara janë dhënë për: Këshillin e Kosovës për Trashëgimi Kulturore, Zyrën e Rregullatorit të Energjisë, Autoritetin e Konkurrencës, Autoriteti Rregullativ i Hekurudhave, Akademia e Drejtësisë, Komisioni Rregullativ i Prokurimit Publik, Paneli Zgjedhor për Ankesa dhe Parashtresa, Kuvendi i Kosovës, Zyra e Kryeministrit, Komuna e Dragashit, Komuna e Mamushës, Komuna e Parteshit, Komuna e Rahovecit, si dhe ndërmarrjen publike Telekomi.  

Auditimi ka vlerësuar edhe pajtueshmërinë e aktiviteteve/operacioneve të organizatave buxhetore me kornizën ligjore në fuqi, ku është evidentuar një sërë parregullsish në menaxhimin financiar dhe të kontrollit, të cilat përsëriten nga viti në vit. Ndër çështjet kryesore të identifikuara te ministritë, institucionet e pavarura dhe komunat janë:

• Mbivlerësim/ Nënvlerësim i regjistrit të pasurive;
• Klasifikim jo adekuat i shpenzimeve buxhetore;
• Vonesa në pagesën e faturave;
• Shpalosje jo e saktë e detyrimeve kontigjente
• Pasaktësia në prezantimin e obligimeve të papaguara në PVF;
• Pagesa e projekteve në kundërshtim me ligjin e buxhetit;
• Angazhimi i zyrtarëve me kontrata për shërbime të veçanta, dhe për ta nuk kishte zhvilluar procedura të prokurimit siç kërkohet me ligjin për zyrtarët publik;
• Vonesa në vlerësimin e tenderëve, dhe zhvillimi i procedurës së prokurimit në kundërshtim me kërkesat ligjore;
• Mos përdorimi i modulit në sistemin e-prokurimi, për menaxhimin e kontratave dhe vlerësimit të performancës së kontraktuesve;
• Nivel i ulët i inspektimit të pronave të paluajtshme;
• Raportim i mangët nga përfituesit lidhur me subvencionet;
• Pasaktësia në prezantimin e Llogarive të arketushme  në PVF;
• Parregullsi në procesin e menaxhimit të subvencioneve për kopshtin publiko-privat;
• Aplikim i procedurave të prokurimit me negocim jo në përputhje me LPP;
• Hyrja në obligime kontraktuale pa fonde të mjaftueshme;
• Fillimi i procedurave të prokurimit pa lëshimin e lejeve ndërtimore;
• Dobësi në menaxhimin e kontratave “Në shtëpi”;
• Vonesa në realizimin e projekteve kapitale;
• Realizimi i sasive në kontratat publike kornizë, në mospërputhje me peshët e përcaktuara në dosjen e tenderit;
• Vonesat në pagesën e faturave dhe kostoja shtesë për komunën si rezultat i ekzekutimit të pagesave përmes vendimeve gjyqësore dhe përmbarimore;
• Subvencionimi i OJQ-ve pa thirrje publike;
• Funksionalizimi jo i plotë i sistemit e-pasuria.

Ndërsa tek ndërmarrjet publike parregullsitë kryesore janë:

• Mbajtja në regjistrin e pasurive të pronave që nuk janë në pronësi dhe as në shfrytëzim të ndërmarrjes;
• Mos provizionimi i llogarive të arkëtueshme;
• Mospërputhje e obligimeve tatimore midis shënimeve kontabël dhe Administratës Tatimore të Kosovës;
• Të hyrat në pasqyrën e të ardhurave ishin mbivlerësuar;
• Përdorimi i shpeshtë i procedurës me vlerë minimale për furnizime të natyrës së njëjtë si rezultat i mungesës së planifikimit të kërkesave nga njësitë kërkuese;
• Ndërmarrjet nuk kishte arritur të aplikojë menaxhimin e kontratave dhe vlerësimin e performancës së kontraktuesve përmes moduleve respektive të platformës e-prokurimi;
• Realizimi i shpenzimeve vjetore për bileta udhëtimi dhe shërbime transporti, pa pasur kontratë me ndonjë operator ekonomik për furnizim me bileta të udhëtimit dhe shërbime transporti;
• Pozita me ushtrues detyre të cilët kishin tejkaluar afatet ligjore të angazhimit;
• Të hyrat e shtyra nga grantet, të prezantuara në pasqyrën e pozicionit financiar, janë mbivlerësuar.

Për të përmirësuar menaxhimin financiar dhe kontrollin e brendshëm, ZKA ka dhënë rekomandime përkatëse, zbatimi i së cilave i kontribuon përmirësimit të proceseve, menaxhimit më të mirë të financave publike dhe përmirësimit të shërbimeve për qytetarët.

Zyra Kombëtare e Auditimit do të vazhdojë publikimin e raporteve të auditimit edhe në ditët në vijim.

Për më shumë informata:https://tinyurl.com/3h2j3fap 

Zyra Kombëtare e Auditimit (ZKA) të premten organizoi tryezën e diskutimit “Propozim plani për auditimet e performancës” për sezonin auditues 2025/2026. Përfaqësuesit e një numri të konsiderueshëm të organizatave të shoqërisë civile, përfaqësues të shoqatave profesionale si dhe përfaqësues të institucioneve kanë dhënë kontributin e tyre duke propozuar tema për auditime të performancës në fusha me interes publik që mund të përfshihen në Planin Vjetor të Auditimit.  

Punimet e tryezës i hapi Auditorja e Përgjithshme, Vlora Spanca, e cila theksoi  rëndësinë e bashkëpunimit me palët e interesit dhe rolin që kanë auditimet e performancës në rritjen e llogaridhënies dhe transparencës në institucionet publike.

Ajo falënderoi të pranishmit për bashkëpunimin e deritanishëm si dhe u zotua për thellim të partneritetit edhe në të ardhmen. Auditorja e Përgjithshme tha se është e vetëdijshme për nevojën për më shumë auditime të performancës mirëpo ZKA-ja ka mungesë të resurseve meqë Ligji e obligon kryerjen e auditimeve financiare dhe të pajtueshmërisë për të gjitha institucionet.  

Temat preliminare të auditimit të performancës për sezonin 2025/2026 u prezantuan nga Drejtorët e Departamenteve për Auditimet e Performancës, Arben Selimi dhe  Ariana Gjonbalaj si dhe Drejtori i Departamentit për Auditimet e Teknologjisë së Informacionit, Samir Zymberi. Temat e prezantuara trajtojnë çështje nga fusha me interes për qytetarët si: infrastruktura, arsimi, mjedisi, turizmi, teknologjia e informacionit etj.   

Gjatë diskutimeve  përfaqësuesit e OShC-së ndanë propozimet dhe rekomandimet e tyre për fusha që prekin interesin publik, duke ofruar sugjerime të vlefshme për përfshirje në planifikimin e ZKA-së për sezonin e ardhshëm. Ata u fokusuan të auditimet që trajtojnë prokurimin, digjitalizimin e administratës publike, zhvillimin e qëndrueshëm, investimet në mjedis, subvencionet në kulturë, operimin e institucioneve publike në objekte me qira, kontraktimi i shërbimeve sociale në komuna, këmbimi i pronave publike, prioritizimi i projekteve në komuna, efektivitetin e inspektorateve në nivelin lokal, zonat ekonomike, planin zhvillimor komunal, Sistemi Informativ Shëndetësor etj.  

Zëvendës Auditori i Përgjithshëm, Bezad Halilaj bëri mbylljen e tryezës duke prezantuar konkluzionet nga diskutimi si dhe falënderoi të gjithë pjesëmarrësit për bashkëpunimin dhe kontributin e dhënë në identifikimin e temave të rëndësishme për auditime të performancës. Ai tha se ZKA-ja do t’i merr parasysh të gjitha propozimet dhe pastaj do ta bëjë prioritizimin e temave.  

Auditorja e Përgjithshme e Republikës së Kosovës, Vlora Spanca, e shoqëruar nga Zëvendës Auditori i Përgjithshëm, Bezad Halilaj mori pjesë në konferencën “Besimi në financat publike: perceptimet kundrejt praktikës”, organizuar më 10-11 qershor 2025 në Zagreb nga CEF dhe CIPFA.  

Në këtë ngjarje të rëndësishme rajonale dhe evropiane, morën pjesë përfaqësues të Institucioneve Supreme të Auditimit, të Ministrive të Financave, Komisionit Evropian, OECD SIGMA, Gjykatës Evropiane të Auditorëve si dhe organizatave ndërkombëtare të shoqërisë civile. Pjesëmarrësit diskutuan dhe shkëmbyen përvojat mbi mënyrat e përmirësimit të transparencës, besueshmërisë dhe menaxhimit të fondeve publike.  

Gjatë fjalës në seancën plenare me temën“Studim rasti – Vlerësimet e Barometrit Ballkanik dhe standardet ndërkombëtare të auditimit”, Auditorja e Përgjithshme Vlora Spanca prezantoi përvojën e Kosovës dhe rolin kyç të Zyrës Kombëtare të Auditimit (ZKA) në rritjen e besimit të qytetarëve në institucionet publike. Ajo theksoi se përmes auditimeve të pavarura, profesionale dhe të bazuara në standardet ndërkombëtare, ZKA ka kontribuar në forcimin e transparencës dhe llogaridhënies, duke ndikuar drejtpërdrejt në perceptimin pozitiv të qytetarëve për qeverisjen publike në vend.  

Znj. Spanca më tutje tha se ndërtimi i besimit publik nuk është çështje deklarative, por kërkon veprime të matshme dhe të qëndrueshme, ilustruar me shembuj konkretë të auditimeve të kryera nga ZKA, auditime këto që trajtuan çështje me interes të madh publik, si përdorimi i fondeve për sport, menaxhimi i pronës publike, proceset e privatizimit, listat e pritjes në shëndetësi dhe digjitalizimi në arsim.  

“Rritja e vazhdueshme e besimit ndaj ZKA-së, e reflektuar edhe në raportet nga viti 2022 e tutje të Barometrit Ballkanik, është dëshmi se auditimi i pavarur dhe profesional mund të luajë rol kyç në forcimin e qeverisjes dhe llogaridhënies publike. Së bashku ne mund të sigurohemi që fondet publike të menaxhohen me integritet dhe t'i shërbejnë të mirës së përbashkët”, përmbylli Auditorja e Përgjithshme Vlora Spanca.  

Në kuadër të vizitës zyrtare në Kroaci, Auditorja e Përgjithshme e Republikës së Kosovës, Vlora Spanca, së bashku me Zëvendës Auditorin e Përgjithshëm, Bezad Halilaj, u pritën të enjten në takim nga Drejtori i Agjencisë për Auditimin e Sistemit të Zbatimit të Programeve të Bashkimit Evropian (ARPA), z. Neven Šprlje.  

Takimi kishte për qëllim forcimin e bashkëpunimit ndërmjet Zyrës Kombëtare të Auditimit të Kosovës dhe agjencisë kroate, me theks të veçantë në shkëmbimin e përvojave dhe përmirësimin e praktikave të auditimit në përputhje me standardet evropiane.  

Auditorja e Përgjithshme, znj. Spanca, falënderoi nikoqirin për mikpritjen dhe shprehu gatishmërinë për të vazhduar komunikimin dhe bashkëpunimin profesional. Ajo i njoftoi përfaqësuesit kroatë me rrugëtimin e deritanishëm të Zyrës Kombëtare të Auditimit të Kosovës, duke vënë theksin në interesimin për të përfituar nga përvoja kroate në auditimin e fondeve të Bashkimit Evropian.  

Në takim morën pjesë edhe Zëvendësdrejtoresha e ARPA-së, znj. Helena-Marija Puskaric, si dhe Drejtoresha e Departamentit për Metodologji, znj. Marina Mandac.

Zyra Kombëtare e Auditimit (ZKA) publikoi edhe 21 raporte të auditimit financiar dhe të pajtueshmërisë për shtatë ministri, 13 komuna dhe një institucion të pavarur.

Nga këto auditime janë dhënë 16 opinione të modifikuara – kualifikuara për: Ministrinë e Ekonomisë, Ministrinë e Bujqësisë, Pylltarisë dhe Zhvillimin Rural,  Ministrinë për Komunitet dhe Kthim, Ministrinë për Zhvillim Rajonal, Komunën e Suharekës, Komunën e Ranillugit, Komunën e Podujevës, Komunën e Shtërpcës, Komunën e Zveçanit, Komunën e Gjakovës, Komunën e Fushë Kosovës, Komunën e Vitisë, Komunën e Lipjanit, Komunën e Kaçanikut, Komunën e Mitrovicës së Jugut si dhe Komunën e Gllogovcit. 

Në kualifikim të opinioneve kryesisht kanë ndikuar: mbivlerësimi/nënvlerësimi i pasurive; prezantimi jo i saktë i llogarive të arkëtueshme dhe detyrimeve kontigjente  si dhe klasifikimi joadekuat i shpenzimeve.

Ndërsa pesë opinione të pamodifikuara janë dhënë për: Ministrinë e Mbrojtjes, Ministrinë e Shëndetësisë, Ministrinë e Punëve të Jashtme dhe Diasporës,  Komisionin Qendror të Zgjedhjeve, si dhe Komunën e Klinës.  

Auditimi ka vlerësuar gjithashtu edhe pajtueshmërinë e aktiviteteve/operacioneve të këtyre organizatave buxhetore me kornizën ligjore në fuqi, ku janë evidentuar një sërë parregullsish në menaxhimin financiar dhe të kontrollit të cilat përsëriten nga viti në vit. Ndër çështjet kryesore të identifikuara janë:

• Pasaktësia në prezantimin e detyrimeve kontigjente dhe obligimeve në PVF;
• Mos mbyllja e investimeve në vijim dhe regjistrimi i tyre si pasuri në përdorim;
• Mangësi në regjistrat e pasurive;
• Klasifikim jo adekuat i shpenzimeve;
• Hyrja në obligime kontraktuale pa fonde të mjaftueshme;
• Mangësi në përcaktimin e specifikave teknike nga njësitë kërkuese;
• Vonesa në vlerësimin e tenderëve dhe në realizimin e punimeve
• Lidhja e kontratave me operatorët ekonomik pa i plotësuar kriteret;
• Lidhja e kontratave pa projekte ekzekutive;
• Mos përdorimi i modulit në sistemin e-prokurimi, për menaxhimin e kontratave dhe vlerësimit të performancës së kontraktuesve;
• Nivel i ulët i inspektimit të pronave të paluajtshme;
• Vonesa në realizimin e pagesave për grante;
• Vonesa në mbylljen e avanceve dhe në kryerjen obligimeve të papaguara;
• Vonesa në arsyetimin e subvencioneve;
• Mangësi në proceset rekrutuese;
• Mbajtja e pozitave të rregullta me ushtrues detyre më gjatë se afati i paraparë ligjor; si dhe
• Mos përmbushja e planit vjetor të auditimit të brendshëm.

Për të përmirësuar menaxhimin financiar dhe kontrollin e brendshëm, ZKA ka dhënë rekomandime përkatëse, zbatimi i së cilave i kontribuon përmirësimit të proceseve, menaxhimit më të mirë të financave publike dhe përmirësimit të shërbimeve për qytetarët.

Zyra Kombëtare e Auditimit do të vazhdojë publikimin e raporteve të auditimit edhe në ditët në vijim.

Për më shumë informata: https://tinyurl.com/ak472t8b

UN Women në bashkëpunim me Zyrën Kombëtare të Auditimit të Kosovës, Kontrollin e Lartë të Shtetit të Shqipërisë dhe Zyrën Shtetërore të Auditimit të Maqedonisë së Veriut, të martën mbajtën punëtorinë rajonale “Nisma për auditime të reja të përbashkëta të performancës”. Ngjarja mblodhi përfaqësues nga Institucionet Supreme të Auditimit (ISA) të tri shteteve dhe partnerë të tjerë, për të diskutuar mundësitë e zhvillimit të auditimeve të përbashkëta me fokus në fuqizimin e grave në vendimmarrje dhe barazinë gjinore.  

Me një prezantim mbi gratë në pozita udhëheqëse dhe ndikimin e tyre në barazinë gjinore, znj. Ermira Lubani nga UN Women ECARO ndau të dhëna dhe përvoja mbi rëndësinë e përfshirjes së grave në vendimmarrje dhe sfidat që e shoqërojnë këtë proces në rajon.  

Ndihmës Auditorja e Përgjithshme, Myrvete Gashi Morina, theksoi rëndësinë e bashkëpunimit rajonal në adresimin e temave që ndikojnë drejtpërdrejt në zhvillimin demokratik dhe fuqizimin e grave në shoqëri. Ajo tha se rëndësia e auditimeve të performancës që adresojnë barazinë gjinore është në rritje të vazhdueshme. Znj. Gashi Morina tregoi se ZKA-ja tashmë ka filluar gjithashtu integrimin e elementeve të barazisë gjinore në auditimet e tjera tematike.

Me qëllim të identifikimit të një teme me interes të përbashkët për auditim, pjesëmarrësit diskutuan mbi përmbajtjen dhe qasjenmetodologjike, si dhe u dakorduan për hapat e mëtejmë për formalizimin dhe zbatimin e tyre.   

Palët u dakorduan që në vazhdim të vendoset për temën përfundimtare të auditimit, duke marrë parasysh kapacitetet ekzistuese dhe rëndësinë e çështjes që do të auditohet.  

Pjesë e punëtorisë nga ZKA-ja ishin edhe Drejtoresha e Departamentit të Auditimit të Performancës, Ariana Gjonbalaj dhe auditoret seniore Ardiana Miftari dhe Ylfete Osmani.

Zyra Kombëtare e Auditimit (ZKA) njofton opinionin publik se gjatë ditës së djeshme (9 qershor 2025) Radio Televizioni i Kosovës dhe disa media tjera kanë publikuar informata që i referohen raportit të auditimit për komunën e Prishtinës të hartuar nga ZKA-ja. Me këtë rast, dëshirojmë ta njoftojmë publikun dhe mediat se publikimi i këtij dokumenti  nuk është autorizuar nga Zyra Kombëtare e Auditimit.  

Procesi i auditimit është i ndërtuar mbi standarde profesionale dhe rregulla të qarta që parashohin hapa të caktuar deri te  publikimi i raportit përfundimtar.  

Prandaj, publikimi i parakohshëm i raportit të auditimit dhe ende pa u miratuar nga Auditorja e Përgjithshme mund të dëmtojë procesin dhe bashkëpunimin ndërinstitucional që ZKA-ja gëzon me institucionet që janë subjekt i auditimit si dhe të çojë në interpretime të pjesshme apo të pasakta për publikun.

Raportet përfundimtare të auditimit të nënshkruara nga Auditorja e Përgjithshme pasi t’i dorëzohen subjektit të audituar dhe Kuvendit të Republikës së Kosovës, në përputhje me afatet dhe procedurat e përcaktuara në nenin 23, paragrafi 1, të Ligjit 05/L-055 për Auditorin e Përgjithshëm dhe Zyren Kombëtare të Auditimit, publikohen në faqen elektronike të ZKA-së dhe janë i vetmi qëndrim zyrtarë i ZKA-së.   

Si medium publik RTK-ja do të duhej të respektonte mandatin kushtetues dhe ligjor të ZKA-së.  Respektimi i tyre i mundëson ZKA-së të punojë në pajtim të plotë me kërkesat ligjore si dhe Standardet Ndërkombëtare të Auditimit dhe të shmang çdo keqinformim eventual të publikut në lidhje me rezultatet e auditimit të jashtëm të institucioneve publike.

ZKA-ja mbetet e përkushtuar për një proces të hapur dhe transparent në shërbim të llogaridhënies dhe interesit publik si dhe e gatshme për bashkëpunim me mediat dhe palët e interesuara për ofrimin e informatave të sakta dhe të verifikuara.

Nga data 2 deri më 6 qershor 2025 në Stamboll u mbajt seminari për zbatimin dhe vlerësimin e Performancës së Institucioneve Supreme të Auditimit (SAI PMF), organizuar nga Iniciativa për Zhvillim e INTOSAI-t (IDI).   

Objektivë e seminarit ishte forcimi i kapaciteteve dhe njohurive për metodologjinë dhe zhvillimet aktuale të Kornizës për Matjen e Performancës së Institucioneve Supreme të auditimit, si dhe njohuritë për rishikimin e pavarur të vlerësimeve  në kuadër të EUROSAI-t. Në këtë seminar nga Zyra Kombëtare e Auditimit të Kosovës morën pjesë Drejtoresha e Departamentit për Komunikim dhe Bashkëpunim Ndërkombëtar, Qendresa Mulaj, dhe Drejtoresha e Departamentit për Menaxhimin e Burimeve Njerëzore, Dafina Strana Ujkani, të cilat bashkë me përfaqësues të institucioneve homologe kontribuuan aktivisht në diskutime dhe prezantime gjatë sesioneve praktike, duke ndarë përvojën institucionale mbi tema të rëndësishme që lidhen me procesin e vlerësimit të performancës së institucioneve supreme të auditimit.  

Agjenda e seminarit pesëditor u fokusua në analizën e shkaqeve rrënjësore, hartimin e raporteve të vlerësimit të performancës së Institucioneve Supreme të Auditimit, menaxhimin e cilësisë dhe vlerësimet e pavarura. Pjesëmarrësit ndanë përvojat e tyre dhe identifikuan praktika të mira që mund të kontribuojnë në përmirësimin e mëtejshëm të aplikimit të Kornizës për matjen e Performancës të institucioneve të tyre.