Lajmet

Zyra Kombëtare e Auditimit (ZKA) ka realizuar auditimin e Teknologjisë së Informacionit “Sistemi i Informacionit të Tatimit në Pronë (SITP)” për periudhën 2024 – korrik 2025, i cili ka vlerësuar nëse ky sistem siguron të dhëna cilësore, të sakta, dhe të besueshme.

Rezultatet e auditimit tregojnë se ky sistem nuk garanton plotësisht ofrimin e të dhënave cilësore, të sakta, të plota dhe të besueshme. Dobësitë në zhvillim dhe funksionim të sistemit, mungesa e procedurave të standardizuara për testim dhe aprovime, si dhe kontrollet e pamjaftueshme, kanë ndikuar negativisht në integritetin e të dhënave dhe menaxhimin efikas të tatimit. Kjo ka rritur rrezikun për pasaktësi në llogaritje, shpërndarje të gabuar të pagesave dhe vështirësi në identifikimin e saktë të tatimpaguesve.

Ministria e Financave, Punës dhe Transfereve e cila menaxhon SITP nuk siguron që zhvillimet e realizuar në këtë sistem arrijnë qëllimin, pasi ka mungesë të procedurave për kontrolle të brendshme funksionale lidhur me menaxhimin e ndryshimeve dhe trajtimit të kërkesave për zhvillim.

Mungesa e kontrolleve hyrëse në aplikacion për SITP ka krijuar rreziqe për saktësinë e të dhënave dhe integritetin e shërbimeve. Auditimi ka evidentuar mangësi në ndërlidhjen e sistemit me regjistrin e të dhënave të Agjencisë Kadastrale të Kosovës, si dhe ndërlidhjes me Sistemin e Anketimit. Kjo ka rezultuar me të dhëna të pasakta për tatimpaguesit dhe pronat. Mangësitë në kontrollet e përpunimit kanë shkaktuar mos shpërndarjen e pagesës në mënyrë proporcionale dhe në borxhe të pasakta për qytetarët duke i dëmtuar me ndëshkime dhe interes.

Po ashtu SITP ka mangësi në regjistrimin e pagesave duke mos regjistruar datën e saktë të tyre, nuk e pasqyron gjendjen reale të faturës si dhe nuk ka pasqyrim dhe zbatim të saktë të kërkesave ligjore dhe rregullative. Për rrjedhojë qytetarët mund të penalizohen me interes pavarësisht pagesës së realizuar në kohë. Gjithashtu proceset manuale rrisin rrezikun e gabimeve dhe humbjes së të dhënave jashtë sistemit. Mangësitë në kontrollet e sigurisë bëjnë më të cenueshëm SITP ndaj keqpërdorimeve të sigurisë.  

Lidhur me këtë auditim, Auditorja e Përgjithshme, Vlora Spanca, theksoi se Sistemi i Informacionit të Tatimit në Pronë ka transformuar administrimin e tatimit në pronë duke e bërë më të menaxhueshëm, por nuk garanton plotësisht të dhëna cilësore, të sakta, të plota dhe të besueshme.

Për të përmirësuar çështjet e identifikuara në këtë sistem, Zyra Kombëtare e Auditimit ka dhënë 14 rekomandime.

Raportin e plotë të auditimit të Teknologjisë së Informacionit “Sistemi i Informacionit të Tatimit në Pronë (SITP)”, e gjeni këtu.

Zyra Kombëtare e Auditimit (ZKA) ka realizuar auditimin e Teknologjisë së Informacionit “Platforma e shërbimeve online e-Kosova” për periudhën 2024 – qershor 2025, i cili ka vlerësuar nëse kjo platformë iu mundëson qytetarëve shërbime elektronike efikase, të sakta, të sigurta dhe të besueshme. Fokusi i auditimit ka qenë në shërbimet “Shtesat për fëmijë”, “Tatimi në pronë”, “Subvencionimi i librave” dhe moduli “Pagesat elektronike”.  

Ndonëse “Platforma e-Kosova” ka kontribuar në digjitalizimin, transparencën dhe efikasitetin e proceseve administrative, ajo vazhdon të përballet me mangësi në kontrollet e aplikacionit, të cilat ndikojnë në integritetin, saktësinë dhe sigurinë e të dhënave.  

Rezultatet e auditimit tregojnë se për shërbimet “Subvencionimi i librave” dhe “Shtesat për fëmijë”, mungesa e ndërlidhjes së duhur të sistemeve ka lejuar përfitimin e subvencionit të librave pa plotësuar kushtet e nevojshme dhe për shtesat e fëmijëve aplikime të dyfishta. Mungesa e përditësimit të gjendjes së pagesës në kohë reale dhe kontrollet e dobëta në modulin e pagesave kanë lejuar pagesa të njëjta të ekzekutohen disa herë, duke shkaktuar dëme financiare për qytetarët.

Agjencia e Shoqërisë së Informacionit e cila menaxhon platformën e-Kosova nuk ka vendosur standarde të mjaftueshme për menaxhimin e kontratave, duke lënë paqartësi mbi përgjegjësitë për sigurinë e informacionit, nuk garanton mjedis të sigurt informacioni për shkak të politikave të vjetruara dhe mungesës së tyre, si dhe nuk është e përgatitur për të rikthyer shërbimet në raste emergjente ose fatkeqësie duke rrezikuar vazhdimësinë e operacioneve shtetërore elektronike.

Lidhur me këtë auditim, Auditorja e Përgjithshme, Vlora Spanca, tha se Platforma e-Kosova ka shënuar përparim të dukshëm në digjitalizimin e shërbimeve publike, megjithatë ka ende sfida në integrimin e sistemeve, sigurinë e informacionit, kontrollin dhe besueshmërinë e të dhënave, si dhe në vazhdimësinë e biznesit.

Me qëllim të përmirësimit të kontrolleve, integrimit, digjitalizimit dhe sigurisë së platformës e-Kosova, Zyra Kombëtare e Auditimit ka dhënë 15 rekomandime. 

Raportin e plotë të auditimit të Teknologjisë së Informacionit “Platforma e shërbimeve online e-Kosova”, e gjeni këtu.

Zyra Kombëtare e Auditimit (ZKA) ka realizuar auditimin e performancës “Mbrojtja, zhvillimi dhe ripërtëritja e hapësirave pyjore”, për periudhën 2020–2024 i cili ka vlerësuar efikasitetin e institucioneve përgjegjëse në mbrojtjen, zhvillimin dhe ripërtëritjen e hapësirave pyjore.

Rezultatet e këtij auditimi tregojnë se institucionet përgjegjëse nuk kanë arritur të menaxhojnë në mënyrë të duhur hapësirat pyjore në Kosovë. Ministria e Bujqësisë, Pylltarisë dhe Zhvillimit Rural(MBPZhR) nuk ka arritur të përgatisë dhe të miratojë udhëzimet administrative të nevojshme për menaxhimin e pyjeve, për rrjedhojë Agjencia Pyjore e Kosovës operon pa kornizë të plotë rregullative.  

Po ashtu Agjencia Pyjore e Kosovës nuk ka bërë inventarizim të plotë dhe të përditësuar të pyjeve si dhe nuk ka organizuar në mënyrë efektive mbrojtjen e pyjeve publike, prandaj nuk ka të dhëna të sakta për gjendjen aktuale të resurseve pyjore.

Auditimi ka evidentuar se rreth 44% e objektivave të planifikuara nuk janë realizuar, ngecjet janë më të theksuara në kultivimin, trajtimin dhe ngritjen e pyjeve të reja. Rreth një milion fidanë në Institutin Pyjor të Kosovës rrezikojnë të dështojnë për shkak të mungesës së kontraktimeve për pyllëzim nga Agjencia.

Në parqet “Bjeshkët e Nemuna” dhe “Sharri” janë regjistruar prerje të shumta ilegale dhe ndërtime pa leje. Në Parkun Kombëtar “Sharri”, mungesa e rojeve pyjore ka bërë që deri në 70% e territorit të mbetet pa mbrojtje. Ndërsa, në Parkun Kombëtarë “Bjeshkët e Nemuna” problem i madh janë edhe ndërtimet ilegale dhe sipas regjistrimeve të vitit 2024 janë mbi 6,083 ndërtime ilegale. Po ashtu nuk ka të dhëna të sakta sa i përket numrit të uzurpimit të pronave publike.

Agjencia Pyjore për më shumë se 20 vjet nuk ka trajtuar çështjen e pronave që i ka në menaxhim. Ka rreth 500 prona me emërtime të ndryshme të cilat ende nuk i ka unifikuar dhe verifikuar. Gjithashtu auditimi ka evidentuar se në procesin e qiradhënies së pronave publike ka vonesa deri në 38 muaj si dhe janë bërë shumë shkelje nga qiramarrësit.

Lidhur me këtë auditim, Auditorja e Përgjithshme, Vlora Spanca,  deklaroi se mungesa e kornizës së qartë ligjore, kontrollit efektiv, dhe koordinimit institucional, kanë rezultuar me prerje ilegale, uzurpime dhe dëmtime të zonave të mbrojtura, duke shkaktuar humbje të mëdha ekonomike dhe mjedisore. Prandaj është i nevojshëm një koordinim ndërinstitucional me qëllim të ruajtjes, zhvillimit dhe ripërtëritjes së hapësirave pyjore të vendit.

Për përmirësimin e gjendjes se pyjeve në Republikën e Kosovës, Zyra Kombëtare e Auditimit ka dhënë 11 rekomandime.

Raportin e plotë të auditimit të performancës “Mbrojtja, zhvillimi dhe ripërtëritja e hapësirave pyjore”, e gjeni këtu.  

Nga 15 deri më 19 shtator 2025, në Vlorë u mbajt punëtoria për Siguri Kibernetike II,  organizuar nga Kontrolli i Lartë i Shtetit të Shqipërisë në bashkëpunim me Zyrën Kombëtare të Auditimit të Norvegjisë, ku morën pjesë auditorë dhe ekspertë të teknologjisë së informacionit nga Institucionet Supreme të Auditimit të Kosovës, Shqipërisë, Maqedonisë së Veriut, Sllovenisë, Turqisë dhe Suedisë.

Zyra Kombëtare e Auditimit u përfaqësua nga auditorja seniore e teknologjisë së informacionit, Poliksena Berisha dhe administratori i sistemeve, Selami Ibishi. 

Punëtoria pati për qëllim forcimin e institucioneve, sigurimin e shërbimeve digjitale dhe rritjen e besimit të qytetarëve tek ato. Fokusi kryesor i aktivitetit ishte testimi i penetrimit të sigurisë kibernetike. Përmes laboratorëve praktikë, pjesëmarrësit u angazhuan në simulime të sulmeve ndaj mjediseve të Active Directory dhe më pas punuan mbi teknikat e zbutjes së sulmeve, duke ndërtuar ura në mes sulmit dhe mbrojtjes.

Në punëtori u theksua se testimi i penetrimit të sigurisë kibernetike është ndër mënyrat më efektive për të verifikuar funksionalitetin e masave të sigurisë dhe për të kuptuar rreziqet reale me të cilat përballen institucionet publike.

Zyra Kombëtare e Auditimit (ZKA) në bashkëpunim me Misionin e OSBE-së në Kosovë të premten në Prizren mbajti punëtorinë rajonale me gazetarë “Rritja e bashkëpunimit me mediat lokale për transparencë dhe llogaridhënie publike”.  Punëtoria pati për qëllim rritjen e bashkëpunimit me mediat lokale dhe informimin e gazetarëve mbi proceset e auditimit.

Në hapje të punëtorisë, Zëvendës Auditori i Përgjithshëm, Bezad Halilaj, tha se Zyra Kombëtare e Auditimit ka prioritet avancimin e transparencës, llogaridhënies dhe rritjen e bashkëpunimit me media. Po ashtu z. Halilaj foli edhe për mandatin kushtetues dhe ligjor të Auditorit të Përgjithshëm dhe të ZKA-së, për rolin  si dhe për llojet e auditimeve dhe procesin e auditimit.

Po ashtu zyrtarë të lartë të ZKA-së prezantuan rezultatet e auditimit për komunën e Prizrenit si dhe praktikat e komunikimit dhe bashkëpunimit të ZKA-së me mediat. Ndërsa në emër të misionit të OSBE-së, Fatmir Zylfijaj, theksoi rëndësinë e këtij bashkëpunimi dhe ndikimin në rritjen e përgjegjësisë në menaxhimin e parasë publike.

Gazetarët falënderuan ZKA-në dhe OSBE-në për mundësinë e këtij bashkëbisedimi duke thënë se ky komunikim duhet të vazhdoj edhe në të ardhmen. Gjithashtu gazetarët folën për sfidat me të cilat ballafaqohen gjatë ushtrimit të profesionit të tyre e që kryesisht kanë të bëjnë me mungesë të mjeteve financiare dhe mungesë të stafit.

Auditorët e Zyrës Kombëtare të Auditimit, Elvir Krasniqi dhe Arian Zenelaj, me 16 dhe 17 shtator 2025 në Riga të Letonisë, morën pjesë në Seminarin VIII “Roli dhe ndikimi i ISA-ve në zbatimin dhe zhvillimin e politikave rajonale” si dhe takimin IX vjetor të Grupit Punues të EUROSAI-t për Auditimin e Komunave (WGMA).

Seminari u fokosua në rolin e Institucioneve Supreme të Auditimit (ISA) gjatë zhvillimit dhe zbatimit të politikave rajonale, ku në sesionin e parë, zyrtarë të lartë letonezë prezantuan njuhuritë dhe sfidat kryesore në këtë fushë si dhe propozimet se si ISA-të  mund të mbështesin zhvillimin rajonal përmes punës së tyre audituese. Kurse në sesionin e dytë dhe të tretë, përfaqësuesit e 12 ISA-ve ndan përvojat e tyre në planifikimin dhe zhvillimin e politikave rajonale, financimin e planifikimit dhe mundësitë për qasje, si dhe krijimin e sinergjive midis programeve mbështetëse.

Ndërsa në takimin IX vjetor të Grupit Punues të EUROSAI-t për Auditimin e Komunave (WGMA) u diskutua për zbatimin e planit të punës për vitin 2025 dhe aktivitetet e planifikuara për vitin 2026. Në takim u përcaktuan aktivitetet e ardhshme të WGMA-së, duke përfshirë iniciativa të reja siç është Çmimi WGMA për auditimin komunal.   

Zyra Kombëtare e Auditimit (ZKA) ka realizuar auditimin e Teknologjisë së Informacionit “Integrimi i Sistemeve, Krijimi i Deponisë së të Dhënave dhe Implementimi i Inteligjencës së Biznesit”, i cili ka vlerësuar nëse Sistemi Deponia e të Dhënave siguron të dhëna të sakta dhe të besueshme.

Rezultatet e auditimit tregojnë se pavarësisht avancimit të këtij sistemi, Ministria e Financave, Punës dhe Transfereve ende nuk ka arritur t’a shtrijë përdorimin e tij te të gjithë zyrtarët përdorues, prandaj një pjesë e stafit përdorë format e vjetra të raportimit. Po ashtu, sistemi nuk njofton në mënyrë automatike nëse të dhënat janë transferuar dhe verifikimi bëhet në mënyrë manuale. Kjo gjendje rrezikon besueshmërinë e raporteve të gjeneruara nga sistemi, ulë transparencën dhe e bën sistemin të varur nga individë, gjë që ndikon në efikasitetin e vendimmarrjes.

Mungesa e një procesi të automatizuar për verifikimin e transferimit të të dhënave në Sistemin Deponia e të Dhënave, si dhe mungesa e dokumentimit të kontrolleve manuale nga ana e TI-së, rrit rrezikun për pasaktësi dhe mungesë të besueshmërisë së të dhënave. Përdoruesit detyrohen të krahasojnë të dhënat përmes raporteve të dërguara me e-mail. Po ashtu, mungesa e koordinimit dhe komunikimit formal për ndryshimet në kodet buxhetore çon në pasaktësi të raporteve.

Lidhur me këtë auditim, Auditorja e Përgjithshme, Vlora Spanca, theksoi se Sistemi për integrimin e të dhënave Deponia e të Dhënave ka mundësuar grumbullimin e të dhënave të ndryshme me qëllim të raportimit më efikas dhe në kohë reale, por mungesa e proceseve të formalizuara, dokumentimit të plotë të proceseve dhe koordinimit ndërinstitucional ka rezultuar në dobësi në menaxhimin strategjik të sistemit dhe në përdorimin e mangët të tij. 

Me qëllim të përmirësimit të gjendjes rreth përdorimit dhe menaxhimit të këtij sistemi, Zyra Kombëtare e Auditimit ka dhënë gjashtë rekomandime. 

Raportin e plotë të auditimit të teknologjisë së informacionit “Integrimi i sistemeve, krijimi i deponisë së të dhënave dhe implementimi i inteligjencës së biznesit” e gjeni këtu. 

Zyra Kombëtare e Auditimit (ZKA) në bashkëpunim me Misionin e OSBE-së në Kosovë të martën në Gjilan mbajti punëtorinë rajonale me gazetarë “Rritja e bashkëpunimit me mediat lokale për transparencë dhe llogaridhënie publike”.  Punëtoria pati për qëllim rritjen e bashkëpunimit me mediat lokale dhe informimin e gazetarëve mbi proceset e auditimit.

Në hapje të punëtorisë, Zëvendës Auditori i Përgjithshëm, Bezad Halilaj, tha se Zyra Kombëtare e Auditimit është e përkushtuar për avancimin e transparencës, llogaridhënies dhe rritjen e bashkëpunimit me media dhe qytetarët. Ky bashkëpunim ka rol kyç në rritjen e ndërgjegjësimit publik për menaxhimin e parasë publike. Z. Halilaj foli edhe për mandatin kushtetues dhe ligjor të Auditorit të Përgjithshëm dhe të ZKA-së, për rolin, misionin dhe vlerat, si dhe për llojet e auditimeve ku në detaje prezantoi proceset e auditimit.

Në emër të Misionit të OSBE-së, Fatmir Zylfijaj përshëndeti pjesëmarrësit duke theksuar rëndësinë e rritjes së bashkëpunimit në mes të institucioneve dhe mediave lokale.   

Ndërsa drejtuesit e departamenteve të auditimit për komuna, Lavdim Maxhuni, Blerina Krasniqi dhe Blerim Kabashi prezantuan rezultatet e auditimit për komunat e regjionit të Gjilanit.   

Gazetarët ndanë përvojat, pritjet dhe nevojat e tyre në raportim mbi çështjet e auditimit dhe qeverisjes publike. Fokusi i tyre ishte te auditimet e nivelit lokal, bashkëpunimi i ZKA-së me auditorët e brendshëm, rëndësia e opinioneve të auditimit, masat ndëshkuese për mos zbatim të rekomandimeve, etj. Po ashtu gazetarët adresuan sfidat me të cilat ballafaqohen që kryesisht kanë të bëjnë me mungesë të mjeteve financiare dhe mungesë të stafit.

Në mbyllje të punëtorisë, Udhëheqësja e Departamentit për Komunikim dhe Bashkëpunim Ndërkombëtar, Qendresa Mulaj, theksoi rëndësinë e vazhdimit të bashkëpunimit  me qëllim të informimit të drejtë, rritjes së transparencës në institucionet publike si dhe qeverisjes që i përgjigjet qytetarit.

Zyra Kombëtare e Auditimit (ZKA) ka publikuar raportin e auditimit “Menaxhimi i Fondit për Burimet e Ripërtërishme të Energjisë” për periudhën 2017-2024. Raporti vlerësoi efikasitetin e menaxhimit të këtij fondi nga Operatori i Sistemit, Transmisionit dhe Tregu (KOSTT) si dhe mbikëqyrjen nga Ministria e Ekonomisë (ME) për zbatimin e masave për burimet e ripërtërishme të energjisë.

Rezultatet e auditimit tregojnë se Operatori i Sistemit, Transmisionit dhe Tregut (KOSTT) nuk kishte arritur të menaxhojë Fondin në mënyrë efikase. Janë identifikuar mangësi gjatë fazës testuese të prodhueseve të burimeve të ripërtërishme të energjisë, në procesin e organizimit të shitblerjes së energjisë së ripërtërishme si dhe në realizimin e të hyrave për Fondin.

Zyra e Rregullatorit të Energjisë nuk ka kryer monitorimin efektiv të Fondit, po ashtu Ministria e Ekonomisë nuk ka bërë monitorim të mjaftueshëm të zbatimit të politikave të burimeve të ripërtërishme të energjisë dhe arritjen e caqeve të vendosur para vitit 2020.

Auditimi ka evidentuar mangësi gjatë fazës testuese dhe certifikimit të prodhueseve të energjisë së ripërtërishme nga KOSTT. Nuk ishin siguruar garancitë financiare për furnizuesit dhe as për prodhuesit e burimeve të ripërtërishme të energjisë. Në procesin e shitblerjes së kësaj energjie është identifikuar nivel i lartë i jo balancave, gjithashtu nuk kishte mekanizma efektiv për minimizimin e këtyre jo balancave të cilat shkaktojnë kosto shtesë për Fondin. KOSTT nuk ishte efikas në inkasimin e të hyrave në Fond. Inkasimet nga furnizuesit kishin vonesa deri në 7 muaj dhe vlera totale e obligimeve ishte 20 milionë euro.

Lidhur me këtë auditim, Auditorja e Përgjithshme, Vlora Spanca, theksoi se institucionet përgjegjëse nuk ishin efikase në arritjen e caqeve të vendosura për vitin 2020 për burimet e ripërtërishme të energjisë (era, dielli dhe uji). Po ashtu skemat mbështetëse të hartuar për këtë qëllim nuk kanë arritur të ndihmojnë në përmbushjen e këtyre caqeve.

Me qëllim të rritjes së efikasitetit në menaxhimin dhe funksionimin e Fondit të Burimeve të Ripërtërishme të Energjisë, Zyra Kombëtare e Auditimit ka dhënë nëntë rekomandime.

Raportin e plotë të auditimit të performancës “Menaxhimi i Fondit për Burimet e Ripërtërishme të Energjisë” e gjeni këtu.

Zyra Kombëtare e Auditimit (ZKA) në bashkëpunim me ekspertët suedezë në datat 9, 10 dhe 11 shtator 2025 në Istog mbajti punëtorinë për Sistemin e Menaxhimit të Cilësisë së Auditimit. Qëllimi i saj ishte hartimi i raportit mbi procesin e menaxhimit të rreziqeve të cilësisë, si pjesë e përpjekjeve për të forcuar mekanizmat e brendshëm dhe për të rritur standardet profesionale të institucionit.

Gjatë punëtorisë, pjesëmarrësit zhvilluan diskutime dhe punë në grupe për të hartuar objektivat e cilësisë, për të identifikuar dhe vlerësuar rreziqet, si dhe për të përcaktuar masat për minimizimin e tyre. Në fund të punëtorisë u hartu raporti mbi procesin e menaxhimit të rreziqeve të cilësisë, i cili pritet të shërbejë si udhëzues praktik për përmirësimin e mëtejshëm të punës së ZKA-së. 

Punëtoria u realizua në kuadër të veprimeve të ndërmarra nga Auditorja e Përgjithshme për zbatimin e standardit ISSAI 140.

Zyra Kombëtare e Auditimit ka publikuar raportin e performancës “Efikasiteti i Shërbimit Spitalor Klinik dhe Universitar të Kosovës në ndërtimin e objektit të Klinikës së Ortopedisë”, i cili ka vlerësuar fazat e planifikimit, prokurimit, menaxhimit të kontratës dhe mbikëqyrjes së punimeve.

Rezultatet e auditimit tregojnë se projekti për ndërtimin e objektit të Klinikës së Ortopedisë ndonëse ishte planifikuar të përfundonte për 18 muaj, u zvarrit për gati pesë vite. Kjo zvarritje ka ardhur si rezultatet i planifikimit të mangët, mungesës së analizave teknike të plota dhe ndryshimeve të shpeshta gjatë zbatimit. Madje është lidhur një kontrate shtesë për punë të paparashikuara duke e rritur koston e përgjithshme të projektit mbi 2,57 milionë euro – një tejkalim prej mbi 16% nga buxheti fillestar.

Auditimi ka evidentuar probleme serioze në menaxhimin e kontratës dhe kontrollin financiar. Ka pasur tejkalime të sasive pa miratim, pagesa të ekzekutuara pa nënshkrimin e menaxherit të kontratës, si dhe mos vlerësimi të performancës.

Zyra Kombëtare e Auditimit ka rekomanduar ShSKUK të përmirësojë proceset e planifikimit, mbikëqyrjes dhe menaxhimit financiar, në mënyrë që projektet e ardhshme të realizohen brenda afateve dhe buxhetit të paraparë.

Raportin e plotë të auditimit të performancës “Efikasiteti i Shërbimit Spitalor Klinik dhe Universitar të Kosovës në ndërtimin e objektit të Klinikës së Ortopedisë” e gjeni këtu. 

Zyra Kombëtare e Auditimit (ZKA) ka realizuar auditimin e performancës “Funksionimi, licencimi dhe mbikëqyrja e Institucioneve Parashkollore” për përiudhën 2022–2024. Auditimi ka vlerësuar organizimin e procesit të edukimit në fëmijërinë e hershme, shfrytëzimin dhe zhvillimin e kapaciteteve si dhe mbikëqyrjen dhe monitorimin e institucioneve parashkollore. 

Subjekt i këtij auditimi ishin Ministria e Arsimit Shkencës Teknologjisë dhe Inovacionit (MASHTI), si dhe Drejtoritë Komunale të Arsimit në Prishtinë, Prizren dhe Gjakovë.

Rezultatet e auditimit tregojnë se pavarësisht iniciativave dhe përpjekjeve për të avancuar edukimin në fëmijërinë e hershme, sistemi aktual përballet me sfida. Ka mungesë të infrastrukturës ligjore sekondare, si dhe të mekanizmave funksional për monitorim dhe licencim.

MASHTI nuk ka arritur të vendosë një proces efektiv për funksionimin dhe mbikëqyrjen e institucioneve parashkollore. Ministria nuk ka siguruar një proces të rregullt, të drejtë dhe të barabartë të licencimit të institucioneve parashkollore.

Në nivel lokal, përkundër disa përparimeve në ndërtimin e objekteve dhe monitorim të pjesshëm, mungesa e planeve zhvillimore, rregulloreve të funksionimit dhe përfshirjes së plotë të grupmoshave e pengon funksionimin e qëndrueshëm dhe cilësor të institucioneve parashkollore.

Lidhur me këtë auditim, Auditorja e Përgjithshme, Vlora Spanca, ka deklaruar se proceset për funksionimin dhe licencimin e institucioneve parashkollore nuk janë efektive dhe nuk sigurojnë zhvillimin e duhur.

Zyra Kombëtare e Auditimit ka dhënë tetë rekomandime për përmiresimet e nevojshme në nivelin e edukimit parashkollor.  

Raportin e plotë të auditimit të performancës “Funksionimi, licencimi dhe mbikëqyrja e Institucioneve Parashkollore” e gjeni këtu.