Lajmet

Zyra Kombëtare e Auditimit (ZKA) ka shënuar progres të dukshëm në zbatimin e rekomandimeve të rishikimit kolegial të vitit 2023, duke forcuar qeverisjen e brendshme, metodologjinë e auditimit, sistemin e menaxhimit të cilësisë dhe proceset e raportimit. Ky është vlerësimi i Raportit Vijues të Rishikimit Kolegial (Peer Review), i realizuar nga SIGMA.  

Sipas raportit,  ZKA-ja po konsolidohet si një institucion suprem i auditimit gjithnjë e më i besueshëm dhe me funksionim të mirë, duke evidentuar progres të rëndësishëm në forcimin e qeverisjes dhe komunikimit të brendshëm, planifikimit strategjik dhe operativ, metodologjisë së auditimit të rregullsisë dhe performancës, si dhe në ndërtimin e një sistemi të strukturuar të menaxhimit të cilësisë. Gjithashtu, raporti vlerëson përmirësimin e vazhdueshëm të raportimit dhe të mekanizmave për monitorimin e zbatimit të rekomandimeve të auditimit. 

Raporti ka identifikuar edhe fusha për përmirësim të mëtejshëm, përfshirë forcimin e garancive ligjore për pavarësinë institucionale, veçanërisht në aspektin e autonomisë financiare, integrimin e plotë të planifikimit dhe menaxhimit të burimeve, zhvillimin e mëtejshëm të mekanizmave për monitorimin e zbatimit të rekomandimeve, zhvillimin e mëtejshëm të metodologjisë së auditimit, si dhe përfundimin e zbatimit të sistemit të menaxhimit të cilësisë. 

Auditorja e Përgjithshme, Vlora Spanca, e cilësoi raportin vijues si konfirmim të progresit të arritur nga ZKA-ja në zbatimin e rekomandimeve të vitit 2023, por edhe si një udhërrëfyes i rëndësishëm për zhvillimin e mëtejshëm të institucionit. “Vlerësimi i pavarur i realizuar nga SIGMA është dëshmi e progresit që kemi arritur në forcimin e kapaciteteve institucionale dhe në përafrimin e mëtejshëm të praktikave tona me standardet ndërkombëtare të auditimit. Rekomandimet e raportit do të shërbejnë si bazë për vazhdimin e reformave dhe përmirësimin e vazhdueshëm të punës sonë, me qëllim rritjen e cilësisë së auditimit dhe forcimin e llogaridhënies në sektorin publik”, theksoi Auditorja e Përgjithshme.  

Raporti vijues është realizuar me kërkesë të Auditorës së Përgjithshme për të vlerësuar progresin në zbatimin e rekomandimeve të rishikimit kolegial të vitit 2023 dhe për të ofruar orientime për zhvillimin e mëtejshëm strategjik të institucionit.   Rishikimi vijues ka shqyrtuar progresin e ZKA-së në pesë fusha kryesore: pavarësinë dhe kornizën ligjore, qeverisjen dhe menaxhimin, metodologjinë dhe praktikat e auditimit, menaxhimin e cilësisë, si dhe raportimin dhe arritjen e rezultateve. 

Raportin vijues të rishikimit kolegial (Peer Review) e gjeni këtu.  

Zëvendës Auditori i Përgjithshëm, Bezad Halilaj, të martën mori pjesë në tryezën e organizuar nga Iniciativa për Progres – INPO, ku u prezantua raporti “Prokurimi që mbetet në plan”. Pjesëmarrësit diskutuan gjetjet e raportit, sfidat e identifikuara në procesin e planifikimit dhe zbatimit të prokurimit publik, si dhe mundësitë për përmirësimin e këtyre proceseve.

Duke iu referuar rezultateve të auditimeve për vitin 2025, z. Halilaj tha se dobësitë nuk kufizohen vetëm në fazën e tenderimit, por në masë të konsiderueshme shfaqen edhe pas nënshkrimit të kontratave, veçanërisht në menaxhimin e tyre dhe përdorimit të e-Prokurimit. Prandaj, duhet vëmendje e veçantë nga organizatat buxhetore, institucionet mbikëqyrëse dhe mekanizmat e kontrollit, theksoi ai.

Ai tregoi se gjetjet që Zyra Kombëtare e Auditimit (ZKA) ka identifikuar në prokurimin publik janë: dobësi në menaxhimin, monitorimin dhe vlerësimin e kontratave përmes e-Prokurimit; mangësi në planifikimin dhe zbatimin e procedurave të prokurimit; si dhe mangësi në parakushtet, dokumentacionin dhe zbatimin e kontratave/projekteve.

Zyra Kombëtare e Auditimit (ZKA) të hënën publikoi raportin e auditimit të teknologjisë së informacionit për Sistemin e Integruar Informativ (SII) për skemat pensionale. Rezultatet e këtij auditimi tregojnë se sistemi i menaxhuar nga Ministria e Punës, Familjes dhe Vlerave të Luftës Çlirimtare (MPFVLÇ), nuk ka arritur të sigurojë integrimin e plotë të skemave pensionale dhe vazhdon të përballet me mangësi në zhvillim, cilësinë e të dhënave dhe sigurinë e informacionit. 

Ndonëse sistemi synon përpunimin efikas, të saktë dhe transparent të aplikimeve për pension, auditimi ka konstatuar se ai nuk ka arritur nivelin e pritshëm të zhvillimit, integrimit dhe sigurisë, duke mos mundësuar digjitalizimin e plotë të proceseve dhe bazave të të dhënave. 

MPFVLÇ nuk ka arritur të sigurojë zhvillimin dhe integrimin e plotë të sistemit, por zhvillimi është realizuar në mënyrë të fragmentuar, ku vetëm një pjesë e skemave pensionale administrohen në platformën qendrore, ndërsa të tjerat menaxhohen përmes zgjidhjeve të ndara teknologjike. Mungesa e mbikëqyrjes dhe proceseve të standardizuara për zhvillimin e ndryshimeve, si dhe varësia nga palët e jashtme për mirëmbajtjen e sistemit kufizojnë zhvillimin e qëndrueshëm të tij. 

Fragmentimi i të dhënave dhe mungesa e digjitalizimit të plotë kanë krijuar rreziqe për cilësinë dhe besueshmërinë e informacionit. Të dhënat nuk janë të konsoliduara në një bazë të vetme qendrore, ndërsa një pjesë e dokumentacionit historik vazhdon të mbahet në formë fizike, duke e bërë procesin e verifikimit më të ngadalshëm dhe më pak efikas. 

Mangësitë në kontrollet e aplikacionit kanë krijuar rreziqe për integritetin e shërbimeve. Sistemi nuk ofron mekanizma të mjaftueshëm për validimin automatik të të dhënave dhe verifikimin ndërinstitucional, ndërsa shumë procese kryhen ende manualisht. Po ashtu, mungojnë kontrollet e automatizuara për verifikimin e të dhënave, gjurmimin e vendimeve dhe kontrollin e llogarive bankare të përfituesve, duke rritur rrezikun për gabime, pagesa të pasakta, përfitime të dyfishta dhe mosrespektim të kërkesave ligjore. 

Mangësitë në kontrollet e sigurisë e bëjnë sistemin më të cenueshëm ndaj keqpërdorimeve të informacionit. Po ashtu mungesa e politikave të formalizuara për kopjet rezervë, vazhdimësinë e shërbimeve dhe rikuperimin nga fatkeqësitë, rrisin rrezikun për ndërprerje të funksionimit të sistemit. 

Lidhur me këtë auditim, Auditorja e Përgjithshme, Vlora Spanca, theksoi se mangësitë e identifikuara nga procesi i auditimit tregojnë  se  institucionet të cilat administrojnë të dhënat dhe dokumentet për pensionet dhe ofrojnë shërbime përmes Sistemit të Integruar Informativ për skemat Pensionale duhet t’i marrin masat e nevojshme për përmirësime të mëtejshme. 

Më qëllim të përmirësimit Zyra Kombëtare e Auditimit ka dhënë 23 rekomandime. 

Raporti e plotë të auditimit për Sistemin e  Integruar Informativ për Skemat Pensionale e gjeni këtu.

Auditorja e Përgjithshme e Republikës së Kosovë, Vlora Spanca, të martën priti në takim z. Neven Šprlje, ekspert i angazhuar në kuadër të projektit “Asistenca Teknike për Mbështetjen e Zbatimit të Reformave të Menaxhimit të Financave Publike në Kosovë”, si dhe z. Boris Petkov, udhëheqës i ekipit të projektit.

Takimi u zhvillua në kuadër të misionit të ekspertit, i cili ka për qëllim të mbështesë forcimin e sistemit të kontrollit dhe auditimit të brendshëm, me fokus në rolin dhe funksionimin e Komiteteve të Auditimit. Gjatë takimit u diskutua për praktikat e mira ndërkombëtare dhe kontributin e Zyrës Kombëtare të Auditimit (ZKA) në avancimin e qeverisjes së mirë, llogaridhënies dhe reformave në Menaxhimin e Financave Publike.

Pjesë e takimit nga ZKA-ja ishin edhe Ndihmës Auditorja e Përgjithshme, Myrvete Gashi Morina dhe Drejtori i Departamentit të Auditimit, Arben Selimi.

Auditorja e Përgjithshme, Vlora Spanca, me bashkëpunëtorë priten të enjten në takim Ushtruesen e Detyrës së Presidentes së Republikës së Kosovës, Albulena Haxhiu. Në takim u diskutua për rolin kushtetues, ligjor dhe rëndësinë e Auditorit të Përgjithshëm dhe Zyrës Kombëtare të Auditimit (ZKA) në forcimin e llogaridhënies, transparencës dhe qeverisjes së mirë. 

Auditorja e Përgjithshme, e njoftoi U.D. Presidenten me punën dhe rezultatet e arritura gjatë sezonit auditues, si dhe prioritetet strategjike të ZKA-së, me theks të veçantë në avancimin e cilësisë së auditimit, forcimin e kapaciteteve profesionale dhe rritjen e ndikimit të rekomandimeve të auditimit. Znj. Spanca, foli edhe për bashkëpunimin e ZKA-së me Prokurorinë e Shtetit. Po ashtu Auditorja e Përgjithshme e njoftoi znj. Haxhiu edhe për sfidat me të cilat përballet ZKA-ja duke përfshirë nevojën për miratimin e Ligjit për Auditorin e Përgjithshëm, sigurimin e objektit për ZKA-në e cila vazhdon të operojë në pronë private, lëvizja e stafit, etj. 

Gjatë takimit u theksua edhe angazhimi aktiv i ZKA-së në organizatat ndërkombëtare të auditimit publik, ku është anëtare me të drejta të plota në INTOSAI dhe EUROSAI, duke kontribuar në shkëmbimin e praktikave më të mira profesionale dhe zhvillimin e auditimit publik. 

Ushtruesja e Detyrës së Presidentes, Albulena Haxhiu, vlerësoi punën dhe profesionalizmin e Zyrës Kombëtare të Auditimi dhe theksoi rëndësinë e ruajtjes së pavarësisë institucionale dhe rolin e auditimit publik në fuqizimin e sundimit të ligjit, transparencës dhe besimit të qytetarëve në institucionet publike. 

Auditorja e Përgjithshme dhe U.D. Presidentja theksuan rëndësinë e bashkëpunimit institucional në funksion të promovimit të qeverisjes së mirë, integritetit dhe llogaridhënies në sektorin publik. 

Zyra Kombëtare e Auditimit (ZKA) në bashkëpunim me Prokurorinë e Shtetit, të mërkurën në Ferizaj mbajti punëtorinë rajonale me temën “Forcimi i bashkëpunimit ndërinstitucional në identifikimin dhe referimin e dyshimeve për vepra penale të identifikuara gjatë auditimit”, ku morën pjesë përfaqësues të ZKA-së, prokurorë nga rajonet e Ferizajt dhe Gjilanit, si dhe përfaqësues të Programit për Zhvillim të Kombeve të Bashkuara (UNDP). 

Ndihmës Auditorja e Përgjithshme, Emine Fazliu theksoi se auditimi publik nuk kufizohet vetëm në identifikimin e parregullsive dhe dhënien e rekomandimeve, por luan një rol të rëndësishëm në forcimin e qeverisjes së mirë, transparencës dhe llogaridhënies. Ajo tha se bashkëpunimi i vazhdueshëm ndërmjet ZKA-së dhe Prokurorisë së Shtetit është thelbësor për trajtimin e rasteve kur gjatë auditimit evidentohen dyshime për vepra penale, me qëllim të mbrojtjes së interesit publik dhe të financave publike. 

Prokurori i Shtetit, njëherësh koordinator për raste të auditimit, Bahri Hyseni, vlerësoi organizimin e këtyre punëtorive si rezultat të bashkëpunimit të mirë ndërinstitucional ndërmjet ZKA-së dhe Prokurorisë së Shtetit, duke theksuar se ato do të vazhdojnë të organizohen edhe në rajonet e tjera të Kosovës, me synim forcimin e koordinimit, shkëmbimin e përvojave profesionale dhe rritjen e efektivitetit në trajtimin e rasteve të referuara. Ai tha se falë këtij bashkëpunimi ndërinstitucional është më e lehtë të trajtohen rastet e referuara nga Zyra Kombëtare e Auditimit. 

Përfaqësuesja e projektit në UNDP, Fjolla Raifi Luzha, theksoi rëndësinë e partneritetit ndërinstitucional në forcimin e sundimit të ligjit dhe luftimin e korrupsionit, duke vlerësuar bashkëpunimin ndërmjet ZKA-së dhe Prokurorisë së Shtetit. Ajo rikonfirmoi mbështetjen e vazhdueshme në kuadër të projektit “Luftimi i Korrupsionit dhe Krimit të Organizuar” për iniciativa që kontribuojnë në rritjen e integritetit institucional, transparencës dhe llogaridhënies në sektorin publik. 

Në sesioni e parë të punëtorisë Udhëheqësja e Njësisë Kundër Mashtrimit dhe Koordinatore me Prokurorinë e Shtetit në ZKA, Natyra Kasumaj Ahmeti, prezantoi kuadrin ligjor dhe mandatin e Zyrës Kombëtare të Auditimit për njoftimin e organeve të zbatimit të ligjit, si dhe përvojat praktike të ZKA-së në referimin e rasteve në Prokurorinë e Shtetit. 

Në sesionin e dytë, përfaqësuesit e Prokurorisë trajtuan procedurat për pranimin dhe vlerësimin e informatave të dërguara nga ZKA, rëndësinë e dokumentimit të provave, sfidat në trajtimin e rasteve dhe praktikat e mira për forcimin e bashkëpunimit ndërinstitucional.  

Drejtoresha e Departamentit për Çështje Juridike dhe Kundër Mashtrimit në ZKA, Minire Begaj Balaj, në përmbyllje të punëtorisë tha se konkluzionet e këtij diskutimi do të shërbejnë për avancimin e bashkëpunimit me Prokurorinë e Shtetit  me synim rritjen e efektivitetit në identifikimin dhe trajtimin e rasteve me dyshime për vepra penale të evidentuara gjatë procesit të auditimit.   

Auditorja e Përgjithshme e Republikës së Kosovës, Vlora Spanca, e shoqëruar nga Zëvendës Auditori i Përgjithshëm, Bezad Halilaj, Drejtori i Auditimit, Faruk Rrahmani dhe Administratorja e Bazës së të Dhënave, Kaltrina Sylejmani, të hënën vizituan Institucionin Shtetëror të Auditimit të Malit të Zi, ku u pritën nga Presidenti i Senatit, Siniša Čađenović, anëtarët e Senatit dhe përfaqësues të tjerë të institucionit. 

Znj. Spanca uroi Presidentin e Senatit për emërimin e tij në këtë detyrë, duke theksuar se nën udhëheqjen e tij institucioni do të vazhdojë të forcojë rolin e tij në promovimin e transparencës, llogaridhënies dhe qeverisjes së mirë. Ajo gjithashtu theksoi rëndësinë e dialogut të vazhdueshëm ndërmjet dy Institucioneve Supreme të Auditimit si një mjet për shkëmbimin e njohurive dhe avancimin e praktikave profesionale. 

“Shkëmbimi i njohurive, përvojës dhe praktikave të mira na mundëson të përmirësojmë vazhdimisht punën tonë, të forcojmë kapacitetet tona institucionale dhe të përmbushim më mirë mandatin tonë kushtetues në shërbim të qytetarëve tanë”, deklaroi znj. Spanca. 

Znj. Spanca dhe z. Čađenović diskutuan për kornizën ligjore dhe institucionale të Institucioneve Supreme të Auditimit me theks të veçantë në pavarësinë institucionale dhe financiare. Po ashtu, palët shkëmbyen përvoja lidhur me metodologjitë e auditimit, sfidat dhe praktikat në realizimin e auditimeve të performancës dhe pajtueshmërisë.  

Pjesë e diskutimeve ishte edhe mbështetja teknologjike në procesin e auditimit, ku u prezantua përvoja në zbatimin praktik të Sistemit të Menaxhimit të Auditimit të ZKA-së (SITA) dhe roli i tij në rritjen e efikasitetit dhe cilësisë së proceseve të auditimit. 

Palët konfirmuan përkushtimin për të vazhduar bashkëpunimin profesional dhe shkëmbimin e praktikave të mira me qëllim të forcimit të auditimit publik dhe promovimin e qeverisjes së mirë.  

Në kuadër të zbatimit të Planit Vjetor të Auditimit, Zyra Kombëtare e Auditimit (ZKA) ka filluar auditimin e teknologjisë së informacionit për Sistemin e Regjistrimit të Bizneseve në Kosovë, për periudhën 2025-2026.

Auditimi ka për qëllim të vlerësojë kontrollet e aplikacionit dhe sigurisë së aplikacionit për Sistemin e Regjistrimit të Bizneseve të Kosovës. Fushëveprimi i këtij auditimi do të jetë Ministria e Industrisë, Ndërmarrësisë, Tregtisë dhe Inovacionit, përkatësisht Agjencia për Regjistrimin e Bizneseve në Kosovë (ARBK), me qendrat komunale për regjistrimin e bizneseve, e cila është përgjegjëse për zhvillimin dhe mirëmbajtjen e Sistemit të Regjistrimit të Bizneseve dhe divizioni përkatës për administrimin e sistemeve të teknologjisë së informacionit.

Sistemi i Regjistrimit të Bizneseve ndikon në efikasitetin institucional duke mundësuar ofrimin e shërbimeve elektronike për qytetarët dhe bizneset, përfshirë krijimin e llogarisë, aplikimin për regjistrim të biznesit, si dhe paraqitjen e kërkesave për ndryshim dhe menaxhimin e të dhënave.

Sipas të dhënave të ARBK-së deri në vitin 2026 në Kosovë janë të regjistruara 265,992 biznese, prej të cilave 134,914 janë aktive, 93,532 pasive dhe 37,546 të çregjistruara. 

Në kuadër të vizitës në Gjykatën Evropiane të Auditorëve në Luksemburg, Auditorja e Përgjithshme, Vlora Spanca, me bashkëpunëtorë mori pjesë në konferencën e organizuar nga ky institucion me temën “Mbështetja e Bashkimit Evropian për Ballkanin Perëndimor”.

Konferenca mblodhi përfaqësues të institucioneve të Bashkimit Evropian, institucioneve financiare ndërkombëtare dhe autoriteteve të vendeve të Ballkanit Perëndimor, për të diskutuar mbi efektivitetin e instrumenteve kryesore financiare të BE-së që mbështesin zhvillimin dhe procesin e integrimit evropian të rajonit. 

Diskutimet u fokusuan në funksionimin e Kornizës së Investimeve për Ballkanin Perëndimor (Western Balkans Investment Framework – WBIF), si dhe në zbatimin e Instrumentit për Reforma dhe Rritje për Ballkanin Perëndimor (Reform and Growth Facility). Pjesëmarrësit trajtuan progresin e arritur, sfidat në zbatim dhe rëndësinë e forcimit të qeverisjes, transparencës dhe llogaridhënies për të siguruar përdorimin sa më efektiv të fondeve të Bashkimit Evropian.

Auditorja e Përgjithshme, duke vlerësuar lartë rëndësinë e kësaj konference dhe ndihmën evropiane për Ballkanin Perëndimor shpalosi para pjesëmarrësve rolin e Zyrës Kombëtare të Auditimit në auditimin e projekteve të financuara nga BE, duke ofruar shembuj konkret të angazhimit të institucionit.

Konferenca ofroi gjithashtu një mundësi për shkëmbimin e përvojave dhe diskutimin e qasjeve të auditimit në vlerësimin e ndikimit të mbështetjes financiare të BE-së, duke krijuar një bazë të vlefshme për bashkëpunim dhe zhvillimin e auditimeve të ardhshme në këtë fushë.

Në kuadër të konferencës, Auditorja e Përgjithshme, Vlora Spanca, zhvilloi takime të veçanta me anëtaren e Gjykatës Evropiane të Auditorëve, znj. Laima Andrikiene, si dhe me deputetin e Parlamentit Evropian, Thomas Waitz. 

Ndihmës Auditorja e Përgjithshme, Myrvete Gashi Morina, Drejtori i Përgjithshëm, Safet Berisha dhe Drejtori i Departamentit të Auditimit, Mehmet Muçaj, morën pjesë në punëtorinë tematike “Puna në terren në kuadër të shqyrtimit kolegial (Peer Review Fieldwork)”, e organizuar në kuadër të aktiviteteve të EUROSAI-t me 29 dhe 30 qershor 2026 në Varshavë të Polonisë. 

Punëtoria pati për qëllim shkëmbin e praktikave dhe përvojave të institucioneve homologe evropiane duke kontribuar në forcimin e kapaciteteve profesionale dhe avancimin e cilësisë së proceseve të auditimit. 

Diskutimet e pjesëmarrësve u fokusuan në fazën e punës në terren të procesit të shqyrtimit kolegial, duke trajtuar tema që lidhen me menaxhimin e provave, kalimin nga gjetjet në raportim, shkëmbimin e përvojave ndërmjet institucioneve supreme të auditimit, si dhe zhvillimin e ushtrimeve praktike për përgatitjen dhe realizimin e shqyrtimeve kolegiale. 

Auditorja e Përgjithshme, Vlora Spanca, dhe Zëvendës Auditori i Përgjithshëm, Bezad Halilaj, me bashkëpunëtorë, zhvilluan vizitë pune në Gjykatën Evropiane të Auditorëve (GjEA), në Luksemburg.

Znj. Spanca dhe zyrtarët e ZKA-së, u pritën në takim nga zyrtarë të lartë të GjEA, ndërkaq në kuadër të vizitës u zhvillua një program i gjerë prezantimesh dhe diskutimesh mbi funksionimin e Gjykatës, rolin e saj në mbikëqyrjen e financave të Bashkimit Evropian (BE), si dhe sfidat në auditimin e projekteve të financuara nga BE.

Gjatë vizitës delegacioni i ZKA-së poashtu u njoh nga afër me punën e Dhomës III të GjEA, e cila mbulon fushat e veprimit të jashtëm, sigurisë dhe drejtësisë ku diskutimet u përqendruan në analizën kost-benefit, vlerësimin e rrezikut dhe qëndrueshmërinë afatgjatë të projekteve të financuara nga BE-ja.

Në kuadër të vizitës, delegacioni zhvilloi gjithashtu një vizitë në Zyrën e Prokurorit Publik Evropian, ku u diskutua për bashkëpunimin institucional dhe mekanizmat për mbrojtjen e interesave financiare të Bashkimit Evropian.

Më 23-25 qershor 2026, përfaqësues të Zyrës Kombëtare të Auditimit (ZKA) morën pjesë në punëtorinë ndërkombëtare për Menaxhimin e Cilësisë, e mbajtur në Stamboll.  Punëtoria u organizua nga Zyra Kombëtare e Auditimit të Suedisë në kuadër të aktiviteteve të projekt grupit të EUROSAI-t për zhvillim.

ZKA-ja në këtë punëtori u përfaqësua nga Fitim Haliti, Drejtor për Menaxhimin e Cilësisë, Ylber Sadiku, Auditor, dhe Lindita Ajeti, Auditore.

Gjatë punëtorisë, përfaqësuesit e ZKA-së prezantuan përvojën institucionale në hartimin dhe zbatimin e Sistemit të Menaxhimit të Cilësisë në Auditim, duke paraqitur progresin e arritur në zhvillimin e politikave dhe procedurave përkatëse, menaxhimin e rreziqeve të cilësisë, monitorimin dhe korrigjimin e sistemit, vlerësimin vjetor të tij, si dhe procesin e Rishikimit të Cilësisë së Angazhimit.

Në prezantim u theksuan gjithashtu rezultatet konkrete të arritura deri më tani, përfshirë miratimin e objektivave të cilësisë, identifikimin dhe vlerësimin e rreziqeve të cilësisë, si dhe përcaktimin e prioriteteve për menaxhimin dhe adresimin e tyre.

Diskutimet gjatë punëtorisë konfirmuan se Zyra Kombëtare e Auditimit është njëra ndër institucionet supreme të auditimit që ka avancuar në hartimin e dokumentacionit të nevojshëm sipas kërkesave të ISSAI 140 dhe ka filluar zbatimin praktik të Sistemit të Menaxhimit të Cilësisë. Ky progres dëshmon angazhimin e ZKA-së për forcimin e cilësisë së auditimit përmes një qasjeje të bazuar në rrezik dhe përmirësim të vazhdueshëm.

Në këtë aktivitet morën pjesë përfaqësues nga institucionet supreme të auditimit të Kosovës, Shqipërisë, Azerbajxhanit, Bosnjë dhe Hercegovinës, Gjeorgjisë, Maqedonisë së Veriut, Moldavisë, Malit të Zi, Serbisë, Suedisë, Turqisë dhe Ukrainës.