Lajmet

Edhe pse Ligji për Auditorin e Përgjithshëm dhe Zyrën Kombëtare të Auditimit të Republikës së Kosovës Nr. 05/L-055 i obligon institucionet/organizatat buxhetore të audituara, që t’i dorëzojnë Zyrës Kombëtare të Auditimit planin e veprimit për adresimin e rekomandimeve jo të gjitha e kanë kryer këtë obligim. Rekomandimet e auditimit kanë për qëllim që t’i ndihmojnë institucionet publike të përmirësojnë qeverisjen dhe të rrisin kontrollet për menaxhimin me paranë publike. Mënyra e zbatimit të rekomandimeve duke përfshirë kohën, masat dhe  resurset e nevojshme përcaktohen përmes Planit të Veprimit që përgatitet nga organizatat e audituara. Sa i përket auditimit të rregullsisë nga 95 institucionet që i janë nënshtruar këtij procesi, pesë prej tyre nuk e kanë zbatuar ligjin për t’i dërguar planet e veprimit për adresimin e rekomandimeve të auditorit. Ministria e Punës dhe Mirëqenies Sociale (MPMS), Komuna e Deçanit, Komuna e Kllokotit, Telekomi i Kosovës si dhe Kompania Rajonale e Mbeturinave “Uniteti Sh.A” Mitrovicë nuk kanë arritur t’i përgjigjen kësaj kërkese ligjore. Ndërsa, gjendja është me e keqe te auditimet e performancës. Dhjetëra entitete që i janë nënshtruar procesit të auditimit nuk i kanë dorëzuar planet për adresimin e rekomandimeve të Auditorit të Përgjithshëm. Për raportin e auditimit “Menaxhimi i kontratave publike të ndërtimit” planin e veprimit nuk e kanë dorëzuar, Ministria e Kulturës, Rinisë dhe Sportit; Ministria e Arsimit dhe Shkencës. Ndërsa për raportin e auditimit “Siguria në trafikun rrugor” planet e veprimit nuk i kanë dërguar Ministria e Infrastrukturës dhe Transportit si dhe Komuna e Prishtinës. Për raportin e auditimit “Korniza Afatmesme e Shpenzimeve” planin e veprimit nuk e kanë dërguar Ministria e Infrastrukturës dhe Transportit si dhe Ministria e Arsimit, Shkencës dhe Teknologjisë. Ndërkaq Ministria e Financave dhe Komuna e Prizrenit nuk i kanë dorëzuar planet e veprimit për raportin e auditimit “Organizimi dhe menaxhimi i investimeve të teknologjisë së informacionit në institucionet publike”. Kurse Komuna e Prizrenit, Pejës, Podujevës, Mamushës dhe Graçanicës nuk i kanë dorëzuar planet e veprimit për auditimin “Projektet e financuara nga grantet e DEMOS”. As komunat Mitrovicë Veriore, Zveqan dhe Zubin Potok nuk i kanë dorëzuar planet e veprimit sa i përket raportit të auditimit “Zbatimi i rekomandimeve të raportit ‘Fondi Zhvillimor’ dhe efektet e fondit. Po ashtu edhe për raportin “Efektiviteti i programeve të veçanta për banim” nuk kanë dorëzuar planin komunat: Gjakovë, Mitrovicë, Prishtinë, Ferizaj dhe Obiliq. Ndërkohë lidhur me raportin “Menaxhimi i Mirëmbajtjes së Institucioneve Publike Arsimore” planet e veprimit nuk i kanë dorëzuar Ministria e Arsimit dhe Shkencës; Agjencia e Veterinës dhe Ushqimit; Komuna e Prishtinës, Vushtrrisë dhe Ferizajt. Edhe për raportin e auditimit “Efektiviteti i ndërlidhjes së Arsimit dhe Aftësimit Profesional me nevojat e tregut të punës” planin e veprimit nuk e kanë dorëzuar entitetet e audituara DKA-të e komunës së Prishtinës, Prizrenit dhe Ferizajt.

Me qellim të avancimit të kontrollit dhe rritjes së cilësisë në Institucionet Supreme të Auditimit gjatë kësaj jave përmes platformës online “Zoom” u mbajt punëtoria e radhës e organizuar nga Zyra Kombëtare e Auditimit të Suedisë, ku pjesëmarrës ishin përfaqësues nga Zyra Kombëtare e Auditimit të Kosovës, Malit të Zi dhe Bosnje e Hercegovinës. Kjo punëtori ishte planifikuar të mbahej në fund të marsit në Prishtinë, por për shkak të situatës me pandeminë Covid-19, ky aktivitetet ishte pezulluar. Synimi kryesor i kësaj punëtorie ishte që pjesëmarrësit nga tri Institucione Supreme të Auditimit të avancojnë njohuritë për ndërtimin dhe mirëmbajtjen e një sistemi të qartë dhe të strukturuar të kontrollit të cilësisë. Në veçanti pjesëmarrësit diskutuan mundësitë e ndryshme se si të ndajnë përgjegjësitë midis pozicioneve të ndryshme në hierarkisië. Po ashtu ata u fokusuan edhe të sqarimet për ndryshimin/dallimin midis kontrollit të cilësisë dhe sistemeve të sigurimit të cilësisë. Institucionet Supreme të Auditimit nga Kosova, Mali i Zi dhe Bosnja e Hercegovina shkëmbyen zgjidhjet më të mira për ndërtimin e sistemit të tyre të kontrollit të cilësisë dhe aktivitetet që mund të nevojiten për të qenë në gjendje të zhvillojnë këto sisteme. Për një javë rresht SAI-t pjesëmarrëse përshkruan se si ata punojnë me kontrollin e cilësisë dhe sigurimin e cilësisë në organizatat e tyre, përfshirë përshkrimin e hierarkive dhe delegimin e përgjegjësive. Mbajtja e kësaj punëtorie është vazhdim i serisë së punëtorive të mbajtura në Sarajevë dhe Podgoricë gjatë vitit 2019, në kuadër të mbështetjes së vazhdueshme nga Zyra Kombëtare e Auditimit të Suedisë për Institucionet Supreme të Auditimit në Ballkanin Përendimor.

Në kuadër të projektit trepalësh në mes të Zyrës Kombëtare të Auditimit, Qeverisë Holandeze dhe BIRN Kosova sot në Komunën e Vushtrrisë u mbajt debati “Roli i Zyrës Kombëtare të Auditimit dhe i qytetarëve në mbikëqyrjen e të ardhurave dhe shpenzimeve komunale” i cili ka për qëllim të promovojë mbikëqyrjen publike për të nxitur rritjen e transparencës dhe llogaridhënies institucionale. Me këtë rast Auditori i Përgjithshëm i Republikës së Kosovës, Besnik Osmani, tha se organizatat buxhetore duhet ta shohin auditimin si një proces të dobishëm dhe bazë të fortë për të avancuar menaxhimin e tyre financiar, siguruar kontrollet e brendshme dhe rritur performancën. Auditori i Përgjithshëm ka theksuar se zbatimi i rekomandimeve, në përgjithësi ka shënuar një rritje të lehtë, megjithatë, shkalla e zbatimit nuk është ende e kënaqshme, sidomos tek niveli lokal.  “Ne vazhdojmë të inkurajojmë drejtuesit e institucioneve publike që të rrisin angazhimin institucional për zbatimin e rekomandimeve të auditimit, pasi kjo do të rezultonte me qeverisje më të mirë dhe shërbime më cilësore për qytetarët. Zbatimi i rekomandimeve të auditimit ka shënuar një rritje të lehtë viteve të fundit, por në përgjithësi shkalla e zbatimit nuk është ende e kënaqshme”, u shpreh Osmani. Në raportin e auditimit për vitin 2019, Komuna e Vushtrrisë ka marrë opinion të pamodifikuar me theksim të çështjes, si dhe i janë adresuar 19 rekomandime. Komuna ka dorëzuar planin e veprimit për zbatimin e rekomandimeve, ndërsa Zyra Kombëtare e Auditimit do të përcjellë procesin e zbatimit sipas planit në auditimin për vitin 2020. Të pranishëm në këtë debat ishin edhe Ambasadorja e Holandës në Kosovë, Carin Lobbezo, kryetari i Komunës së Vushtrrisë, Xhafer Tahiri, redaktori përgjegjës në BIRN Kosova, Visar Prebreza si dhe asamblistë të kësaj komune. Ndërkohë ambasadorja e Holandës në Kosovë, Carin Lobbezo, tha se qëllimi i këtij projekti është që të mbështetet misioni i Zyrës së Auditorit të Përgjithshëm dhe të sigurojë se paraja në Kosovë është shpenzuar në bazë të vendimeve të drejta dhe për të mirën e qytetarëve. “Qëllimi ynë është që të rritet transparenca, llogaridhënia për të gjithë kosovarët në çdo nivel,  kjo rrit besimin në institucionet dhe i jep qytetarit ndjenjën se institucionet punojnë për të. Ky është një rrugëtim i vështirë, por është e rëndësishme që të vazhdojmë të punojmë në këtë drejtim. Është me rendësi për Kosovën në përgjithësi dhe luan rol të madh drejt rrugëtimit të Kosovës në BE. Prandaj jam krenare që kemi ofruar këtë mbështetje sepse është me rendësi për të gjitha palët e përfshira dhe për qytetarët e Kosovës sundimi i ligjit, transparenca, llogaridhënia, dhe ky projekt luan rol të rëndësishëm në këtë drejtim”, u shpreh Lobbezo, duke shtuar se Kosova dhe Holanda kanë punuar shumë se bashku në dy dekadat e fundit dhe janë mike të mira. Kurse kryetari i Komunës së Vushtrrisë, Xhafer Tahiri, tha se të gjeturat e Auditorit të Përgjithshëm si sheh si një mundësi që të përmirësojë praktikat e menaxhimit të parasë publike. Ai shprehu gatishmërinë për t’i zbatuar të gjeturat e auditorit në raportin e auditimit për vitin 2019. “E pranoj që nuk është bërë mjaftueshëm në adresim të rekomandimeve për sa i takon raportit të auditimit për vitin 2018. Qëndrojmë shumë më mirë në zbatimin  e rekomandimeve nga njësia e auditorit të brendshëm, por jo tek auditori i jashtëm dhe një prej arsyeje janë disa probleme strukturale që i përmenda tek keqklasifikimi, planifikimi dhe menaxhimi”, deklaroi Tahiri. Ndërsa redaktori përgjegjës në BIRN Kosova, Visar Prebreza, tha se secili kryetar i komunës apo udhëheqës i institucioni duhet ta merr raportin e auditorit si një udhërrëfyes për punën dhe vizionin  e tij  se si t’i adresoj të gjitha shkeljet. Ai tha se Komuna e Vushtrrisë qëndron mirë sa i përket ekzekutimit të buxhetit për investime kapitale në gjashtëmujorin e parë, megjithatë sipas Prebrezes, një prej elementeve shqetësuese ka qenë ekzekutimi shumë i vogël për subvencione. Gjithashtu sektori i prokurimit  është keq dhe kërkon një intervenim më të shpejtë për adresim. Prebreza tha se Vushtrria qëndron keq në aspektin e zbatimit të rekomandimeve të auditorit dhe për të pasur progres në këtë fushë duhet të bëjë një plan të mirë.

Me rastin e përfundimit të mandatit të Avokatit të Popullit, Hilmi Jashari ka pritur në takim përshëndetës Auditorin e Përgjithshëm, Besnik Osmani. Me këtë rast Auditori i Përgjithshëm, ka përgëzuar z. Jashari për përmbushjen me sukses të mandatit pesëvjeçar duke avokuar gjithnjë  mbrojtjen, mbikëqyrjen dhe promovimin e të drejtave dhe lirive themelore në shoqërinë tonë. Osmani në veçanti ka theksuar bashkëpunimin e kultivuar gjatë këtij mandati në mes të dy institucioneve, dhe angazhimin e përbashkët për të adresuar çështje me interes për vendin dhe shoqërinë. Ai ka shprehur përkushtimin që ky nivel i bashkëpunimit institucional të vazhdojë edhe në të ardhmen. Nga ana tjetër Avokati i Popullit të Kosovës, Hilmi Jashari, e falënderoi Auditorin e Përgjithshëm, Besnik Osmani për vizitën si dhe e vlerësoi lartë bashkëpunimin me Zyrën Kombëtare të Auditimit gjatë këtyre pesë viteve sa ka drejtuar Institucionin e Avokatit të Popullit.

Të enjten në Komunën e Kamenicës u mbajt debati i parë nga BIRN Kosova në kuadër të projektit “Mbështetja e shoqërisë civile për të rritur mbikëqyrjen publike dhe llogaridhënien e institucioneve publike të Kosovës” i mbështetur nga Zyra e Jashtme e Komonuelthit përmes Ambasadës së Mbretërisë së Bashkuar në Prishtinë. Pjesëmarrës në këtë debat ishin kryetari i Komunës së Kamenicës, Qëndron Kastrati, Ndihmës Auditori i Përgjithshëm, Naser Arllati, Udhëheqësi i Auditimit, Astrit Bllaca, redaktori përgjegjës në BIRN Kosova, Visar Prebreza si dhe asamblistë të kësaj komune. Me këtë rast, Udhëheqësi i Auditimit, Astrit Bllaca, tha se raportet e auditimit të Zyrës Kombëtare të Auditimit (ZKA) promovojnë drejtpërsëdrejti llogaridhënien dhe ofrojnë bazë të qëndrueshme për Kuvendin dhe aksionarët për t’iu kërkuar llogari drejtuesve të organizatave buxhetore dhe menaxhereve të ndërmarrjeve publike. Ai tha se rëndësia e raporteve të auditimit qëndron në identifikimin e dobësive në sistemet e qeverisjes, veçanërisht të sistemeve financiare, ndërsa zbatimi i rekomandimeve të auditimit shërben si një mekanizëm për sanimin e këtyre dobësive dhe bërjen e sistemeve më efikase dhe efektive në arritjen e objektivave. Bllaca bëri me dije se për vitin 2019 Komuna e Kamenicës ka opinion të pamodifikuar, që nënkupton se Pasqyrat Financiare Vjetore paraqesin një pamje të drejtë dhe të vërtetë në të gjitha aspektet materiale dhe në përputhje me Standardet Ndërkombëtare të Kontabilitetit për Sektorin Publik. “Komuna e Kamenicës kishte shpenzuar 92% të buxhetit final për vitin 2019, 2% me shume krahasuar me vitin 2018. Kontrollet mbi të hyrat dhe shpenzimet në përgjithësi janë të përshtatshme, megjithatë nevojiten përmirësime të mëtutjeshme në fushën e subvencioneve, investimeve kapitale, menaxhimin e pasurisë, obligimeve, llogarive të arkëtueshme dhe klasifikimin e shpenzimeve në kategorinë e duhur ekonomike”, u shpreh ai. Ndër të tjera Bllaca tha se niveli i zbatimit të rekomandimeve është treguesi më i mirë se si menaxhmenti po përmirëson proceset ekzistuese dhe po rrit kontrollet në fushat ku janë identifikuar gabimet dhe parregullsitë. Ai tha se Komuna e Kamenicë qëndron shumë mirë në aspektin e zbatimit të rekomandimeve në raport me komunat e tjera.  “Për vitin 2018 kemi dhënë nëntë rekomandime, prej tyre pesë janë zbatuar, dy nuk janë zbatuar dhe dy konsiderohen të mbyllura. Ndërsa për vitin 2019 janë dhënë nëntë rekomandime, shtatë prej të cilave janë rekomandime të reja dhe dy të përsëritura”, theksoi Bllaca. Ndërkohë kryetari i Komunës së Kamenicës, Qëndron Kastrati, tha se për herë të parë Komuna e Kamenicës ka një opinion të pamodifikuar dhe pa theksim të çështjes nga Auditori i Përgjithshëm. Ai theksoi se ky opinion është motiv për këtë komunë që të avancojë qeverisjen dhe shërbimet ndaj qytetarëve. “Për funksionimin sa më të mirë të institucionit pjesa më rëndësishme është auditimi, qoftë auditimi i jashtëm apo i brendshëm. Më sa kam informacion Komuna e Kamenicës për herë të parë ka pranuar një raport të auditimit me opinion të pamodifikuar dhe pa theksim të çështjes. Kjo na ka bërë të ndihemi mirë dhe na motivon që të angazhohemi edhe më shumë dhe të avancojmë tutje”, u shpreh Kastrati. Ai u zotua se do të angazhohet edhe më tutje në zbatimin e rekomandimeve të Auditorit të Përgjithshëm. Duke folur për qeverisjen e kësaj komune, Kastrati tha se në vitin 2018 Kamenica ka qenë komuna me përqindjen më të lartë të rritjes së inkasimit të tatimit në pronë. Ai rikujtoj se është rritur edhe buxheti për investime kapitale dhe subvencione krahasuar me dy vitet paraprake. Kastrati tha se problem për Komunën e Kamenicës do të jetë çështja e pagesave për pagat jubilare për mësimdhënës përmes vendimeve gjyqësore. Ai tha se për Kamenicën do të jenë të papërballueshme vendimet e tilla. Ndërsa redaktori përgjegjës në BIRN Kosova, Visar Prebreza, duke folur për analizën e raporteve të auditimit dhe zbatimin e rekomandimeve, tha se në dy vitet e fundit Komuna e Kamenicës  ka rritur investimet kapitale dhe kjo është një punë e mirë që është bërë. Ai tha se Komuna e Kamenicës vazhdimisht ka pasur opinion jo të mirë të Auditorit, kurse tani ka arritur që të ketë opinion të pamodifikuar dhe pa theksim të çështjes.  “Lajm i mirë është që për vitin 2019 opinion i Auditorit për Komunën e Kamenicës është i pamodifikuar dhe pa theksim të çështjes. Sa i përket çështjes së zbatimit të rekomandimeve duhet të cekim se komunat qëndrojnë jashtëzakonisht keq, është diku rreth 40 % mesatarja e nivelit të zbatimit të rekomandimeve”, tha ai. Prebreza vlerësoi se komunat duhet të rrisin kontrollin e brendshëm dhe zbatimin e rekomandimeve të Auditorit të Përgjithshëm. Ai tha se Kamenica nuk qëndron keq në këtë aspekt. “Komuna e Kamenicës ndër vite nuk ka pasur shumë rekomandime,  në dy vitet e fundit kemi më pak rekomandime dhe po ashtu gjatë kësaj periudhe është rritur niveli i zbatimit të rekomandimeve. Në raportin e fundit të auditimit për këtë komunë janë dhënë vetëm nëntë rekomandime, prej të cilave disa janë lehtë të zbatueshme”, deklaroi ai.

“Qeverisja dhe Shpenzimi i Parasë Publike” ishte tema e debatit të radhës që u mbajt të hënën në Lipjan nga BIRN Kosova në kuadër të projektit “Promovimi i rolit të Auditorit të Përgjithshëm / ZKA në Kosovë”, i mbështetur nga Ambasada e Mbretërisë Holandeze/ Ministria e Punëve të Jashtme. Të pranishëm në debat ishin kryetari i Komunës së Lipjanit, Imri Ahmeti, Ndihmës Auditori i Përgjithshëm, Naser Arllati, drejtori i Departamentit të Auditimit, Bujar Bajraktari, redaktori përgjegjës në BIRN Kosova, Visar Prebreza, asamblistë të kësaj komune si dhe përfaqësues të shoqërisë civile. Drejtori i Departamentit të Auditimit në Zyrën Kombëtare të Auditimit (ZKA), Bujar Bajraktari, tha se një debat i tillë nuk i zgjidh të gjitha problemet e menaxhimit dhe shpenzimit të parasë publike, megjithatë i kontribuon përmirësimit të menaxhimin të parasë publike. Duke folur për raportet e auditimit të Komunës së Lipjanit për tri vitet e fundit, Bajraktari theksoi se vërehet një përparim i dukshëm duke marrë parasysh edhe numrin e rekomandimeve. “Në vitin 2017 Komuna e Lipjanit ka pasur 15 rekomandime, në vitin 2018 nëntë rekomandime ndërsa për vitin 2019 janë dhënë gjashtë rekomandime. Lidhur me rekomandimet e vitit 2018 kemi konstatuar se tri rekomandime janë zbatuar, tri rekomandime kanë qenë në proces të zbatimit dhe tri të tjera janë konsideruar të mbyllura”, deklaroi Bajraktari. Tutje Bajraktari tha se çështjet kryesore për vitin 2019 që janë identifikuar në Komunën e Lipjanit përfshijnë keqklasifikimin e shpenzimeve i cili ka ardhur për shkak të ekzekutimit të pagesave për pagat jubilare nga ana e thesarit përmes përmbarimeve gjyqësore; pagesën e disa zyrtarëve të Agjencisë për Menaxhimin e Emergjencave;  ngecjen e investimeve kapitale meqë nuk është bërë planifikimi i duhur; si dhe problemet me llogaritë e arkëtueshme, çështje kjo me të cilën ballafaqohen të gjitha komunat. Kurse kryetari i Komunës së Lipjanit, Imri Ahmeti, tha se raporti i auditimit i kësaj komune për vitin 2019 është ndër raportet më të mira në nivel vendi. “Është opinion i pamodifikuar pa theksim të çështjes. Por megjithatë dobësi dhe të meta kemi të gjithë. Në proces e sipër duhet të implementojmë të gjitha rekomandimet që na vijnë prej raporteve të auditimit. Për çdo vit e kemi adresuar planin e implementimit të rekomandimeve në asamblenë komunale. Lipjani është i përkushtuar për të implementuar çdo rekomandim të Auditorit të jashtëm”, u shpreh Ahmeti. Ndër të tjera ai përmendi vështirësitë me të cilat ballafaqohet komuna, duke thënë se alokimi dhe aprovimi i buxhetit nuk po ndodh në kohën e duhur. Sipas Ahmetit, kjo paraqet telashe për shumicën e komunave dhe organizatave buxhetore. Sidoqoftë Ahmeti deklaroi se buxheti i adresohet nevojave të qytetarëve të Lipjanit. Ndërsa redaktori përgjegjës në BIRN Kosova, Visar Prebreza, duke  prezantuar analizën për të gjeturat e auditorit, tha se Komuna e Lipjanit ka pasur ngecje në ekzekutim të shpenzimeve kapitale në gjashtë mujorin e parë, që ndoshta lidhet me pandeminë apo me inicimin e projekteve me vonesë. Ai theksoi se në Lipjan vitin e kaluar 55 për qind e buxhetit të investimeve kapitaleve është ekzekutuar në tre mujorin e fundit dhe kjo është njëra prej dobësive që duhet të ndryshohet për shkak se në tre mujorin e fundit shpeshherë institucionet obligohen që të kryejnë punë të cilat ndoshta edhe nuk janë të cilësisë së duhur, vetëm e vetëm që buxheti mos të shkojë në suficit. “Duhet të punohet që shtrirja e projekteve të jetë gjithmonë në gjithë muajt e vitit, planifikimi i prokurimit të bëhet shumë më herët në mënyrë që shpenzimi të mos koncentrohet në tre muajt e fundit për shkak se shpeshherë kushtet atmosferike pamundësojnë kryerjen e punëve në teren. Kjo është njëra prej pikave të dobëta e cila duhet të adresohet dhe normalisht kjo lidhet edhe me një të gjetur tjetër të Auditorit e cila flet për zvarritjen e projekteve në Komunën e Lipjanit. Komuna duhet të jetë më dorë shtrëngues sa i përket trajtimit të operatorëve ekonomik që i zvarrisin punët. Çështja e borxheve që i ka komuna ose që bizneset ja kanë komunës dhe sado që Komuna e Lipjanit qëndron shumë më mirë sa i përket borxheve që palët e treta ja kanë komunës, prapë një borxh prej 4.4 milionë euro është i lartë dhe duhet të adresohet aty ku ka mundësi”, deklaroi Prebreza.

Në kuadër të projektit “Promovimi i rolit të Auditorit të Përgjithshëm / ZKA në Kosovë”, i mbështetur nga Ambasada e Mbretërisë Holandeze/ Ministria e Punëve të Jashtme, BIRN Kosova të mërkurën në Komunën e Dragashit organizoi debatin me temën “Ndikimi i pandemisë në të hyrat dhe shpenzimet e komunës”. Të pranishëm në debat ishin kryetari i Komunës së Dragashit, Shaban Shabani, Ndihmës Auditori i Përgjithshëm, Emine Fazliu, redaktori përgjegjës në BIRN Kosova, Visar Prebreza si dhe përfaqësues të shoqërisë civile e asamblistë të kësaj komune. Ndihmës Auditori i Përgjithshëm, Emine Fazliu, tha se opinioni i auditimit për pasqyrat financiare vjetore të Komunës së Dragashit për vitin 2019 është opinion i pamodifikuar, që do të thotë se pasqyrat financiare vjetore prezantojnë një pamje të drejtë dhe të vërtetë. Fazliu bëri me dije se gjetjet kryesore të raportit të auditimit të Komunës së Dragashit për vitin 2019 kryesisht kanë të bëjnë me klasifikimin jo adekuat të shpenzimeve, parregullsi në dhënien e pronave komunale me qira, dobësi në procedurat e mbajtjes së ankandit publik, mangësi në inkasimin e të hyrave për lejet mjedisore komunale, depozitim i vonuar i parasë publike si dhe dobësi në procesin e rekrutimit. Tutje Fazliu theksoi se rekomandimet e Auditorit kanë për qellim përmirësimin e menaxhimit të  financave publike dhe forcimin e kontrolleve të brendshme në komunë dhe se zbatimi i plotë i tyre ndikon në rritjen e performancës së komunës dhe përmirësimin e shërbimeve ndaj qytetarëve. “Komuna e Dragashit ka zbatuar 38.9 për qind të rekomandimeve e që është pak mbi mesataren e zbatimit të përgjithshëm të rekomandimeve në nivel lokal prej 37 për qind. ZKA në raportin e auditimit për vitin 2018 kishte dhënë 18 rekomandime, prej tyre shtatë janë zbatuar, një ishte në proces, tri ishin të pa adresuara dhe shtatë janë vlerësuar si rekomandime të mbyllura. Kurse në raportin e auditimit për vitin 2019 kemi dhënë 15 rekomandime, prej tyre nëntë rekomandime janë të reja ndërsa të tjerat janë rekomandime që përsëriten ndër vite. ZKA kërkon nga kryetari i Komunës së Dragashit që të fokusohet te zbatimi i rekomandimeve”, deklaroi Fazliu. Kurse kryetari i Komunës së Dragashit, Shaban Shabani, vlerësoi se mbajtja e këtij debati i kontribuon rritjes së transparencës të komunës. Shabani tha se Auditorin e Përgjithshëm e konsiderojnë si mekanizëm mjaftë të rëndësishëm për përmirësimin e qeverisjes dhe shërbimeve ndaj qytetarëve. Në këtë kontekst ai tha se gjetjet e auditorit janë të pranueshme dhe të arsyeshme, me ç’rast u zotua se do të implementohen të gjitha rekomandimet. “Auditori i Përgjithshëm nga viti në vit na ka inkurajuar që ne të përmirësohemi dhe kemi përparim në këtë drejtim. Jemi në proces të implementimit të rekomandimeve dhe po punojmë për të përmirësuar gjendjen dhe qeverisjen në Komunën e Dragashit”, u shpreh Shabani. Ndër të tjera Shabani tha se pandemia Covid-19 ka ndikuar në uljen e të hyrave në Komunën e Dragashit. Ndërsa redaktori përgjegjës në BIRN Kosova, Visar Prebreza, duke  prezantuar analizën për të gjeturat e auditorit, tha se pandemia në këtë komunë ka vështirësuar çështjen e të hyrave dhe shpenzimeve të parasë publike. Ai theksoi se në raportin e shpenzimeve në gjashtëmujorin e parë vërehet një ekzekutim i ulët i shpenzimeve kapitale, pra vetëm 8 për qind e planit. Megjithatë sipas Prebrezes, nuk duhet t’i lihet faji vetëm pandemisë sepse Dragashi  ka qenë keq sa i përket shpenzimeve edhe vitin e kaluar, duke ekzekutuar vetëm 56 për qind të shpenzimeve të planifikuara kapitale. “Madje Auditori në raportin e tij ka thënë se 60 për qind e tyre janë ekzekutuar në muajt e fundit të vitit dhe kjo praktikë duhet të ndryshohet. Shpenzimet kryesisht kapitale lidhen me prokurimin publik dhe në ketë fushë shumica e institucioneve kanë pasur çalime. Komuna e Dragashit  ka pasur vonesa për disa vite në projektin e ujësjellësit, pra banorët e 15 fshatrave mbesin pa ujë për shkak të shkeljeve që bëhen në prokurim, dhe Komuna e ka fajin e vet për zvarritjen e projekteve në prokurim”, theksoi ai, duke shtuar se Auditori ka gjetur lëshime edhe sa i përket dhënies se pronave me qira, problem ky që ka nisur moti, por që nuk është adresuar prej qeverisjes aktuale. Prebreza vlerësoi se kur do të kemi zbatim të rekomandimeve në nivel prej 70 për qind do të jemi pjesë e BE-së. Ai tha se duhet të kemi sa më pak gjetje dhe ato që janë të merren seriozisht nga drejtuesit e institucioneve.

Në kuadër të Projektit të Binjakëzimit “Fuqizimi i mëtejshëm i ndikimit të Zyrës Kombëtare të Auditimit të Kosovës” dhe me qëllim të ngritjes së kapaciteteve të brendshme për zbatimin e metodologjisë së përditësuar në auditimin financiar dhe të pajtueshmërisë sot ka filluar trajnimi tre javor i auditorëve të ZKA-së. Ky trajnim është aktiviteti i parë në kuadër të programit të trajnimeve të brendshme që do të zhvillohen gjatë shtatorit dhe gjysmës së parë të tetorit 2020, në ZKA. Auditori i Përgjithshëm i Kosovës, Besnik Osmani, përmes komunikimit elektronik me stafin, vlerësoi se trajnimi ka për qëllim ngritjen e kapaciteteve të ZKA-së në fushën e metodologjisë. Me këtë rast Osmani përmendi investimet e shumta që janë bërë në përditësimin e metodologjisë së auditimit në mënyrë që ZKA-ja të jetë sa më afër standardeve ndërkombëtare të auditimit si dhe të përvetësojë praktikat më të mira ndërkombëtare të planifikimit dhe zbatimit të auditimit. Auditori i Përgjithshëm falënderoj drejtuesit e projektit dhe stafin e ZKA-së për punën e mirë të bërë deri më tani në zhvillimin e doracakëve dhe letrave të punës. Për shkak të gjendjes pandemike me Covid-19 seancat trajnuese janë duke u mbajtur përmes platformës Zoom. Realizimi i trajnimit është ndarë në dy pjesë/module. Në pjesën e parë parashihet mbajtja e trajnimit për zbatimin e metodologjisë për planifikimin e përgjithshëm dhe detaj në auditim, kurse në pjesën e dytë do të mbahet trajnimi për zbatimin e metodologjisë për fazën e ekzekutimit dhe të raportimit në auditim. Faza e parë e këtij trajnimi ka filluar sot dhe do të zgjasë deri më 25 shtator, ndërsa faza e dytë do të organizohet gjatë muajit janar të vitit 2021. Në fund të trajnimit auditorët do t’i nënshtrohen testimit si dhe do të pajisen me certifikatë.

Auditori i Përgjithshëm, Besnik Osmani, i ka dorëzuar kryetares së Kuvendit, Vjosa Osmani -Sadriu, Raportin Vjetor të Auditimit të Pasqyrave Vjetore Financiare të Buxhetit të Republikës së Kosovës për vitin 2019. Osmani u pritë në takim të veçantë nga kryetarja e Kuvendit dhe me këtë rast, e ka informuar atë për përmbylljen me sukses të vitit auditues, si dhe për sfidat, të cilat e kanë shoqëruar procesin, për shkak të gjendjes së krijuar nga pandemia. “Ka qenë sfiduese balancimi i nevojave për ruajtjen e shëndetit të auditorëve dhe paralelisht zbatimi i mandatit, duke siguruar cilësinë e punës sonë, por, përkundër vështirësive kemi arritur që me kohë të dorëzojmë Raportin e Auditimit për Pasqyrat Vjetore Financiare të Buxhetit të Republikës të Kosovës për vitin 2019, duke e përmbyllur me sukses të plotë vitin auditues”, ka deklaruar Osmani. Ndër të tjera, Auditori i Përgjithshëm, ka theksuar se fokusi parësor i punës së ZKA-së kanë qenë vlerësimet për cilësinë e raportimit financiar, dizajnimin dhe efektivitetin e sistemeve të kontrollit të brendshëm, si dhe pajtueshmërinë e transaksioneve financiare me ligjet dhe rregulloret në fuqi. Përmes procesit të auditimit është konstatuar se ka një progres të lehtë në fushën e raportimit financiar, por mangësitë dhe dobësitë më të theksuara vazhdojnë të mbeten në aktivitetet ekzekutive të buxhetit, ku shumë projekte kapitale fillohen pa fonde të mjaftueshme, dhe për shkak të kësaj, ato rrallëherë përfundohen me kohë, ndërkohë që mbikëqyrja nuk parandalon devijimet e shumta nga kushtet e përcaktuara me kontrata. Me këtë rast në mënyrë të veçantë është kërkuar nga Qeveria që të forcojë disiplinën financiare, sepse shumat e detyrimeve të papaguara dhe llogarive të arkëtueshme kanë arritur shifra të larta, dhe pa dyshim janë sfidat kryesore të Qeverisë derisa regjistrimi dhe menaxhimi i pasurive paraqesin një problem të përsëritur prej shumë vitesh, dhe progresi në këtë fushë është i varfër, u shpreh Auditori i Përgjithshëm. Gjatë vitit raportues janë audituar 95 organizata buxhetore me një buxhet të përgjithshëm rreth 2.5 miliardë, 14 ndërmarrje publike kryesisht në fushën e telekomunikimit, furnizimit me ujë dhe trajtimit të mbeturinave, 13 auditime të performancës si dhe 9 projekte të financuara nga fondet e donatorëve. Zyra Kombëtare e Auditimit me 15 shtator fillon vitin e ri të auditimit dhe aktualisht në mënyrë intensive po punohet në planin vjetor të punës 2020/2021.

Auditimi i fondeve publike këtë vit ka qenë sfidues për shkak të ndikimit të pandemisë Covid- 19. Balancimi i nevojave për ruajtjen e shëndetit të auditorëve dhe paralelisht zbatimi i mandatit duke siguruar cilësinë e punës sonë ka shkaktuar vonesa në disa raporte individuale të auditimit, por kemi kënaqësinë që përkundër kushteve të rënda të punës të konfirmojmë se Zyra Kombëtare e Auditimit sot ka përfunduar Raportin Vjetor të Auditimit për Pasqyrat Vjetore Financiare të Buxhetit të Republikës të Kosovës për vitin 2019 dhe kështu është  përmbyllur me sukses të plotë viti i auditimit. Përveç performancës financiare të Qeverisë, raportet tona kanë ofruar informata shtesë edhe për fushat tjera që kanë të bëjnë me afarizmin e ndërmarrjeve publike, performancën e shpenzimeve të fondeve publike (ekonomizimi, efektiviteti dhe efikasiteti), si dhe zbatimin e procesit të prokurimit e raportimit financiar. Gjatë vitit raportues kemi audituar 95 organizata buxhetore me një buxhet të përgjithshëm rreth 2.5 miliardë, 14 ndërmarrje publike kryesisht në fushën e telekomunikimit, furnizimit me ujë dhe trajtimit të mbeturinave, 13 auditime të performancës si dhe 9 projekte të financuara nga fondet e donatorëve. Me rastin e përfundimit të vitit auditues, Auditori i Përgjithshëm, Besnik Osmani, ka theksuar se fokusi parësor i punës sonë kanë qenë vlerësimet për cilësinë e raportimit financiar, dizajnimin dhe efektivitetin e sistemeve të kontrollit të brendshëm, si dhe pajtueshmërinë e transaksioneve financiare me ligjet dhe rregulloret në fuqi. Përmes procesit të auditimit kemi konstatuar se ka një progres të lehtë në fushën e raportimit financiar, por mangësitë dhe dobësitë më të theksuara vazhdojnë të mbeten në aktivitetet ekzekutive të buxhetit ku shumë projekte kapitale fillohen pa fonde të mjaftueshme, dhe për shkak të kësaj, ato rrallëherë përfundohen me kohë, ndërkohë që mbikëqyrja nuk parandalon devijimet e shumta nga kushtet e përcaktuara me kontrata. Me këtë rast në mënyrë të veçantë është kërkuar nga Qeveria që të forcoj disiplinën financiare sepse shumat e detyrimeve të papaguara dhe llogarive të arkëtueshme kanë arritur shifra të larta, dhe pa dyshim janë sfidat kryesore të Qeverisë derisa regjistrimi dhe menaxhimi i pasurive paraqesin një problem të përsëritur prej shumë vitesh, dhe progresi në këtë fushë është i varfër. Me rastin e përfundimit të vitit auditues falënderojmë organizatat e audituara për bashkëpunimin korrekt në këto kushte të pandemisë deri sa vlerësojmë me notat më të larta personelin e Zyrës Kombëtare të Auditimit të cilët me përkushtim dhe profesionalizëm përmbyllen me sukses planin e punës. Zyra Kombëtare e Auditimit me 15 shtator fillon vitin e ri të auditimit dhe aktualisht në mënyrë intensive po punohet në planin vjetor të punës 2020/2021.

Organizata  Ndërkombëtare e Institucioneve Supreme të Auditimit (INTOSAI) ka publikuar edicionin e verës të gazetës së saj, ku trajtohen tema të ndryshme lidhur me procesin e auditimit gjatë kësaj periudhe si dhe praktikat e Institucioneve Supreme të Auditimit në ballafaqimin me pandeminë Covid-19. Pjesë e këtij edicioni të gazetës së INTOSA-it përkatësisht në rubrikën për liderët e rinj është edhe Zyra Kombëtare e Auditimit përmes opinionit të punonjës së saj, Qëndresa Mulaj - Udhëheqëse e Departamentit për Bashkëpunim Ndërkombëtar. Në paraqitjen e saj, Mulaj ka shpalosur përvojën e Zyrës Kombëtare të Auditimit të Kosovës gjatë përballjes me virusin Covid-19. Ndër të tjera Mulaj ka thënë se papritur po përballemi me një krizë globale që po kërcënon grupet e ndjeshme si dhe më të dashurit tanë, dhe rrethanat e reja kanë ndikuar drejtpërdrejt tek ne profesionalisht dhe personalisht. “Organizatat, përfshirë Institucionet Supreme të Auditimit, duhet të përshtaten me normën e re dhe të gjejnë mënyra alternative për të vepruar. Është shumë e rëndësishme që udhëheqësit të kenë një përqendrim të fortë te njerëzit dhe marrëdhëniet ndërsa adresojnë proceset, detyrat dhe rezultatet për të përmbushur objektivat dhe afatet kohore”, ka theksuar ajo. Nga përvoja e Zyrës Kombëtare të Auditimit në përballjen me Covid-19, Mulaj ka thënë se është e rëndësishme të ketë komunikim, besim, ndjeshmëri dhe bashkëpunim të mirë. “Mbajtja e ekipit të përqendruar dhe të angazhuar, gjë që mund të ndikojë në arritjen e rezultateve të planifikuara, ka qenë shumë e vështirë gjatë operimit gjatë pandemisë. Situata është akoma shumë e paparashikueshme, kështu që unë komunikoj shpesh, dërgoj mesazhe të qarta, vendos përparësi dhe marr vendime me bindje. Si ekip, ne ndjehemi të fuqizuar dhe pronarë të objektivave tona me qëllim që të kemi sukses”, është shprehur Mulaj. Gazetën mund ta lexoni në këtë link  

Zyra Kombëtare e Auditimit ka publikuar raportin e auditimit “Efektiviteti i ndërlidhjes së arsimit dhe aftësimit profesional me nevojat e tregut të punës”. Auditimi është kryer në Ministrinë e Arsimit dhe Shkencës, Ministrinë e Punës dhe Mirëqenies Sociale dhe komunat: Prishtinë, Prizren dhe Ferizaj si dhe ka pasur për qëllim të vlerësojë efektivitetin e masave të ndërmarra nga institucionet publike për zhvillimin e njohurive dhe aftësive profesionale dhe ndërlidhjen e tyre me nevojat e vazhdueshme të tregut të punës. Pavarësisht përpjekjeve të Ministrisë së Arsimit dhe Shkencës dhe të akterëve relevant për të rishikuar kurrikulat e profileve të arsimit dhe aftësimit profesional dhe për t’i bazuar ato në zhvillimin e standardeve të profesionit, ky qëllim nuk është arritur. Kjo për faktin se, një pjesë e konsiderueshme e kurrikulave nuk janë rishikuar ende dhe një numër shumë i kufizuar i institucioneve të arsimit dhe aftësimit profesional janë duke zbatuar kurrikulat e rishikuara. Po ashtu, mësimi praktik në punëtoritë e Institucioneve të Arsimit dhe Aftësimit Profesional dhe praktika profesionale në biznese janë realizuar me vështirësi dhe ngecje të mëdha. Institucionet përgjegjëse nuk kanë arritur të ofrojnë mundësi efektive për përvetësimin dhe zhvillimin e aftësive dhe shkathtësive dhe nuk kanë siguruar se janë krijuar kushtet e nevojshme për zbatimin e formave duale të arsimit, kushte këto që mundësojnë realizimin e mësimit praktik në ambientet e shkollës dhe praktikës profesionale në biznese. Kjo është pamundësuar për shkak të mungesës së pajisjeve të nevojshme në shkolla, mungesës së kabineteve apo punëtorive, problemeve me pajisjet aktuale, mungesës së materialit shpenzues, etj. Me qëllim të adresimit të shpejtë të çështjeve për të ndërlidhur arsimin dhe aftësimin profesional me kërkesat dhe nevojat e tregut të punës, Zyra Kombëtare e Auditimit ka dhënë 16 rekomandime për institucionet përkatëse. Raportin e plotë mund ta lexoni në këtë vegëz.