Lajmet

Auditori i Përgjithshëm, Besnik Osmani, i ka dorëzuar kryetares së Kuvendit, Vjosa Osmani -Sadriu, Raportin Vjetor të Auditimit të Pasqyrave Vjetore Financiare të Buxhetit të Republikës së Kosovës për vitin 2019. Osmani u pritë në takim të veçantë nga kryetarja e Kuvendit dhe me këtë rast, e ka informuar atë për përmbylljen me sukses të vitit auditues, si dhe për sfidat, të cilat e kanë shoqëruar procesin, për shkak të gjendjes së krijuar nga pandemia. “Ka qenë sfiduese balancimi i nevojave për ruajtjen e shëndetit të auditorëve dhe paralelisht zbatimi i mandatit, duke siguruar cilësinë e punës sonë, por, përkundër vështirësive kemi arritur që me kohë të dorëzojmë Raportin e Auditimit për Pasqyrat Vjetore Financiare të Buxhetit të Republikës të Kosovës për vitin 2019, duke e përmbyllur me sukses të plotë vitin auditues”, ka deklaruar Osmani. Ndër të tjera, Auditori i Përgjithshëm, ka theksuar se fokusi parësor i punës së ZKA-së kanë qenë vlerësimet për cilësinë e raportimit financiar, dizajnimin dhe efektivitetin e sistemeve të kontrollit të brendshëm, si dhe pajtueshmërinë e transaksioneve financiare me ligjet dhe rregulloret në fuqi. Përmes procesit të auditimit është konstatuar se ka një progres të lehtë në fushën e raportimit financiar, por mangësitë dhe dobësitë më të theksuara vazhdojnë të mbeten në aktivitetet ekzekutive të buxhetit, ku shumë projekte kapitale fillohen pa fonde të mjaftueshme, dhe për shkak të kësaj, ato rrallëherë përfundohen me kohë, ndërkohë që mbikëqyrja nuk parandalon devijimet e shumta nga kushtet e përcaktuara me kontrata. Me këtë rast në mënyrë të veçantë është kërkuar nga Qeveria që të forcojë disiplinën financiare, sepse shumat e detyrimeve të papaguara dhe llogarive të arkëtueshme kanë arritur shifra të larta, dhe pa dyshim janë sfidat kryesore të Qeverisë derisa regjistrimi dhe menaxhimi i pasurive paraqesin një problem të përsëritur prej shumë vitesh, dhe progresi në këtë fushë është i varfër, u shpreh Auditori i Përgjithshëm. Gjatë vitit raportues janë audituar 95 organizata buxhetore me një buxhet të përgjithshëm rreth 2.5 miliardë, 14 ndërmarrje publike kryesisht në fushën e telekomunikimit, furnizimit me ujë dhe trajtimit të mbeturinave, 13 auditime të performancës si dhe 9 projekte të financuara nga fondet e donatorëve. Zyra Kombëtare e Auditimit me 15 shtator fillon vitin e ri të auditimit dhe aktualisht në mënyrë intensive po punohet në planin vjetor të punës 2020/2021.

Auditimi i fondeve publike këtë vit ka qenë sfidues për shkak të ndikimit të pandemisë Covid- 19. Balancimi i nevojave për ruajtjen e shëndetit të auditorëve dhe paralelisht zbatimi i mandatit duke siguruar cilësinë e punës sonë ka shkaktuar vonesa në disa raporte individuale të auditimit, por kemi kënaqësinë që përkundër kushteve të rënda të punës të konfirmojmë se Zyra Kombëtare e Auditimit sot ka përfunduar Raportin Vjetor të Auditimit për Pasqyrat Vjetore Financiare të Buxhetit të Republikës të Kosovës për vitin 2019 dhe kështu është  përmbyllur me sukses të plotë viti i auditimit. Përveç performancës financiare të Qeverisë, raportet tona kanë ofruar informata shtesë edhe për fushat tjera që kanë të bëjnë me afarizmin e ndërmarrjeve publike, performancën e shpenzimeve të fondeve publike (ekonomizimi, efektiviteti dhe efikasiteti), si dhe zbatimin e procesit të prokurimit e raportimit financiar. Gjatë vitit raportues kemi audituar 95 organizata buxhetore me një buxhet të përgjithshëm rreth 2.5 miliardë, 14 ndërmarrje publike kryesisht në fushën e telekomunikimit, furnizimit me ujë dhe trajtimit të mbeturinave, 13 auditime të performancës si dhe 9 projekte të financuara nga fondet e donatorëve. Me rastin e përfundimit të vitit auditues, Auditori i Përgjithshëm, Besnik Osmani, ka theksuar se fokusi parësor i punës sonë kanë qenë vlerësimet për cilësinë e raportimit financiar, dizajnimin dhe efektivitetin e sistemeve të kontrollit të brendshëm, si dhe pajtueshmërinë e transaksioneve financiare me ligjet dhe rregulloret në fuqi. Përmes procesit të auditimit kemi konstatuar se ka një progres të lehtë në fushën e raportimit financiar, por mangësitë dhe dobësitë më të theksuara vazhdojnë të mbeten në aktivitetet ekzekutive të buxhetit ku shumë projekte kapitale fillohen pa fonde të mjaftueshme, dhe për shkak të kësaj, ato rrallëherë përfundohen me kohë, ndërkohë që mbikëqyrja nuk parandalon devijimet e shumta nga kushtet e përcaktuara me kontrata. Me këtë rast në mënyrë të veçantë është kërkuar nga Qeveria që të forcoj disiplinën financiare sepse shumat e detyrimeve të papaguara dhe llogarive të arkëtueshme kanë arritur shifra të larta, dhe pa dyshim janë sfidat kryesore të Qeverisë derisa regjistrimi dhe menaxhimi i pasurive paraqesin një problem të përsëritur prej shumë vitesh, dhe progresi në këtë fushë është i varfër. Me rastin e përfundimit të vitit auditues falënderojmë organizatat e audituara për bashkëpunimin korrekt në këto kushte të pandemisë deri sa vlerësojmë me notat më të larta personelin e Zyrës Kombëtare të Auditimit të cilët me përkushtim dhe profesionalizëm përmbyllen me sukses planin e punës. Zyra Kombëtare e Auditimit me 15 shtator fillon vitin e ri të auditimit dhe aktualisht në mënyrë intensive po punohet në planin vjetor të punës 2020/2021.

Organizata  Ndërkombëtare e Institucioneve Supreme të Auditimit (INTOSAI) ka publikuar edicionin e verës të gazetës së saj, ku trajtohen tema të ndryshme lidhur me procesin e auditimit gjatë kësaj periudhe si dhe praktikat e Institucioneve Supreme të Auditimit në ballafaqimin me pandeminë Covid-19. Pjesë e këtij edicioni të gazetës së INTOSA-it përkatësisht në rubrikën për liderët e rinj është edhe Zyra Kombëtare e Auditimit përmes opinionit të punonjës së saj, Qëndresa Mulaj - Udhëheqëse e Departamentit për Bashkëpunim Ndërkombëtar. Në paraqitjen e saj, Mulaj ka shpalosur përvojën e Zyrës Kombëtare të Auditimit të Kosovës gjatë përballjes me virusin Covid-19. Ndër të tjera Mulaj ka thënë se papritur po përballemi me një krizë globale që po kërcënon grupet e ndjeshme si dhe më të dashurit tanë, dhe rrethanat e reja kanë ndikuar drejtpërdrejt tek ne profesionalisht dhe personalisht. “Organizatat, përfshirë Institucionet Supreme të Auditimit, duhet të përshtaten me normën e re dhe të gjejnë mënyra alternative për të vepruar. Është shumë e rëndësishme që udhëheqësit të kenë një përqendrim të fortë te njerëzit dhe marrëdhëniet ndërsa adresojnë proceset, detyrat dhe rezultatet për të përmbushur objektivat dhe afatet kohore”, ka theksuar ajo. Nga përvoja e Zyrës Kombëtare të Auditimit në përballjen me Covid-19, Mulaj ka thënë se është e rëndësishme të ketë komunikim, besim, ndjeshmëri dhe bashkëpunim të mirë. “Mbajtja e ekipit të përqendruar dhe të angazhuar, gjë që mund të ndikojë në arritjen e rezultateve të planifikuara, ka qenë shumë e vështirë gjatë operimit gjatë pandemisë. Situata është akoma shumë e paparashikueshme, kështu që unë komunikoj shpesh, dërgoj mesazhe të qarta, vendos përparësi dhe marr vendime me bindje. Si ekip, ne ndjehemi të fuqizuar dhe pronarë të objektivave tona me qëllim që të kemi sukses”, është shprehur Mulaj. Gazetën mund ta lexoni në këtë link  

Zyra Kombëtare e Auditimit ka publikuar raportin e auditimit “Efektiviteti i ndërlidhjes së arsimit dhe aftësimit profesional me nevojat e tregut të punës”. Auditimi është kryer në Ministrinë e Arsimit dhe Shkencës, Ministrinë e Punës dhe Mirëqenies Sociale dhe komunat: Prishtinë, Prizren dhe Ferizaj si dhe ka pasur për qëllim të vlerësojë efektivitetin e masave të ndërmarra nga institucionet publike për zhvillimin e njohurive dhe aftësive profesionale dhe ndërlidhjen e tyre me nevojat e vazhdueshme të tregut të punës. Pavarësisht përpjekjeve të Ministrisë së Arsimit dhe Shkencës dhe të akterëve relevant për të rishikuar kurrikulat e profileve të arsimit dhe aftësimit profesional dhe për t’i bazuar ato në zhvillimin e standardeve të profesionit, ky qëllim nuk është arritur. Kjo për faktin se, një pjesë e konsiderueshme e kurrikulave nuk janë rishikuar ende dhe një numër shumë i kufizuar i institucioneve të arsimit dhe aftësimit profesional janë duke zbatuar kurrikulat e rishikuara. Po ashtu, mësimi praktik në punëtoritë e Institucioneve të Arsimit dhe Aftësimit Profesional dhe praktika profesionale në biznese janë realizuar me vështirësi dhe ngecje të mëdha. Institucionet përgjegjëse nuk kanë arritur të ofrojnë mundësi efektive për përvetësimin dhe zhvillimin e aftësive dhe shkathtësive dhe nuk kanë siguruar se janë krijuar kushtet e nevojshme për zbatimin e formave duale të arsimit, kushte këto që mundësojnë realizimin e mësimit praktik në ambientet e shkollës dhe praktikës profesionale në biznese. Kjo është pamundësuar për shkak të mungesës së pajisjeve të nevojshme në shkolla, mungesës së kabineteve apo punëtorive, problemeve me pajisjet aktuale, mungesës së materialit shpenzues, etj. Me qëllim të adresimit të shpejtë të çështjeve për të ndërlidhur arsimin dhe aftësimin profesional me kërkesat dhe nevojat e tregut të punës, Zyra Kombëtare e Auditimit ka dhënë 16 rekomandime për institucionet përkatëse. Raportin e plotë mund ta lexoni në këtë vegëz.

Pavarësisht masave të ndërmarra dhe kujdesit të shtuar, tetë punonjës të Zyrës Kombëtare të Auditimit kanë rezultuar pozitiv me virusin Covid-19, ndërsa 30 të tjerë gjenden në vet-izolim. Të gjitha këto raste janë duke u trajtuar në shtëpi me kujdesin dhe udhëzimet e mjekëve dhe gjendja e tyre shëndetësore është e mirë. Po ashtu grupet e rrezikuara siç janë personat mbi 60 vjeç, shtatzënat dhe kronikët po punojnë nga distanca. Të gjitha ekipet e auditimit që për shkak të natyrës së punës audituese kanë qenë të detyruara të kryejnë edhe punë në terren, në vazhdimësi janë monitoruar për gjendjen shëndetësore dhe kanë raportuar në baza ditore kontaktet e mundshme me raste të testuara pozitiv me Covid-19. Përkundër që i kemi dhënë përparësi ruajtjes së shëndetit të stafit është arritur që të përfundohen dhe publikohen në uebfaqe më shumë se 60 raporte të auditimit dhe jemi në fazën finale të përfundimit të raporteve tjera të parapara me planin vjetor të punës. Janë marrë me kohë të gjitha masat mbrojtëse sipas rekomandimeve të institucioneve përgjegjëse shëndetësore dhe Manualit për mbrojtje nga përhapja e virusit Covid-19. ZKA-ja shpreh mirënjohjen e thellë për bashkëpunimin e krerëve dhe zyrtarëve nëpër institucionet e audituara që kanë punuar bashkë me ekipet në këto kushte të vështirësuara të punës si pasojë e pandemisë. Në mënyrë të veçantë falënderojmë personelin nga Instituti dhe Klinika Infektive që vazhdimisht kanë dhënë udhëzimet specifike dhe ndihmën për shëndetin e personelit tanë. Në këtë rast bëjmë thirrje për respektimin e masave të vendosura në mënyrë që të ruajmë vetën, familjen dhe shtetin.

Zyra Kombëtare e Auditimit ka publikuar raportin e auditimit të teknologjisë së informacionit “Menaxhimi i Obligimeve Tatimore në Sistemet e Informacionit të Administratës Tatimore të Kosovës”. Auditimi është kryer në Administratën Tatimore të Kosovës dhe kishte për qëllim vlerësimin e sistemeve të teknologjisë së informacionit të cilat mbështesin menaxhimin dhe administrimin e detyrimeve tatimore, për të siguruar që sistemet ofrojnë informacione të besueshme, të plota dhe të sakta. Administrimi dhe menaxhimi i detyrimeve tatimore bëhet nëpërmjet sistemeve të informacionit të ndërlidhura siç janë Sistemi Elektronik për Deklarim të Tatimit, Sistemi i Integruar Qeveritar për Administratën Tatimore dhe Sistemi për Menaxhimin e Rasteve të Mbledhjes. Sistemet e ndërlidhura tatimore kanë mundësuar ofrimin e shërbimeve online, ruajtjen dhe trajtimin e deklaratave tatimore dhe kanë zvogëluar shpenzimet operative për ATK-në duke mundësuar menaxhim më të lehtë të borxheve tatimore. Mirëpo, auditimi ka nxjerr përfundimin se pavarësisht avancimit të sistemeve dhe lehtësirave të ofruara, sistemet e teknologjisë së informacionit kanë mangësi që ndërlidhen me kontrollet e aplikacionit, konfigurimin e sistemit, kontrollet e qasjes logjike në sisteme, si dhe me sigurinë e informacionit dhe vazhdimësinë e sistemeve. Sistemet janë të ekspozuara ndaj rreziqeve të humbjes së integritetit dhe konfidencialitetit të të dhënave dhe disponueshmërisë së sistemeve. Këto mangësi kanë ndikuar në paraqitjen e një pasqyre jo të saktë dhe jo të plotë të llogarive të deklaratave tatimore, në rreziqe të funksionimit të sistemeve të informacionit, humbje të integritetit dhe konfidencialitetit të të dhënave dhe rreziqe në sigurinë e informacionit dhe vazhdimësinë e punës së sistemeve. Auditori i Përgjithshëm i Kosovës, Besnik Osmani, ka theksuar që rezultatet e auditimit tregojnë nevojën për përmirësime të menjëhershme në menaxhimin e sistemeve të informacionit, nëpërmjet të cilave administrohen detyrimet tatimore. Osmani, tha se duke marrë parasysh rëndësinë e detyrimeve tatimore që kanë për buxhetin e shtetit, Zyra Kombëtare e Auditimit ka rekomanduar Ministrinë e Financave që me prioritet të adresoj çështjet rreth sigurisë së informacionit dhe kapaciteteve të Administratës Tatimore të Kosovës. Me qëllim të adresimit të shpejtë të çështjeve të menaxhimit dhe kontrollit të teknologjisë së informacionit brenda organizatës, Zyra Kombëtare e Auditimit ka dhënë 18 rekomandime për Administratën Tatimore të Kosovës. Procesi dhe Metodologjia e zbatuar në këtë auditim, është mbështetur nga Projekti i Binjakëzimit i financuar nga BE-ja KS 17 IPA FI 01 19 “Fuqizimi i mëtejmë i ndikimit të Zyrës Kombëtare të Auditimit të Kosovës”. Raportin e plotë mund ta lexoni në këtë vegëz.

Auditori i Përgjithshëm i Republikës së Kosovës, Besnik Osmani, uroi z. Arben Shehu me rastin e emërimit të tij Kryetar i Kontrollit të Lartë të Shtetit të Republikës së Shqipërisë. Nëpërmjet një letre urimi, Osmani i ka dëshiruar Shehut sukses në arritjen e synimeve institucionale dhe përmbushjen e misionit kushtetues dhe ligjor në shërbim të vendit dhe qytetarëve. “Institucionet tona tashmë kanë ndërtuar një bashkëpunim të fortë dhe ka një traditë të shkëmbimeve profesionale dhe organizimin e aktiviteteve të përbashkëta.  Në këtë frymë, dua të ju siguroj për dëshirën dhe gatishmërinë time për të rritur dhe forcuar më tej këtë bashkëpunim, e në veçanti për çështjet me interes të përbashkët dhe paraqitjes aktive të institucioneve tona në ngjarjet dhe aktivitetet e organizuara nga INTOSAI dhe EUROSAI”, thuhet ndër të tjera në letrën e urimit të Auditorit të Përgjithshëm, Besnik Osmani dërguar homologut të tij shqiptar Arben Shehu.

Zyra Kombëtare e Auditimit e njeh rëndësinë e ofrimit të informacionit te Parlamenti dhe publiku i gjerë rreth mënyrës se si Qeveria i menaxhon burimet shtetërore, prandaj strategjia e komunikimit është mjet thelbësor për promovimin e praktikave më të mira, llogaridhënies dhe rritjen e transparencës. Auditori i Përgjithshëm sot ka miratuar Strategjinë e Komunikimit, e cila përcakton qëllimet dhe objektivat që Zyra synon të arrijë gjatë periudhës 2020-2022, në komunikimin me palët e interesit dhe publikun. Përmes kësaj strategjie ZKA synon të: promovojë rolin kushtetues të ZKA-së dhe të rris vetëdijesimin publik për rezultatet e auditimit; rris llogaridhënien në sektorin publik përmes bashkëpunimit  intensiv me Parlamentin; rris ndikimin e punës audituese si dhe të komunikojë  dhe marrë pjesë aktive në aktivitete ndërkombëtare. Auditori i Përgjithshëm i Republikës së Kosovës, Besnik Osmani, në fjalën e tij ka theksuar se Strategjia e Komunikimit 2020-2022 përqendrohet në rrjedhën efektive dhe të pandërprerë të informacionit mes ZKA-së dhe palëve të saj të interesit. Ajo, gjithashtu kontribuon në zbatimin e misionit, vizionit dhe qëllimeve strategjike të ZKA-së, si një institucion që mbështet funksionimin më të mirë të shtetit. Miratimit të kësaj strategjie i ka paraprirë proces i diskutimit me bashkëpunëtor, shoqërinë civile, mediat dhe qytetarët. Procesi i hartimit të Strategjisë së Komunikimit është mbështetur nga ekspertë të Institucionit Suprem të Auditimit të Polonisë përmes projektit të binjakëzimit. Strategjinë e Komunikimit të Zyrës Kombëtare të Auditimit e gjeni në këtë vegëz.

Kolegu dhe miku ynë Enver Ramadani, sot shënon me sukses dhe shëndet të plotë mbylljen e karrierës profesionale si “Auditor Senior” që është shkalla më e lartë e funksionit auditues. Auditori i Përgjithshëm, Besnik Osmani dhe kolegët nga Zyra Kombëtare e Auditimit shprehin respekt të veçantë për kontributin dhe bashkëpunimin e tij gjatë kohës sa kemi punuar bashkë. Enver Ramadani ka filluar punën në Zyrën Kombëtare të Auditimit në shtator të viti 2004. Për 16 vite me radhë ka punuar me përkushtim dhe profesionalizëm duke dhënë kontribut të çmuar për institucionin dhe auditimin publik në përgjithësi. Gjatë karrierës së tij si auditor,  Ramadani ka udhëhequr auditime të rëndësishme që në mënyrë të drejtpërdrejtë kanë ndikuar në rritjen e cilësisë dhe përmirësimin e proceseve, qoftë në institucion por edhe në administratën publike në përgjithësi. Përvoja dhe këshillat e tij profesionale do t’u shërbejnë kolegëve edhe për një kohë të gjatë.

Zyra Kombëtare e Auditimit (ZKA) ka publikuar Raportin e Auditimit të Teknologjisë së Informacionit “Qeverisja, menaxhimi i operacioneve dhe siguria e sistemeve të teknologjisë së informacionit në Agjencinë e Statistikave të Kosovës”. Auditimi është kryer në këtë Agjenci që është bartëse, shpërndarëse dhe koordinatore e statistikave zyrtare të Kosovës. Ky auditim përfshin periudhën 2019-2020 dhe kishte për qëllim të vlerësojë organizimin dhe qeverisjen e teknologjisë së informacionit, lidhur me kontrollet e sigurisë së të dhënave, kontrollet e aplikacioneve si dhe ruajtjen e integritetit të të dhënave. Rezultatet e auditimit tregojnë se Agjencia përmes sistemeve të teknologjisë së informacionit në përgjithësi ka arritur të realizojë dhe të publikojë projektet statistikore të parapara me planin e publikimeve. Megjithatë, nuk kishte vendosur mekanizmat e nevojshëm për kontrollet e përgjithshme të teknologjisë së informacionit, që përfshijnë mjedisin në të cilin aktivitetet janë zhvilluar, operuar, menaxhuar dhe mirëmbajtur. Ka mungesë të vlerësimit adekuat të nevojave në fushën e teknologjisë së informacionit, ndarje joadekuate të detyrave dhe përgjegjësive të stafit si dhe ka staf të pamjaftueshëm të teknologjisë së informacionit. Po ashtu, menaxhimi i aktiviteteve të teknologjisë së informacionit nuk është mjaftueshëm i bazuar në politika, procedura dhe procese të operimit. Agjencia nuk kishte marrë hapat e mjaftueshëm për t’u siguruar që informacioni i përpunuar nuk ekspozohet ndaj palëve të paautorizuara. Mungojnë politikat që trajtojnë çështjet e sigurisë së informacionit si dhe ndërgjegjësimi mbi kërkesat e përgjithshme të sigurisë së informacionit nga personeli i Agjencisë ka rezultuar i mangët. Auditori i Përgjithshëm i Kosovës, Besnik Osmani, ka theksuar që rezultatet e auditimit tregojnë se çështjet lidhur me sigurinë e informacionit rreth sistemeve statistikore kanë nevojë të përmirësohen. Në veçanti, sistemet e teknologjisë së informacionit duhet të forcohen para fillimit të proceseve të rëndësishme të parapara për vitin 2021 siç janë realizimi i regjistrimit të popullsisë, ekonomive familjare dhe banesave. Duke marrë parasysh rëndësinë që kanë statistikat në nivel shtetëror, Osmani tha se Zyra Kombëtare e Auditimit ka rekomanduar Qeverinë e Kosovës që posaçërisht të adresojë çështjet rreth sigurisë së informacionit dhe kapaciteteve të Agjencisë së Statistikave të Kosovës. Ndërsa, me qëllim të adresimit të shpejtë të çështjeve rreth menaxhimit dhe qeverisjes së teknologjisë së informacionit brenda Agjencisë, ka dhënë 13 rekomandime për Agjencinë e Statistikave të Kosovës. Raportin e plotë mund ta lexoni në këtë vegëz.

Komisioni për Buxhet dhe Transfere në mbledhjen e sotme ka shqyrtuar dhe miratuar Raportin Financiar të Zyrës Kombëtare të Auditimit (ZKA) për vitin 2019. Auditori i Përgjithshëm, Besnik Osmani, prezantoi dhe arsyetoi në mënyrë të detajuar Raportin e Punës dhe Pasqyrat Vjetore Financiare 2019 të audituara. Prezantimi është fokusuar në strukturën e buxhetit, qëllimet e përdorimit dhe rezultatet e arritura. Deputetët kanë vlerësuar pozitivisht jo vetëm rritjen e numrit të auditimeve, por edhe rritjen e vazhdueshme të cilësisë së raporteve e të forcimit të kapaciteteve të ZKA-së dhe e cila është zbatuar me një rritje të lehtë të buxhetit të dhënë në dispozicion nga Kuvendi i Republikës së Kosovës. Duke folur për sfidat, Auditori i Përgjithshëm nënvizoi se shpenzimet e qirasë që marrin rreth 26 për qind të buxhetit të mallrave dhe shërbimeve duhet të tejkalohen duke siguruar një objekt nga organet kompetente të Kosovës dhe se është urgjente ndryshimi i kornizës ligjore për tejkalimin e dualizmave në sektorin e auditimit publik dhe harmonizimin me Kushtetutën e Republikës së Kosovës. Tutje duke folur për aktivitetin dhe punën e Zyrës Kombëtare të Auditimit, Osmani i njoftojë deputetët e Kuvendit të Kosovës se ka pasur rritje të numrit të auditimeve, nga 98 auditime sa kane qenë në vitin 2016 tani janë rreth 130 auditime. Deputetët kanë vlerësuar bashkëpunimin cilësor të ZKA-së në nivel rajonal dhe global i cili  është kurorëzuar me anëtarësimin e plotë në INTOSAI si dhe shprehen mbështetjen e tyre që të punojnë në ruajtjen dhe forcimin e mëtejmë të integritetit dhe pavarësisë në punën audituese të Auditorit të Përgjithshëm dhe ZKA-së. Raporti financiar i ZKA-së mori miratimin e të gjithë anëtarëve të Komisionit për Buxhet dhe Transfere dhe i njëjti bashkë me rekomandime do të dërgohet për miratim në seancë të Kuvendit.

Ministrja e Financave Hykmete Bajrami, ka pritur sot në takim Auditorin e Përgjithshëm Besnik Osmani me bashkëpunëtorë, me të cilët ka diskutuar për reformën në menaxhimin e financave publike, me theks të veçantë rritjen e performancës në shpenzimin e parasë publike. Me këtë rast, Ministrja Bajrami, ka theksuar rëndësinë e avancimit të kontrollit të financave publike me qëllim të rritjes së efikasitetit dhe cilësisë së  ofrimit të shërbimeve për qytetarët nga Organizatat Buxhetore. Ministrja Bajrami shprehu gatishmërinë e Qeverisë Hoti për bashkëpunim të ngushtë me Zyrën Kombëtare të Auditimit në ngritjen e efikasitetit të kontrollit të financave publike, me qëllim të eliminimit të keqmenaxhimit të financave publike. Ajo gjithashtu njoftoi auditorin e përgjithshëm Besnik Osmani për procesin e rishikimit të Buxhetit, i cili sipas saj shumë shpejt do t’i dorëzohet Qeverisë dhe Kuvendit për miratim. Në anën tjetër, Auditori i Përgjithshëm, Besnik Osmani ka shprehur gatishmërinë e tij për bashkëpunim me institucionet qeverisëse, veçanërisht me Ministrinë e Financave në avancimin e menaxhimit të financave publike nga organizatat buxhetore.