Lajmet

Në një ceremoni të rastit ku prezentë ishin Ambasadorja e Maqedonisë së Veriut në Kosovës, Shpresa Jusufi, Zëvendëskryeministri i Qeverisë së Maqedonisë së Veriut, Fatmir Bytyqi dhe Zëvendëskryeministrja Donika Gervalla, Zyra Kombëtare e Auditimit të Republikës së Kosovës dhe Autoriteti i Auditimit të Maqedonisë së Veriut kanë avancuar bashkëpunimin institucional me nënshkrimin e një Memorandumi të Mirëkuptimit/Bashkëpunimit. Memorandumi i mirëkuptimi për bashkëpunim ndërmjet dy institucioneve i nënshkruar të martën në Prishtinë nga Auditori i Përgjithshëm i Republikës së Kosovës, Besnik Osmani dhe Auditori i Përgjithshëm i Autoritetit të Auditimit të Maqedonisë së Veriut për auditimin e fondeve IPA, Adem Curi ka për qëllim forcimin e mëtejshëm të kapaciteteve institucionale për auditim efektiv dhe efikas në fushën e auditimit të fondeve nga IPA. Auditori i Përgjithshëm, Besnik Osmani, ka vlerësuar se ky Memorandum  është mundësi e mirë që auditorët e Zyrës Kombëtare të Auditimit të Kosovës të forcojnë njohuritë e tyre për specifikat e auditimeve të fondeve IPA. Përafrimi i Kosovës në procesin e integrimeve evropiane do të sjellë nevojën e zbatimit të këtyre auditimeve për të cilat aktualisht ne nuk kemi ndonjë përvojë të veçantë. Edhe Auditori i Përgjithshëm i Autoritetit të Auditimit të Maqedonisë së Veriut për auditimin e fondeve IPA, Adem Curi, e ka vlerësuar të rëndësishëm nënshkrimin e këtij memorandumi, duke thënë se shkëmbimi i praktikave profesionale mundëson  përmirësimin e kapaciteteve audituese të dy institucioneve. Ky bashkëpunim parasheh shkëmbimin e përvojës në qasjen e audimit dhe metodologjinë e përdorur në pajtim me standardet e auditimit; shkëmbimin e përvojës dhe mësimet e nxjerra në fushën e auditimit; ofrimin e ndihmës dhe bashkëpunimit nga eksperti në fushën e auditimit; organizimin e hulumtimeve, takimeve, konferencave, trajnimeve, vizitave studimore, dhe praktikave profesionale për përmirësimin e kapaciteteve audituese te të dy institucioneve si dhe organizimin e vizitave të përbashkëta tek organet dhe institucionet profesionale në fushën e auditimit. Zëvendëskryeministrja njëherësh Ministrja e Punëve të Jashtme dhe Diasporës e Republikës së Kosovës, Donika Gërvalla, ka thënë se Qeveria mirëpret një bashkëpunim të tillë mes dy shteteve për forcimin e marrëdhënieve bilaterale. “Memorandumit të Mirëkuptimit i cili do të nënshkruhet sot, i paraprijnë një sërë marrëveshjesh qoftë ndërinstitucionale apo ndërqeveritare në mes të Republikës së Kosovës dhe Maqedonisë së Veriut. Si Qeveri e re e mirëpresim një bashkëpunim të tillë mes dy shteteve për forcimin e marrëdhënieve bilaterale. Republika e Kosovës dhe Republika e Maqedonisë së Veriut ndajnë interesa të përbashkëta politike dhe ekonomike, për stabilitetin, qëndrueshmërinë dhe prosperitetin e rajonit tonë. Fuqizimi i marrëdhënieve dypalëshe dhe fqinjësisë së mirë madje miqësisë së ndërsjellë është përkushtimi ynë”, ka thënë Gërvalla. Edhe Zëvendëskryeministri i Qeverisë së Maqedonisë së Veriut, Fatmir Bytyqi e ka përshëndetur nënshkrimin e këtij memorandumi. “Nënshkrimi i memorandumit të sotëm dëshmon që bashkëpunimi ynë rajonal i bazuar në paradigmën e konkurueshmerisë rajonale kundrejt konkurrencës rajonale të vendeve të Ballkanit Perëndimor jetësohet edhe në praktikë, duke shkëmbyer përvojat ”, ka deklaruar Bytyqi.  

Auditori i Përgjithshëm Besnik Osmani dhe presidenti i EUROSAI-t Miloslav Kala flasin për avancimin e bashkëpunimit në forumet e EUROSAI-t Auditori i Përgjithshëm i Kosovës, Besnik Osmani, ka mbajtur takim virtual me Presidentin e Organizatës Evropiane të Institucioneve Supreme të Auditimit (EUROSAI), z. Miloslav Kala njëherësh President i Institucionit Suprem të Auditimit të Republikës së Çekisë. Me këtë rast presidenti i EUROSAI-t Miloslav Kala i ka uruar mirëseardhje Zyrës Kombëtare të Auditimit në këtë organizatë, duke shprehur gatishmërinë për të avancuar bashkëpunimin ndërinstitucional përmes zhvillimit të aktiviteteve në forumet e EUROSAI-t. Ndërsa Auditori i Përgjithshëm, Besnik Osmani, ka deklaruar se anëtarësimi i Zyrës Kombëtare të Auditimit në EUROSAI ofron një mundësi të shkëlqyeshme për zhvillimin tonë profesional në të ardhmen dhe lejon stafin tonë të ndajnë përvojën dhe idetë me interes të përbashkët me kolegët e tyre evropianë. Osmani ka rikonfirmuar  gatishmërinë e tij dhe të Zyrës Kombëtare të Auditimit të Kosovës për të pranuar dhe marrë përsipër të gjitha detyrimet dhe të drejtat që lidhen me statusin si anëtar i plotë në EUROSAI. Të pranishëm në këtë takim kanë qenë edhe Zëvendës Auditori i Përgjithshëm Ilir Salihu dhe drejtoresha për Bashkëpunim Ndërkombëtar, Qëndresa Mulaj.

Në kuadër të Projektit të Binjakëzimit “Fuqizimi i mëtejshëm i ndikimit të Zyrës Kombëtare të Auditimit të Kosovës”, të enjten dhe të premten është mbajtur trajnimi lidhur me udhëzimet e rekomandimeve të auditimit. Trajnimi dy ditorë për udhëzimet e rekomandimeve të auditimit është përqendruar në temat si: Moszbatimi i rekomandimeve të ZKA-së; Shkaqet e brendshme dhe të jashtme;  Referenca themelore – Interesi publik; Strukturat kyçe të rekomandimit: Gjetja; Rreziku; Kërkimi për mbështetje në teknologji digjitale; Përqendrimi i veçantë në statusin e të zbatuarit si dhe Prezantim i rekomandimeve në ueb faqe të Zyrës Kombëtare të Auditimit.  Secila nga këto  temat është diskutuar në punëtori, duke u mbuluar me detajet e nevojshme dhe duke iu referuar shembujve konkret bazuar në raportet e auditimit nga ZKA-ja. Ky trajnim është ndjekur nga Ndihmësit e Auditorit të Përgjithshëm, Udhëheqësit e Auditimit, Udhëheqës të Ekipeve të Auditimit, Departamenti për Metodologji dhe Sigurimin e Cilësisë si dhe Departamenti për Komunikimi dhe Zhvillim Profesional. Ndikimi i auditimit matet me nivelin e zbatimit të rekomandimeve. Niveli i zbatimit të rekomandimit është treguesi më i mirë për të kuptuar nëse menaxhmenti po përmirëson proceset ekzistuese dhe kontrollet në fushat ku janë identifikuar gabimet dhe parregullsitë. Rekomandimet e dhëna në raportet e auditimit përshkruajnë veprimet e nevojshme për të korrigjuar situatën, prandaj që të kenë efektin e dëshiruar ato duhet të jenë të përgatitura me kujdes, të shkruara dhe strukturuara mirë dhe të orientuar drejt rezultateve. Me qëllim të rritjes së numrit të rekomandimeve të zbatuara dhe rritjes së ndikimit të ZKA-së, përmes projektit “Fuqizimi i mëtejshëm i ndikimit të Zyrës Kombëtare të Auditimit të Kosovës”, është duke u zhvilluara dhe së shpejti pritet të finalizohet databaza e rekomandimeve të auditimit e cila do të jetë e qasshme për publike përmes ueb faqes së ZKA-së. Prandaj, një pjesë e këtij trajnimi është fokusuar në demonstrimin e konceptit mbi të cilin është duke u zhvilluar kjo databazë.  

Auditori i Përgjithshëm Besnik Osmani pranon urime për anëtarësimin e ZKA-së me të drejta të plota në EUROSAI Në punimet e Kongresit të XI-të të Organizatës Evropiane të Institucioneve Supreme të Auditimit (EUROSAI), të mbajtur me 14 dhe 15 prill 2021, pasi u ndërmorën të gjitha veprimet e nevojshme, Kongresi si organi më i lartë i organizatës, ka bërë të plotfuqishëm vendimin e Bordit Drejtues për pranimin e Zyrës Kombëtare të Auditimit të Republikës së Kosovës (ZKA) në këtë organizatë. Me këtë rast, Auditori i Përgjithshëm i Kosovës, Besnik Osmani, ka pranuar urime të shumta nga homologët e tij për këtë arritje të rëndësishme për ZKA-në. Osmani ka marrë telegrame urimi nga Presidenti i EUROSAI-t, z. Miloslav Kala njëherësh President i Institucionit Suprem të Auditimit të Republikës së Çekisë, nga z. Seyit Ahmet Bas, President i Gjykatës Turke të Llogarive, njëherësh Nën President i EUROSAI-t, Auditori i Përgjithshëm i Britanisë së Madhe, z. Gareth Davies, nga Kryetar i Kontrollit të Lartë të Shtetit të Shqipërisë, z. Arben Shehu. Gjithashtu ka pranuar telefonata të shumta urimi nga homologë të Institucioneve Supreme të Auditimit dhe kolegë e miq tjerë ndërkombëtar, si nga Auditori i Përgjithshëm i Republikës së Maqedonisë së Veriut, z. Maksim Acevski, ai i Kroacisë, z. Ivan Klešic, Presidenti i Institucionit Supreme të Auditimit të Polonisë, z. Marian Banas etj. Presidenti i EUROSAI-t, z. Miloslav Kala, në letrën e tij drejtuar z. Osmani, ka thënë se është i lumtur që në Kongresin e XI të EUROSAI-t është vulosur anëtarësimi i plotë i ZKA-së në këtë organizatë. Ai ka rikujtuar se rruga për t’u bërë pjesë e EUROSAI-t ishte e gjatë dhe me pengesa, por falë përpjekjeve të përbashkëta dhe bashkëpunimit  të ngushtë është  shënuar ky sukses. “Ky është një moment historik për ZKA-në, bashkëpunimi miqësor dhe i frytshëm do të vazhdojë edhe në të ardhmen në mes të dy organizatave tona. Gjatë mandatit tim të presidencës, unë do të theksoja domosdoshmërinë e bashkëpunimit ndërkombëtar dhe ndarjen e njohurive midis anëtarëve të EUROSAI-t”, ka shkruar Kala. Urime të përzemërta Osmani ka marrë edhe nga Kryetari i Kontrollit të Lartë të Shtetit të Shqipërisë, Arben Shehu. Në letrën e urimit z. Shehu ka thënë se Zyra Kombëtare e Auditimit të Kosovës ndan të njëjtat parime dhe vlera me të gjitha vendet anëtare të EUROSAI-t në lidhje me transparencën, mirëqeverisjen, llogaridhënien dhe zhvillimin e kompetencave profesionale në fushën e auditimit të sektorit publik, duke u bërë anëtari i 51-të i kësaj organizate. “Angazhimi i vazhdueshëm në mbështetje të ZKA-së do të shërbej për intensifikimin dhe rritjen cilësore të bashkëpunimit midisi dy institucioneve tona në fushat me interes të përbashkët edhe në të ardhmen”, është shprehur Shehu. Po ashtu edhe Auditori i Përgjithshëm i Britanisë së Madhe, Gareth Davies, ka përgëzuar Auditorin e Përgjithshëm Besnik Osmanin lidhur me anëtarësimin e ZKA-së në EUROSAI, duke thënë se kjo mundëson shkëmbimin e eksperiencave dhe njohurive ndërmjet anëtarëve. “Ne e mbështesim Zyrën Kombëtare të Auditimit të Kosovës dhe presim që të punojmë edhe më tutje në ngritjen e marrëdhënieve të mira në mes të organizatave tona, veçanërisht punën që lidhet me procesin e auditimit për Covid 19”, thuhet ndër të tjera në urimin e Davies.

Auditori i Përgjithshëm, Besnik Osmani, të premten është pritur në takim nga kryetari i Komisionit për Buxhet, Punë dhe Transfere (KBPT), Armend Muja. Osmani e ka informuar z. Muja për finalizimin e procesit të auditimit për sezonin 2020/21 dhe për vështirësitë me të cilat është duke u ballafaquar ZKA-ja në realizimin e planit të auditimit. Ata kanë biseduar për modalitetet e bashkëpunimit ndërmjet ZKA-së dhe KBPT-së me qellim që rezultatet e auditimit të përmirësojnë qeverisjen dhe shërbimet ndaj qytetarëve. Me këtë rast Auditori i Përgjithshëm/Zyra Kombëtare e Auditimit (ZKA) e ka dorëzuar  në Kuvendin e Kosovës edhe Raportin Vjetor të Performancës për vitin 2020. Pas dorëzimit, raporti është publikuar në uebfaqen e ZKA-së. Raporti Vjetor i Performancës përmban informata të rëndësishme rreth performancës së institucionit të Auditorit të Përgjithshëm në përmbushjen e obligimeve të tij kushtetuese e ligjore, në pajtim me Standardet Ndërkombëtare të Institucioneve Supreme të Auditimit (SNISA). Puna e  Zyrës gjatë vitit 2020 është mbështetur në Planin Strategjik 2018-2021, Planin Vjetor të Auditimit 2019/20, që paraprakisht i është dorëzuar Kuvendit të Kosovës, si dhe në Planin Operativ 2020. Auditori i Përgjithshëm, Besnik Osmani, në fjalën e tij brenda raportit ka thënë se pavarësisht se viti 2020 ka qenë sfidues për shkak të ndikimit të pandemisë COVID 19, Zyra Kombëtare e Auditimit ka arritur t’i përmbush të gjitha kërkesat dhe afatet ligjore për punën audituese, duke forcuar mbulueshmërinë dhe cilësinë e auditimit. Madje gjatë vitit 2020 ka kryer numrin më të lartë të auditimeve të rregullsisë që nga themelimi. Ai ka thënë se përmes rekomandimeve praktike, ZKA-ja ka shtrirë më tej ndikimin e saj, ku është vërejtur një progres i lehtë në rritjen e shkallës së zbatimit të rekomandimeve të auditimit. “Janë audituar 95 organizata buxhetore me një buxhet të përgjithshëm rreth 2.5 miliardë euro, 14 ndërmarrje publike kryesisht në fushën e telekomunikimit, furnizimit me ujë dhe trajtimit të mbeturinave, 8 auditime të performancës me fokus tema komplekse, si dhe 9 projekte të financuara nga fondet e donatorëve”, është shprehur Osmani. Paralelisht, janë përditësuar doracakët dhe letrat e punës sipas Standardeve Ndërkombëtare të Auditimit dhe praktikave të mira ndërkombëtare si dhe është  digjitalizuar procesi i punës audituese me lansimin e sistemit elektronik të auditimit SITA, përmes së cilit do të racionalizohet koha në auditim, rritet cilësia dhe siguria e auditimeve si dhe forcohet transparenca. Kurse sukseset në rrafshin ndërkombëtar kanë kulmuar me integrimin e ZKA-së si anëtare në dy organizata ndërkombëtare, Organizatën Ndërkombëtare të Institucioneve Supreme të Auditimit (INTOSAI) dhe në Organizatën Evropiane të Institucioneve Supreme të Auditimit (EUROSAI). Ndërkaq, me Planin Vjetor për sezonin e auditimit 2020/21, ZKA-ja është duke kryer 116 auditime të rregullsisë (financiare dhe të pajtueshmërisë) si dhe tetë (8) auditime të performancës. Raportin Vjetor të Performancës për vitin 2020 mund ta gjeni këtu.

Auditor i Përgjithshëm i Autoritetit të Maqedonisë së Veriut për auditimin e fondeve IPA, Adem Curi i shoqëruar nga këshilltari  për auditimin e programeve të financuara nga BE dhe bashkëpunimin ndërkombëtar Ivan Ignjatov të martën zhvilluan një vizitë pune në Zyrën Kombëtare të Auditimit të Kosovës. Osmani dhe Curi folën për rëndësinë e auditimit të fondeve të Bashkimit Evropian me qellim që ato të shpenzohen në mënyrë efektive dhe në dobi të qytetarëve dhe për modalitetet e bashkëpunimit ndërmjet dy institucioneve në mënyrë që Kosova gradualisht të përgatitet në ngritjen e këtyre strukturave krahas progresit të vendit në procesin e integrimeve evropiane. Përfaqësuesit e Zyrës Kombëtare të Auditimit, njoftuan delegacionin e Autoritetit të Maqedonisë së Veriut për auditimin e fondeve IPA lidhur me zbatimin e Planit Strategjik të Zyrës Kombëtare të Auditimit 2018-2021 dhe Planit aktual vjetor të auditimit; Procesin e Auditimit, Kontrollin e cilësisë dhe Sigurimin e cilësisë; Zhvillimin Profesional dhe Komunikimi me palët  e interesit; bashkëpunimin me organet e drejtësisë dhe organizmat përkatëse për luftimin e korrupsionit; si dhe për bashkëpunimin ndërkombëtar. Edhe përfaqësuesit e Autoritetit të Maqedonisë së Veriut për auditimin e fondeve IPA bën një prezantim të këtij institucioni duke treguar për mandatin, detyrat dhe përgjegjësitë e tij. Të dy institucionet e vlerësuan të rëndësishëm bashkëpunimin e mëtutjeshëm në mes tyre dhe shkëmbimin e ideve dhe përvojave të tyre.

Organizata  Ndërkombëtare e Institucioneve Supreme të Auditimit (INTOSAI) me 21 dhe 22 prill mbajti konferencën ndërkombëtare shkencore dhe praktike. Për shkak të pandemisë Covid 19 konferenca u mbajt në platformën online. Punimet e kësaj konference janë ndjekur edhe nga përfaqësuesit e Zyrës Kombëtare të Auditimit të Kosovës, ku janë diskutuar tema të ndryshme për praktikat e auditimit në sektorin publik, kryesisht përgjatë situatës aktuale të pandemisë. Në ditën e parë të konferencës tema kryesore e diskutimit ka qenë “Auditimi në sektorin publik dhe përparimi i praktikave të qeverisjes gjatë dhe pas emergjencës”. Më pas në kuadër të kësaj teme diskutimi i pjesëmarrësve ka vazhduar me shpalosjen e praktikave të Institucioneve Supreme të Auditimit lidhur me “Auditimi i kujdesit shëndetësor dhe kujdesit shoqëror: mjete të reja për komunitetin e INTOSAI-t”; Prokurimi publik dhe risitë në auditim: Zgjidhje të reja për probleme të vjetra;  si dhe “Gjithëpërfshirja: objektivi i auditimit ose kriteret e auditimit”. Ndërsa në ditën e dytë konferenca shkencore e INTOSAI-t ka vazhduar punimet me temën “Mësimi online: Normë e re, apo zgjidhje e përkohshme?”; për të vazhduar më tutje diskutimet për “Auditimi strategjik”; “Analitika e të dhënave në punën e ISA-ve”; “Hapja (transparenca) e ISA-së; si dhe “Auditimi i synimeve për zhvillim të qëndrueshëm (SZhQ)”.

Deputetët e Kuvendit të Kosovës njëherësh anëtarë të Komisionit për Mbikëqyrjen e Financave Publike (KMFP) zhvilluan një vizitë pune të martën në Zyrën Kombëtare të Auditimit, me ç’rast u priten në takim nga Auditori i Përgjithshëm, Besnik Osmani dhe bashkëpunëtorët e tij. Kryetarja e KMFP-së, Hykmete Bajrami, nënkryetarja Arta Bajralija, si dhe anëtarët Eman Rrahmani, Mirlinda Sadiku, Jetmire Vrenezi, Hajdar Beqa, Fadil Nura, dhe Albana Bytyqi u njoftuan në detaje nga përfaqësuesit e ZKA-së lidhur me zbatimin e Planit Strategjik të Zyrës Kombëtare të Auditimit 2018-2021 dhe Planit aktual vjetor të auditimit; Procesin e Auditimit, Kontrollin e cilësisë dhe Sigurimin e cilësisë; Sistemin elektronik për menaxhimin e auditimit- SITA; Zhvillimin Profesional dhe Komunikimi me palët  e interesit; si dhe për bashkëpunimin me organet e drejtësisë dhe organizmat përkatëse për luftimin e korrupsionit. Më tutje ligjvënësit u njoftuan edhe me nevojën e ndryshimit të Ligjit për Auditorin e Përgjithshëm dhe Zyrën Kombëtare të Auditimit, në mënyrë që auditimet të përzgjidhen duke vlerësuar shkallën e rrezikut për paranë publike. Këto ndryshime do të ndikonin në rritjen e numrit të auditimeve të Ndërmarrjeve Publike dhe auditimeve të performancës. Kryetarja e KMFP-së, Hykmete Bajrami, ka thënë se informata e prezantuara nga përfaqësuesit e Zyrës Kombëtare të Auditimit janë mjaftë të vlefshme për punën e Komisionit për Financa Publike i cili merret me shqyrtimin e raporteve të auditimit. Bajrami ka deklaruar se përmes shqyrtimit të raporteve të auditimit të organizatave buxhetore në KMFP, Kuvendi i Republikës së Kosovës kërkon rritjen e përgjegjësisë llogaridhënëse nga institucionet e audituara në mënyrë që të ndërmarrin veprime të menjëhershme për zbatimin e rekomandimeve dhe adresimin e mangësive të raportuara. Anëtarët e KMFP-së u interesuan që të dinë nëse ZKA-ja do të mund ta përmbush planin auditues 2020/2021 për shkak të pandemisë Covid 19 sipas dinamikës së paraparë në mënyrë që të bëhen harmonizimet e nevojshme për planin e punës së Komisionit. Anëtarët e Komisionit për Mbikëqyrjen e Financave Publike, kanë vlerësuar punën e Zyrës Kombëtare të Auditimit duke shprehur gatishmërinë për të thelluar bashkëpunimin në mënyrë që rezultatet e auditimit të përmirësojnë qeverisjen në vend dhe shërbimet ndaj qytetarëve.

ZKA-ja përfaqësohet si anëtare fuqiplotë në Kongresin e XI të EUROSAI-t Me datë 14 dhe 15 prill 2021 u mbajt Kongresi i XI i Organizatës Evropiane të Institucioneve Supreme të Auditimit (EUROSAI). Për shkak të pandemisë me Covid-19 mbajtja e Kongresit ishte shtyrë nga viti 2020 dhe për herë të parë në historinë e kësaj organizate, kongresi është mbajtur online. Zyra Kombëtare e Auditimit të Republikës së Kosovës në punimet e Kongresit u përfaqësua si anëtare më të drejta të plota e kësaj organizate. Për herë të parë ZKA-ja ishte pjesë aktive, mori përgjegjësitë dhe ushtroj të drejtën e plotë të votimit për anëtarët e rinj të Bordit Drejtues dhe çështjet tjera që ishin paraparë me agjendë. Në këtë kongres është bërë edhe ndryshimi i Statutit të EUROSAI-t me qëllim që të mundësohej caktimi i tarifës financiare të kontributit në buxhetin e EUROSAI-t për Zyrën Kombëtare të Auditimit të Republikës së Kosovës si anëtare e kësaj organizate. Pjesë e punimeve të kongresit ishin Auditori i Përgjithshëm, Besnik Osmani, Zëvendës Auditori i Përgjithshëm, Ilir Salihu si dhe Drejtoresha për Bashkëpunim Ndërkombëtar, Qendresa Mulaj. Kongresi mes tjerash ka marr edhe vendime tjera të rëndësishme duke zgjedhur Britaninë e Madhe dhe Lituaninë si anëtarë të Bordit Drejtues dhe po ashtu ka vendosur që kryesimi i radhës së EUROSAI, pas mandatit trevjeçar të Çekisë të bëhet nga Izraeli ku dhe do të mbahet Kongresi i radhës. Pas përfundimit të Kongresit të XI të EUROSAI-t, Auditori i Përgjithshëm i Republikës së Kosovës, Besnik Osmani, ka thënë se Zyra Kombëtare e Auditimit si anëtare e EUROSAI-t synon të jap kontribut dhe të ndajë me kolegët njohuritë dhe përvojën e vet profesionale dhe të prezantojë Kosovën me dinjitet. “Përfundimisht Zyra Kombëtare e Auditimit e Republikës së Kosovës është anëtare fuqiplotë e Organizatës Evropiane të Institucioneve Supreme të Auditimit. Faleminderit të gjitha shteteve anëtare që në Kongresin e XI-të që u mbajt në Pragë votuan me 2/3 e votave të nevojshme. Ndjenjë e veçantë që nga ky moment të marrim pjesë aktive në punimet e Kongresit dhe të votojmë për anëtarët e rinj të Bordit Drejtues. U jam mirënjohës ekipit të ZKA-së që patën dijen dhe kurajon që të punojmë së bashku për këtë sukses”, është shprehur Osmani. Në kuadër të Kongresit të XI të EUROSAI-t është prezantuar Raporti i Aktiviteteve 2017 -2021 i Sekretariatit të EUROSAIT, pasqyrat financiare si dhe raporti i buxhetit të organizatës. Ndërsa, kanë kaluar në votim dhe janë zgjedhur: Institucioni Suprem i Auditimit të Izraelit është zgjedhur që të marrë Presidencën në vitin 2024 pas Çekisë, Zyra Kombëtare e Auditimit të Britanisë së Madhe dhe Institucioni Suprem i Auditimit të Lituanisë janë zgjedhur anëtarë të rinj të Bordit Drejtues të EUROSAIT, ndërsa Institucioni Suprem i Kroacisë dhe ai i Bullgarisë janë zgjedhur auditorë të jashtëm të EUROSAI-t. Gjithashtu janë prezantuar raportet e punës nga grupet punuese dhe task forcat siç janë: Grupi Punues për Teknologjinë e Informacionit; Grupit Punues për Auditimet e Mjedisit; Grupi Punues për Auditimin e Fondeve për Fatkeqësi dhe Katastrofa; Task Forca për Auditimin e Komunave si dhe Task Forca për Auditim dhe Etikë.

Në kuadër të bashkëpunimit të vazhdueshëm me institucionet akademike, Auditori i Përgjithshëm, Besnik Osmani, të enjten vizitojë Kampusin Inovativ të UBT-së, me ç’rast u prit në takim të veçantë nga rektori i UBT-së, z, Edmond Hajrizi si dhe pastaj mbajti një ligjëratë para studentëve. Qëllimi kryesor i diskutimit ishte prezantimi i përparimit të bërjes së strategjive sektoriale dhe niveli i zbatimit të tyre i matur përmes punës audituese për të vlerësuar se si menaxhimi i rrezikut, sistemet e kontrollit të brendshëm dhe qasja koorporative po zbatohet nga ana e institucioneve publike. Para të pranishmëve, Auditori i Përgjithshëm, Besnik Osmani, foli për rolin dhe përgjegjësitë e Zyrës Kombëtare të Auditimit, duke shpalosur planin strategjik dhe progresin ne zbatimin e auditimeve. Në këtë kontekst ka theksuar rëndësinë e zbatimit të  rekomandimeve dhe ndikimin e tyre në fuqizimin e qeverisjes së mirë dhe llogaridhënies. Osmani ka thënë se sfidë mbetet niveli i ulët i zbatimit të rekomandimeve që nuk e kalon 40 % në nivel të përgjithshëm, përderisa në vendet evropiane shkalla e zbatimit të rekomandimeve kalon 80%. Për të pasur sukses dhe ndikim të plotë auditimi, institucionet që auditohen duhet ta shohin ZKA-në si aleat për të përmirësuar performancën e tyre. Për të ndryshuar këtë perceptim nevojitet mbështetja e institucioneve akademike, shoqërisë civile dhe mediave. Gjithashtu gjatë këtij debati u diskutua edhe për mungesën e strategjive institucionale në nivel vendi si dhe nevoja për një koordinim në mes të gjitha niveleve të institucioneve qeverisëse, institucioneve akademike dhe të tjera. Ndërkohë Rektori i Kolegjit UBT, z. Edmond Hajrizi, ka vlerësuar se ZKA-ja vazhdon të jetë shembull i mirë për institucionet e tjera si në aspektin profesional, ashtu edhe në atë funksional dhe të pavarur. Hajrizi ka përgëzuar Auditorin e Përgjithshëm edhe për arritjet në nivel ndërkombëtar me anëtarësimin në dy organizatat më të rëndësishme të audtimit: INTOSAI dhe EUROSAI, duke thënë se kjo tregon për nivelin e lartë të standardeve profesionale dhe pavarësisë së institucionit. Në kuadër të këtij bashkëbisedimi studentët u interesuan që të dinë më shumë  për realizimin e procesit të auditimit; për gjetjet kryesore më të rëndësishme si dhe ndikimin e tyre në nivelin e përgjithshëm të qeverisjes në vend.  

Në kuadër të bashkëpunimit rajonal dhe me qëllim të zhvillimit të kapaciteteve për auditimet e performancës si dhe përgatitjeve për projektin e tretë të auditimeve paralele, Zyra Kombëtare e Auditimit të Suedisë ka filluar programin e trajnimit e-learning,  për Institucionet Supreme të Auditimit të Ballkanit Perëndimor dhe Turqisë.  Pjesë e këtij programi është edhe Zyra Kombëtare e Auditimit të Kosovës, përmes pjesëmarrjes se auditorëve nga departamenti i performancës, Alba Keqa dhe Elira Hashani. Ky program do të zhvillohet përmes mentorimit të drejtpërdrejtë,  punëtorive e seminareve dhe punës së ekipeve në auditimet e tyre reale që të jenë në gjendje të zbatojnë aftësitë e tyre në praktikë. Programi përbehet nga gjashtë module dhe për shkak të pandemisë do të mbahet kryesisht on-line dhe do  të zgjatë në një periudhe prej 6-10 muaj. Në kuadër të trajnimit janë parashikuar mësimet si dhe njohuri për  standardet e auditimit të performancës, përfshirë të gjitha fazat e auditimit. Gjithashtu pjesëmarrësit do të përfshihen në punë praktike në të gjitha fazat e auditimit konkret – nga parastudimi, ekzekutimi  deri në raportim, ku në te njëjtën kohë do të marrin udhëzime dhe mbështetje nga trajnerët. Programi i trajnimit për auditimin e performancës është hartuar nga Zyra Kombëtare e Auditimit të Suedisë dhe me mbështetjen e ISA-ve të tjera është zbatuar me sukses në rajonin e AFROSAI për shumë vite. Ky trajnim profesional  është zhvilluar edhe në ZKA gjatë vitit 2019, ku kanë marrë pjesë  dhe janë certifikuar të gjithë auditorët e performancës. Trajnimet e sistemuara dhe të standardizuara, të zbatuara në bazë rajonale, kanë rezultuar të jenë shumë efektive dhe kontribuojnë në institucionalizimin e auditimit të performancës.    

Auditori i Përgjithshëm i Republikës së Kosovës, Besnik Osmani, të hënën ka vizituar Kolegjin AAB, ku është pritur në takim nga Rektori, z. Bujar Demjaha, Dekani i Fakultetit Ekonomik, z. Medain Hashani dhe prodekanja znj. Kosovare Ukshini. Qëllimi i këtij takimi ishte forcimi i bashkëpunimit ndërmjet Zyrës Kombëtare të Auditimit dhe Kolegjit AAB në fushën e auditimit, shkëmbimet e ndihmës profesionale e akademike, si dhe të angazhimit të studentëve në punë praktike. Në kuadër të kësaj vizite në Kolegjin AAB, Auditori i Përgjithshëm, Besnik Osmani, po ashtu, pati edhe një bashkëbisedim me studentët e Fakultetit Ekonomik, para të cilëve shpjegoj rolin, misionin, mënyrën se si funksionon Zyra Kombëtare e Auditimit, si dhe detaje të tjera rreth procesit të përpilimit të raporteve të auditimit. Osmani ka thënë se ZKA-ja auditon fondet publike për t’i siguruar taksapaguesit që paratë e tyre po përdorën në mënyrë ekonomike, që raportimi financiar është i saktë dhe vendimet janë në pajtim me kërkesat ligjore. Tutje Auditori i Përgjithshëm ka theksuar rëndësinë e zbatimit të  rekomandimeve të ZKA-së dhe ndikimin e tyre në fuqizimin e qeverisjes së mirë dhe llogaridhënies. Nga ana tjetër studentët u interesuan që të informohen më shumë lidhur me atë se si bëhet auditimi, për sigurinë në auditim, llojet e auditimeve, për llogaridhënien dhe transparencën e  shpenzimit të parasë publike. Ndërkohë Dekani i Fakultetit Ekonomik në Kolegjin AAB, z. Medain Hashani, falënderojë Auditorin e Përgjithshëm për vizitën, duke theksuar rëndësinë e bashkëpunimi mes dy institucioneve.  Hashani ka thënë se ZKA-ja vazhdon të jetë nder institucionet më kredibile në Kosovë përmes punës profesionale, të pavarur dhe transparente.