Lajmet

Në shenjë respekti për bashkëpunimin e pandërprerë e të frytshëm përgjatë viteve 2012-2019, në mes të Kontrollit të Lartë Shtetëror të Shqipërisë (KLSH) dhe Zyrës Kombëtare të Auditimit të Kosovës (ZKA), si dhe në kuadër të pranimit të saj si anëtare me të drejta të plota në INTOSAI, më 17 shkurt në KLSH u përurua  Salla e Bibliotekës dhe leximit në katin e parë të ndërtesës së KLSH-së, në krah të Muzeut të Historikut të KLSH-së, me emrin “Zyra Kombëtare e Auditimit të Kosovës”. Në këtë sallë janë vendosur Deklarata e Pavarësisë së Kosovës, faksimile, dokumente pune, botime të KLSH-së dhe të ZKA-së, fotografi të presidentit historik të Kosovës Ibrahim Rugova, presidentit Hashim Thaçi, foto e dekorimit të ish-Auditorit të Përgjithshëm Lars Lage Olofsson nga ish-presidenti Bujar Nishani, foto të drejtuesve të ZKA-së, të aktiviteteve të përbashkëta mes KLSH-së dhe ZKA-së, etj. Në këtë ceremoni nga ZKA-ja morën pjesë Ndihmës Auditorët e Përgjithshëm, Qerkin Morina dhe Naser Arllati, si dhe drejtues dhe auditues të KLSH-së. Në hapjen e kësaj ceremonie, Kryetari i KLSH-së, Bujar Leskaj, nënvizoi bashkëpunimin e veçantë me Zyrën Kombëtare të Auditimit të Kosovës, duke theksuar se marrëveshjen e parë të bashkëpunimit në cilësinë e kryetarit të KLSH-së e ka nënshkruar me ish-Auditorin e Përgjithshëm të kësaj zyre, Lars Lage Olofsson. Ai tregoi se që nga viti 2012 e deri tani dy institucionet Supreme të Auditimit të Kosovës dhe Shqipërisë kanë realizuar shumë aktivitete të përbashkëta, si auditime paralele, trajnime, workshope, vizita pune, etj. Tutje Leskaj theksoi se me dhjetëra auditues të KLSH-së kanë marrë pjesë në analizat vjetore të ZKA-së, ashtu sikurse shumë auditues të ZKA-së kanë marrë pjesë në analizat vjetore dhe në Konferencat Shkencore vjetore të KLSH-së. Leskaj tha se pas pranimit të ZKA-së si anëtare me të drejta të plota në INTOSAI, bashkëpunimi i fortë dhe frytdhënës në mes institucioneve tona, i ndërtuar ndër vite do të vijojë në të njëjtën linjë, duke rritur dhe forcuar bashkëpunimin tonë, veçanërisht në organizimin e aktiviteteve të përbashkëta trajnuese dhe të qenit aktiv në aktivitetet e organizuara nga INTOSAI. Ndërsa Ndihmës Auditori i Përgjithshëm i Kosovës, Qerkin Morina, në emër të  Auditorit të Përgjithshëm, Besnik Osmani, falënderoi kryetarin Leskaj për respektin dhe vlerësimin e treguar për Zyrën Kombëtare të Auditimit të Kosovës. Ai tha se bashkëpunimi në mes të dy institucioneve do të vazhdojë të forcohet, veçanërisht në fushën e auditimit dhe të realizimit të botimeve të përbashkëta, sepse fatmirësisht kanë një gjuhë të përbashkët që u ndihmon për të përfituar nga eksperienca e njëri-tjetrit. Leskaj mbylli këtë ceremoni duke theksuar se ky është vetëm fillimi dhe se salla që mban këtë emër të nderuar do të vazhdojë të pasurohet me dokumente të reja, duke bashkëpunuar ngushtë në këtë drejtim me ZKA-në. Salla ka marrë emrin e ZKA-së, mbështetur në vendimin e Kryetarit të KLSH-së nr.967, datë 26/11/2019 me motivacionin: “Në respekt të Institucioneve më të larta publike të Republikës së Kosovës dhe veçanërisht të Zyrës Kombëtare të Auditimit (ZKA), me të cilën Kontrolli i Lartë i Shtetit ka pasur bashkëpunim të pandërprerë e të frytshëm përgjatë viteve 2012-2019, në drejtim të rritjes së kapaciteteve audituese përmes trajnimeve dhe botimeve të përbashkëta, auditimeve paralele dhe të përbashkëta dhe pjesëmarrjes aktive në konferencat vjetore të të dyja institucioneve, si dhe në respekt dhe mirënjohje të thellë ndaj drejtuesve dhe audituesve të ZKA-së në 15 vitet e krijimit të saj”. (Marrë nga web faqja e Kontrollit të Lartë Shtetëror të Shqipërisë  (KLSH)).

Zyra Kombëtare e Auditimit është duke mbajtur Konferencën Ndërkombëtare “Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit”. Konferenca u organizua me rastin e pranimit të ZKA-së në Organizatën Ndërkombëtare të Institucioneve Supreme të Auditimit (INTOSAI) efektiv nga 1 janari i këtij viti. Pjesëmarrës në këtë konferencë janë përfaqësues të lartë nga Institucionet Supreme të Auditimit nga Suedia, Emiratet e Bashkuara Arabe, Polonia, Turqia, Finlanda, Shqipëria, Maqedonia e Veriut, Mali i Zi,  nga Gjykata Evropiane e Auditorëve,  si dhe përfaqësues nga INTOSAI. Po ashtu, në konferencë po marrin pjesë edhe udhëheqës të lartë të Institucioneve publike të Kosovës, përfaqësues nga shoqërisë civile, mediave dhe organizatave ndërkombëtare dhe donatorë. Auditori i Përgjithshëm i Kosovës, Besnik Osmani, hapi punimet e konferencës, duke falënderuar  të pranishmit për pjesëmarrje dhe kontributin e dhënë në procesin e anëtarësimit në INTOSAI. Osmani tha se procesi i anëtarësimit është moment shumë i rëndësishëm për secilin Institucion të Auditimit, sepse INTOSAI është një platformë globale bashkëpunimi për shkëmbimin e përvojave, hartimin e standardeve të auditimit dhe promovimin e ngritjes së kapaciteteve. Të pranishmëve në konferencë u është drejtuar edhe Drejtori i Pergjithshëm i Thesarit, Ahmet Ismaili, i cili e përgëzoi Auditorin e Përgjithshëm dhe Zyrën Kombëtare të Audtimit për anëtarësim në INTOSAI. Ai tha se ZKA-ja është institucion profesional dhe kredibil dhe këtë e dëshmon edhe anëtarësimi në INTOSAI. Ismaili shprehu gatishmërinë e Qeverisë së Kosovë për të mbështetur Zyrën Kombëtare të Auditimit në përmbushjen e misionit të saj. “Është kënaqësi të fillojë punën qeveria me këtë sukses të ZKA-së. Raportet e auditimit janë vlerë e shtuar dhe kanë për qëllim rritjen e transparencës dhe llogaridhënien”, tha Ismaili. Në një fjalë rasti, Dr. Harbib Saeed Al Amimi, president i Institucionit Shtetëror të Auditimit të Emirateve të Bashkuara Arabe, e uroi ZKA-në për anëtarësimin në INTOSAI, si dhe për organizimin e suksesshëm të kësaj konference. Ai është fokusuar te domethënia e anëtarësimit në INTOSAI. Tha se me anëtarësimin e ZKA-së INTOSAI është bërë me 194 shtete anëtare. “Qëllimet kryesore të INTOSAI-t janë shkëmbimi i përvojave dhe maksimizimi i tyre. Kjo organizatë tenton të promovojë qeverisjen e mirë, të rrisë transparencën, të ruajë kredibilitetin dhe të luftojë korrupsionit, të promovojë besimin publik, duke ofruar vlerë e dobi për qytetarët e tyre. Nën moton e INTOSAI-t nga përvoja e përbashkët përftojnë të gjithë. Urime të gjithëve”, tha ai. Kurse Auditorja e Përgjithshme e Suedisë, njëherësh zëvendëskryetare e Komitetit për Ngritje të Kapaciteteve të INTOSAI-t, Helena Lindberg, foli për rendësinë e anëtarësimit të Zyrës Kombëtare të Auditimtit të Kosovës në INTOSAI. Ajo tha se anëtarësimi në INTOSAI tregon se sa e përgatitur dhe profesionale është Zyra Kombëtare e Auditimit e Kosovës. Edhe Gene L Dodaro, Auditor i Përgjithshëm i Shteteve të Bashkuara të Amerikës, Zyra Qeveritare e Auditimit të SHBA-ve, përmes një video-mesazhi e uroi ZKA-në dhe Kosovën për anëtarësimin në INTOSAI. E falënderoi Auditorin e Përgjithshëm, Besnik Osmani, për ftesën qe ia ka bërë për t`iu adresuar përmes këtij video-mesazhi. Dodaro tha se presin që të kenë edhe me tutje bashkëpunim me ZKA-në. “INTOSAI ndihmon ISA-t në zbatimin e standardeve ndërkombëtare të auditimit, ngritjes se kapaciteteve, ndihmës për kolegët ndërkombëtar dhe siguron zbatimin e praktikave te mira”, tha ai. Konferenca Ndërkombëtare me temë qendrore “Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit” po vazhdon punimet në tri panele. Në panelin e parë po diskutohet lidhur me temën ‘Domethënia dhe rëndësia e anëtarësimit në INTOSAI: ndikimi dhe përfitimet që kanë ISA-të”. Në panelin e  dytë diskutimi do të përqendrohet në temën ‘Si të zbatohen Standardet Ndërkombëtare të Institucioneve Supreme të Auditimit–praktikat e mira?’. Ndërkaq, në panelin e tretë do të diskutohet për temën ‘Roli i Thesarit në menaxhimin e parasë publike dhe ndikimi i auditimit të jashtëm’.

Në shenjë falenderimi dhe respekti për ndihmën e gjithanshme e shumëvjeçare për ngritjen e kapaciteteve të personelit të Zyres Kombëtare të Auditimit (ZKA), sot në ambientet e ZKA-së u bë inaugurimi i sallës së trajnimeve me emrin e institucionit të Zyres Kombetare të Auditimit të Suedisë (SNAO). Ceremonia simbolike e inagurimit u bë nga Auditori i Përgjithshëm i Kosovës, Besnik Osmani dhe Auditorja e Përgjithshme e Suedisë, Helena Lindberg, e cila njëherësh është edhe zëvendëskryetare e Komitetit për Ngritje të Kapaciteteve të INTOSAI-t.

Auditori i Përgjithshëm i Republikës së Kosovës, Besnik Osmani, i shoqëruar nga presidenti i Institucionit Shtetëror të Auditimit i Emirateve të Bashkuara Arabe, Dr. Harib Saeed Al Amimi, si dhe zyrtarët e tjerë të delegacionit arab u priten sot në takim nga zëvendëskryeministri i parë, Avdullah Hoti. Presidenti Al Amimi uroi Zëvendëskryeministrin e parë  z. Hoti për marrjen e përgjegjësive të reja. Ai po ashtu ofrojë mbështetjen e tij dhe organizatës të cilën e udhëheq në rrugën që Zyra Kombëtare e Auditimit të Kosovës ka nisur me rastin e anëtarësimit në Organizatën Ndërkombëtare të Institucioneve Supreme të Auditimit. Ndërsa, Zëvendëskryeministri Hoti, falënderoi z. Al Amimi  për përkrahjen e vazhdueshme gjatë tri viteve të fundit për anëtarësimin e Zyrës Kombëtare të Auditimit të Kosovës në  Organizatën Ndërkombëtare të Institucioneve Supreme të Auditimit si dhe siguroi atë se Qeveria e Republikës së Kosovës do të angazhohet dhe përkujdeset për zbatimin e rekomandimeve që dalin nga raportet e auditimeve në mënyrë që qeverisja në sektorin publik të arrijë dhe të jetë në nivelin e duhur. Ky takim u realizua në kuadër të vizitës së Dr. Harib Saeed Al Amimi në Kosovë për të marrë pjesë në Konferencën Ndërkombëtare “Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit” të organizuar nga ZKA-ja. Konferenca organizohet me rastin e pranimit të ZKA-së në Organizatën Ndërkombëtare të Institucioneve Supreme të Auditimit (INTOSAI), si dhe në kuadër të shënimit të 12-vjetorit të pavarësisë së Kosovës (17 shkurtit).

Zyra Kombëtare e Auditimit (ZKA), të mërkurën me datë 12 shkurt 2020 në ora 10:00, mbanë Konferencën Ndërkombëtare “Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit”. Për të festuar këtë sukses ndërkombëtar të Zyrës Kombëtare të Auditimit, në konferencë do të marrin pjesë udhëheqës të lartë të Institucioneve Publike, si dhe të Institucioneve Supreme të Auditimit nga Shqipëria, Maqedonia e Veriut, Mali i Zi, Suedia, Polonia, Turqia, Finlanda, Emiratet e Bashkuara Arabe, nga Gjykata Evropiane e Auditorëve si dhe përfaqësues nga INTOSAI.  Po ashtu, pjesëmarrës në konferencë do të jenë edhe përfaqësues të shoqërisë civile, mediave dhe organizatave ndërkombëtare dhe donatorë. Fillimisht, para të pranishmëve një fjalë rasti do ta mbajë Auditori i Përgjithshëm, Besnik Osmani si dhe Ministri i Financave dhe Transfereve, Besnik Bislimi. Folës kryesor për temën:  “Domethënia dhe rëndësia e anëtarësimit në INTOSAI: ndikimi dhe përfitimet që kanë ISA të” do të jetë Dr. Harib Saeed Al Amimi, President i Institucionit Shtetëror të Auditimit i Emirateve të Bashkuara Arabe, President i Konferencës së Shteteve Palë t ë Konventës së OKB-së Kundër Korrupsionit, ish President i INTOSAI-t. Për këtë çështje të pranishmëve do t’iu adresohet përmes një video mesazhi edhe z. Gene L Dodaro, Auditor i Përgjithshëm i Shteteve të Bashkuara, Zyra Qeveritare e Auditimit të SHBA-ve. Konferenca Ndërkombëtare “Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit” do të zhvillohet në tri panele me tema të ndryshme. Paneli I: “Domethënia dhe rëndësia e anëtarësimit në INTOSAI: ndikimi dhe përfitimet që kanë ISA-të” Moderator: z. Magnus Lindell, ish zv. Auditor i përgjithshëm i Suedisë dhe ish zv. Kryetar i Komitetit për Ngritje të Kapaciteteve të INTOSAI-t Panelistë:

• Znj. Helena Lindberg, Auditore e Përgjithshme e Suedisë dhe zv. Kryetare eKomitetit për Ngritje të Kapaciteteve të INTOSAI-t
• Dr.Harib Saeed Al Amimi, President i Institucionit Shtetëror të Auditimit i Emirateve të Bashkuara Arabe, President i Konferencës së Shteteve Palë të KonventëssëOKB-së Kundër Korrupsionit, ish President i INTOSAI-t
• Z. Besnik Osmani, Auditor i Përgjithshëm i Kosovës

Paneli II:  ‘Si të zbatohen Standardet Ndërkombëtare të Institucioneve Supreme të Auditimit–praktikat e mira?’ Folësi kryesor:        Geoffrey Simpson, Drejtor i Komisionit për Kontrollin e Cilësisë, Gjykata Evropiane e Auditorëve Moderator: Jade Quarrel, Menaxhere e lartë, Iniciativa për Zhvillim (IDI), INTOSAI Panelistë:

• Z. Bujar Leskaj, Kryetar, Kontrolli i Lartë i Shtetit të Shqipërisë
• Z. Jari Sanaskoski, Drejtor i Auditimit Financiar, Zyra Kombëtare e Auditimit e Finlandës
• Znj. Tanja Tasevska, Këshilltare e Auditorit të Përgjithshëm, Maqedonia e Veriut
• Znj. Arvita Zyferi, Ndihmëse eAuditorittëPërgjithshëm tëKosovës
• Z. Murat Ince, Krye-auditor, Gjykata Turke e Llogarive

Paneli III:  ‘Roli i Thesarit në menaxhimin e parasë publike dhe ndikimi i auditimit të jashtëm’ Folësi kryesor:        Ahmet Ismaili, Drejtor i Përgjithshëm i Thesarit të Kosovës Moderator: Z. Ilir Salihu, zv. Auditor i Përgjithshëm i Kosovës Panelistë:

• Z. Milan Dabovic, President i Senatit të Institucionit Shtetëror të Auditimit tëMalit të Zi
• Z. Marco Mantovanelli, Menaxher rajonal i Bankes Botërore për Kosovë dhe Maqedoni të Veriut
• Z. Selim Thaqi, Ekonomist në Zyrën e FMN-së në Kosovë
• Z. Qerkin Morina, Ndihmës Auditor i Përgjithshëm i Kosovës
• Z. Wieslaw Kurzyca, Këshilltar i Presidentit të Institucionit Suprem të Auditimit të Polonisë
• Z. Branko Smilevski, Drejtor i Auditimit, Institucioni Shtetëror i Auditimit të Maqedonisë së Veriut

Dhe në fund do të ndahen certifikata për auditorët e performancës të Zyrës Kombëtare të Auditimit të Kosovës për pjesëmarrje në punëtorinë Simulimi i politikave  e organizuar në bashkëpunim me Universitetin e Kembrixhit dhe Kolegjin UBT në Kosovë. Mbylljen e Konferencës do ta bëjë Zëvendës Auditori i Përgjithshëm, Ilir Saliu.

Auditori i Përgjithshëm i Republikës së Kosovës, Besnik Osmani, të martën priti në takim bilateral presidentin e Institucionit Shtetëror të Auditimit të Emirateve të Bashkuara Arabe, Dr. Harib Saeed Al Amimi. Osmani dhe Dr. Harib Saeed Al Amimi diskutuan për intensifikimin e bashkëpunimit bilateral me qëllim të shkëmbimit të informatave dhe përvojave, në interes të avancimit të mëtejmë të auditimit të jashtëm dhe përmirësimit të menaxhimit të parasë publike. Me këtë rast, Osmani e njoftoi homologun arab për punën dhe rezultatet e Zyrës Kombëtare të Auditimit, si dhe për ndikimin e rekomandimeve për të rritur llogaridhënien dhe qeverisjen e mirë të institucioneve. Auditori i Përgjithshëm, Besnik Osmani, falënderoi presidentin e Institucionit Shtetëror të Auditimit i Emirateve të Bashkuara Arabe, Dr. Harib Saeed Al Amimi, i cili në vazhdimësi e ka përkrahur Zyrën Kombëtare të Auditimit dhe për kontributin e dhënë në procesin e anëtarësimit të ZKA-së në INTOSAI. Në anën tjetër, presidenti i Institucionit Shtetëror të Auditimit i Emirateve të Bashkuara Arabe, Dr. Harib Saeed Al Amimi tregoi se e përcjellë në vazhdimësi punën e Zyrës Kombëtare të Auditimit të Kosovës, me ç’rast përgëzoi Osmanin për arritjet e deritanishme.  Ai tha se me anëtarësimin në INTOSAI, ZKA-së do t’i mundësohet shkëmbimi i njohurive dhe përvojave me Institucionet Supreme të Auditimit simotra. Institucioni Suprem i Auditimit i Emirateve të Bashkuara Arabe ka një përvoje të madhe në organizimet dhe projektet ndërkombëtare në fushën e auditimit, duke qenë se për tri vjet (2016-2019) ka drejtuar INTOSAI-n. Ky takim u realizua në kuadër të vizitës së Dr. Harib Saeed Al Amimi në Kosovë për të marrë pjesë në Konferencën Ndërkombëtare “Domethënia dhe rëndësia e anëtarësimit në INTOSAI: ndikimi dhe përfitimet për Institucionet Supreme të Auditimit”. Kjo konferencë do të mbahet me rastin e anëtarësimit të Zyrës Kombëtare të Auditimit të Republikës së Kosovës me të drejta të plota në Organizatën Ndërkombëtare të Institucioneve Supreme të Auditimit (INTOSAI). Gjatë qëndrimit në Prishtinë, delegacioni nga Emiratet e Bashkuara Arabe do të takohet me përfaqësues të Kuvendit, Qeverisë dhe organizatave të shoqërisë civile.

Zyra Kombëtare e Auditimit (ZKA) sot bëri prezantimin publik të raportit të performancës  “Korniza Afatmesme e Shpenzimeve 2018–2020 në sektorin e arsimit dhe të infrastrukturës”, ku morën pjesë përfaqësuesit e Ministrisë së Financave, Ministrisë së Arsimit, Shkencës dhe Teknologjisë, Zyrës për Planifikim Strategjik në kuadër të Zyrës së Kryeministrit, Kuvendit të Kosovës, shoqërisë civile dhe mediave. Ndihmës-Auditori i Përgjithshëm, Vlora Spanca, tha se ky raport i auditimit do t’iu shërbejë institucioneve përkatëse që të rrisin llogaridhënien, transparencën, efikasitetin dhe efektivitetin në arritjen e objektivave strategjike përmes një planifikimi të mirëfilltë të aktiviteteve dhe buxhetit. Më tutje Spanca tha se rezultatet e auditimit kanë nxjerrë në pah se procesi i hartimit të Kornizës Afatmesme të Shpenzimeve (KASH) dhe shfrytëzimi i saj është karakterizuar me disa mangësi  të cilat mund të pengojnë arritjen e objektivave dhe prioriteteve strategjike të vendit. “Mangësitë janë që nga planifikimi i projekteve jashtë objektivave strategjike, planifikimi i aktiviteteve jashtë kompetencës dhe përgjegjësisë të ministrive, planifikimi i projekteve duke mos u bazuar në analiza të mirëfillta financiare dhe për pasojë të gjitha këto kanë ndikuar në mosefikasitetin e kryerjes së projekteve të cilat janë me rëndësi për qytetarët”, tha Spanca. Ndërkohë drejtor i Departamentit të Auditimit të Performancës dhe Teknologjisë Informative, Samir Zymberi, tregoi se raporti i auditimit ka mbuluar periudhën e Kornizës Afatmesme të Shpenzimeve për vitin 2018-2020 me fokus viti 2018. Ai tregoi se procesi i auditimit është zhvilluar në Zyrën e  Kryeministrit përkatësisht Zyrën për Planifikim Strategjik, në Ministrinë e Financave, në Ministrinë e Infrastrukturës dhe Transportit si dhe në Ministrinë e Arsimit, Shkencës dhe Teknologjisë. “Objektivë kryesore e këtij auditimi ishte që të vlerësojmë nëse Korniza Afatmesme e Shpenzimeve 2018-2020 reflekton objektivat strategjike dhe nëse ka shërbyer si dokument kryesore për hartimin e buxhetit vjetor. Ndërsa me qëllim të përmirësimit të hartimit të KASH-it vijues ZKA-ja ka dhënë 1 rekomandim për Kuvendin e Kosovës dhe 10 rekomandime për palët e audituara. Prej tyre, 2  rekomandime janë për Zyrën e Kryeministrit, 4 për Ministrinë e Financave dhe 4  rekomandime për Ministrinë e Infrastrukturës dhe për Ministrinë e Arsimit, Shkencës e Teknologjisë”, tha Zymberi. Kurse udhëheqës i ekipit, Labinot Sadiku, në detaje prezantoi gjetjet e këtij auditimi, me ç’rast theksoi se objektivat strategjike në sektorin e arsimit dhe infrastrukturës janë përcjellë më disa mangësi. Ai fillimisht tha se KASH 2018-2020 është aprovuar për sektor dhe jo në nivel ministror dhe sipas Sadikut, kjo e bënë të vështirë ndërlidhjen, vlerësimin dhe mbikëqyrjen e aktiviteteve për organizata. Tutje Sadiku theksoi se Zyra për Planifikim Strategjik në kuadër të Zyrës së Kryeministrit nuk ka bërë përpjekje të mjaftueshme për të monitoruar adresimin e objektivave strategjike.  Kurse Ministria e Infrastrukturës dhe Transportit kërkesat buxhetore nuk i ka hartuar plotësisht sipas udhëzimeve për përgatitjen e KASH. Për më tepër ai shpalosi dobësitë e gjetura në projektet individuale në MIT.  Ndërkaq tri projekte që i takojnë Ministrisë së Arsimit, Shkencës dhe Teknologjisë Sadiku tha se janë vendosur në programin e investimeve publike pa dokumente mbështetëse. Ndërsa anëtarja e ekipit, Arlinda Mustafa-Selmani, tha se planifikimi i buxhetit për objektiva strategjike në MAShT dhe aktivitete të tjera nuk është bërë mbi bazën e analizave të mirëfillta. Ajo tregoi se MAShT-i, ka pasur vonesa në tekstet shkollore, si dhe për hartimin e këtyre teksteve janë shpenzuar 1.9 milionë euro më shumë se sa vlera e planifikuar. Mustafa-Selmani theksoi se si përfundim kjo tregon për një planifikim të paqëndrueshëm për këtë projekt. Nga ana tjetër përfaqësuesit e institucioneve të audituara, kanë shprehur gatishmërinë për t’i zbatuar rekomandimet e dhëna nga Zyra Kombëtare e Auditimit.  

Ju ftojmë të ndiqni tryezën e organizuar nga Zyra Kombëtare e Auditimit (ZKA), ku do të prezantohet raporti i auditimit të performancës “Korniza Afatmesme e Shpenzimeve 2018 – 2020 në sektorin e arsimit dhe të infrastrukturës”.   Tryeza do të mbahet:

Të premten me datën  07 shkurt  2020 në ora 10:00,

në ambientet e Zyrës Kombëtare të Auditimit,

Lagjja Arbëria, Rr. Ahmet Krasniqi, 210

Prishtinë

  Në tryezë janë të ftuar përfaqësues nga Ministria e Financave, Ministria e Arsimit Shkencës dhe Teknologjisë, Ministria e Infrastrukturës dhe Transportit, Zyra për Planifikim Strategjik në kuadër të Zyrës së Kryeministrit, përfaqësues nga Kuvendi i Kosovës, institucionet e arsimit të lartë,  shoqëria civile, mediat e organizatat ndërkombëtare.   Jeni të mirëseardhur.  

Zyra Kombëtare e Auditimit (ZKA) bëri publik raportin e performancës për projektin “Sistemi i Përcaktimit të Tarifave të Energjisë Elektrike, Termike dhe atyre të Ujësjellësit”. Raporti konstaton se pavarësisht progresit të arritur nga rregullatorët në procesin e përcaktimit të tarifave, ka disa mangësi që ndikojnë në saktësinë e tarifave të aprovuara dhe të cilat rrezikojnë që tarifat të mos jenë drejtë të përcaktuara. Po ashtu gjatë procesit të përcaktimit të tarifave, Rregullatorët nuk kanë arritur të sigurojnë transparencë të mjaftueshme si dhe vendosje plotësisht të drejtë dhe të saktë të tarifave. Raporti thekson se Rregullatorët dhe ofruesit e shërbimeve publike nuk kanë zhvilluar një proces të identifikimit të sasisë së konsumuar të shërbimeve nga konsumatorët të cilët janë të liruar nga pagesa e shërbimeve publike për t’u kompensuar nga autoritetet përkatëse. Edhe përcaktimi i kostove operative, kostove kapitale dhe koeficienteve tjerë të rëndësishëm financiarë nuk aprovohet plotësisht bazuar në analiza përkatëse dhe të dokumentuara me sqarime të mjaftueshme dhe të qarta. Parakushtet procedurale dhe teknike gjatë procesit për përcaktimin e tarifave nuk sigurojnë një pjesëmarrje të kënaqshme të qytetarëve dhe shoqërisë civile në aktivitetet e konsultimeve publike, qasje e cila ka rezultuar në një situatë ku konsultimet publike - pjesëmarrja e publikut në përcaktimin e tarifave në përgjithësi, është shumë e kufizuar. Ky auditim kishte për qëllim vlerësimin se sa efektiv është sistemi i përcaktimit të tarifave të shërbimeve publike dhe njëkohësisht të identifikojë boshllëqet dhe vlerësojë nëse procesi i përcaktimit të tarifave për shërbimet publike është bërë sipas kritereve të matshme dhe në përputhje me shpenzimet reale dhe relevante. Zyra Kombëtare e Auditimit i rekomandon autoritetet përgjegjëse që të zhvillojnë tutje dhe të implementojnë drejtë dhe me saktësi metodologjinë për përcaktimin e tarifave duke siguruar se konsumatorët e shërbimeve publike paguajnë tarifa të shërbimeve publike të vendosura saktë dhe drejtë. Raportin e plotë mund ta lexoni në këtë vegëz.

Raporti i auditimit të performancës “Siguria në trafikun rrugor” u prezantua edhe në konferencën e shtatë ndërkombëtare “Sfidat e Mobilitetit në Transport dhe Siguria Publike”. Në konferencën e organizuar nga Kolegji Tempulli dhe Akademia e Kosovës për Siguri Publike u shpalosen arritjet e ngecjet në sigurinë e transportit dhe sigurinë publike në Kosovë si dhe u diskutuan praktikat më të mira nga vendet e tjera. Për gjetjet kryesore të raportit “Siguria në trafikun rrugor” para të pranishmëve prezantoi Labinot Sadiku, udhëheqës i ekipit që realizoi këtë raport të auditimit. Sadiku tha se ky raport ka adresuar çështjet kryesore te cilat ndërlidhen me sigurinë në trafikun rrugor e cila viteve të fundit është mjaftë shqetësuese për pjesëmarrësit në trafik. Bazuar në këtë, ai tregoi se ZKA-ja ka dhënë 24 rekomandime për institucionet e audituara me qëllim të rritjes së sigurisë në trafik. Ndërkohë dekani i Fakultetit të Sigurisë Publike, Bejtush Gashi, tha se siguria publike në përgjithësi dhe ajo rrugore në veçanti vazhdojnë të mbeten ndër problemet kryesore për institucionet shtetërore. Edhe drejtori i Kolegjit të Shkencave të Aplikuara Teknike “Tempulli”, Muhamed Krasniqi, theksoi se siguria e lëvizjes në rrugë është çështje që duhet t’i brengosë institucionet dhe qytetarët.

Komiteti Drejtues i projektit të binjakëzimit “Fuqizimi i mëtejmë i ndikimit të Zyrës Kombëtare të Auditimit të Kosovës” në mes të Zyrës Kombëtare të Auditimit (ZKA) dhe Zyrës Supreme të Auditimit të Polonisë mbajti takimin e dytë të drejtuar nga Zëvendës-Auditori i Përgjithshëm, njëherësh udhëheqës i këtij projekti, Ilir Salihu si dhe drejtuesi i projektit nga Polonia, këshilltari i presidentit të Zyrës Supreme të Auditimit të Polonisë, Wojciech Kutyla. Në këtë takim palët fillimisht diskutuan për raportin e parë tremujor të progresit si dhe për  planin e punës për gjashtëmujorin e ardhshëm, që u prezantuan nga këshilltarja rezidente e projektit të binjakëzimit, Aleksandra Kukula. Më tutje diskutimi u fokusua në ecurinë e zbatimit të projektit i cili ka për qëllim fuqizimin e ndikimit të Zyrës Kombëtare të Auditimit të Kosovës. Projekti shërben për avancimin e metodologjisë së auditimit, rritjen e  cilësisë në auditim dhe fuqizimin e ndikimit të Zyrës Kombëtare të Auditimit, përmes zbatimit të rekomandimeve të auditimit nga subjektet e audituara. Ky projekt financohet nga Bashkimi Evropian dhe zbatohet nga Zyra Supreme e Auditimit të Polonisë.

Zyra Kombëtare e Auditimit (ZKA) bëri publik raportin e performancës “Korniza Afatmesme e Shpenzimeve 2018–2020 në sektorin e arsimit dhe të infrastrukturës”. Raporti konstaton se Korniza Afatmesme e Shpenzimeve (KASH) nuk trajtohet mjaftueshëm për të siguruar planifikime buxhetore në përputhje me prioritetet strategjike. Auditimi vë në pah se planifikimi, zbatimi dhe monitorimi i realizimit të objektivave strategjike nuk është në nivelin e duhur. Kjo ka bërë që të zbehet rëndësia dhe qëllimi që ka Korniza Afatmesme e Shpenzimeve (KASH) në planifikim afatgjatë të objektivave dhe buxhetit. Për rrjedhojë, Korniza Afatmesme e Shpenzimeve nuk është plotësisht në funksion të një planifikimi të qëndrueshëm. Sipas të gjeturave të auditimit, Zyra për Planifikim Strategjik në kuadër të Zyrës së Kryeministrit nuk ka arritur të bëjë bashkërendim të aktiviteteve të saj, monitorim dhe raportim të vazhdueshëm të implementimit të objektivave strategjike në mënyrë që të hartojë një deklaratë të duhur të prioriteteve. Kurse, Ministria e Financave (MF) ka bërë hartimin e Kornizës Afatmesme të Shpenzimeve në mënyrë të përgjithësuar nëpër sektorë por jo edhe sipas organizatave buxhetore, kjo e bënë të vështirë ndërlidhjen, vlerësimin dhe mbikëqyrjen e aktiviteteve për organizata. Ndërsa, Ministria e Infrastrukturës dhe Transportit (MIT) si dhe Ministria e Arsimit Shkencës dhe Teknologjisë (MAShT), nuk kanë arritur të bëjnë planifikim të duhur financiar të projekteve/aktiviteteve dhe realizim të buxhetit për projekte të caktuara duke rrezikuar realizimin e objektivave strategjike qeveritare. Për më shumë, këto dy ministri kishin planifikuar dhe realizuar projekte jashtë objektivave strategjike. Zyra Kombëtare e Auditimit i rekomandon autoritetet përgjegjëse që të sigurojnë hartim dhe miratim të duhur të Kornizës Afatmesme të Shpenzimeve, e cila duhet të shërbej si dokument kyç për planifikimin e aktiviteteve strategjike dhe atyre vjetore. Objektivë e këtij auditimi është vlerësimi nëse procesi i përgatitjes dhe zbatimit të Kornizës Afatmesme të Shpenzimeve (KASH) ka adresuar objektivat strategjike të përcaktuara, për planifikim të mirëfilltë dhe financim të politikave prioritare në vend. Auditimi përfshin periudhën për Kornizën Afatmesme të Shpenzimeve 2018 – 2020 me fokus vitin 2018 ndërsa, për nevoja krahasimore mbulon edhe periudhën e Kornizës Afatmesme të Shpenzimeve 2017–2019. Raportin e plotë mund ta lexoni në këtë vegëz