Lajmet

Me datat 16 dhe 17 nëntor, auditorët nga Zyra Kombëtare e Auditimit të Kosovës, Arben Selimi dhe dhe Donjetë Dreshaj,  morën pjesë në punëtorinë  me temë “Çmimi ekonomikisht më i favorshëm- çfarë më tutje?”. Punëtoria u organizuar nga Instituti Demokratik i Kosovës (KDI). Pjesëmarrës në këtë punëtori ishin përfaqësues nga institucionet vendore me njohuri në fushën e prokurimit publik nga aspekti rregullativ, zbatues dhe mbikëqyrës/llogaridhënës si: Komisioni Rregullativ i Prokurimit Publik, Prokuroria e Shtetit, Agjencia Qendrore e Prokurimit, Agjencia Kundër Korrupsion dhe OJQ-të. Gjatë kësaj punëtorie janë shqyrtuar përvojat vendore dhe ato të Bashkimit Evropian sa i përket aplikimit në aktivitetet e prokurimit të kriterit çmimi ekonomikisht më të favorshëm. Po ashtu është diskutuar edhe për kapacitetet aktuale në nivelin zbatues dhe sfidat e pritshme gjatë zbatimit të këtij kriteri. Kjo temë u trajtua me ligjërata, punë në grupe, diskutime të hapura dhe në fund është bërë përmbledhja e mendimeve. Fillimisht janë prezantuar disa nga problemet aktuale në prokurimin publik. Më tutje është prezantuar Rregullorja 67 e Direktivës 2014/24 / KE, si vlerësohet tenderët bazuar në kriterin çmimi ekonomikisht më të favorshëm dhe cilat janë nën kriteret e këtij kriteri.  Pastaj u trajtuan çështja lidhur me kapacitetet që i ka Kosova për implementim dhe menaxhim e tenderëve që aplikojnë këtë kriter për të siguruar qëndrueshmërinë e furnizimit. Përfaqësuesit e Zyrës Kombëtare të Auditimit janë deklaruar se edhe pse përqindja aktuale e shfrytëzimit të kësaj procedure është e vogël (rreth 1% për vitet e kaluara) ka kapacitete për të mbuluar fushën e prokurimit që ka të bëjë me aplikimin e kriterit çmimi ekonomikisht më i favorshëm. Shumica e pjesëmarrëse kanë qenë të mendimit se kjo procedurë duhet të fillojë të aplikohet me pilot projekte deri në vitin 2022 në mënyrë që të ketë përgatitje të duhura për përdorim të kësaj procedura me kapacitete të plota. Megjithatë sipas pjesëmarrësve, mund të ketë sfida në aplikimin e këtij kriteri për shkak se zyrtarët e prokurimit mund të mos jenë kompetent për të zhvilluar këtë procedurë.

Me datë 15 nëntor, në Larnaka të Qipros u mbajt seminari për Rregulloren e Përgjithshme të Mbrojtjes së të Dhënave (GDPR). Seminari u organizua nga Zyra e Auditimit të Republikës së Qipros. Qëllimi i seminari ishte  ndikimi i Rregullores  së Përgjithshme për Mbrojtjen e të Dhënave në Institucionet Supreme të Auditimit (ISA) dhe në menaxhimin e të dhënave gjatë procesit të auditimit, për mbledhjen, transferimin, ruajtjen dhe shkatërrimin e të dhënave personale. Fokus i veçantë i është dhënë funksionit, rolit dhe detyrave të  Zyrtarit për Mbrojtjen e të Dhënave në Institucionit Supreme të Auditimit (ISA). Prezantues ishin zyrtarë me përvojë nga Gjykata Evropiane e Auditorëve (ECA) dhe nga Komisioni Evropian. Në seminar është prezantuar hulumtimi mbi zbatimin e kësaj rregullore nga ISA-të Evropiane, ndërsa përmes diskutimeve pjesëmarrësit kanë shkëmbyen përvojat e vendeve të tyre rreth ligjeve dhe rregulloreve të brendshme të ISA për trajtimin e të dhënave personale gjatë proceseve audituese. Në mënyrë të veçantë ISA e Hungarisë ka prezantuar përvojën dhe praktikën e saj në zbatimin e kësaj Rregulloreje. Po ashtu janë ngritur shqetësimet rreth nivelit të zbatimit të kësaj Rregulloreje. Në këtë seminar morën pjesë përfaqësues nga Institucionet Supreme të Auditimit të Shqipërisë, të Austrisë, të Çekisë, të Kroacisë, të  Estonisë, të Finlandës, Hungarisë, Holandës, Irlandës, Italisë, Qipros dhe Serbisë. Ndërsa Zyra Kombëtare e Auditimit u përfaqësua nga Udhëheqësi i Departamentit për Performancë dhe Teknologji Informative z. Samir Zymberi dhe auditorë e TI-së znj. Shqipe Mujku Hajrizi. Përfaqësuesit nga ZKA  zhvilluan biseda dhe takime jo formale me përfaqësues nga Holanda, Estonia, Kroacia, Shqipëria, Qipro, Finlanda, Austria, të cilët kanë shfaqur interesim për zhvillimin e Zyrën Kombëtare të Auditimit të cilët po ashtu kanë përshëndetur anëtarësimin e ZKA-së në INTOSAI si dhe kanë shprehur gatishmërinë për bashkëpunim, sidomos në fushën e auditimeve të TI dhe performancës.

Sot, Auditori i Përgjithshëm i Kosovës z. Besnik Osmani i shoqëruar nga Zëvendës Auditori i Përgjithshëm z. Ilir Salihu zhvilluan një vizitë pune në selinë e Zyrën Supreme të Auditimit të Çekisë, në Pragë ku u pritën në një takim të veçantë nga Presidenti i këtij institucioni, z. Miloslav Kala. Në këtë takim u bisedua për forcimin e mëtutjeshëm të bashkëpunimit në mes të dy Institucioneve Supreme të Auditimit; për procesin e zbatimit të marrëveshjes bilaterale, si dhe për involvimin e Zyrës Kombëtare të Auditimit në institucione të rëndësishme të auditimit në nivel rajonal dhe evropian. Auditori i Përgjithshëm i Republikës Çeke, z. Kala ka shprehur gatishmërinë e institucionit të tij për të thelluar bashkëpunimin ndërinstitucional përmes zhvillimit të aktiviteteve bilaterale si dhe duke ofruar ekspertizën në kuadër të Projektit të binjakëzimit “Fuqizimi i mëtejmë i ndikimit të Zyrës Kombëtare të Auditimit në Kosovë”, i cili zbatohet nga Zyra Supreme e Auditimit e Polonisë. Z. Osmani e ka falënderuar z. Kala për përkrahjen e tij të vazhdueshme dhe ka ritheksuar rëndësinë që ka bashkëpunimi bilateral me homologët Çekë në zhvillimin e mëtejmë profesional të personelit auditues të ZKA-së si dhe arritjen e standardit evropian të cilësisë së auditimeve, si parakushte për integrimin e ZKA-së në programet dhe organizatat rajonale dhe evropiane. Zyra Kombëtare e Auditimit e Kosovës dhe ajo e Republikës së Çekisë, në muajin maj të këtij viti, kanë nënshkruar memorandumin për bashkëpunim në fusha të rëndësishme profesionale midis dy institucioneve dhe synon shkëmbimin e praktikave të mira audituese, veçmas në lidhje me metodologjinë dhe procedurat e auditimit të jashtëm të sektorit publik; aktivitetet profesionale për zhvillimin e mëtejmë të kapaciteteve institucionale e njerëzore; përmirësimin e komunikimit me palët e jashtme, si dhe shkëmbimin e përvojave përmes auditimeve paralele.

Përfaqësues nga Zyra Kombëtare e Auditimit të Kosovës morën pjesë në punëtorinë rajonale me temën “Strategjitë dhe qasjet teknike për përforcimin e bashkëpunimit mes Parlamenteve dhe Institucioneve Supreme të Auditimit (ISA)” të mbajtur në Podgoricë nga 12 deri më 14 nëntor. Punëtoria u organizua nga Parlamenti i Malit të Zi dhe Banka Botërore si dhe është mbështetur nga Fondi i Forcimit të Mjedisit të Përgjegjshmërisë dhe Mirëbesimit (FFMPM) i themeluar nga sekretariati shtetëror zviceran për çështje ekonomike dhe Komisioni Evropian. Pjesëmarrës në këtë punëtori ishin deputetë nga parlamentet dhe përfaqësues nga Institucionet Supreme të Auditimit të vendeve të Ballkanit Perëndimor. Kjo punëtori ishte aktivitet përcjellës nga punëtoria e mbajtur në muajin maj në Tiranë, me temën “Fuqizimi i marrëdhënieve të Parlamentit dhe Institucioneve Supreme të Auditimit për të përmirësuar performancën e auditimit të jashtëm në Shtetet e Ballkanit Perëndimor”. Pjesëmarrësit e kanë njoftuar njëri-tjetrin lidhur me progresin në zbatimin e planeve të veprimit për të cilat janë pajtuar në punëtorinë e mbajtur në Tiranë. Përmes diskutimeve pjesëmarrësit shkëmbyen edhe përvojat e vendeve të tyre lidhur me rolin e parlamentit dhe komisioneve respektive për mbikëqyrjen  e financave publike, çështjen e shqyrtimit të raporteve të auditimit si dhe mënyrat e bashkëpunimit  për krijimin e një marrëdhënie më efektive. Tema të tjera të diskutimit dhe shkëmbimit të përvojave në kuadër të punëtorisë lidhen me memorandumin e bashkëpunimit në mes të Parlamentit dhe ISA-ve, kuptimi i raportit të auditimit, përdorimi i raportit të auditimit për të shqyrtuar performancën e qeverisë dhe subjekteve të audituara, monitorimi i rekomandimeve etj. Në këtë punëtori nga Zyra Kombëtare e Auditimit morën pjesë Ndihmës Auditori i Përgjithshëm z. Naser Arllati, Drejtori i Përgjithshëm z. Imri Semtishti, Udhëheqësja e Departamentit për Komunikim dhe Bashkëpunim Ndërkombëtar në Auditimi znj. Saranda Husaj-Baraliu dhe auditore/këshilltare për Kuvend znj. Violeta Smajlaj. Ndërsa në emër të Parlamentit të Kosovës morën pjesë stafi mbështetës i Komisionit për Buxhet dhe Financa dhe Komisionit për Mbikëqyrjen e Financave Publike. Po ashtu, pjesëmarrës ishin  edhe përfaqësues nga Zyra e Bashkimit Evropian në Kosovë. Në kuadër të kësaj punëtorie, pjesëmarrësit vizituan edhe Parlamentin e Malit të Zi, ku u mirëpritën nga  kryetari z. Ivan Brajovic, i cili i ka njoftuar lidhur me punën e parlamentit dhe komisioneve parlamentare. Po ashtu, pjesëmarrësit kanë vizituar edhe Institucionin Suprem të Auditimit të Malit të Zi ku janë pritur në një takim të veçantë nga presidenti i këtij institucioni, z. Milan Dabovic.

Sot, Auditori i Përgjithshëm i Kosovës, z. Besnik Osmani, i shoqëruar nga Zëvendësi i tij z. Ilir Salihu, zhvilluan një vizitë zyrtare në Gjykatën Evropiane të Auditorëve (ECA) në Luksemburg, ku u takuan me Kryetarin e ECA-së, z.Klaus Hainer Lehne. Bisedimet u fokusuan në vazhdimin e bashkëpunimit dhe shkëmbimit të përvojave në nivel profesional. Temë e bisedimeve ishte edhe pjesëmarrja e Zyrës Kombëtare të Auditimit të Kosovës (ZKAK) në programet dhe aktivitetet e institucioneve evropiane të auditimit. Auditori i Përgjithshëm, z.Osmani, uroi z.Lehne për emërimin e tij edhe për një mandat tjetër si President i ECA-së dhe e falënderoi atë për mbështetjen e vazhdueshme dhënë ZKAK-së, veçanërisht për ofrimin e mundësive për auditorë e ZKAK-së që të marrin pjesë në programet e praktikës profesionale. Kjo paraqet një mundësi shumë të mirë për auditorët e ZKAK-së që të njoftohen me praktikat e mira evropiane për auditim dhe të mësojnë drejtpërsëdrejti nga ekspertët e ECA-së. Presidenti i Gjykatës Evropiane të Auditorëve, z.Lehne, i vlerësoi të arriturat e ZKAK-së dhe rikonfirmoi mbështetjen e ECA-së për ZKAK-në si në zhvillimin e kapaciteteve profesionale ashtu edhe në përfshirjen e ZKAK-së në programet e organizimet rajonale dhe evropiane të auditorëve.

Sot, Zyra Kombëtare e Auditimit, ka bërë prezantimin publik të raportit të perfomancës “Sistemi i kontrollit dhe monitorimit të cilësisë së derivateve të naftës”. Pjesëmarrës në këtë tryezë ishin përfaqësues të Ministrisë së Tregtisë dhe Industrisë, të Doganës së Kosovës, përfaqësues nga shoqata e naftarëve dhe Laboratorëve vendor, shoqëria civile, mediat dhe organizatat ndërkombëtare. Me këtë rast, Ndihmësja e Auditorit të Përgjithshme znj. Vlora Spanca, nën udhëheqjen e të cilës është kryer ky auditim, ka thënë se Zyra Kombëtare e Auditimit është obliguar ta kryejë këtë auditim duke e ditur rëndësinë e cilësisë së derivateve të naftës për një ambient të pastër dhe të shëndetshëm për vendin. Znj. Spanca me tej theksoi se përkundër përpjekjeve për të siguruar cilësinë e derivateve të naftës kontrolli dhe monitorimi i këtyre produkteve është përcjellë me mangësi dhe kjo ka ndikuar që të mos sigurohet cilësia e derivateve në import dhe në tregun e brendshëm. Për ta rritur sigurinë audituese në këtë auditim ZKA ka angazhuar edhe një ekspert të fushës i cili ka dhënë kontribut të mirë në këtë auditim. “Zbatimi i rekomandimeve të ZKA-së do të ndikojë sado pak në përmirësimin e gjendjes së kontrollit dhe monitorimit të cilësisë së derivateve të naftës në Kosovë” është shprehur ajo. Udhëheqja e departamentit të auditimit të performancës, znj. Myrvete Gashi, ka thënë se ky raport i auditimit do t’iu ofrojë palëve të interesit informata dhe një vlerësim lidhur me kontrollin dhe monitorimin e cilësisë së derivateve të naftës në import dhe në tregun e brendshëm. Cilësia e derivateve të naftës përveç që ndikon në cilësinë e ajrit ajo ka ndikim edhe në performancën e automjeteve andaj kontrolli dhe monitorimi adekuat janë të rëndësishme  për të siguruar se derivatet e naftës i përmbushin të gjitha specifikimet dhe standardet e duhura, shtoi ajo. Prezantimi detaj i raportit përfshirë gjetjet konkluzionet dhe rekomandimet e auditimit, është bërë nga  Drilon Shala udhëheqës i ekipit dhe Shkurta Stublla, auditore. Në anën tjetër pjesëmarrësit kanë vlerësuar lartë kontributin e Zyrës Kombëtare të Auditimit në forcimin e llogaridhënies dhe rritjen e transparencës në administratë publike. Ata kanë shprehur opinionet e tyre lidhur me raportin e auditimit. Zyra Kombëtare e Auditimit në vazhdimësi mban një dialog kuptimplotë dhe efektiv me palët e interesit, me qëllim që t? siguroj ndikim m? t? madh t? rezultateve t? auditimit përmes organizimit të tryezave. Kjo me qëllim  që të bëhet sa më transparente puna audituese dhe të sqarohen gjetjet dhe rekomandimet për publikun e gjerë, në mënyrë që të mos ketë keqkuptime dhe keqinterpretime.

Të nderuar përfaqësues të mediave, Ju ftojmë të ndiqni tryezën e organizuar nga Zyra Kombëtare e Auditimit për prezantimin e raportit të auditimit të performancës “Sistemi i kontrollit dhe monitorimit të cilësisë së derivateve të naftës”.   Tryeza do të mbahet:

të marten, me 12 nëntor 2019

në ora 10:00

në sallën Orion rr. Rexhep Luci,

Prishtinë

  Në tryezë janë të ftuar përfaqësues të Ministrisë së Tregtisë dhe Industrisë, Doganës së Kosovës, shoqërisë civile, mediave, organizatave ndërkombëtare. Tryeza është e hapur për publikun dhe ka karakter informues lidhur me përmbajtjen, gjetjet dhe rekomandimet e auditimit. Debati do të jetë i hapur për të gjithë pjesëmarrësit.   Ju mirëpresim!

Sot, në kuadër të vizitës së Presidentit të Zyrës Supreme të Auditimit të Polonisë, është mbajtur konferenca për fillimin e zbatimit të Projektit të Binjakëzimit “Fuqizimi i mëtejmë i ndikimit të Zyrës Kombëtare të Auditimit në Kosovë”. Ky projekt financohet nga Bashkimi Evropian dhe do të zbatohet nga Zyra Supreme e Auditimit të Polonisë. Në konferencën hapëse të projektit, morën pjesë z. Besnik Osmani, Auditor i Përgjithshëm i Kosovës, z. Marian Banas, Kryetar i Zyrës Supreme të Auditimit në Poloni, znj. Hillen Francke, Zëvendës Kryesuese e Bashkëpunimit, Zyra e Bashkimit Evropian në Prishtinë dhe përfaqësues të institucioneve vendore e ndërkombëtarë në Kosovë. Prezantimi i projektit është bërë nga z. Ilir Salihu, Zëvendës Auditor i Përgjithshëm dhe Udhëheqës i Projektit nga pala kosovare. Me këtë rast, Auditori i Përgjithshëm z. Besnik Osmani, ka shprehur falënderimin e tij në radhë të parë për Bashkimin Evropian për mbështetjen e vazhdueshme që ka ofruar në zhvillimin e kapaciteteve të Zyrës Kombëtare të Auditimit të Kosovës përmes projekteve të binjakëzimit. Binjakëzimi jep mundësi që të avancohet në auditimin dhe përmes këtij procesi të ndihmohet Kosova në integrime evropiane. “Shkëmbimi profesional i përvojave të auditorëve tonë me ata evropian na siguron neve që ne jemi kompetent dhe jemi të barabartë me dijen, ndikimin që e kemi në interes të publikut. Kjo për neve është shumë e rëndësishme”, shtoi ai, Z. Osmani po ashtu është shprehur shumë i kënaqur që Zyra Supreme e Auditimit të Polonisë do të jetë partnerë në realizimin e këtij projekti, marrë parasysh përvojën dhe kredibilitetin e lartë që gëzon ky institucion. Projekti na siguron qe qëllimet tona në planin strategjik po zbatohen me sukses, theksoi Osmani. President i Zyrës Supreme të Polonisë z. Marian Banas, është shprehur se ndihet shumë i nderuar që ZKA për herë të dytë zgjedh Zyrën Supreme të Polonisë si partnere. “Ky projekt do të shërbejë për rritje të cilësisë në auditim dhe do t’i motivojë subjektet e audituara që të zbatojnë rekomandimet e auditorëve” shtoi ai, meqë rast uroj kolegët nga ZKA për anëtarësimin në INTOSAI. Ky është projekti i pestë i mbështetur nga Bashkimi Evropian dhe jemi shumë të lumtur për atë që është arritur deri më tani është shprehur Zëvendës Kryesuesja e Bashkëpunimit nga Zyra e Bashkimit Evropian në Prishtinë, znj. Hillen Francke. Zyra e BE-së është e përkushtuar që në vazhdimësi ta mbështes ZKA-në në ngritjen e kapaciteteve të saj. ZKA në tri vitet e fundit ka arritur shumë suksese duke rritur mbulueshmërinë e auditimeve dhe  në raportet e auditimit po trajton tema me interes për qytetarët siç janë cilësia e ajrit, lista esenciale e barërave, përdorimi i pajisjeve mjekësore, grantet në bujqësi, punësimi etj. Ndërsa, Zëvendës Auditor i Përgjithshëm z. Ilir Salihu, tha se janë të interesuar të shtrijnë ndikimin pozitiv te institucionet publike. “Për të ndodhë kjo duhet të ngrisim kapacitetin dhe cilësinë e punës tonë. Besojmë qe përmes këtij projekti do të arrijmë një nivel evropian të punës dhe cilësisë”, theksoi ai Projekti i Binjakëzimit “Fuqizimi i mëtejmë i ndikimit të Zyrës Kombëtare të Auditimit në Kosovë” financohet nga Bashkimi Evropian dhe do të zbatohet nga Zyra Supreme e Auditimit të Polonisë, me mbështetjen edhe të kolegëve ekspertë nga Institucionet Supreme të Auditimit të Kroacisë, të Republikës së Çekisë, të Letonisë, të Lituanisë dhe të Portugalisë. Ky është projekti i dytë që mbështetet nga Bashkimi Evropian dhe zbatohet nga Zyra Supreme e Auditimit të Polonisë”. Vlera e tërësishme e projektit është 700 000 € dhe pritet të realizohet brenda 18 muajve. Objektivë specifike e projektit është që të mbështetet Zyra Kombëtare e Auditimit në zhvillimin e mëtejmë të kapaciteteve të saj në realizimin e qëndrueshëm të objektivave dhe  të misionit të vet sipas Standardeve Ndërkombëtare të Institucioneve Supreme të Auditimit (SNISA) dhe rritjen e ndikimit të saj përmes komunikimit të intensifikuar me qytetarët, Parlamentin dhe palët tjera të interesit. Projekti përbëhet nga tri komponente kryesore: (i) Komunikimi me qytetarët, Parlamentin dhe palët e tjera të interesit; (ii) Fuqizimi i kapaciteteve institucionale të ZKA-së; dhe (iii) Përditësimi i doracakëve të auditimit (financiar dhe të pajtueshmërisë) dhe të letrave të punës, në përputhje me legjislacionin dhe SNISA-t.

Të nderuar përfaqësues të mediave,

Ju ftojmë të ndiqni konferencën e hapjes së Projektit të Binjakëzimit “Fuqizimi i mëtejmë i ndikimit të Zyrës Kombëtare të Auditimit në Kosovë”.

Konferenca mbahet:

të premten, me 08 nëntor 2019, në ora 11:00

në EU House, Rr. UÇK nr.90, Prishtinë, Kosovë

Projekti do të financohet nga Bashkimi Evropian dhe do të zbatohet nga Zyra Supreme e Auditimit të Polonisë me mbështetjen edhe të kolegëve ekspertë nga Institucionet Supreme të Auditimit të Kroacisë, të Republikës së Çekisë, të Letonisë, të Lituanisë dhe të Portugalisë. Vlera e tërësishme e projektit është 700 000 € dhe pritet të realizohet brenda 18 muajve.

Objektiva specifike e projektit është që ta mbështes Zyrën Kombëtare të Auditimit për zhvillimin e mëtejmë të kapaciteteve të saj në realizimin e qëndrueshëm të objektivave të misionit të vet sipas Standardeve Ndërkombëtare të Institucioneve Supreme të Auditimit (SNISA) dhe rritjen e ndikimit të saj përmes komunikimit të intensifikuar me qytetarët, Parlamentin dhe palët tjera të interesit.

Ju mirëpresim!

Me datë 06 dhe 07 Nëntor, në Maqedoninë e Veriut është mbajtur punëtoria “Auditimi Dixhital”. Kjo punëtori u organizua në kuadër të Rrjetit të Institucioneve Supreme të Auditimit (ISA-ve) të shteteve kandidate dhe kandidate të mundshme për në BE dhe Gjykatës Evropiane të Auditorëve dhe është mbështetur nga  Institucioni Suprem i Auditimit të  Maqedonisë së Veriut, SIGMA-as dhe OECD-së. Objektivë e kësaj punëtorie ishte krijimi i një platforme për diskutim në mes të rrjetit të ISA-ve në lidhje me çështjet dhe sfidat me të cilat ata përballen gjatë zhvillimit të auditimit dixhital,  dhe të diskutojnë mundësit sesi t'i përgjigjemi sfidave në rritje të dixhitalizimit në gjithë sektorin publik. Gjatë punëtorisë dy ditore, pjesëmarrësit kanë  shkëmbyer praktikat e  tyre në auditimin e TI-së, auditimin e shërbimeve dixhitale dhe përdorimin e mjeteve dhe teknikave dixhitale. Në këtë punëtori  janë zhvilluar diskutime rreth çështjeve strategjike dhe sfidave që ISA-të duhet të adresojnë. Punëtoria  ishte interaktive dhe  ka  përfshirë prezantime të rasteve. Zyra Kombëtare e Auditimit të Kosovës në këtë punëtori u përfaqësua nga auditorët dhe punonjësit e teknologjisë informative; Armend Salihu, Poliksena Berisha dhe Shqipe Azemi, të cilët kanë prezantuar temën “Auditimet e Teknologjisë Informative të kryera nga ZKA dhe ekipet e auditimit të TI-së”. Institucionet Supreme të Auditimit, pasi që adresojnë çështjet dhe rreziqet që janë të rëndësishme në sektorin publik dhe qytetarët duhet t'i përgjigjen epokës dixhitale. Prandaj, punëtoria ka shërbyer për të diskutuar mënyrat se si ISA-t duhet të reagojnë ndaj dixhitalizimit të operacioneve qeveritare dhe shërbimeve publike në planifikimin e punës së tyre, si ti përdorin mjetet dhe teknologjinë dixhitale për të mbështetur punën e auditimit dhe  si të ndërtojnë kapacitetin dhe aftësitë përkatëse në të gjithë institucionin.

Një shumë e konsiderueshme nga buxheti i shtetit shpenzohet për ndërtimin e objekteve arsimore, kulturore dhe sportive, andaj është tejet e rëndësishme që Organizatat Buxhetore të bëjnë menaxhimin e kontratave për këto ndërtime në mënyrë të duhur dhe efikase. Mirëpo, auditimi i performancës i kryer nga Zyra Kombëtare e Auditimit lidhur me  “Menaxhimin e kontratave publike të ndërtimit” ka identifikuar se Organizatat Buxhetore të audituara nuk kishin arritur të sigurojnë që objektet arsimore, kulturore dhe sportive të bëhen me kohë, brenda buxhetit të aprovuar dhe procesi i ndërtimit të objekteve të bëhet sipas marrëveshjeve kontraktuale. Sipas raportit të auditimit, shkaktarët kryesorë që projektet e audituara nuk janë përfunduar me kohë siç janë kontraktuar fillimisht janë; mos verifikimi i gjendjes faktike në vendin e ndërtimit, mos përgatitja e dokumenteve kyçe të ndërtimit në mënyrë të duhur dhe mungesa e  vlerësimit të  performancës së kontratave. Më tej në raport theksohet se Organizatat Buxhetore nuk kanë shfrytëzuar mjaftueshëm as mjetet juridike që do të ndihmonin në përfundimin e projekteve sipas planit dhe kontratave. Mangësitë e identifikuara në këtë aspekt ishin: siguria e ekzekutimit të kontratës më e ulët se avansi, koha e sigurisë nuk mbulonte kohëzgjatjen e kontratës dhe në 9 nga 11 kontratat e audituara nuk kishin paraparë fare mundësinë e penalizimit, ndërsa në dy rastet kur është paraparë nuk është aplikuar edhe pse ishte paraqitur nevoja për penalizim. Në këtë raport prezantohen  edhe mangësi në përdorimin e tepërt të aneks kontratave. Edhe pse në Ligjin për Prokurim Publik parashihet që përdorimi i aneks kontratave lejohet në rastet kur punët nuk mund të parashihen në kontratën bazë, auditimi nxjerr në pah se janë nënshkruar kontrata për punë të cilat do të mund të përfshiheshin gjatë dizajnimit të projektit fillestar. Si pasojë e kësaj, OB-të kanë paguar më shumë se që kanë planifikuar dhe fondet e ndara për projektet tjera janë përdorë për të mbuluar shpenzimet për aneks kontrata. Auditori i Përgjithshëm, z. Besnik Osmani lidhur me këtë raport ka deklaruar se “Mungesa e monitorimit të performancës gjatë menaxhimit të kontratave, ka shkaktuar që projektet të mos mund të realizohen siç është pritur dhe objektet mos të vihen në dispozicion të shfrytëzuesve të synuar me kohë. Përmirësimi i disa proceseve gjatë menaxhimit të kontratave mund të sigurojë se projektet po arrijnë qëllimin për çka janë  ndërtuar dhe po e sigurojnë vlerën për paranë e investuar në to”. Zyra Kombëtare e Auditimit, ka dhënë rekomandimet e veta, të cilat kanë për qëllim të sigurojnë se autoritetet përgjegjëse, respektivisht Ministria e Administratës Publike, Ministria e Arsimit Shkencës dhe Teknologjisë dhe Ministra e Kulturës Rinisë dhe Sportit, shtojnë përpjekjet e tyre për të përmirësuar menaxhimin e kontratave duke siguruar se projektet po përfundohen në kohën e pritur, në përputhje me kushtet e kontraktuara, janë përdorur mjetet juridike që i mbrojnë interesat e organizatave buxhetore dhe se është zvogëluar përdorimi i aneks kontratave. Raportin e plotë mund ta lexoni në këtë vegzë.  

Një shumë e konsiderueshme nga buxheti i shtetit shpenzohet për ndërtimin e objekteve arsimore, kulturore dhe sportive, andaj është tejet e rëndësishme që Organizatat Buxhetore të bëjnë menaxhimin e kontratave për këto ndërtime në mënyrë të duhur dhe efikase. Mirëpo, auditimi i performancës i kryer nga Zyra Kombëtare e Auditimit lidhur me  “Menaxhimin e kontratave publike të ndërtimit” ka identifikuar se Organizatat Buxhetore të audituara nuk kishin arritur të sigurojnë që objektet arsimore, kulturore dhe sportive të bëhen me kohë, brenda buxhetit të aprovuar dhe procesi i ndërtimit të objekteve të bëhet sipas marrëveshjeve kontraktuale. Sipas raportit të auditimit, shkaktarët kryesorë që projektet e audituara nuk janë përfunduar me kohë siç janë kontraktuar fillimisht janë; mos verifikimi i gjendjes faktike në vendin e ndërtimit, mos përgatitja e dokumenteve kyçe të ndërtimit në mënyrë të duhur dhe mungesa e  vlerësimit të  performancës së kontratave. Më tej në raport theksohet se Organizatat Buxhetore nuk kanë shfrytëzuar mjaftueshëm as mjetet juridike që do të ndihmonin në përfundimin e projekteve sipas planit dhe kontratave. Mangësitë e identifikuara në këtë aspekt ishin: siguria e ekzekutimit të kontratës më e ulët se avansi, koha e sigurisë nuk mbulonte kohëzgjatjen e kontratës dhe në 9 nga 11 kontratat e audituara nuk kishin paraparë fare mundësinë e penalizimit, ndërsa në dy rastet kur është paraparë nuk është aplikuar edhe pse ishte paraqitur nevoja për penalizim. Në këtë raport prezantohen  edhe mangësi në përdorimin e tepërt të aneks kontratave. Edhe pse në Ligjin për Prokurim Publik parashihet që përdorimi i aneks kontratave lejohet në rastet kur punët nuk mund të parashihen në kontratën bazë, auditimi nxjerr në pah se janë nënshkruar kontrata për punë të cilat do të mund të përfshiheshin gjatë dizajnimit të projektit fillestar. Si pasojë e kësaj, OB-të kanë paguar më shumë se që kanë planifikuar dhe fondet e ndara për projektet tjera janë përdorë për të mbuluar shpenzimet për aneks kontrata. Auditori i Përgjithshëm, z. Besnik Osmani lidhur me këtë raport ka deklaruar se “Mungesa e monitorimit të performancës gjatë menaxhimit të kontratave, ka shkaktuar që projektet të mos mund të realizohen siç është pritur dhe objektet mos të vihen në dispozicion të shfrytëzuesve të synuar me kohë. Përmirësimi i disa proceseve gjatë menaxhimit të kontratave mund të sigurojë se projektet po arrijnë qëllimin për çka janë  ndërtuar dhe po e sigurojnë vlerën për paranë e investuar në to”. Zyra Kombëtare e Auditimit, ka dhënë rekomandimet e veta, të cilat kanë për qëllim të sigurojnë se autoritetet përgjegjëse, respektivisht Ministria e Administratës Publike, Ministria e Arsimit Shkencës dhe Teknologjisë dhe Ministra e Kulturës Rinisë dhe Sportit, shtojnë përpjekjet e tyre për të përmirësuar menaxhimin e kontratave duke siguruar se projektet po përfundohen në kohën e pritur, në përputhje me kushtet e kontraktuara, janë përdorur mjetet juridike që i mbrojnë interesat e organizatave buxhetore dhe se është zvogëluar përdorimi i aneks kontratave. Raportin e plotë mund ta lexoni në këtë vegzë.