Lajmet

Të  nderuar kolegë të Zyrës Kombëtare të Auditimit Me pikëllim të thellë e morëm lajmin për vdekjen tragjike të ish kolegut të Zyrës Kombëtare të Auditimit z. Artan Venhari, i cili humbi jetën tragjikisht me datën 7 shtator 2019. Z. Artan Venhari, i lindur më 6 shkurt 1974, themeloi marrëdhënie pune në Zyrën Kombëtare të Auditimit në shtator të vitit 2012 në pozitën e punës “Zëvendës i Auditorit të Përgjithshëm” ku punoi deri në shkurt të vitit 2017. Me rastin e vdekjes se Artanit, Auditori i Përgjithshëm z. Besnik Osmani, në emrin e tij dhe të personelit të Zyrës Kombëtare të Auditimit, i ka dërguar telegram ngushëllimi familjes Venhari. Auditorit të Përgjithshëm z.Osmani, i kanë dërguar telegrame ngushëllimi Kryetari i Kontrollit të Lartë të Shtetit nga Shqipëria z.Bujar Leskaj dhe ushtruesi i detyrës së Auditorit të Përgjithshëm të Maqedonisë së Veriut z. Naser Ademi. Përmes kësaj shkrese, Auditori i Përgjithshëm z. Osmani, të gjithë punonjësve të Zyrës Kombëtare të Auditimit iu përcjellë ngushëllimet më të sinqerta të tij si dhe të kryetarëve të  institucioneve homologe nga Shqipëria dhe Maqedonia e Veriut. Artani, do të mbetet gjithnjë në kujtesen tonë si punonjës, kolegë i respektuar dhe mik i dashur.   Departamenti për Komunikim në ZKA

Zyra Kombëtare e Auditimit (ZKA) ka organizuar tryezë me shoqërinë civile dhe shoqatat profesionale të auditimit, me qëllim të identifikimit dhe diskutimit të temave relevante dhe me prioritet që do të përfshihen në planin vjetor për auditime të performancës. Auditori i Përgjithshëm, z. Besnik Osmani, ka theksuar se bashkëpunimi dhe komunikimi i ZKA-së me qytetarët nëpërmjet partneritetit me organizatat e shoqërisë civile dhe shoqatat profesionale të auditimit është shumë i rëndësishëm. Përmes këtyre organizatave, qytetarëve ju mundësohet qasje e plotë për të kontribuar në rritjen e llogaridhënies dhe përgjegjësisë së zyrtarëve publik. Tutje z. Osmani ka ftuar të pranishmit që të paraqesin sfidat, të cilat kanë arritur t’i identifikojnë, me të cilat përballet shoqëria jonë, vështirësitë që hasin institucionet publike në përmbushjen e detyrave të tyre të cilat pastaj ndikojnë në performancën e tyre dhe rrjedhimisht ndikojnë në shërbimet e ofruara për qytetarët dhe mirëqenien e tyre në përgjithësi. Znj. Vlora Spanca, Ndihmës Auditore e Përgjithshme, ka prezantuar metodologjinë dhe procesin e përzgjedhjes së temave në auditimin e performancës, dhe ka prezantuar  temat e auditimit të identifikuara nga ZKA, për sezonin auditues 2019/2020. Përfaqësues të organizatave të shoqërisë civile të pranishëm në këtë takim, kanë shprehur gatishmëri për bashkëpunim me ZKA-në dhe kanë vlerësuar kontributin e saj në forcimin e llogaridhënies dhe rritjen e transparencës në administratë publike. Ata kanë shprehur opinionet e tyre për temat e përzgjedhura nga ZKA dhe kanë dhënë propozime për tema të reja që mund të auditohen nga ZKA, në sezonin vijues. Zyra Kombëtare e Auditimit, në vazhdimësi mban një dialog kuptimplotë dhe efektiv me palët e interesit, me qëllim që t? siguroj ndikim m? t? madh t? rezultateve t? auditimit. Takime të tilla me organizatat e shoqërisë civile i ndihmojnë ZKA-së në identifikimin e fushave të mundshme ku ka nevojë për përmirësim dhe më shumë efikasitet në punë nga organizatat buxhetore. Angazhimi aktiv i shoqërisë civile ka një ndikim pozitiv te subjektet e audituara për të zbatuar rekomandimet e auditimit.

Në datat 15-16 Korrik, një grup auditorësh nga Zyra Kombëtare e Auditimit nën udhëheqjen e Ndihmës Auditorit të Përgjithshme z.Qerkin Morina morën pjesë në një vizitë studimore në Zyrën Kombëtare të Auditimit të Bullgarisë. Gjatë qëndrimit në Sofie, delegacioni nga Zyra Kombëtare e Auditimit u prit nga Presidenti i Zyrës Kombëtare të Bullgarisë z.Tzvetan Tzvetkov, ku u bisedua për mandatin, organizimin dhe planifikimin strategjik të këtij insitucioni. Kjo vizitë i shërben thellimit të bashkëpunimit ndërinstitucional si dhe shkëmbimit të përvojave të auditimit në sektorin publik. Gjatë dy ditëve janë shkëmbyer përvojat në planifikimin strategjik dhe aktiviteteve të auditimit, planifikimin vjetor të auditimit, planifikimi i një auditimi individual dhe planifikimi i auditimit të performancës në Zyrën Kombëtare të Auditimit të Bullgarisë. Delegacioni nga ZKA, përveç që kanë prezantuar përvojat dhe rezultatet e Zyrës Kombëtare të Auditimit të Kosovës, në mënyrë interaktive kanë marrë pjesë në diskutimet e përbashkëta me homologët bullgar, lidhur me planifikimin e auditimit, mënyrat dhe praktikat për përmirësimin e mëtejmë të planeve të auditimit. Të dyja palët u pajtuan që bashkëpunimi në fusha të ndryshme të auditimit të forcohet më tutje me qëllim të shkëmbimit të informatave, përvojave dhe praktikave të mira në interes të ngritjes së nivelit të cilësisë së auditimit të jashtëm në të dyja vendet.

Në kuadër të vizitës në Tokio të Japonisë, Auditori i Përgjithshëm z. Besnik Osmani dhe Zëvendës Auditori i Përgjithshëm, z. Ilir Salihu të shoqëruar nga Ambasadori i Kosovës në Japoni z. Leon  Malazogu mbajtën takime të veçanta në Parlamentin e Japonisë, Bashkinë e Tokios dhe Bordin e Auditimit të Japonisë. Në Parlamentin e Japonisë, Auditori i Përgjithshëm u prit në një takim të veçantë nga Kryetari i Komisionit për Auditim dhe Mbikëqyrje të Administratës z. Banri KAIEDA. Në takim u bisedua për rëndësinë e auditimit të jashtëm në menaxhimin e mirë të fondeve publike, me theks të veçantë për bashkëpunimin në mes të parlamenteve dhe Institucioneve Supreme të Audimit, sidomos në rolin e Parlamentit në zbatimin e rekomandimeve të auditimit, me qëllim të përmirësimit të qeverisjes dhe menaxhimit më të mirë të parasë publike. Ndërsa, në takimin e mbajtur në bashkinë e Tokios, Auditori i Përgjithshëm u prit nga Drejtori i Përgjithshëm i  Sekretarisë për Auditim dhe Inspektim të Tokios si dhe përfaqësues nga Komiteti i Auditimit. Temë e këtij takimi ishte roli, mandati organizimi, llojet e auditimit dhe inspektimit që kryhen nga ky Institucion në subjektet publike të Tokios.  U biseduan çështje me interes për palët, ndërsa praktikat e veprimit dhe masat korrigjuese që ndërmerren nga institucionet japoneze, me qëllim të zbatimit të rekomandimeve, u vlerësuan si një mekanizëm i qëndrueshëm dhe i rëndësishëm për të rritur përgjegjësinë në menaxhimin me fondet publike. Po ashtu, u bisedua për përgatitjet për auditimin e fondeve për Olimpiadën “Tokyo 2020” dhe mundësitë që auditorët kosovarë të përfitojnë njohuri të reja nga kjo përvojë e veçantë. Auditori i Përgjithshëm, u mirëprit në takim edhe nga Auditorja e Përgjithshme e Japonisë Dr. Mari KOBYASHI, e cila ka shprehur kënaqësinë për rezultatet e mira dhe rritjen e kapaciteteve në Zyrën Kombëtare të Kosovës duke nënvizuar vullnetin e saj për t’i përkrahur institucionet e Kosovës në rrugëtimin për menaxhim efektiv të pasurisë publike. Nga delegacioni kosovar është informuar për rezultatet dhe synimet integruese në Institucionet ndërkombëtare të auditimit. Gjatë vizitës në Japoni, delegacioni nga Zyra Kombëtare e Auditimit, ka vizituar edhe Ambasadën e Kosovës në Japoni.  

Në Tokio të Japonisë, po mbahet takimi vjetor i Komitetit të INTOSAI-it  për Ngritje të Kapaciteteve, ku po merr pjesë Auditori i Përgjithshëm i Kosovës z. Besnik Osmani dhe Zëvendës Auditori i Përgjithshëm, z. Ilir Salihu. Temë kryesore e takimit është “Eksplorimi i kapaciteteve për të mbështetur profesionalizmin e Institucioneve Supreme të Auditimit”. Përveç temës kryesore, po diskutohet edhe për katër shtyllat kryesore të profesionalizmit: pavarësia e institucioneve supreme të auditimit dhe ndikimi i tyre në menaxhimin më të mirë të fondeve publike; rëndësia e standardeve për të udhëhequr me profesionalizëm; komponenta e Burimeve Njerëzore  si parakusht për një ISA profesionale; si dhe vlera dhe rëndësia e matjes së perfomancës së ISA-ve. Në margjinat e kësaj ngjarje, Auditori i Përgjithshëm, ka zhvilluar takime të veçanta me homologët e tij nga vende të ndryshme të botës siç janë: Auditori i Përgjithshëm i SHBA-ve, z. Gene Dodaro, atë të Japonisë, Dr. Mari Kobayashi, të Suedisë, znj. Helena Lindberg, të Arabisë Saudite, z. Al-Angari, të Kuvajtit, z. Adel Al-Sarawi, Drejtorin e Përgjithshëm të Iniciativës për Zhvillim të Organizatës Ndërkombëtare të Institucioneve Supreme të Auditimit (IDI – INTOSAI), si dhe me Zëvendës-kryesuesin e Komitetit të INTOSAI-t për Ngritje të Kapaciteteve. Fokusi kryesor i bisedës gjatë këtyre takimeve ishte integrimi i Zyrës Kombëtare të Auditimit në organizatat globale dhe rajonale t? Institucioneve Supreme të Auditimit p?r sektorin publik. Po ashtu, është biseduar edhe për mundësitë e përfitimit nga programet profesionale si dhe mundësitë e shkëmbimit të përvojave bilaterale dhe ndërinstitucionale. Në takimin vjetor të Komitetit të INTOSA-it për Ngritje të Kapaciteteve po marrin pjesë përfaqësues të Institucioneve Supreme të Auditimit nga vende të ndryshme të botës. Komiteti për Ngritje të Kapaciteteve është një nga katër organet kryesore të INTOSAI-it, i cili mbështet iniciativat për ndërtimin e aftësive dhe zhvillimin e kapaciteteve të Institucioneve Supreme të Auditimit, përmes trajnimeve, asistencës teknike dhe aktiviteteve të tjera zhvillimore. INTOSAI vepron si një organizatë profesionale ombrellë për Insitucionet Supreme të Auditimit dhe ka të anëtarësuar rreth 190 Institucione Supreme të Auditimit.

Kryetari i Kuvendit Kadri Veseli, ka pritur në një takim të veçantë Auditorin e Përgjithshëm z. Besnik Osmanin. Me këtë rast, z. Osmani ka njoftuar z. Veselin, që të gjitha raportet e auditimit do të përfundojnë sipas afatit ligjor dhe ka prezantuar çështjet kryesore lidhur me pasqyrat vjetore financiare të organizatave buxhetore dhe ndërmarrjeve publike dhe dobësitë e evidentuara nga këto raporte. Në mënyrë të veçantë është biseduar për auditimet e ndërmarra me kërkesë të Kuvendit si ndërmarrjet publike: Telekomi dhe Posta e Kosovës, Grantet dhe Subvencionet në sektorin e bujqësisë, si dhe për procesin e auditimit të Radio Televizionit të Kosovës. Auditori i Përgjithshëm ka ritheksuar për përkushtimin e tij për të përmbushur mandatin kushtetues e ligjor të Zyrës Kombëtare të Auditimit, në funksion të përmirësimit të vazhdueshëm të qeverisjes e të llogaridhënies në menaxhimin e fondeve publike dhe përmirësimin e shërbimeve ndaj qytetarëve. Gjatë bashkëbisedimit vëmendje i është kushtuar nivelit jo të kënaqshëm të zbatimit të rekomandimeve dhe mungesës së një angazhimi sistematik nga subjektet e audituara për adresimin e tyre. Kryetari Veseli ka nënvizuar nevojën që të gjitha institucionet publike kanë obligim menaxhimin efikas të parasë publike dhe të fuqizojnë qeverisjen e mirë. Ai nënvizoj se transparenca dhe llogaridhënia nuk janë vetëm parime kushtetuese sa i përket shpenzimit të parasë publike, por janë detyrime ligjore që çdo institucion duhet t’i ndjek me përpikëri. Ai  ka ftuar Prokurorinë e Shtetit që t’i shikojë me vëmendje të gjeturat e raporteve të auditimit dhe të ndërmarrë veprimet e nevojshme. Në relacion me Zyrën Kombëtare të auditimit,  Kryetari Veseli, ka deklaruar mbështetjen e plotë të Kuvendit të Kosovës dhe nevojën që të forcohet edhe më tej pavarësia dhe integriteti i saj, sikurse edhe t’i jepen resurset e nevojshme financiare për kryerjen e detyrave.

Në Ditën Botërore të Mjedisit, Institucioni i Avokatit të Popullit në bashkëpunim me Zyrën Kombëtare të Auditimit në Kosovë organizuan tryezë të përbashkët me temën “Mjedisi i sigurt dhe i shëndetshëm – e drejtë e njeriut dhe përgjegjësi Kushtetuese”. Auditori i Përgjithshëm, z. Besnik Osmani, në fjalën e tij,  tha se qëllimi i organizimit të kësaj tryeze është që te dy institucionet kushtetuese të ndërtojmë një aleancë, për më shumë ndikim për çështjet e rëndësishme për qytetarët e vendit bazuar në mandatin tonë: - njëra për të mbrojtur të drejtat e njeriut e tjetra për të treguar se si përdoren burimet publike nga shfrytëzuesit e fondeve publike. Kështu, ne synojmë të rrisim vetëdijen e publikut rreth çështjeve të rëndësishme dhe të tërheqim vëmendjen e politik-bërësve, si dhe të nxisim veprime konkrete në këtë drejtim. “Të kemi tokë, ujë e ajër të shëndetshëm duhet të sigurohemi që të gjitha organizatat publike dhe jo publike që kanë ndikim dhe  përgjegjësi po e kryejnë punën e vet mirë” theksoi Osmani. Tutje, z Osmani shtoi se Zyra Kombëtare e Auditimit, përmes auditimeve i është qasur këtij problemi në dy perspektiva: duke bërë auditime të rregullta financiare kemi shtuar komponentën e qeverisjes së mirë, përmes së cilës, kemi mundësi të japim rekomandime të vlefshme se si puna e institucioneve mund të bëhet më efikase e me këtë edhe shërbimet kundrejt qytetarëve; si dhe duke bërë auditimeve të veçanta në tema të rëndësishme, të nxjerrim në sipërfaqe situatën reale dhe po japim rekomandime konkrete si kjo mund të përmirësohet. Megjithatë, në Kosovë, ne kemi dështuar që t’i sjellim para përgjegjësisë publike apo drejtësisë, ndotësitë e ajrit e ujit, dëmtuesit e natyrës siç kemi dështuar të sjellim qeverisje efektive për zbatimin e politikave dhe strategjive që vet i kemi adaptuar, përfundoi ai. Avokati i Popullit, z.Hilmi Jashari, është shprehur se ndien kënaqësi të veçantë meqenëse rrallë herë ndodh që në Kosovë dy Insitucione të Pavarura, Avokati i Popullit dhe Auditori i Përgjithshëm, kanë dhënë kontribut lidhur me vlerësimin e gjendjes mjedisore në vend dhe për më tepër kane dalë me rekomandime konkrete drejtuar autoriteteve publike lidhur me veprimet që ata duhet të ndërmarrin për të përmirësuar dhe për të jetësuar garancinë kushtetuese, që vendi jonë i ka jetësuar në dispozitën 52 të Kushtetutës së Republikës së Kosovës. Po ashtu, ai theksoi se zhvillimi ekonomik në Kosovë, nuk duhet të kushtëzohet dhe të shkoj në dëm të të drejtave të njeriut. Përfaqësuesja nga Zyra e Bashkimit Evropian në Kosovë, Znj. Annette Fath Lihic, pasi ka folur për rëndësinë e mjedisit në jetën dhe shëndetin e popullsisë, ka ngritur çështjet e dala nga Raporti i Progresit për vendin, e që lidhen me çështjet e mjedisit. Ajo tha që sipas këtij raporti, Kosova ende është në fazat e hershme dhe asnjë progres nuk është arritur lidhur me këtë çështje. Problemet mjedisore në Kosovë dhe mungesa e vullnetit politik të institucioneve në ndërmarrjen e masave adekuate për mbrojtjen e mjedisit kanë ndikuar në mirëqenien dhe shëndetin e qytetarëve. Në këtë tryezë u diskutua edhe lidhur me rolin e  Kuvendit në drejtim të përmirësimit të gjendjes së mjedisit në vend, me ç’rast deputeti i Kuvendit të Kosovës, njëherit anëtar i Komisionit të Kuvendit të Kosovës, për Bujqësi, Pylltari dhe Planifikim Hapësinor, z.Sali Zyba, ngriti shqetësimin e mosfunksionimit të te gjitha hallkave në zinxhirin e institucioneve. Tema të tjera të diskutuara ishin: roli i shoqërisë civile në mbrojtjen e mjedisit, roli i prokurorisë në parandalimin e problemeve mjedisore, roli i Policisë së Kosovës në parandalimin e degradimit të mjedisit. Gjithashtu, edhe nga ana e Ministrisë së Mjedisit dhe Planifikimit Hapësinorë u paraqiten veprimet e ndërmarra nga kjo ministri në drejtim të ushtrimit të kompetencave ligjore. Kjo tryezë u organizuar në Ditën Botërore të Mjedisit. Qëllimi i kësaj tryeze ishte që të  vihet në pah rëndësia dhe bashkëpunimit i institucioneve  në zbatimin e rekomandimeve adresuar institucioneve të nivelit qendror dhe nivelit lokal me qëllim të përmirësimit të gjendjes së mjedisit në vend. Në tryezë morën pjesë dhe shprehën opinionet e tyre, përfaqësues të Kuvendit të Kosovës, të Zyrës së BE-së në Kosovë, të organeve të drejtësisë, Policisë së Kosovës, Ministrisë së Mjedisit dhe Planifikimit Hapësinor, institucioneve tjera të nivelit qendror dhe lokal, të Organizatave Ndërkombëtare në vend si dhe përfaqësues nga shoqëria civile. Të gjithë të pranishmit, u pajtuan që për të pasur një mjedis më të shëndetshëm, nevojitet një mobilizim, bashkëpunim dhe koordinim i mirëfilltë i të gjithë dikasterëve institucional, shoqërisë civile dhe qytetareve.

Të nderuara media, Institucioni i Avokatit të Popullit dhe Zyra Kombëtare e Auditimit do të organizojnë tryezë me temën “ Mjedisi i sigurt dhe i shëndetshëm – e drejtë e njeriut dhe përgjegjësi kushtetuese”. Tryeza  do të mbahet:

të mërkuren, me 05 Qershor 2019

në ora 10:00

në Hotel Emerald,

Prishtinë

  Tryeza ka për qëllim të vë në pah rëndësinë e bashkëpunimit të institucioneve publike me Avokatin e Popullit dhe Auditorin e Përgjithshëm në zbatimin e rekomandimeve adresuar institucioneve të nivelit qendror dhe nivelit lokal me qëllim të përmirësimit të gjendjes së mjedisit në vend. Në këtë tryezë Avokati i Popullit, Auditori i Përgjithshëm, përfaqësues të legjislativit, ekzekutivit dhe të shoqërisë civile, do të diskutojnë për gjendjen, veprimet dhe sfidat në drejtim të mbrojtjes së mjedisit në vend. Diskutimi do të jetë i hapur për të gjithë pjesëmarrësit. Ju mirëpresim, Zyra për Informim e ZKA

Për të shënuar Ditën Ndërkombëtare të Drejtave të Fëmijëve, në ambientet e Zyrën Kombëtare të Auditimit, është organizuar aktivitet kulturore - artistike me fëmijët e punonjësve të institucionit. Me këtë rast, fëmijët të shoqëruar nga prindërit e tyre punonjës të këtij institucioni, patën mundësi të njoftohen me vendin e punës së prindërve të tyre. Për të krijuar një përvojë të këndshme dhe atmosferë  të ngrohtë ishin të pranishëm personazhet e preferuar të  animuar për fëmijë, krijimi i lojërave të shumta të shoqëruara me muzikë dhe vallëzime. Aktivitete të ngjashme, ku fëmijët mësojnë për rëndësinë e auditimit duke festuar, tashmë janë bërë tradicionale nga ZKA. Ky aktivitet njëditor i organizuar, përveç argëtimit, iu ka mundësuar fëmijëve për tu njohur me botën dhe natyrën e të punuarit. Këto aktivitete shërbejnë edhe si një mundësi e mirë për prindërit për të nisur fillimet e diskutimeve për vlerat e punës, ndërsa institucionit iu ka mundësuar që të ndajnë njohurit, praktikat e mira dhe shkathtësitë përkatëse që kërkohen në vendin e punës. Shënimi i Ditës Ndërkombëtare të Fëmijëve mbështetet nga konventa ndërkombëtare për të drejtat e fëmijëve dhe u kushtohet të gjithë fëmijëve, ku në mbarë botën festohet me aktivitete të ndryshme që kanë për qëllim të vënë në vëmendje rritjen e vetëdijesimit për mirëqenien e fëmijëve, respektimin e te drejtave të tyre, pa dallim moshe apo kombësie. Aktivitete me qëllim të promovimi të rëndësisë së veprimtarisë audituese do të organizohen në vazhdimësi në mënyrë që të sensibilizohet publiku për nevojën e përmirësimeve në administratën publike.  

Auditori i Përgjithshëm Besnik Osmani, sot ka prezantuar para Komisionit për Mbikëqyrje të Financave Publike, Raportin Vjetor të Performancës së Zyrës Kombëtare të Auditimit për vitin 2018 së bashku me PVF- të e audituara. Në fjalën e tij para këtij komisioni, Auditori i Përgjithshëm z Besnik Osmani, ka prezantuar rezultatet e punës për vitin 2018 dhe ka raportuar lidhur me përdorimin e buxhetit të Zyrës Kombëtare të Auditimit. Më këtë rast ka nënvizuar tri sukseset kryesore që kanë të bëjnë me miratimin e Planit Strategjik 2018 – 2021, rritjen e portofolios së të gjitha llojeve të auditimeve dhe ngritjen e kapaciteteve humane e administrative të Zyrës Kombëtare të Auditimit. Numri i auditimeve të rregullsisë është rritur për 20% në krahasim me sezonin 2015/16 dhe janë trefishuar auditimet e performancës. Po ashtu, auditimi i ndërmarrjeve publike ka filluar në sezonin auditues 2016/17 me 4 auditime dhe ky  numër është trefishuar në sezonin auditues 2018/19. Duke folur për sfidat, Auditori i Përgjithshëm, ka vendosur theksin në miratimin e paketës ligjore në fushën e administratës publike përmes së cilave është vendosur në rrezik pavarësia institucionale, administrative e financiare e ZKA-së dhe në nevojën e profilizimit të auditorëve sipas fushave të auditimit në sektorin e performancës. Në vazhdim të fjalës së tij, ka prezantuar Pasqyrat Vjetore Financiare dhe Raportin e Auditimit, duke prezantuar aspektet kryesore të menaxhimit që kanë të bëjnë me buxhetin e realizuar në shkallën 98%, nga të cilat 74% i përkasin kategorisë paga dhe mëditje, 23% mallrave e shërbimeve, 2% investime kapitale dhe 1% shpenzime komunale. Z. Driton Selmanaj, kryetar i Komisionit për Mbikëqyrje të Financave Publike (KMFP), ka vlerësuar lartë punën e ZKA-së, dhe ka falënderuar Auditorin e Përgjithshëm për gatishmërinë dhe përkushtimin për t’iu përgjigjur gjithmonë këtij komisioni. Po ashtu, anëtarët e komisionit kanë përgëzuar Auditorin e Përgjithshëm për punën dhe raportet profesionale të ZKA-së.  Në këtë takim janë diskutuar edhe çështje tjera me interes si mundësia e rritjes së numrit të auditimeve të performancës dhe ndërmarrjeve publike, rritja e adresimit të rekomandimeve si dhe shqyrtimi i kërkesave për auditime të veçanta që vijnë nga Kuvendi. Të gjithë deputet pjesëmarrës në diskutim kanë nënvizuar rëndësinë e pavarësisë institucionale të Zyrës Kombëtare të Auditimit dhe trajtimin me dinjitet të personelit profesional të angazhuar, përmes financimit të edukimit profesional dhe lartësisë së kompensimit.

Sot, në ambientet e Zyrës Kombëtare të Auditimit, Auditori i Përgjithshëm, z. Besnik Osmani, ka mirëpritur në takim informues përfaqësues nga Këshilli Studentor i Fakultetit Ekonomik, të Universitetit të Prishtinës “Hasan Prishtina”. Me këtë rast, Auditori i Përgjithshëm, ka bashkëbiseduar me studentët për mandatin, rolin dhe punën e Zyrës Kombëtare të Auditimit, si dhe u informua për së afërmi me punën dhe aktivitetet e tyre studentore. Në takim u bisedua edhe për marrëveshjen e bashkëpunimit që Zyra Kombëtare e Auditimit ka me Universitetin e Prishtinës “Hasan Prishtina”, e cila përfshin mundësinë e shkëmbimit të njohurive profesionale në mes të dyja institucioneve, ofrimin e punës praktike për studentët si dhe organizimin e ngjarjeve dhe diskutimeve publike për raportet e auditimit. Auditori i Përgjithshëm i ka inkurajuar studentët që të angazhohen në avancimin  e tyre profesional duke shfrytëzuar burime të besueshme informacioni për mësim efektiv dhe të qëndrueshëm.  Z. Osmani, u shpreh se bazuar edhe në marrëveshjen e lartpërmendur, ai dhe stafi i tij do të angazhohen të përkrahin gjeneratat e reja në edukim dhe zhvillim profesional. Përfaqësuesit e Këshillit Studentor shprehën falënderimin e tyre lidhur me këtë takim dhe e mirëpritën mundësinë e bashkëpunimit në mes të studentëve dhe ZKA-së.

Me datat 9 dhe 10 Maj në Tiranë, Auditori i Përgjithshëm z.Besnik Osmani,  së bashku me përfaqësues nga Zyra Kombëtare e Auditimit, morën pjesë në Konferencën Rajonale të Institucioneve Supreme të Auditimit dhe Rrjetit të Komisioneve Parlamentare për Ekonomi, Financa, dhe Integrime Evropiane të Ballkanit Perëndimor, organizuar nga Banka Botërore dhe OECD/SIGMA. Pjesëmarrës në këtë konferencë ishin deputetë nga Parlamentet dhe përfaqësues nga Institucionet Supreme të Auditimit të vendeve të Ballkanit Perëndimor. Në emër të Parlamentit të Kosovës, pjesëmarrës ishin  kryetari i Komisionit për Mbikëqyrjen e Financave Publike, Driton Selmanaj dhe zëvendëskryetarja e parë e Komisionit për Buxhet dhe Financa, Safete Hadergjonaj. Temë kryesore e konferencës ishte "Fuqizimi i marrëdhënieve të Parlamentit dhe Institucioneve Supreme të Auditimit për të përmirësuar performancën e auditimit të jashtëm në Shtetet e Ballkanit Perëndimor". Pjesëmarrësit shkëmbyen përvojave e vendeve të tyre lidhur me rolin e Parlamentit dhe komisioneve respektive për mbikëqyrjen financiare, çështjen e shqyrtimit të raporteve te auditimit si dhe bashkëpunimin dhe sfidat kryesore me të cilat përballen ISA-të dhe parlamentet në krijimin e një marrëdhënie më efektive. Në procesin e bashkëpunimit në mes të ZKA-së dhe komisioneve parlamentare, u vlerësua se në Kosovë ka një proces të vazhdueshëm dhe bashkëpunim të mirë mes ZKA-së dhe dy Komisioneve parlamentare, Komisionit për Mbikëqyrjen e Financave Publike dhe  Komisionit për Buxhet dhe Financave. Me qëllim të rritjes së llogaridhënies në sektorin publik  dhe rritjes së ndikimit të raporteve të auditimit, u diskutua lidhur me  mënyrën e analizimit të raporteve te auditimit nga Parlamenti dhe aplikimin e mekanizmit të përcjelljes së zbatimit të rekomandimeve të auditimit nga komisionet parlamentare. Temat e tjera të diskutimit dhe shkëmbimit të përvojave në kuadër të konferencës lidhen me sfidat dhe zgjidhjet për llogaridhënien dhe fuqizimin e llogarisë financiare. Konferenca ka trajtuar ne mënyre te veçantë çështje që lidhen  me pavarësinë e Institucioneve Supreme të Audimit, shqyrtimi i raporteve të auditimit, përcjellja e rekomandimeve lidhur me raportin e auditimit, etj. Në këtë konferencë nga ZKA, përveç Auditorit të Përgjithshëm pjesëmarrës ishin edhe Ndihmës Auditori i Përgjithshëm z. Naser Arllati, Saranda Husaj Baraliu dhe Violeta Smajlaj nga Departamenti për Komunikim dhe Bashkëpunim Ndërkombëtar në Auditim.