ZKA

28/04/2023

Auditorja e Përgjithshme pret përfaqësuesin nga Zyra e Auditorit të Përgjithshëm të Norvegjisë

Me qëllim të shtrirjes së bashkëpunimit me zyrat kombëtare të auditimit në rajon dhe më gjerë, Auditorja e Përgjithshme, Vlora Spanca dhe Zëvendës Auditori i Përgjithshëm, Bezad Halilaj, kanë pritur në takim Këshilltarin e Lartë të Zyrës së Auditorit të Përgjithshëm të Norvegjisë z. Trygve Christiansen. E para e institucionit informoi mbi historikun e Zyrës Kombëtare të Auditimit të Kosovës, mandatin, strukturën dhe mënyrën e veprimit, duke theksuar edhe bashkëpunimet në nivel rajonal dhe ndërkombëtar. Në këtë kontekst, z. Christiansen adresoi bashkëpunimet bilaterale që ka zyra e tij me institucionet e auditimit në rajonin ballkanik, me theks të veçantë në Shqipëri dhe Maqedoninë Veriore. Më tutje, tha se bashkëpunimet përqendrohen kryesisht në auditime për Teknologji Informative dhe auditime mjedisore. Ai foli gjerësisht mbi rëndësinë e këtyre dy shtyllave, kursit tre-modular në Ballkan si dhe të ashtuquajturës “Small Innovation Lab,” që hyn në sferën e TI-së dhe ka për qëllim ngritjen e nivelit të sistemit për menaxhim të auditimit duke trajtuar të dhëna dhe inputet analitike. Znj. Spanca lavdëroi iniciativa të tilla që promovojnë kreativitetin, synim ky që ndan edhe zyra jonë. Më tutje, ajo tha se Zyra e Auditimit nuk lë mënjanë as rëndësinë e auditimeve mjedisore duke qenë se jemi në pritje të aprovimit të aplikimit për IPA 3, ku njëra ndër objektivat është fusha që mbulon auditimet mjedisore. Në përmbyllje të takimit z. Christiansen, ka bërë me dije se Zyra e Auditorit të Përgjithshëm të Norvegjisë është e hapur të krijojë dhe mirëmbajë marrëdhënie pune me ZKA-në. Edhe përfaqësuesit e ZKA-së mirëpriten mundësinë për bashkëpunim në të ardhmen.

Lexo më shumë

27/04/2023

Vazhdon mbështetja e projektit të USAID-it “Integriteti i Komunave të Kosovës” për ZKA-në

Auditorja e Përgjithshme, Vlora Spanca, ka pritur në takim Ushtruesin e Detyrës së Drejtorit të Projektit të USAID –it “Integriteti i Komunave të Kosovës” z. Stephen Carpenter, me të cilin ka diskutuar për progresin e deritanishëm dhe planet për zbatimin e këtij projekti. Ushtruesi i Detyrës së Drejtorit të Projektit të USAID –it “Integriteti i Komunave të Kosovës” z. Stephen Carpenter, ka rikonfirmuar përkrahjen dhe ka shprehur gatishmërinë që përmes këtij projekti të ndihmojë Zyrën Kombëtare të Auditimit (ZKA) në fusha të ndryshme, si atë të përcaktimit të auditimit të pajtueshmërisë bazuar në qasjen në rrezik, ngritjen e kapaciteteve audituese në fushën kundër mashtrimit, dhe bashkëpunimin me Njësinë Qendrore të Harmonizimit për auditim të brendshëm, etj. Të pranishëm në këtë takim kanë qenë edhe Zëvendës Auditori i Përgjithshëm, Bezad Halilaj, Ndihmës Auditorja e Përgjithshme, Myrvete Gashi Morina, si dhe nga USAID-i, Ruzhdi Zeqiri, udhëheqës i objektives së parë të projektit.

Lexo më shumë

26/04/2023

Zyra Kombëtare e Auditimit ftohet të jetë pjesë aktive e nëngrupit punues për E- Qeverisje në kuadër të grupit të EUROSAI-t për Teknologji të Informacionit

Institucionet Supreme të Auditimit të Portugalisë dhe Polonisë me 17 dhe 18 prill në Lisbonë kanë organizuar takimin vjetor të anëtarëve të nëngrupit për e-Qeverisje nga Grupi punues për Teknologji të Informacionit në EUROSAI (ITWG), në të cilin ka marrë pjesë edhe drejtori i Departamentit për Auditimet e Teknologjisë së Informacionit të Zyrës Kombëtare të Auditimit të Kosovës, Samir Zymberi. Në këtë takim ndër të tjera është diskutuar edhe për Mjetin (CUBE) i cili synon të jetë bazë e të dhënave i raporteve të auditimit të qeverisjes elektronike nga ISA të ndryshme. Nga kjo bazë mund të ketë qasje të lehtë në informacion jo vetëm për raportet e ISA-ve të tjera mbi auditimet e qeverisjes elektronike, por edhe artikuj, prezantime, metodologji, baza të të dhënave dhe materiale të tjera. Po ashtu të pranishmit kanë diskutuar edhe për Manualin Aktiv të Auditimeve të Teknologjisë së Informacionit, funksionet e reja dhe zhvillimet si dhe për Formatin e Udhëzuesve të Nënkomitetit të Standardeve të Kontrollit të Brendshëm të INTOSAI-t. Gjatë diskutimeve në këtë takim ekspertët nga Portugalia dhe Polonia kanë prezantuar si shembull Raportin e auditimit të Zyrës Kombëtare të Auditimit për teknologjinë e informacionit në Administratën Tatimore të Kosovës, me ç’rast është vlerësuar lartë puna e ZKA-së si dhe struktura e raportit.

Ndërsa në ditën e dytë të takimit pjesëmarrësit kanë diskutuar për metodologjinë dhe qasjen e auditimit duke i ndërlidhur me raportet vijuese të prezantuara në takim:

Menaxhimi i aksesit në bazën e të dhënave (Estonia)
Administrimi dhe besueshmëria e X-Road ( Estonia)
Sistemi i Gjendjes Civile në Agjencinë e Regjistrimit Civil (Kosova)
Aktivitetet e institucioneve të Bosnjës dhe Hercegovinës për të siguruar parakushtet bazë të sigurisë kibernetike (BiH)
A mund të mbështetemi në aksesin në sistemet e informacionit dhe marrjen e shërbimeve elektronike? (Letonia)

Gjithashtu në kuadër të këtij takimi, kryetari i Nëngrupit për e-Qeverisje në kuadër të ITWG-EUROSAI, ka ftuar Zyrën Kombëtare të Auditimit të Kosovës për pjesëmarrje aktive për të dhënë kontributin e saj në aktivitetet e mëtutjeshme në kuadër të këtij nëngrupi. Kjo tregon për vlerësimin e punës së ZKA-së dhe paraqet hap tjetër pozitiv për Zyrën Kombëtare të Auditimit. Ndërsa me datën 19 dhe 20 prill në Institucionin Suprem të Auditimit të Portugalisë, auditoret e Zyrës Kombëtare të Auditimit të Kosovës, nga Departamenti i Auditimit për Teknologjisë të Informacionit, Arberore Sheremeti Berisha dhe Saranda Husaj Baraliu kanë ndjekur trajnimin për përdorimin efikas të funksionaliteteve të Manualit Aktiv të Auditimeve të Teknologjisë së Informacionit. Mjeti bazohet në Manualin e Auditimit të TI-së dhe ka për objektiv të ndihmojë auditorët për të planifikuar dhe kryer auditimet e TI-së. Ky trajnim është mbajtur nga ekspertët e Institucioneve Suprem të Auditimit të Portugalisë dhe Polonisë si dhe ka përfshirë aplikimin e të gjitha fazave të auditimit.

Lexo më shumë

13/04/2023

Ruajtja e cilësisë së lartë në auditim, prioritet për Institucionet Supreme të Audimit

Përfaqësuesit e Zyrës Kombëtare të Auditimit të Kosovës të enjten kanë marrë pjesë në webinarin me temën “Menaxhimi i Cilësisë për Institucionet Supreme të Auditimit” të organizuar nga SIGMA në kuadër të Rrjetit të Institucioneve Supreme të Auditimit të vendeve kandidate dhe kandidate të mundshme për Bashkimin Evropian dhe Gjykatës Evropiane të Auditorëve. Qëllimi i këtij webinari ishte rritja e vëmendjes së ISA-ve të Rrjetit për ndryshimin e standardeve të menaxhimit të cilësisë dhe rëndësia e tyre; shkëmbimi i përvojave – mësimet e nxjerra nga ISA-të rreth menaxhimit të cilësisë, sfidat me të cilat përballen, planet e ardhshme si dhe pritshmëritë për standardet e rishikuara. Drejtori i Departamentit për Sigurimin e Cilësisë në Zyrën Kombëtare të Auditimit, Fitim Haliti duke folur për procesin e menaxhimit të cilësisë, ka treguar se Sistemi i Menaxhimit të Cilësisë i cili përfshinë edhe Kontrollin e Cilësisë dhe Sigurinë e Cilësisë ka të integruar të gjitha elementet e Kontrollit të Cilësisë të përcaktuara në SNISA 140 si: menaxhimi i burimeve njerëzore, kryerjen e audtimeve, marrëdhëniet me palët e interesit, përmirësimin e vazhdueshëm, kërkesat etike, dhe monitorimin. Haliti ka treguar se Departamenti për Sigurimin e Cilësisë është përgjegjës për sigurimin e vazhdueshëm të cilësisë në auditim duke u kujdesur që procedurat e kontrollit të cilësisë janë duke funksionuar në mënyrë efektive si dhe siguron Auditorin e Përgjithshëm se auditimet janë kryer në përputhje me SNISA-të. Kurse sa i përket pritjeve nga rishikimi i SNISA 140 ai ka thënë se fokusi është që të ofrohen udhëzime të qarta për ndërtimin e Sistemit të Menaxhimit të Cilësisë dhe Dokumentimin e Sistemit të Menaxhimit të Cilësisë.

ISSAI 140 ndihmon Institucionet Supreme të Auditimit që të hartojnë një sistem të kontrollit të cilësisë i cili është i përshtatshëm për mandatin dhe rrethanat e tyre dhe që i përgjigjet rreziqeve të tyre për cilësinë. Aktualisht ISSAI 140 është duke u rishikuar dhe objektiv i këtij procesi është përditësimi që përmban parimet bazë dhe kërkesat kryesore.

Lexo më shumë

27/03/2023

Auditorja e Përgjithshme dhe shefi i bashkëpunimit të Zyrës së BE-së në Kosovë diskutojnë për ndikimin e auditimit të jashtëm në menaxhimin e parasë publike

Auditorja e Përgjithshme e Republikës së Kosovës, Vlora Spanca dhe Zëvendës Auditori i Përgjithshëm, Bezad Halilaj, kanë pritur të hënën në takim Johannes Madsen, shef i bashkëpunimit në Zyrën e Bashkimit Evropian në Kosovë dhe Paulina Stanoeva menaxhere e programit Reforma në Administratën Publike. Temë e diskutimit të këtij takimi kanë qenë zhvillimet më të fundit në Zyrën Kombëtare të Auditimit dhe bashkëpunimi i mëtejshëm me Zyrën e BE-së në Prishtinë. Auditorja e Përgjithshme duke folur për rëndësinë e ndikimit të auditimit të jashtëm në menaxhimin e parasë publike, ka njoftuar më në detaje z. Madsen për mandatin kushtetues dhe ligjor, procesin e auditimit, bashkpunimin me palët e interesit si dhe projektet e bashkëpunimit që ZKA-ja është duke i zbatuar. Nga ana e tij z. Madsen, e ka falenderuar znj. Spanca për informatat dhe bashkëpunimin e vazhduar duke theksuar se e kupton shumë mirë rolin dhe përgjegjësinë që ka. Të pranishmit biseduan gjithashtu edhe për procesin e vlerësimit ndërkolegial të ZKA-së nga SIGMA, dhe projektin e ardhshëm të binjakëzimit i cili do të financohet përmes instrumentit të asistencës para anëtarësimit të BE-së. Pjesë e këtij takimi kanë qenë edhe drejtoresha e Departamentit për Komunikim dhe Bashkëpunim Ndërkombëtar, Qëndresa Mulaj, si dhe shefja e Kabinetit, Shqipe Çavdarbasha.

Lexo më shumë

24/03/2023

Mbahet punëtoria për zhvillimin e aftësive të buta dhe ndikimin e tyre në rezultatet e punës

Në datat 20-22 mars 2023, është mbajtur punëtoria për zhvillimin e shkathtësive të buta, udhëheqjen dhe menaxhimin e kohës në punë, e dedikuar për stafin administrativ të Zyrës Kombëtare të Auditimit (ZKA). Aktivitetet e punëtorisë kanë pasur për qëllim që pjesëmarrësit të fitojnë njohuri rreth inteligjencës emocionale, komunikimit dhe menaxhimit të kohës. Punonjësit e ZKA-së kanë mësuar se si inteligjenca emocionale mund t'i ndihmojë ata në marrëdhëniet e tyre në punë si dhe të reflektojnë rreth anëve të forta profesionale. Po ashtu, sa i përket menaxhimit të kohës pjesëmarrësit kanë mësuar se si të punojnë më të fokusuar dhe më me efikasitet.

Këto njohuri do të shërbejnë për arritjen e një kulture pune më profesionale në ZKA dhe do t’u japin pjesëmarrësve një ndjenjë më të gjerë se si ata mund të kenë influencë dhe ndikojnë pozitivisht në kulturën e ZKA-së. Punëtoria ka qenë interaktive dhe është përcjellë me aktivitete të ndryshme të cilat kanë pasur për qëllim punën ekipore dhe arritjen e rezultateve të qëndrueshme, duke u fokusuar në planifikim, menaxhim dhe realizim. Kjo punëtori është zhvilluar në kuadër të projektit të bashkëpunimit për zhvillim institucional në mes të Zyrës Kombëtare të Auditimit të Suedisë dhe Zyrës Kombëtare të Auditimit të Kosovës dhe është udhëhequr nga ekspertët Tinna Bondestam dhe Hazim Sabanovic.

Lexo më shumë

23/03/2023

Menaxhimi i parasë publike në fokus të bashkëpunimit në mes të Kosovës dhe Malit të Zi

Auditorja e Përgjithshme e Republikës së Kosovës, Vlora Spanca, e shoqëruar nga Zëvendës Auditori i Përgjithshëm, Bezad Halilaj dhe delegacioni i ZKA-së, të enjten kanë zhvilluar një vizitë zyrtare në Institucionin Shtetëror të Auditimit të Malit të Zi. Delegacioni i Kosovës është pritur në takim të veçantë nga kryetar i Senatit të Institucionit Shtetëror të Auditimit të Malit të Zi, Nikolla N. Kovaçeviq me bashkëpunëtorë. Me këtë rast, z. Kovaçeviq ka shprehur përkushtimin e tij dhe të institucionit që drejton për të intensifikuar bashkëpunimin me Zyrën Kombëtare të Auditimit të Kosovës. Ai më tej ka njoftuar mysafirët për planet e punës dhe të arriturat e institucionit që drejton. Auditorja e Përgjithshme, Vlora Spanca, e ka falënderuar homologun e saj për pritjen si dhe ka shprehur gatishmërinë për të bashkëpunuar në fushat me interes të përbashkët. Znj. Spanca më tej e ka njoftuar z. Kovaçeviq për punën e Zyrës Kombëtare të Auditimit të Kosovës, me theks të veçantë për zbatimin e Planit Strategjik 2023 – 2026, realizimin e Planit Vjetor të auditimit 2022/2023 si dhe për ndikimin e auditimit të jashtëm për menaxhim më të mirë dhe performancë më të lartë në administratën shtetërore. Në veçanti homologët kanë biseduar për rregullimin ligjor të Institucioneve Supreme të Auditimit të vendeve të tyre. Auditorja e Përgjithshme, Vlora Spanca, ka thënë se pavarësisht se i Ligji për ZKA-në dhe Auditorin e Përgjithshëm në kontekst të gjerë e rregullon dhe fuqizon institucionin që drejton, megjithatë plotësim-ndryshimi është i nevojshëm dhe kjo do të mundësonte realizimin e auditimeve të bazuara në rrezik si dhe do të rriste numrin e auditimeve të performancës. Në kuadër të kësaj vizite delegacionet e të dyja shteteve kanë shkëmbyer njohuritë dhe përvojën e tyre edhe për çështje tjera me interes të përbashkët sikurse: Kontrolli i cilësisë dhe sigurimi i cilësisë; Monitorimi i zbatimit të rekomandimeve të auditimit; Sistemi i menaxhimit të auditimit; si dhe procesi i auditimit të performancës. Në përbërje të delegacionit të Kosovës kanë qenë edhe Ndihmës Auditori i Përgjithshëm Agron Fetiu, drejtori i Metodologjisë së Auditimit, Muhamet Balaj, drejtor i Departamentit të Auditimit të Rregullsisë, Faruk Rrahmani, si dhe drejtoresha e Departamentit të Auditimit të Performancës, Ariana Gjonbalaj.

Lexo më shumë

16/03/2023

Prokurori i Shtetit dhe Zyra Kombëtare e Auditimit nënshkruajnë marrëveshje bashkëpunimi

Me qëllim të forcimit të sundimit të ligjit në Republikën e Kosovës, si dhe në pajtim me standardet dhe praktikat më të mira ndërkombëtare, Ushtruesi i Detyrës së Kryeprokurorit të Shtetit, z. Besim Kelmendi dhe Auditorja e Përgjithshme e Kosovës, znj. Vlora Spanca, kanë nënshkruar marrëveshje bashkëpunimi, ku të pranishëm në ceremoninë e nënshkrimit ishin edhe përfaqësuesit e Zyrës së OPDAT-it të Ambasadës Amerikane në Kosovë. Marrëveshja ndërmjet institucionit të Prokurorit të Shtetit dhe Zyrës Kombëtare të Auditimit, përcakton mënyrën e bashkëpunimit dhe bashkërendimit të aktiviteteve ndërinstitucionale dhe procedurave standarde në shkëmbimin e informacioneve lidhur me rastet të cilat sipas Kodit Penal të Republikës së Kosovës paraqesin vepra penale, që janë identifikuara gjatë ushtrimit të aktiviteteve audituese, të paraqitura nga Zyra Kombëtare e Auditimit tek Prokurori i Shtetit sipas Kodit të Procedurës Penale. Të dyja palët u zotuan se do të avancojnë mënyrat e komunikimit, si dhe të shkëmbimit të të dhënave të cilat janë të nevojshme për zbatimin sa më efikas të kësaj marrëveshje.

Lexo më shumë

10/03/2023

Auditorët e ZKA-së ndjekin trajnimin për auditimin e performancës në Shkup të organizuar nga Zyra Kombëtare e Auditimit të Suedisë

Auditorët e Zyrës Kombëtare të Auditimit, Mimoza Selimi, Ernes Beka, Vjosa Zeqiraj, Lirak Mulliqi dhe Laureta Matoshi, për katër ditë më radhë kanë ndjekur modulin e parë të trajnimit për auditimin e performancës të organizuar nga Zyra Kombëtare e Auditimit të Suedisë, i cili është mbajtur në Shkup nga datat 7-10 mars. Përveç auditorëve të ZKA-së, në këtë trajnim kanë marrë pjesë edhe auditorët e Institucioneve Supreme të Auditimit të Shqipërisë, Malit të Zi, Maqedonisë së Veriut dhe Turqisë. Hapjen e kësaj ngjarje e ka bërë Auditor i Përgjithshëm i Maqedonisë se Veriut, Maksim Acevski, duke thënë se investimi në forcimin e njohurive dhe aftësive të punonjësve si dhe shkëmbimin e përvojave dhe praktikave të mira me kolegë nga institucionet e tjera supreme të auditimit kontribuon në rritjen e cilësisë në auditim. Në kuadër të modulit të parë të këtij trajnimi janë trajtuar aspektet e auditimit të përformancës dhe shkëmbimi i përvojave të institucioneve pjesëmarrëse. Trajnimi për auditimin e performancës është i ndarë në gjashtë module të cilat do të mbahen deri në fund të vitit 2023. Fokusi i trajnimit është zhvillimi i punës praktike dhe aplikimi i teknikave më të mira të bazuara në Standardet Ndërkombëtare të Auditimit. Pas përfundimit të të gjitha moduleve pjesëmarrësit nga Institucionet Supreme të Auditimit të vendeve të Ballkanit Perëndimor do të certifikohen si auditorë të performancës nga Zyra Kombëtare e Auditimit të Suedisë.

Lexo më shumë

03/03/2023

Nënshkruhet marrëveshja trepalëshe për auditimin e përbashkët të performancës “Barazia gjinore dhe fuqizimi i grave në zonat rurale përmes përfshirjes së tyre në tregun e punës”

Auditor i Përgjithshëm i Maqedonisë se Veriut, Maksim Acevski, Sekretarja e Përgjithshme e Kontrollit të Lartë të Shtetit të Shqipërisë, Valbona Gaxha, si dhe Auditorja e Përgjithshme e Republikës së Kosovës, Vlora Spanca, kanë nënshkruar marrëveshjen trepalëshe për realizimin e auditimit të përbashkët të performancës me temën: “Barazia gjinore dhe fuqizimi i grave në zonat rurale përmes përfshirjes së tyre në tregun e punës” për periudhën 2019-2023.

Nënshkrimi i marrëveshjes është bërë të premten në një ceremoni zyrtare në Shkup ku të pranishëm kanë qenë drejtues dhe përfaqësues të tri institucioneve supreme të auditimit dhe nga UN Women. Bazuar në këtë marrëveshje palët kanë rënë dakord të kryejnë auditimin për barazinë gjinore për të verifikuar nëse ka politika dhe masa në zbatim për përfshirjen e grave nga zonat rurale në tregun e punës.

Me rastin e nënshkrimit të marrëveshjes, Auditorja e Përgjithshme e Kosovës, Vlora Spanca, ka thënë se Zyra Kombëtare e Auditimit (ZKA) ka marrë me prioritet këtë auditim përmes së cilit se bashku do të përçojmë mesazhet kryesore tek institucionet përgjegjëse dhe palët e tjera të interesit. Znj. Spanca ka thënë se bashkëpunimi trepalësh është i shumëfishtë si dhe ka për synim rritjen e ndikimi të Institucioneve Supreme të Auditimit (ISA) në menaxhimin e mirë të parasë publike.

“Ata që administrojnë paranë publike shpesh fokusohen tek zonat urbane duke favorizuar grupe të ndryshme të interesit dhe harrojnë disa grupe zëri i të cilave nuk dëgjohet. Prandaj ISA-të duhet të jenë zëri i tyre për tu kujdesur se paraja publike po shpërndahet njëjtë si për burra ashtu edhe për gra. Koha po tregon se bashkëpunimi është mënyra e vetme për të siguruar se ndikimi i ISA-ve do të jetë në të mirë të qytetarëve”, është shprehur ajo. Auditorja e Përgjithshme, Vlora Spanca, ka vlerësuar se shkëmbimi i informacioneve midis njëra-tjetrës duke zhvilluar auditime të përbashkëta zgjeron horizontin tonë të njohurive dhe gjithashtu, kjo hap perspektivë të re në menaxhimin e fondeve publike. Auditor i Përgjithshëm i Maqedonisë se Veriut, Maksim Acevski, ka thënë se me këtë aktivitet të përbashkët besojmë se do të arrijmë t’i çojmë gjërat drejt krijimit të një jete të denjë, përmirësimit të kushteve ekonomike dhe përfshirjes së grave nga zonat rurale në tregun e punës. Edhe Sekretarja e Përgjithshme e Kontrollit të Lartë të Shtetit të Shqipërisë, Valbona Gaxha, ka theksuar se rëndësinë e këtij auditimi dhe bashkëpunimit të ndërsjellë për të nxjerrë më të mirën. Ndërsa Ermira Lubani, specialiste e Programit në UN Women, ka deklaruar se ISA-t mund të kontribuojnë në cilësinë gjinore dhe fuqizimin e grave duke kryer auditime të cilat fokusohen tërësisht në çështjet gjinore. Sipas saj, ISA-t kanë një rol udhëheqës për të luajtur, jo vetëm duke i kërkuar qeverive të japin llogari për angazhimet e barazisë gjinore, por edhe në dhënien e një shembulli duke punuar drejt barazisë gjinore në organizatat e tyre dhe duke integruar çështjet gjinore në punën e tyre. Kjo iniciativë është përkrahur nga Un Women në kuadër të kornizës së Programit “Transformative Financing for Gender Equality towards more Transparent, Inclusive and Accountable Governance in Western Balkan” i financuar nga Ambasada e Suedisë në Prishtinë. Në takimin rajonal ndërmjet Institucioneve Shtetërore të Auditimit të Maqedonisë së Veriut, Shqipërisë dhe Kosovës, Auditorja e Përgjithshme, Vlora Spanca, ka qenë e shoqëruar nga Zëvendës Auditori i Përgjithshëm, Bezad Halilaj, Ndihmës Auditorja e Përgjithshme, Myrvete Gashi, drejtoresha e auditimit, Ariana Gjonbalaj si dhe ekipi që do ta kryej auditimin, Ardiana Miftari, Ylfete Osmani dhe Arlinda Mustafa.

Lexo më shumë

02/03/2023

Përfaqësueset e ZKA-së marrin pjesë në Samitin e Burimeve Njerëzore “Power to HR”

Punonjëset e Zyrës Kombëtare të Auditimit (ZKA) përkatësisht të Divizionit të Burimeve Njerëzore, Dafina Strana Ujkani, Ardita Gashi Bllaca dhe Leonora Krasniqi Jashari, kanë ndjekur punimet njëditore të Samitit të Burimeve Njerëzore “Power to HR” që është mbajtur për herë të parë në Kosovë. Në këtë samit janë trajtuar tema të rëndësishme si “Rekrutimi i punonjësve; Paraqitja/reklamimi i kompanisë për të tërhequr punonjës të ri si dhe Strategjitë/politikat e organizatës për të mos ju larguar stafi”. Për rëndësinë dhe rolin e këtyre temave para të pranishmëve kanë prezantuar ekspertë, Anne Morrison nga BBC Academy, Serdzan Arnautovic nga META, si dhe Hava Maloku nga Linkedin. Fokusi i përgjithshëm i diskutimeve të samitit ka qenë tek njeriu, roli dhe rëndësia e tij në zhvillimin e institucioneve, strategjitë për të rekrutuar dhe mbajtur stafin profesional dhe të talentuar si dhe rëndësia e përkrahjes nga punëdhënësi për punonjësit në arritjen e objektivave dhe promovimi për imazh të mirë në publik. Për Zyrën Kombëtare të Auditimit, kjo ngjarje ishte një mundësi e mirë që përveç ofrimit të njohurive dhe përvojave të institucionit tonë, ishte edhe përfitimi i eksperiencave të reja nga perspektivë tjetër që do të ndihmojë, jo vetëm në menaxhim sa më të mirë të këtyre burime, por edhe në qasje më të avansuar të auditimit të kësaj fushe. Prezantimi ka qenë interaktiv si dhe diskutimet janë zhvilluar në kuadër të dy paneleve nga ekspertë të burimeve njerëzore. Pjesëmarrës të këtij samiti kanë qenë kryesisht punonjës të burimeve njerëzore, ndërmarrës, pronarë të bizneseve, etj.

Lexo më shumë

24/02/2023

ZKA-ja dhe KLSH-ja vazhdojnë shkëmbimin e përvojave lidhur me auditimin paralel në fushën e teknologjisë së informacionit

Në vijim të aktiviteteve në kuadër të auditimit paralel të Teknologjisë së Informacionit për sistemet e informacionit të ujësjellësit në Tiranë dhe Prishtinë, me datë 20 dhe 21 shkurt në Prishtinë është mbajtur puntoria e radhës. Ekipet e auditimit nga të dyja institucionet kanë prezantuar rezultatet e fazës së ekzekutimit të auditimit dhe përmbajtjen e draft raporteve individuale të auditimit, lidhur me auditimin paralel që është duke u zhvilluar, si dhe kanë diskutuar për fazat vijuese të këtij procesi të auditimit në mes të KLSH-së dhe ZKA-së. Në kuadër të kësaj vizite është realizuar edhe një vizitë pune në Kompaninë Rajonale të Ujësjellësit Prishtina. Në takim u prezantuan aktivitetet lidhur me furnizimin me ujë të pijshëm përfshirë sfidat dhe vështirësitë si dhe projektet specifike zhvillimore veçanërisht në fushën e teknologjisë së informacionit, etj. Digjitalizimi i proceseve, siguria dhe kontrolli i informacioneve ishte tema kryesore e diskutimit. Po ashtu, auditorët nga të dyja vendet kanë vizituar edhe Impiantin e Trajtimit të Ujit në Shkabaj për t’ua prezantuar për së afërmi funksionimin, sistemet dhe proceset teknologjike të trajtimit të ujit. Punëtoria është përmbyllur me dakordimin për planin e aktiviteteve të ardhshme deri në përmbylljen e auditimit paralel për sistemet e informacionit të ujësjellësve në të dy vendet.

Lexo më shumë

Lajmet