Lajmet

Ushtruesi i detyrës së Kryeprokurorit të Shtetit, z. Besim Kelmendi, ka pritur të martën në një takim pune Drejtorin e Përgjithshëm në detyrë të Zyrës Kombëtare të Auditimit (ZKA) të Republikës së Kosovës,  z. Safet Berisha. Në këtë takim është biseduar për fuqizimin e mëtejmë të bashkëpunimit të shkëlqyeshëm në mes të institucionit të Prokurorit të Shtetit dhe Zyrës Kombëtare të Auditimit të Republikës së Kosovës, me theks të veçantë u bisedua për zbatimin e sundimit të ligjit dhe luftën kundër mashtrimit financiar dhe akteve tjera të paligjshme. Gjatë këtij takimi, palët u dakorduan që të hartohet edhe një draft marrëveshje për  bashkëpunim në mes këtyre dy institucioneve, i cili pritet të nënshkruhet së shpejti e që do të ketë për qëllim të lehtësojë bashkërendimin e aktiviteteve ndër institucionale. Drejtori i Përgjithshëm në detyrë i ZKA,  Safet Berisha, në këtë takim ka qenë i shoqëruar nga z. Besim Tafa, ekspert ligjor nga USAID- Aktiviteti për Integritet të Komunave të Kosovës, që do të ndihmojë në hartimin e kësaj marrëveshje të bashkëpunimit, si dhe Zyrtarja përgjegjëse në Departamentin për Çështje Juridike dhe Kundër Mashtrimeve, Natyra Kasumaj.

Auditorja e Përgjithshme, Vlora Spanca, dhe Zëvendës Auditori i Përgjithshëm, Bezad Halilaj, të enjten kanë pritur në takim Dekanin e Fakultetit Ekonomik të Kolegjit AAB, Medain Hashani. Qëllimi i këtij takimi ishte rritja e bashkëpunimit ndërmjet dy institucioneve në fushën e auditimit, shkëmbimet e ndihmës profesionale e akademike, si dhe mundësitë për promovim dhe vetëdijesim të profesionit të auditimit. Me këtë rast palët janë dakorduar që në ditët në vazhdim kjo iniciativë të materializohet përmes nënshkrimit të një memorandumi të bashkëpunimit. Auditorja e Përgjithshme, Vlora Spanca, e ka vlerësuar të rëndësishëm bashkëpunimin e deritanishëm në mes të ZKA-së dhe institucioneve akademike, publike dhe private, në këtë rast me AAB-në, duke thënë se ky bashkëpunim do të avancohet edhe më tutje dhe do të jetë në të mirë të të dyja institucioneve. Nga ana tjetër Dekani i Fakultetit Ekonomik në Kolegjin AAB, Medain Hashani, ka falënderuar drejtuesit e ZKA-së për iniciativën, duke thënë se mirëpresin bashkëpunimin me Zyrën Kombëtare të Auditimit e cila është një prej institucioneve më të besueshme në vend.

Sot, Auditorja e Përgjithshme e Kosovës, Vlora Spanca, dhe Sekretari i Përgjithshëm i Ministrisë së Financave, Punës dhe Transfereve, Enis Spahiu dhe ushtruesi i detyrës së Drejtorit të Thesarit Nysret Koca, kanë nënshkruar marrëveshjen e bashkëpunimit për transferimin automatik të të dhënave nga Ministria e Financave Punës dhe Transfereve (MFPT) dhe Thesari në Zyrën Kombëtare të Auditimit (ZKA). Qëllimi i kësaj marrëveshje është definimi i hapave dhe përgjegjësive për transferimin automatik të të dhënave nga bazat e të dhënave të Thesarit dhe MFPT-së në bazën e të dhënave të ZKA-së, të cilat janë të nevojshme për auditim. Zyra Kombëtare e Auditimit ka krijuar bazën e të dhënave për importimin/transferimin automatik të shënimeve të librit të përgjithshëm, buxheteve, pasurive dhe shënimeve të pagave për entitetet përkatëse. Në këtë bazë të të dhënave janë krijuar tabelat për të gjitha këto shënime dhe tabelat mbështetëse për të gjitha kodet e bllokut kodues Kjo procedurë e transferimit automatik të të dhënave do të rrisë sigurinë dhe saktësinë e shënimeve dhe transferimin e tyre në mënyrë efektive dhe efikase për qëllime të auditimit. Palët janë zotuar që informacionin në shkëmbim ta shqyrtojnë dhe trajtojnë me kujdes dhe në përputhje me legjislacionin në fuqi për sa i përket konfidencialitetit dhe mbrojtjes së të dhënave. Të gjitha të dhënat dhe informacionet të cilat vihen në dispozicion do të trajtohen vetëm për qëllime të parapara sipas marrëveshjes. Të pranishëm në këtë takim bashkë me Auditoren e Përgjithshme ishin edhe Zëvendës Auditori i Përgjithshëm Bezad Halilaj, Drejtori i Departamentit për Planifikim Strategjik, Raportim dhe Analiza Ramadan Gashi dhe Shqipe Azemi, Specialiste e TI-së. Marrëveshja hyn në fuqi nga sot, 30 dhjetor 2022.  

- A po ndërtohen shtëpitë për të kthyerit me çmime të pranueshme dhe brenda afateve të planifikuara Zyra Kombëtare e Auditimit (ZKA) ka filluar auditimin me temën “Ekonomiciteti dhe efikasiteti në ndërtimin e shtëpive për të kthyerit”, i cili ka për qëllim të vlerësojë nëse Ministria për Komunitete dhe Kthim ka arritur të kontraktojë ndërtimin e shtëpive për të kthyerit me çmim të arsyeshëm, nëse ndërtimi është bërë brenda afateve kohore dhe sipas planit dhe limiteve buxhetore. Subjekt i këtij auditimi është Ministria për Komunitete dhe Kthim (MKK) e cila zhvillon dhe menaxhon programe dhe mekanizma për të ndihmuar integrimin e komuniteteve dhe pjesëtarëve të tyre në kushte të barabarta, që aktualisht banojnë në Kosovë, si dhe për të siguruar kthimin e qëndrueshëm të të shpërngulurve dhe refugjatëve. Gjatë viteve 2019-2022, nga buxheti i Republikës së Kosovës për banim janë shpenzuar afërsisht 20,5 milionë euro, ndërsa vetëm Ministria për Komunitete dhe Kthim ka shpenzuar rreth 7 milionë euro apo 35 % të këtij buxheti. Fushëveprimi i auditimit “Ekonomiciteti dhe efikasiteti në ndërtimin e shtëpive për të kthyerit”, përfshinë periudhën 2019-2022 dhe kontratat e nënshkruara nga MKK gjatë kësaj periudhe, duke përfshirë vlerësimin e nevojave, zhvillimin e procedurave të prokurimit dhe menaxhimin e kontratave. Janë gjithsej tri kontrata  në vlerë mbi 11 milionë euro, dhe për çështje të krahasimit të çmimeve do të trajtohen edhe shtatë kontrata të institucioneve tjera. Krahasime do të ketë edhe me çmimet e përcaktuara nga institucionet e  tjera. Përmes këtij auditimi ZKA-ja synon të ofrojë rekomandime të rëndësishme për përmirësimin e  procesit të kontraktimit të ndërtimit të shtëpive në aspektin ekonomik dhe menaxhimit më të mirë.

Zyra Kombëtare e Auditimit (ZKA) ka publikuar raportin e auditimit “Performanca financiare dhe operative NP Trepça Sh.A” për periudhën 2019-2021. Rezultatet e këtij auditimi tregojnë se  “Trepça” Sh.A nuk ka  arritur të jetë efikase dhe efektive në shfrytëzimin dhe përpunimin e burimeve minerare, me synim të tejkalimit të operimit me humbje mesatare mujore prej 620,307€ dhe arritjes së rentabilitetit. “Trepça” Sh.A nuk ka arritur të krijojë as parakushtet e duhura për operim të cilat do të siguronin shfrytëzim efikas dhe fitimprurës të burimeve minerare. Rezultatet e auditimit kanë nxjerr në pah dobësi dhe mungesë efektiviteti në sistemin e kontrollit të brendshëm që do të mundësonin produktivitet të lartë në nxjerrjen e xehes, përpunimin dhe pasurimin e mëtejshëm të saj. “Analizat e indikatorëve kyç të performancës financiare kanë rezultuar me tregues negativ për gjendjen e rënduar financiare që e ka përcjellë kompaninë ndër vite. Teknologjia dhe infrastruktura e vjetëruar në Trepça Sh.A, si dhe mungesa e investimeve kapitale kanë ndikuar në produktivitet të ulët. Përderisa rrjedhjet (humbje) e mëdha të metaleve në steril gjatë procesit të flotimit të xehes ishin rezultat i teknologjisë së vjetëruar dhe mungesës së investimeve kapitale dhe mos standardizimit të procesit të punës në flotacione”, theksohet në raport. Gjithashtu, “Trepça” Sh.A nuk ka arritur të sigurojë menaxhim optimal të burimeve njerëzore në procesin e prodhimit. Kjo, si rezultat i mungesës së analizës dhe identifikimit të nevojave për angazhim të stafit në prodhim nëpër njësi biznesore, me synim të ngritjes së produktivitetit. Shpallja e konkurseve të paplanifikuara në plan të biznesit, tejkalimi i stafit të punësuar në njësitë biznesore në krahasim me shpalljen e konkursit publik si dhe angazhimi i punëtorëve me punë dhe detyra specifike për pozita të rregullta pa shpallje të konkursit publik, janë vetëm disa nga parregullsitë e shumta të menaxhimit të burimeve njerëzore dhe të cilat kishin rezultuar edhe me shpenzime shtesë gjatë periudhës 2019-2021. Lidhur me këtë auditim, Auditorja e Përgjithshme, Vlora Spanca,  ka deklaruar se “Trepça” Sh.A nuk ka arritur të vendos sisteme dhe kontrolle të brendshme adekuate të cilat do ta mbështesnin arritjen e performancës financiare dhe operative pozitive, me theks në procesin e prodhimit. Në raportin e auditimit janë dhënë 22 rekomandime, 3 për Qeverinë e Kosovës dhe 19 për “Trepça” Sh.A. me qellim të përmirësimit të procesit të prodhimit në përgjithësi dhe forcimin e kontrolleve të brendshme në ndërmarrje. Raportin e plotë të auditimit “Performanca financiare dhe operative NP Trepça Sh.A”e gjeni këtu.

Zyra Kombëtare e Auditimit të Kosovës mbetet e përkushtuar që përmes auditimeve të jap kontributin e saj dhe të jetë e pa kompromis në betejën që paraja publike të shpenzohet me kujdes të shtuar dhe për të mirën e qytetarëve. Kështu ka deklaruar Auditorja e Përgjithshme, Vlora Spanca, në takimin “Bashkëpunimi ndërinstitucional në fushën e Prokurimit Publik në Republikën e Kosovës” të organizuar nga Komisioni Rregullativ i Prokurimit Publik (KRPP) në bashkëpunim me USAID-n përmes projektit “Aktiviteti për Integritet të Komunave të Kosovës”. Znj. Spanca ka vlerësuar se ky takim është një vazhdim i mbarë për të avancuar bashkëpunimin ndër institucional në fushën e prokurimit publik e cila është çështje me interes për të gjitha palët e përfshira dhe për secilin qytetarë të Kosovës. Ajo ka theksuar se implementimi i duhur i sistemit të prokurimit publik është mjaft kompleks dhe ngërthen në vete sfida të ndryshme, prandaj edhe raportet e auditimit të Zyrës Kombëtare të Auditimit tregojnë se një numër i konsiderueshëm i gjetjeve i referohen kësaj fushe, me fokus procesin e tenderimit dhe menaxhimit të kontratave. Auditorja e Përgjithshme, Vlora Spanca, ka folur edhe për nivelin e bashkëpunimit në mes të ZKA-së dhe KRPP-së i cili ka për qëllim që të fuqizojë zbatimin e kornizës ligjore të prokurimit dhe rritjen  e ndikimit  në përmirësimin e menaxhimit të parasë publike. Para të pranishmëve znj. Spanca ka bërë me dije se prioritet i auditimeve të planifikuara 2022/2023 është menaxhimi i kontratave publike, si një prej proceseve më komplekse dhe burim i shpeshtë i parregullsive. Përveç drejtuesve të ZKA-së, pjesëmarrës të kësaj ngjarje kanë qenë edhe përfaqësues të institucioneve të ndryshme, si: KRPP, USAID, OSHP, AQP, Agjencia për Parandalim të Korrupsionit, Zyra e Prokurorit të Shtetit, Autoriteti i Konkurrencës, Inspektorati Policor etj.

Zyra Kombëtare e Auditimit të martën ka mbajtur Konferencën Vjetore me temën “Plani strategjik 2023-2026”. Punimet e konferencës janë zhvilluar në dy panele, ku është prezantuar për diskutim draft Plani strategjik 2023-2026, si dhe është diskutuar për sfidat e mundshme dhe realizimin e planit vjetor të punës 2022 – 2023. Auditorja e Përgjithshme, Vlora Spanca, në fjalën e saj të hapjes së punimeve të konferencës, ka falënderuar të pranishmit për pjesëmarrje dhe kontributin e dhënë për arritjen e sukseseve të vazhdueshme të ZKA-së. Znj. Spanca, ka vlerësuar se Zyra Kombëtare e Auditimit është ndërtuar mbi baza të forta ligjore dhe institucionale, ka staf kompetent dhe të përkushtuar, dhe si anëtare e INTOSAI dhe EUROSAI, po jep kontributin e saj edhe në aktivitete ndërkombëtare dhe në  kuadër të grupeve të ndryshme punuese të këtyre organizatave. Auditorja e Përgjithshme, ka thënë se gjatë kësaj periudhe ka marrë vendime të përgjegjshme të cilat kanë sjellë ndryshime në menaxhim për të vendosur sistem adekuat për adresimin dhe përmbushjen e vizionit strategjik. Kryerja e auditimeve duke respektuar plotësisht standardet ndërkombëtare të auditimit, dhe në interes të qytetarëve dhe Kuvendit të Kosovës, është prioritet i ZKA-së. “Besueshmëria në punën tonë audituese është thelbësore dhe shumë domethënëse, prandaj edhe është vendosur në vizionin tonë strategjik”, është shprehur Spanca. Sidoqoftë, karshi rezultateve te mira dhe sukseseve të treguara, ZKA-ja para vetes ka një numër objektivash të cilat synon t’i përmbush, prandaj edhe nevojiten plane, veprime dhe mbikëqyrje adekuate. Ndërsa Zëvendës Auditori i Përgjithshëm, Bezad Halilaj, ka prezantuar qëllimet kryesore të Planit Strategjik të ZKA-së, përmes së cilit synohet avancimi i pavarësisë institucionale në përputhje me parimet kyçe të INTOSAI-t; ZKA-ja të jetë institucion shembull në sektorin publik duke respektuar parimet dhe vlerat kyçe lidhur me integritetin, llogaridhënien dhe transparencën në proceset tona të brendshme organizative. Gjithashtu,  komunikimi me Kuvendin dhe institucionet e tjera të rivendoset në një rol më proaktiv dhe dinamik, me dialog të sinqertë dhe të vazhdueshëm, në mënyrë që të ndihmojë autoritetet të marrin vendime të qëndrueshme dhe të bazuara ne informata të sakta. Në sesionin e parë, grupi punues/drejtuesit e departamenteve përkatëse kanë shpalosur në detaje objektivat dhe qëllimet e draft Planit strategjik, duke konstatuar se realizimi i tyre do ta ndihmojë ZKA-në të rris edhe më tej kredibilitetin institucional për të kryer misionin e saj në mënyrë të pavarur dhe objektive dhe për të përmbushur pritjet e qytetarëve. Me këtë rast stafi ka dhënë kontributin e tij nëpërmjet pyetjeve dhe komenteve të cilat i kanë shtuar vlerë prezantimit të Planit. Ndërsa në sesionin tjetër, punonjësit e ZKA-së në kuadër të grupeve punuese kanë diskutuar dhe kanë dhënë kontributin e tyre për mënyrën e realizimit të planit të punës dhe sfidat që mund të shfaqen. Mbi këtë bazë janë ngritur çështje me interes/të rëndësishme të cilat do të merren parasysh në planin operativ dhe kohor të punës. Në kuadër të Konferencës është bërë edhe shpërndarja e jubileve për punonjësit e ZKA-së  si dhe falënderimet për ish kolegët që tashmë nuk janë pjesë e Zyrës.

Me ftesën e Auditores së Përgjithshme të Suedisë, Helena Lindberg, Auditorja e Përgjithshme e Kosovës, Vlora Spanca, e shoqëruar nga Zëvendës Auditori i Përgjithshëm, Bezad Halilaj dhe Ndihmës Auditorët e Përgjithshëm, Qerkin Morina, Emine Fazliu, Naser Arllati, Zukë Zuka, Myrvete Gashi; ushtruesi i detyrës së Drejtorit të Përgjithshëm, Safet Berisha; drejtoresha e Departamentit për Komunikim dhe Bashkëpunim Ndërkombëtar, Qëndresa Mulaj, si dhe Fjoralba Kokonozi, udhëheqëse e Njësisë së Përkthimit, kanë zhvilluar vizitë zyrtare në Zyrën Kombëtare të Auditimit të Suedisë, në Stokholm. Kjo vizitë është realizuar në kuadër të projektit “Bashkëpunimi për Zhvillim Institucional me Zyrën Kombëtare të Auditimit të Kosovës 2020-2023”. Gjatë qëndrimit në Stokholm, delegacioni i Zyrës Kombëtare të Auditimit të Kosovës (ZKA) së bashku me homologët e tyre suedez, kanë analizuar dhe diskutuar për të arriturat dhe sfidat me të cilat ZKA-ja ballafaqohet. Në fokus të agjendës së takimeve ishin tema me interes për ZKA-në siç janë: mjetet dhe praktikat më të mira të udhëheqjes; menaxhimi i ndryshimit i bazuar në besim dhe të qenurit organizatë e hapur; planifikimi strategjik; kontrolli i cilësisë dhe sigurimi i cilësisë; procesi i auditimit dhe standardet, si dhe integrimi ndërkombëtar dhe komunikimi. Qëllimi i këtyre diskutimeve ishte identifikimi i nevojave të ZKA-së për mbështetje dhe planifikimi i aktiviteteve për vitin 2023 në kuadër të projektit. Auditorja e Përgjithshme e Kosovës, Vlora Spanca, dhe Auditorja e Përgjithshme e Suedisë, Helena Lindberg, kanë zhvilluar një takim bilateral, me ç’rast, znj.  Spanca, e ka falënderuar znj. Lindberg për përkrahjen e vazhdueshme për ZKA-në duke theksuar se kjo ndihmë është shumë e rëndësishme për zhvillimin profesional dhe ngritjen e kapaciteteve të institucionit. Falë edhe bashkëpunimit dhe përkrahjes nga Zyra Kombëtare e Auditimit të Suedisë, ZKA-ja ka arritur rezultate të kënaqshme në përgjithësi në punën e vet, dhe ato janë janë mëse të dukshme dhe lirisht mund të shprehem e kënaqur me nivelin e arritur, u shpreh Spanca. Nga ana e saj znj. Lindberg ka shprehur angazhimin e saj për të vazhduar mbështetjen për ZKA-në dhe zbatimin e projektit të bashkëpunimit. Në kuadër të kësaj vizite, gjithashtu janë zhvilluar takime në mes të dy menaxhmenteve të institucioneve si dhe një vizitë në Parlamentin e Suedisë përkatësisht në sekretariatin e Komisionit për Financa.  Auditorja e Përgjithshme u prit në takim nga ambasadorja e Kosovës në Suedi Në kuadër të vizitës në Suedi, Auditorja e Përgjithshme, Vlora Spanca, dhe Zëvendës Auditori i Përgjithshëm, Bezad Halilaj janë pritur në takim edhe nga ambasadorja e Republikës së Kosovës në Suedi, Sh. S. Shkendije Geci Sherifi. Me këtë rast znj. Spanca e ka njoftuar Ambasadoren për punën audituese, sfidat dhe rezultatet e auditimit. Diplomatja kosovar ka falënderuar znj. Spanca për vizitën, si dhe ka përgëzuar për punën e Zyrës Kombëtare të Auditimit për një menaxhimin më të mirë  të parasë publike përmes auditimeve, respektivisht zbatimit të rekomandimeve të auditimit.

Zyra Kombëtare e Auditimit (ZKA) ka filluar auditimin e teknologjisë së informacionit me temën “Menaxhimi i Projekteve për Sistemet e Teknologjisë së Informacionit në Agjencinë e Shoqërisë së Informacionit (AShI)” për  periudhën  2019 - 2022. Subjekt i auditimit është Agjencia e Shoqërisë së Informacionit (AShI) që është përgjegjëse për zhvillimin dhe zbatimin e teknologjisë së informacionit dhe të komunikimit (TIK) për institucionet e Republikës së Kosovës, si dhe menaxhon Qendrën e të Dhënave Shtetërore. Qëllimi i këtij auditimi është që të vlerësohet se si Agjencia i ka menaxhuar projektet e sistemeve të TIK-ut si dhe sa ka qenë efektive në vlerësimin e projekteve përfshirë procesin e inicimit, planifikimit, zbatimit dhe monitorimit. AShI-ja ka për qëllim digjitalizimin e shërbimeve të institucioneve dhe lehtësimin e qasjes në këto shërbime përmes platformave elektronike. Prej vitit 2013 deri më tani AShI-ja ka bërë investime të vazhdueshme në TIK duke realizuar dhe menaxhuar rreth 45 kontrata në vlerë mbi 24 milionë euro. Investimet kryesisht janë drejtuar në projekte të ndryshme, si: blerjen dhe mirëmbajtjen e harduerit, ruajtjen dhe procesimin e të dhënave dhe sigurisë kibernetike për Qendrën e të Dhënave Shtetërore. Poashtu, është investuar në ofrimin e shërbimeve të TI-së për institucionet publike, në zhvillimin e sistemeve të softuerit, zhvillimin e sistemit për ndërveprim të sistemeve elektronike të Qeverisë së Kosovës, zhvillimin e e-shërbimeve për qytetarët dhe bizneset, në marrjen e shërbimeve si dhe në trajnime të stafit për ngritje të kapaciteteve profesionale.

Vendet demokratike kanë dëshmuar se buxhetimi i përgjegjshëm gjinor ndikon në rritjen ekonomike, në zhvillim dhe në stabilitet. Kështu ka deklaruar Auditorja e Përgjithshme, Vlora Spanca, në hapjen e seminarit dyditor për përfaqësuesit e Zyrës Kombëtare të Auditimit  dhe Institucionit të Avokatit të Popullit për integrimin gjinor në proceset e auditimit i organizuar nga UN Women. Znj. Spanca, ka thënë se mbajtja e këtij seminari është një iniciativë e mirë për të shtyrë përpara procesin e buxhetimit të përgjegjshëm gjinor e me këtë edhe proceset e auditimit. Prandaj e ka vlerësuar seminarin si një mundësi të mirë për ndarjen e praktikave të vendeve të tjera në zbatimin e angazhimeve për barazi gjinore, si dhe një mundësi që në vitin 2023 të kryhet një auditim paralel së bashku me ISA-t e tjera për barazinë gjinore dhe çështjet gjinore. Auditorja e Përgjithshme, Vlora Spanca, ka rikujtuar se shteti ka marrë angazhime ligjore të rëndësishme dhe detyruese për të luftuar diskriminimin, përfshirë këtu edhe diskriminimin gjinor e që nënkupton shpërndarje të fondeve publike, programeve dhe vendimmarrjes në mënyrë të drejtë për të gjitha gjinitë. “Kosova është në fazën fillestare të hartimit të politikave për buxhetim të përgjegjshëm gjinor. Edhe pse në praktikë Qeveria ka filluar t’i jap vëmendje më të madhe financimit të skemave të ndryshme në përkrahje të grave, përfshirë edhe ato në pozita vendimmarrëse, këto procese kërkojnë politika të qarta dhe sisteme të cilat përkrahin informatat lidhur me këtë.  Me qellim që të vlerësohen nëse po bëhet shpërndarje e drejtë e parasë publike dhe nëse po arrihen qëllimet e përcaktuara, këto procese është e nevojshme t’i nënshtrohen auditimit të jashtëm”, ka deklaruar znj. Spanca. Duke marrë parasysh se barazia gjinore është një prej objektivave të Agjendës së Kombeve të Bashkuara për Zhvillim të Qëndrueshëm 2030, si dhe aktualitetin në Kosovë, në tetor të këtij viti, Auditorja e Përgjithshme ka treguar se ka aprovuar auditimin e  performancës “Efektiviteti i institucioneve në trajtimin e rasteve të dhunës në familje” përmes se cilit do të vlerësohet nëse organet përgjegjëse kanë ndërmarr masat e duhura për trajtimin e rasteve të dhunës në familje, siç janë reagimi, mbrojtja dhe rehabilitimi i viktimave të dhunës.  

Zëvendës Auditori i Përgjithshëm, Bezad Halilaj, të mërkurën  ka marrë pjesë në tryezën me temën “Luftimi i Korrupsionit në Prokurimin Publik”, të organizuar nga Iniciativa për Progres - INPO në kuadër të “Javës Kundër Korrupsionit 2022”. Z. Halilaj së bashku me panelistët e tjerë kanë diskutuar për të arriturat, sfidat dhe dobësitë në prokurimin publik si dhe luftën kundër korrupsionit në prokurim. Diskutimi është fokusuar në temat: Mbikëqyrja dhe shqyrtimi i prokurimit; Sundimi i ligjit dhe llogaridhënia; Efektet e raporteve të auditimit në luftën kundër korrupsionit në prokurimin publik; Bashkëpunimi i sistemit prokurorial me institucionet tjera në luftimin e kriminalitetit në prokurim publik; si dhe Ndryshimet ligjore të propozuara në prokurim:  A e trajtojnë fenomenin e korrupsionit dhe keqpërdorimit të parasë publike. Zëvendës Auditori i Përgjithshëm, Bezad Halilaj, ka folur për efektet e raporteve të auditimit në luftën kundër korrupsionit në prokurimin publik, me ç’rast ka thënë se prokurimi publik është pjesa më e ndjeshme ndaj korrupsionit dhe se në vështrim të përgjithshëm tenderimi shihet si proces ku zyrtarët publik mund të keqpërdorin autoritetin e tyre zyrtar me qëllim të përfitimit të dobisë pasurore. Një këndvështrim të tillë e reflektojnë edhe raportet e auditimit të Zyrës Kombëtare të Auditimit në Kosovë, që tregojnë se një numër i konsiderueshëm i gjetjeve apo shkeljeve të identifikuara gjatë auditimeve i referohen kësaj fushe. Bazuar në rezultatet e auditimit, z. Halilaj ka thënë se duhet të punohet akoma më shumë për sisteme më të avancuar të kontrollit të brendshëm, në mënyrë që hallka e sistemit të menaxhimit të parasë publike të përmirësohet në vazhdimësi. Bartësit e institucioneve duhet të marrim masa që personat që abuzojnë me detyrën zyrtare të vihen para përgjegjësisë, që sistemi i llogaridhënies të funksionojë si një nga masat më efektive në luftimin dhe parandalimin e dukurive negative. “Në kuadër të përgjegjësive kushtetuese dhe ligjore Auditori i Përgjithshëm dhe Zyra Kombëtare e Auditimit, besoj fuqishëm që është duke e kryer misionin e vet që përmes rekomandimeve të auditimit të mundësojë që prokurimi publik të jetë një proces transparent dhe llogaridhënës duke ofruar mallra, shërbime dhe investime sa më ekonomike dhe cilësore”, është shprehur Halilaj. Zëvendës Auditori i Përgjithshëm, Bezad Halilaj, ka treguar se ZKA-ja në sezonin auditues 2021-2022 ka kryer 134 auditime dhe ka dhënë 861 rekomandime në baza vjetore, vetëm në fushën e prokurimit gjatë kësaj periudhe janë dhënë 138 rekomandime. Tutje Zëvendës Auditori i Përgjithshëm, Bezad Halilaj, ka folur për rolin dhe rëndësinë e Njësisë kundër mashtrimit në ZKA-së që merret me identifikimin e mashtrimeve potenciale dhe shkeljeve të tjera në këtë fushë që pastaj i dërgon tek Zyra e Kryeprokurorit të Shtetit, ku vetëm për sezonin e fundit auditues janë raportuar 77 raste të kësaj natyre.

Zyra Kombëtare e Auditimit të Kosovës (ZKA) është anëtarësuar në Grupin Punues të EUROSAI-t për Teknologjinë e Informacionit (ITWG). Grupi Punues i TI-së (ITWG) në EUROSAI përmes shkëmbimit të praktikave më të mira dhe aktiviteteve të përbashkëta inkurajon Institucionet Supreme të Auditimit të vendeve evropiane  në punën e tyre rreth auditimeve të Teknologjisë së Informacionit  si dhe në përdorimin e TI-së në punën e përditshme. Në fokus të aktiviteteve të këtij grupi punues është mbështetja e procesit të auditimit, me prioritet zhvillimin profesional të auditorëve dhe avancimin e praktikave të auditimit të teknologjisë së informacionit në sektorin publik. Duke qenë pjesë e ITWG-së, auditorët e TI-së të Zyrës Kombëtare të Auditimit  do të jenë më afër zhvillimeve në fushën e auditimeve të TI-së dhe do të kenë mundësi më të madhe të bashkëpunojnë me kolegët evropian. Auditorja e Përgjithshme, Vlora Spanca, e ka vlerësuar lartë pjesëmarrjen e auditorëve të TI-së në aktivitetet e këtij grupi punues, duke thënë se  do të shërbejë për zhvillimin e mëtejshëm të kapaciteteve dhe në cilësinë e auditimeve. Zyra Kombëtare e Auditimit të Kosovës në vitin 2018 ka themeluar Departamentin e Auditimit të Teknologjisë së Informacionit krahas auditimit të performancës. Gjatë kësaj periudhe në bashkëpunim me ekspertët ndërkombëtar, ky departament ka arritur një zhvillim të qëndrueshëm në aspektin e kapaciteteve dhe të metodologjisë së auditimit. Gjatë një sezone audituese ZKA-ja kryen 3 deri 4 auditime të TI-së. Deri më tani janë kryer rreth 12 auditime të TI-së, që ndërlidhen me performancën e sistemeve të informacionit. Grupi Punues i EUROSAI-t për Teknologjinë e Informacionit (ITWG) është themeluar në vitin 2002, dhe aktualisht kryesohet nga Zyra Kombëtare e Auditimit të Estonisë.